Read Ngombale Hebələ̂ 11 Bible Online

Hebələ̂ 11 - Ngombale bible

Hebələ̂ 11

¹Ə ngwô pə̂i-ntə̂ʉ nzəm Sê, ə̂ mbə́i tə́ mʉ̂ŋtə ńgó zə̂u yi pə́ pâp zěi, pə́ láʼ ghwǒ; ə́ pə̂ fú mbə́i ńgó zə̂u yi káa pə́ pə́ njwô, ə́ pə́ wó lə́nə́ʉ.

²Sê lə leitə pə́ lə̂ pə̂i-ntə̂ʉ pəmə́ngâa-njʉʼ paghʼə, ə́ ndaghʼ gháp ńgʉ́ pye pé.

³Ə pə̂i-ntə̂ʉ zághʼə lə́ ghʉ, paghʼə pə̂i ńgó Sê lə laghʼ pə̂ tsâr yé ə́ ntsuŋú ndəu nzʉ̂, ə́ laghʼ ḿbə́ ńgó ə zə̂u yi pə́ pə́ njwó, ə̂ yi Sê lə lǎghʼ zə̂u yi káa pə pə́ njwó yé, ə́ ntsuŋú.

⁴Ə́ lə leitə́ lə̂ pə̂i-ntə̂ʉ Abêl, a nuŋu poʼ mbi Sê ə́ poŋ ndêi yi Kayêŋ. Ə́ lə leitə́ pə́ lə̂ pə̂i-ntə̂ʉ yé zêi, Sê fûŋ ńgó ŋuu ndʉŋ-ndʉŋ. Ńté ńgó tú mbəʉ Sê lə pə̂i məzə̂u poʼ mi a lə ŋə́. Ghíʼ Abêl lə ghwǒ pə̂i-ntə̂ʉ lə̂, a pə̂ leʼé wo ə́ nkə́ mə́ ndâʼ pə̂ no lə́ paghʼə, tə mbaa pə́ ghíʼ a lə kwʉ́ mə́.

⁵Ə́ lə leitə́ lə̂ pə̂i-ntə̂ʉ Enôghʼ, Sê lâghʼ yé ńkóʼ lə̂ tʉ̌-lə́pû pə̂ ntəʉ ntəʉ. Mboʼ pə́ lə kə̂ mbóu njwô yé yé po, ńté ńgó Sê lə laghʼ yé ńdə́r lə̂ mbəʉ zʉ́. Ŋwaʼa Sê pə̌ ndaʼ ńgó Sê lə ghí lǎghʼ Enôghʼ kóʼ lə̌r lə̂ tʉ̌-lə́pû, ə no yé yaa mbǒŋ yé.

⁶Mboʼ ŋuu pôŋ yé Sê tə́ ghó a ghwo pə̂i-ntə̂ʉ po. Ńté ńgó ŋuu yi a cʉ́ŋə mbâatə Sê ghwo lə̂ mbə́i ńgó Sê pə́ wó, ə́ mbou mə́ ntsôʼ faʼ pye pi gháp pə́ ndou yé.

⁷Ə́ lə lei pə́ lə̂ pə̂i-ntə̂ʉ Nówa, Sê zâʼ nzʉ̂ ndǎʼ yé no, ńté məno mi ə́ pə́ ngwo ngʉ̌ wó, lə́ mə́i pə́ kə́ pə́ njî yé. Ə́ pə̂ yə́rə́, a zûʼ no yi Sê lǎʼ lə́ zʉ́ lêi, ə́ mbə́i; ə́ ntsuŋú tə́koʼ kənyúʼ, gháp pə ngər ye ntsəm kə̂u cər wó, ə́ ncwór. A lə ghʉ yə́rə́, ə́ ndaghʼ ńnyárə ńgó pəcó pye lə pə́ pye tə́poŋ mbi Sê; lə́ ngwǒ lə́ zʉ́, ə́ leitə lə̂ pə̂i-ntə̂ʉ yé, Sê fûŋ ńgó ŋuu ndʉŋ-ndʉŋ mbi zʉ́.

⁸Ə́ lə lei lə̂ pə̂i-ntə̂ʉ Ábələhâm, Sê fûŋ yé, a pə̂i; ə́ ngʉ̌ zə̂u yi a lǎʼ ńgó â ghʉ̂: ə́ ndə̌r lə̂ lâʼ yi Sê lə pə́ ngwô ŋə́ lə́ zʉ́, â lághʼ ńgʉ yé. A lə̂r tə́ pə́ njî yʉʼ yi a lər lə̂ wó.

⁹Pə̂i-ntə̂ʉ yé lə ghʉ a lə̂r ngwó nyáŋ cər lâʼ yi gháp Sê lə ghʉ̌ ndaʼá mə́u, ə́ ncʉ́ʼ nyáŋ wó, ə́ mbə́ ngəʉ. Gháp pə Ísaghʼ lə́ Yokôp cʉ̂ʼ mə́ ncî cər məjûŋ. Gháp záp kə̂ mbə́ pye pi Sê lə ghʉ̌ ndaʼá lə̂ ngʉ́ ŋə́ zə̂u lə́ páp.

