Read Ngombale Tîtə 3 Bible Online

Tîtə 3 - Ngombale bible

Tîtə 3

¹Kʉ́ʉtə́ pye Kəlísto pə́tsəm ńgó gháp ghwo lə̂ nzúʼ ntsʉ pəsǎʼ ngoŋ, mbaa yi pətə̌ʉ-tú-mbi lə̂ ncághʼə́ pye mə́soŋ, ə́ mbǒu kûʼ lə̂ ngʉ̂ zə̂u tsəm yi ə́ pǒŋ.

²Ńgó koo gháp kʉ̂ʉ cǒ ŋuu tə́poŋ, ńgó gháp pə́ ngaŋə mbwórə, ə́ ngǐ khwǒr no ə́ nkwáŋə́ tû záp, ə́ ngʉ̌ tə ŋuu ntsəm jí ńgó gháp pəghaŋə mbwórə.

³Ńté no paghʼə zághʼə lə pə̂ cǒ mpfu, ə́ ngʉ məno pə́ tə́ kwaŋə́ tû zághʼə, ə́ mbə́ ngaŋə-təi-tû mbi Sê, káa pə́ ŋəi ghíʼ ləpə̌ʉ yǎa mə́ ntúŋú. Paghʼə lə pə́ məpuʼ mbó məzə̂u mi mbəʉ zághʼə cʉ́ŋə wághʼə lə̂ ngwô mbaa lə̂ ngʉ̂. Paghʼə lə pə́ ngaŋə cǐ tə́poŋ, ə́ mbə́ ngaŋə fúʼ-lóŋ; paghʼə lə ghʉ ŋuu ntsəm tyê wághʼə, paghʼə pôu mə́ ngwô kəpaa təcər paghʼə.

⁴Lə́, ə́ lə pə́ ghíʼ Sê yi a pə̌ Nzaʼ-nkʉ wághʼə lə nyarə́ poŋə-ntə̂ʉ yé gháp nkoŋə ye ńté pye-mə́soŋ,

⁵ə́ ngʉ̌ paghʼə cwôr, káa cwór ńté pə́ ńgó paghʼə pə̌ ngʉ məno shʉʼʉ, lə́ ə́ ncwór ńté pə̂ tsáa məjʉ̂ŋ yé yi a ghwǒ nzəm paghʼə. A lə ghʉ paghʼə cwôr, ə́ ngʉ́ pə́ jî wághʼə lə̂ ləjǐ yi shwî, ə́ ndeitə́ lə̂ pfû-nci gháp Zəghʼə Ndêi-lěi.

⁶Sê lə lei lə́ Yěso Kəlísto yi a ghʉ paghʼə cwôr, ə́ ngʉ́ Zəghʼə Ndêi-lěi kə̂u lə́ paghʼə ə́ ndóghʼə tə nzéʼ ncwə́rə́.

⁷Sê lə laghʼ poŋə-ntə̂ʉ yé ńgʉ́ paghʼə pə̂ pye ndʉŋ-ndʉŋ mbi zʉ́, lə̂ ndáʼ ngwô ləcwôr tə me yi paghʼə pâp wěi.

⁸Ə no yi n nyǎŋ ndaʼ gho lə̂, ə̂ no lə́nə́ʉ. M mbôu mə́ nkôŋ ńgó o tághʼ nkwəi njyéʼ gháp məno mêi, ńjí ńgó pye pi gháp pə́i no Sê sâa-sǎa mbə́i lə̂ ntə̂ʉ gháp tsəm lə̂ fâʼ faʼ shʉʼʉ. Zə̂ zə̂u yi ə́ pǒŋ mbou mbə́ yi mboʼ ə́ pfûtə ŋuu ntsəm.

⁹Lwóʼtə́ məghəghəʉ mətsâr gháp pə məno mi pə́ jwôghʼ nzóŋə́ ńté pəmə́ngâa-njʉʼ pághʼə; lwóʼtə́ məno mi pə́ zoŋə ə́ mbou nkôu ntsʉ mə́u lə̂ ləpə̌ʉ Sê: káa měi pə́ mpfûtə yé ŋuu lə̂ có zə̂u.

¹⁰Ŋuu lə̌i mə́ mâʼ ngaptə cər cûʼtə pye Kəlísto, o shûŋtə mətuŋú mé lə̂ nduŋ-mbi mpfu, a póu mbyə́ghʼə́, o kə̂ ncí shûŋtə́, a lághʼ ńdə̌r lə̂ mbi, o fû cər wó, ə́ nzûŋ yé.

¹¹Jí ńgó mbə̂u ŋuu zêi gháʼá mə́i a faa mə́ laŋə́-ndə̂u Sê, ə́ ncʉ́ʼ ngaŋə-məfaa; ə́ ncʉ́ʼ mə́ ncôghʼ mbəʉ ye tsâŋ pə́ zʉ́.

¹²N ndə̌i ndêi tə ntə́u Arətemásʉ káa Tishîkə lə́ gho, o sâʼ təʉ ńtó ńcə́r ghâa túsoŋ Nikopolísʉ. Ńté ńgó n njwǒ ńgó n ngwo nyáŋ wó mpfu məghǎa.

¹³Sáʼ mətəʉ lə̂ ntóutə́ Zenásʉ yi a pə̌ nzoŋ-tû pye-mə́soŋ ndə̂ kôr gháp Apolósʉ lə̂ ləŋəi yi gháp wo ngʉ̌ wěi, tóutə́ gháp tə lə́u có zə̂u gháp pûŋ yé gháp laŋə́-ndə̂u po.

¹⁴Ə́ pə́ ntúŋu ńgó pághʼə pye jyêʼ záp lə̂ ncóghʼ ntə̂ʉ, ə́ ngʉ̌ məno shʉʼʉ; ńjí ńgó ə́ lei yə́rə́, gháp kuʼtə lə̂ mpfútə́ pye pi có zə̂u pə́ mbûŋ mbó páp; ə́ ngʉ̌ yə́rə́, ə́ ndaghʼ mbə́ tʉ̌ yi ə́ zə̂m məntǎa shʉʼʉ.

¹⁵Pye Kəlísto pə́tsəm pi paghʼ pə pǎp pə́ yaʼa tsêʼtə ghô. Tsêʼtə́ pye Kəlísto pə́tsəm pi gháp kǒŋ wóghʼə. Ńgó Sê ghwô poŋə-ntə̂ʉ yi tə́ ndaghʼ nzəm pei pə́tsəm.