Read Ngombale Hebələ̂ 10 Bible Online

Hebələ̂ 10 - Ngombale bible

Hebələ̂ 10

¹Ləpə̌ʉ Mə̌usə̂i pə́ pə̂ məfəiʼtə məzə̂u shʉʼʉ mi ə́ ghʉ̌ poŋə́ tó. Kâa lə pə̂ yé kwaʼ məzə̂u mi Sê lə ghʉ̌ ndaʼá mə́u lə̂ ngʉ́ ŋə́ lə́ pye pé. Ləpə̌ʉ zêi pə́ ntúŋu ńgó pə pə̂ maa nguʼ tsəm, ə́ núŋu poʼ Sê tə́ zêʼ cǒ nguʼ, ə́ nkə́ nuŋú pə́ lə̂ mbə̂u yi pə́ cî núŋú. Ə̂ zə̂u yi ə́ ghʉ̌ mboʼ mbə̂u núŋú poʼ zêi kuʼ yé lə̂ ngʉ́ tə pye pi gháp cʉ́ŋə mbâatə Sê lêi pə̂ tə́ lǒʼ po.

²Zêi mbə̂u ləghuʼtə́ Sê lə̌i ndə pə́ yi mboʼ ə́ soghʼ məfaa pye pi gháp ghʉ mbə̂u məno mêi tâʼ mpfu moʼ, mə́i káa gháp lə kə́ mbyér nzûʼ gháp ńgó gháp pəghaŋə məfaa, mə́i gháp lə nyér lə̂ nkə́ núŋú poʼ Sê.

³Pə́ lə̌i ntsúŋú náŋtə́, pə́ jwô ńgó məzə̂u poʼ Sê mi pye lə ŋə̂ měi maa nguʼ tsəm lə ghʉ gháp nyâŋ nkʉ̂ʉtə məfaa gháp.

⁴Ńté ńgó mboʼ məci pələ̂u məfoŋ gháp pə mi məpwôp lə pə̂i nkûʼ yé lə̂ sôghʼ məfaa pye po.

⁵Ə̂ zə̂u yi ə́ lə ghʉ̌, Kəlísto lə pə́ ngwô ntô wó cər ngoŋ, ə́ ndǎʼ lə̂ Sê ngô: «Koo o lə koŋ gho ńgó pə jwí mənye, ə́ ndaghʼ ŋə́ poʼ Sê lə́ gho, káa kə́ kǒŋ gho ńgó pə ŋə́ məzə̂u laghʼ ńnúŋú po lə́ gho, o lə ghʉ n ngwô mbəʉ.

⁶Ə́ ntôu mənye gháp sʉ̂ tə ncʉ́ʼ pfû, pə́ nuŋu mbi gho ńté məfaa, kâa lə poŋə́ yé ghô, ə́ njwí mənye, ə́ ndághʼ ńnúŋú poʼ mbi gho ńté məfaa, kâa kə́ ncí mboŋə́ yé ghô,

⁷Ə́ pə̂ yə́rə́ n ndâʼ ngô: “Mə̂ŋ ngwo Nde, n ntô lə̂ ngʉ́ zə̂u yi o pə̌ nkǒŋ, ə́ laghʼ ḿbə́utə́ lə̂ zə̂u yi pə́ lə ŋwaʼá cər ŋwaʼa Sê ńté ghâa.”»

⁸Tu mbəʉ Kəlísto lə laʼ ńgó Sê kâa lə kôŋ yé ńgó pə jwí mənye, ə́ ndághʼ ńnuŋú poʼ mbi zʉ́, káa kə́ koŋ yé ńgó pə núŋú məzə̂u laghʼ ńnúŋú poʼ mbi zʉ́, káa koŋ yé ńgó pə́ tôu mənye gháp sʉ́ tə ncʉ́ʼ pfû, pə lághʼ ńnúŋú poʼ mbi zʉ́, káa koŋ yé ńgó pə jwí mənye ndághʼ ńnúŋú poʼ mbi zʉ́ ńté məfaa, káa měi lə poŋə́ yé yé. Lə́, zə̂u pei tsəm kə̂ mbə́ pə́ mi ləpə̌ʉ Mə̌usə̂i pə́ ntúŋú ńgó pə ŋə́.

