Read Ngombale Tîtə 2 Bible Online

Tîtə 2 - Ngombale bible

Tîtə 2

¹Ə́ ngwǒ lə́ gho, jyéʼ pye no lə́nə́ʉ yi pə́ jyêʼ pye zěi ńté Yěso Kəlísto.

²Lǎʼ lə́ pətikáŋ ńgó gháp ghʉ́ məno mə́tsəm kuʼú-kuʼú, ə́ ngʉ̌ zə̂u tsəm lə̂ mbə̂u yi pə́ wo ŋə́ məkuʼ máp, ńgó gháp pə́ pye pi gháp kwaŋ no mboŋə́ ghʉ̌, ə́ mbə́ pye pi gháp ghwǒ pə̂i-ntə̂ʉ nzəm Yěso Kəlísto tə́ mʉ̂ŋtə, ə́ mbə́ pye pi gháp ghwǒ nkoŋə nzəm pəcó pye, ə́ mbou mbə́ pye pi gháp pə́ nzəm Sê tə́ kâa.

³Kə́ mbou ndáʼ ndʉŋ-ndʉŋ lə́ pətikáŋ pəngyě ńgó gháp ghwô cǐ shʉʼʉ ghíʼ pye pi gháp ŋəi ghíʼ Sê pə̌ nkǒŋ. Gháp ghwo lə̂ ndə̂ʼ lə̂ ntáŋ məlaa, lə́u meʼ gháp mbəʉ záp lə̂ məluʼ po, ə́ mbə́ pye pi gháp jyêʼ pye lə̂ ngwô cǐ shʉʼʉ.

⁴Gháp ghwo lə̂ njyéʼ pəngyě pi gháp pyér nzôʼ zǒʼ mbə̂u yi gháp lǎghʼ ńkǒŋ no pələ̂u páp gháp pə ghəpə́ záp;

⁵ə́ mbou jyéʼ gháp lə̂ ngʉ̂ məno mi ə́ kuʼú-kuʼú, ə́ mbou njyéʼ gháp ńgó wǒwó nkə́ njí pə́ ndaʼ yé, ə́ njyéʼ gháp ńgó wǒwó pápə́ ndə̂ ye shʉʼʉ, ə́ mbə́ pəngyě shʉʼʉ pi gháp zúʼ ntsʉ pələ̂u páp, ńjí ńgó lei yə́rə́, lə́u pə́ zoutə yé tsâr Sê po.

⁶Jyéʼ ngwəsəu gháp záp lə́wó ńgó gháp kwâŋ no mboŋə́ ghʉ̌.

⁷Ə́ ngʉ yə́rə́ lə̂ zə̂u tsəm. Kwaʼ gho zô, pə́ fəiʼ no shʉʼʉ mbó pye, ə́ njyéʼ pye zə̂u yi Sê pə̌ nkǒŋ, ə́ ngǐ jyéʼ, ə́ njí zə̂u yi o jyêʼ zěi.

⁸Ə́ pə́ ntúŋu ńgó mətsâr mô pə́ mi lə́nə́ʉ, ə́ mbə́ mi mboʼ pə́ zoŋə yé po, ə́ njí ńgó sə̂ʉ kô pəghaŋə mbəu pô, lə́u gháp kə̂ ngwô gháp lə̂ nkʉ́ʉ wághʼə tə́poŋ po.

⁹Lǎʼ mbó məpuʼ ńgó gháp zúʼ ntsʉ pye pi gháp ghwǒ gháp, lə́ maa zə̂u tsəm, ńgó gháp ghwo lə̂ fâʼ mbó páp lə̂ mbə̂u yi ə́ wo poŋə́ gháp. Ńgó koo gháp pʉŋ no ntsʉ páp;

¹⁰ńgó koo gháp shətə có zə̂u záp. Ńgó gháp kə̂ nyárə gháp pə̂ cǐ shʉʼʉ yi gháp ghwǒ nzəm páp ə́ mbǒu mbə́ pye pi mboʼ ŋuu tə̂m nzəm yé ńŋə́ lə́ páp, ńjí ńgó ə́ lei yə́rə́, pye ŋə̂ məkuʼ lə̂ zə̂u yi paghʼə jyêʼ pye zěi ńté Sê yi a ghʉ paghʼə cwôr.

¹¹Ńgó pye Kəlísto pə́tsəm ŋə̂i ghíʼ n ndaʼ lo. Ńté ńgó Sê lə nyárə poŋə-ntə̂ʉ yé yi tə́ ndaghʼə mbó pye-mə́soŋ, ə́ mbou kûʼ lə̂ ngʉ́ ŋuu ntsəm cwôr.

¹²Poŋə-ntə̂ʉ yé zêi pə́ jyêʼ wághʼə lə̂ ndə̂ʼ lə̂ nkə́ ntə̂i tû ŋə́ mbó Sê, lə̂ nyér lə̂ ntsáa məzə̂u nzʉ̂, ə́ ncʉ́ʼ ngwô pə́ məkwaŋtə shʉʼʉ lə̂ ndághʼ cí cər nzʉ̂, ə́ məkwaŋtə mi ə́ pə́ ndʉŋ-ndʉŋ, ə́ mbou ngʉ́ pə́ ŋəi ghíʼ Sê pə̌ nkǒŋ.

¹³Yo mbə̂u yi paghʼə wo lǎghʼ pə́ ńnyáŋ, ə́ lǎghʼ pə́ zʉ́ʼtə́ zə̂u shʉʼʉ yi Sê lə ghʉ̌ ndaʼá mə́u ńgó a ghʉ̌ ŋə́ lə́ pághʼə, mbaa leʼé yi Nzaʼ-nkʉ wághʼə Yěso Kəlísto ghʉ̌ tó cər ləghûʼ ye. Â zʉ́, ə́ mbə́ Sê zághʼə yi njwǐ yi a ghʉ paghʼə cwôr.

¹⁴A lə ŋə̂ tû yé pə́ zʉ́ ńté wághʼə, lə̂ ndághʼ ńtsǔʼ tû zághʼə, lə̂ məfaa wághʼə tsəm, ə́ ngʉ́ paghʼə cʉ̂ʼ pətəlǒʼ, ə́ ncʉ́ʼ pye lâʼ pé, ə́ pye pi mbəʉ zap zaŋə́ lə̂ ngʉ̂ məno shʉʼʉ.

¹⁵Yo mbə̂u yi o lǎghʼ tsár, o lə̌i mə́ ntsár lə̂ ndághʼ ńcóghʼ ntə̂ʉ gháp, kəʉ pə́ lə̂ ndághʼ ńsáʼ, o lâghʼ pə̂ mətəʉ Sê. Koo cǒ ŋuu wâghʼ ghô.