⁹A lə kə́ ncí ndáʼ ngô: «Mə̂ŋ ngwo, n ntô lə̂ ngʉ́ zə̂u yi o pə̌ nkǒŋ.» A lə laʼ yə́rə́, lə̂ ndághʼ ḿbə́ghʼ ndwuŋu kaa, ə́ ntághʼ yi shwî.

¹⁰Yěso Kəlísto lə ghʉ zə̂u yi Sê lə pə́ nkôŋ; a lə ŋə̂ tû yé ə́ ndághʼ ńsóghʼ məfaa wághʼə tâʼ mpfu, ə́ kuʼ yə́rə́, ə́ ngʉ̌ yə́rə́ paghʼə kûʼ lə̂ mbə́ pye Sê.

¹¹Ə́ pə́ cər kaa lwuŋ, nuŋu-poʼ Sê ntsəm pə̂ leʼé tsəm ə́ ndesé ntə́ʉ ə́ ngʉ̂ faʼ yé; ə́ ŋə̂ məzə̂u poʼ Sê, ə́ ŋə́, ə́ mbyə́ghʼə́ ŋə́ ghíʼ a cî ŋə́, ə́ pə̂ poʼ Sê yi mboʼ ə́ lâʼ mbə̂ yé có leʼé, ə́ sóghʼ məfaa lə́ ŋuu po.

¹²Lə́ ə́ ngwǒ lə́ Kəlísto, mə́i a lə nuŋu tâʼ poʼ moʼ ə́ ndághʼ ńsǒghʼ məfaa pye ə́ kuʼ yə́rə́, a pə̂ mpfu wo, nyáŋ lə̂ ndyəghʼə́ pô Tǎa Sê yi təʉ, a láʼ kə́ cí pə̂ pə́ yʉʼ wó.

¹³A pə́ yʉʼ wó, ə́ mə́ nzʉ̂ʼtə ghíʼ Sê wo lǎghʼ pəghaŋə mbəu pé ə́ ghʉ̌ lətǎghʼ məku yé.

¹⁴Ə́ pə̂ yə́rə́, a lə nuŋu tâʼ poʼ moʼ mbi Sê, ə́ ndaghʼ ńgʉ́ pye pi a lə sǒghʼ məfaa gháp kuʼ lə̂ mbə́ pye Sê, ghíʼ gháp láʼ kə́ cí pə̂ pə́ pěi.

¹⁵Ə Zəghʼə Ndêi-lěi pə́ ndaʼ ńgó ə no zêi, ə̂ no lə́nə́ʉ, a lə laʼ ngô:

¹⁶«Ə Nde lâʼ ngô: Yo kaa yi paghʼ pə pǎp ghʉ̌ wǎr ghíʼ mêi məleʼé ghʉ̌ lěi: N ngʉ̌ cóghʼ ləpə̌ʉ zâa cər məntə̂ʉ páp, ə́ pǒu ŋwáʼá zěi cər jîno záp.»

¹⁷Ə́ nkə́ ncí ndâʼ ngô: «N ngʉ̌ kə́ kʉ̂ʉtə ghâa məfaa ghap po, ə́ kə́ kʉ̂ʉtə ghâa məno tə́poŋ máp po.»

¹⁸Lə́, Sê lə̌i ndêi tə ndyə́ghʼə́ məfaa ŋuu, a kə̂ mbóu nuŋu yé có poʼ mbi Sê ńté měi po.

¹⁹Ə́ pə̂ yə́rə́ pəfə̌r, paghʼə tsuŋu mə́ njî ńgó káa có zə̂u pyér mə́ nkə̂ʼtə yé wághʼə lə̂ ndêi ńkə́u lə́ kwaʼ yʉʼ yi Sê pə̌ wó, ə́ ndwúʼú məci Yěso mi a lə lǎghʼ ńnúŋú poʼ Sê ńté tû zághʼə.

²⁰Yěso lə sə̂ tə́koʼ paghʼə ndǐ yi ə́ lə pə́ nkə̂ʼtə wághʼə lə̂ ndêi ńkə́u cər kwaʼ yʉʼ yi Sê pə̌ wó. Ə́ pə̂ yə́rə́, a lêi lə̂ tû-mbəʉ yé yi a pə̌ ntəʉ, ə́ ntsóʼ laŋə́-ndə̂u shwî yi paghʼə wo lěi mə́u ə́ ghwǒ ləcwôr tə me. Tə́koʼ paghʼə ndǐ yi a lə sə̌ lêi, lə laghʼ ḿbə̂ mbəʉ ye yi pə́ lə kʉ̌ʉ lə̂ tʉ̌-mbʉ̂ŋtə.

²¹Paghʼə lêi yə́rə́, ə́ ngwǒ tâʼ nuŋu-poʼ Sê yi njwǐ yi a pápə cûʼtə pye Sê.

²²Ghíʼ ə́ kə́ mbə́ yə́rə́ lə̂, paghʼə lâghʼ ntə̂ʉ lěi ncʉ́ŋə́ mbáatə́ Sê, ə́ mbou ntsúŋú ncóghʼ ntə̂ʉ wághʼə lə́ zʉ́ kwaʼ shʉʼʉ; ńté ńgó Yěso lə laghʼ məci mé ńsǒghʼ məfaa yi a lə pə́ cər məntə̂ʉ pághʼə, ə́ mbǒu ndághʼ nci yi káa ə̂ ghwo yé có lǒʼ ńsóghʼ mbəʉ zaghʼə.

²³Sê lə ghʉ ndaʼá lə̂ məzə̂u mi a ghʉ̌ ŋə́ lə́ paghʼə, a lə̌i ngʉ̂ yé ndaʼá lə̂ no, ə́ mbou ndáʼ ntî tə ghʉ po. Ghíʼ ə́ kə́ mbə́ yə́rə́ lə̂, paghʼə lâʼ zə̂u yi Sê lə ghʉ̌ ndaʼá mə́u lə̂ ngʉ́ ńŋə́ lə́ pághʼə tə́ pôghʼ.

²⁴Paghʼə tóutə́ mbəʉ zághʼə təcər paghʼə; ə̂ leitə́ yə́rə́, paghʼə ghwô mətəʉ lə̂ ndághʼ ńfǎʼ məfaʼ shʉʼʉ, ə́ mbou ngwô nkoŋə təcər paghʼə.

²⁵Koo paghʼə fû cər məcûʼtə pye Kəlísto mághʼə ńkwár ghíʼ pəcó pye ghʉ lə̂. Tə ncʉ́ʼ yə́rə́, paghʼə tsúŋu ntóutə́ mbəʉ zághʼə toutə́ təcər paghʼə, ńté no leʼé yi Nde wo pə̌ʉ tó pə́ mə́ mbáatə́.

²⁶Ŋuu lə̌i ndêi tə mə́ njî no lə́nə́ʉ, ə́ mbou nkə́ mə́ nkʉʼʉ́ ngʉ̂ pə̂ məfaa, mə́i có poʼ Sê yi mboʼ pə́ pou nkə́ ndághʼ ńsǒghʼ lǒʼ lə́ zʉ́, kâa kə́ mbə̂ yé wó.

²⁷Mə́i ngaŋ cʉ́ʼ kə́ pə́ zʉ̂ʼtə pə́ ngwôʼ yi Sê ghʉ̌ ntághʼ tû zʉ́ leʼé yi a wo nzáʼ kôr pye-mə́soŋ. Ə ngwôʼ zei pə̂ ghíʼ Sê ghʉ̌ cághʼə́ yé ńŋə́ cər tə́koʼ mǒghʼ yi a caghʼə pye pi gháp tə̌i tû ńŋə́ lə́ zʉ́ ńcôghʼ cər wó.

²⁸Pei pə̌ tsuŋu njî ńgó ŋuu lə̌i ngwʉ́ ləpə̌ʉ Mə̌usə̂i, tə pye pə́pwô káa pə́tárə́ kwâr ńtə́ʉ ḿbə́i ńgó a yǎa ngwʉ̌, pə́ jwî yé tə́ có tsâa-mə́jʉ̂ŋ.

²⁹Tə ə́ wo tó lə́ ŋuu yi a wǎghʼ Môu Sê, ə́ mbǒu ndaʼ ńgó məci kaa mi a lə lǎghʼ ńsôghʼ yé kâa pə̂ yé có zə̂u, ə́ nzoutə́ Zəghʼə Ndêi-lěi yi ə́ ghʉ məno shʉʼʉ tə́ ndaghʼə lə́ pághʼə; ə́ cʉ́ʼ pə́ gháʼá? Káa pei jwó ńgó yé ngwôʼ ghʉ̌ fú záa lei yi wêi wə̂ ŋuu?

³⁰Paghʼə tsuŋu mə́ njî ńgó Nde Sê lə lâʼ ngô: «Məŋ lə̂ ngwǒ lə̂ mbʉ̂ŋ mbəu no tə́poŋ. N ngʉ̌ fú lə̂ faʼ yi wǒwó, ə́ côghʼ yé zə̂u laa pô zʉ́!» A lə kə́ ncí ndáʼ ngô: «N ngʉ̌ fěʼ pye pâa.»

³¹Ə Sê pə̂ ntəʉ, o lə̌i ngwʉ́ no mbó zʉ́, o jî ńgó o kwʉ̌ tə ndə̂m!

³²Pei kʉ́ʉtə́ məno mi ə́ lə cə́r wéi mpfu yi pei lə zúʼ tsâr Sê. Nkeʼ Sê lə keʼ wéi, məno mbə̂u lə̂ mbə̂u cə̂r wéi, pei ghi pə́ shə̌ghʼ, ə́ mə́ sâʼ təʉ ńdwóʼó.

³³Pei lə pə́ lə̂ có ndyə́ghʼə́ pə́ pə̂ nzôutə́ wéi, ə́ mə́ ŋə̂ wéi ngwôʼ ndəu zǎa; ə́ mbə́ lə̂ có ndyə́ghʼə́ pei pə̂ ntóutə́ pye pi gháp pə́ njwô ngwôʼ.

³⁴Pye lə pə́ ndə̂-tsâŋ ə́ mə́ njwó ngwôʼ, pei pə pǎp naa njwó. Pə́ lə ghou məzə̂u méi ḿpfú, pei lâghʼ lətsei ḿbə́i, ə́ ncwí měi, ńté ńgó pei lə pə́ njî ńgó pei ghwo məzə̂u mi ə́ pǒŋ nděi měi, ə́ mbou mbə́ mi ə́ láʼ cî pə̂ pə́ wó.

³⁵Ghíʼ ə́ kə́ mbə́ yə́rə́ lə̂, pei kə́ mə́ ncôghʼ pə̂ ntə̂ʉ wéi lə̂ Sê, ə́ ngʉ ngwô tə́koʼ ntsoʼó-faʼ.

³⁶Ə́ pə́ ntúŋu ńgó pei ghwô shəghʼ-ntə̂ʉ, ə́ ngʉ̌ zə̂u yi Sê pə̌ nkǒŋ, ə̂ lêitə́ yə́rə́, pei ghʉ́ ngwǒ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ pei.

³⁷Sê yaa ndǎʼ cər ŋwaʼa ye ngô: «Mpfu pə́ mə́ mbáatə́, ə pəi mə́ mbáatə́ gháʼate, ghíʼ ŋuu yi a ghwǒ lə̂ ntó, wo tó, a kə cî yé poŋə́ tó po.

³⁸Ŋuu yi a pə̌ ndʉŋ-ndʉŋ mbi məŋ, ghʉ̌ leitə́ lə̂ pə̂i-ntə̂ʉ yé nzəm Kəlísto, ə́ ghwǒ ləcwôr tə me, lə́ ə́ mbə́ yi a lə̌i cwí pə̂i-ntə̂ʉ yé, ntə̂ʉ ghâa kə̂ ngwô yé lətsei ńté yé po.»

³⁹Káa paghʼə pə̂ wághʼə ghíʼ pye pi gháp pəʉ nzəmə-nzəmə, ə́ nkə̂u cwí. Paghʼə pye pi gháp pə̂i no Sê, ə́ mbou mə́ njî ńgó paghʼə pə̌ ŋəi lə̂ laŋə́-ndə̂u ləcwôr.