¹⁰Ábələhâm lə ghí pə́ cî wó yə́rə́, ə́ mə́ nzʉ̂ʼtə túsoŋ yi cû zěi təitə́, ə́ pə̂ túsoŋ yi Sê lə̂ wo ghʉ̌ pəlâŋ wěi pə́ zʉ́, ə́ kə́ pǒu póu pə́ zʉ́.

¹¹Ə́ lə leitə́ lə̂ pə̂i-ntə̂ʉ Sará, Sê ghʉ̂ a kûʼ lə̂ njí môu, tə mbaa pə́ ghíʼ ə́ lə ghí pə́ mə́i a lwuŋ mə́; ńté no a lə cóghʼ cər ntə̂ʉ zʉ́ ńgó mboʼ Sê tî yé tə́ ŋə́ zə̂u yi a lə ghʉ̌ ndaʼá mə́u lə̂ ngʉ́ ŋə́ lə zʉ́ po.

¹²Ə̂ zə̂u yi ə́ lə ghʉ̌, tâʼ mə́ngâa-njʉʼ moʼ, Ábələhâm yi a lə lwǔŋ tə ncʉ́ʼ ntə́ʉ pə́ lə̂ nkwʉ́ pôu nzə́r, tə ngər ye zâa ghíʼ pəcwôʼ-saŋ pi ə́ pə́ ləfaŋ, ə́ mbou mbə́ tə kwǎʼ njí ndwuŋ ghíʼ məmbəm saŋə-sáŋə mi ə́ pə́ nkaŋ nci.

¹³Ábələhâm gháp pə pye pêi pə́tsəm lə ghí kwʉ́tə́, ə́ nkə́ ngwô pə̂ pə̂i-ntə̂ʉ nzəm Sê. Gháp lə ghí kwʉ́tə́ yə́rə́, ə́ mbyér tə́ ghwǒ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ páp, lə́ ə́ ntə́ʉ mə́ njwô zěi ndǐ təsə ə́ mbóu mə́ ntsêi no mə́u gháʼate. Ə́ mbou mə́ ntsúŋú njî ńgó gháp pə́ ndəu ndesé, ə́ mbə́ pə́ pəghəʉ ə́ mbou mbə́ pə́ ləwə̂.

¹⁴Pye pi gháp tsâr yə́rə́ lêi, pə́ nyárə́ ńgó gháp pə́ ndou lâʼ yi gháp wo fú nyáŋ wó, ə̂ pə̂ záp.

¹⁵Mboʼ gháp lə ghíʼi mə́ nkwâŋ lâʼ yi gháp lə fú wó ndə́r, mə́i gháp lə pə̂ʉ gháp lə̂ wó.

¹⁶Kwaʼ lə́nə́ʉ, gháp lə pə́ ntsâa lə̂ ndə́r lə̂ cər lâʼ yi ə́ pǒŋ gháʼate, pə́ laʼ gháʼá tʉ̌-lə́pû. Ə̂ zə̂u yi ə́ ghʉ̌, káa sə̂ʉ pə́ nkô yé Sê lə̂ mbə́i ńgó gháp fúŋ yé ńgó Sê zap; ńté ńgó ə́ lə ghí pə́ mə́i Sê lə tsuŋu mə́ yʉʼ záp tʉ̌-lə́pû.

¹⁷Ə́ lə leitə́ lə̂ pə̂i-ntə̂ʉ Ábələhâm, Sê zʉ̂ʼ yé, ə́ ndáʼ lə́ zʉ́ ńgó â lâghʼ môu yé Ísaghʼ ńnúŋú poʼ mbi zʉ́, a pə̂i. Ə́ mə́ ndôu ndághʼ tâʼ môu ye wêi moʼ ńnúŋú poʼ mbi Sê. Lə́ mə́i Sê lə ghʉ̌ ndaʼá mbó zʉ́,

¹⁸ngô: «Ísaghʼ lə̂ táa ghʉ̌ ngər ye zə́r.»

¹⁹Ábələhâm lə pə́ njî ńgó Sê ghwo mətəʉ lə̂ ndághʼ ńgʉ̌ pəpfû zʉ̂ʉ lə̂ ləwʉ̂, ə̂ zə̂u yi ə́ lə ghʉ̌, Sê pághʼə môu ye ńŋə́ lə́ zʉ́ pə́ ghíʼ ŋuu yi a kwʉ mə́, a pôu ngʉ́ a zʉ̂ʉ lə̂ ləwʉ̂. Ə zə̂u yi Sê lə ghʉ̌ lei, ə́ pə́ ləiʼi laghʼ ńdâʼ có no.

²⁰Ə́ lə leitə́ lə̂ pə̂i-ntə̂ʉ yi Ísaghʼ ghwǒ nzəm Sê, Ísaghʼ côghʼ mbwórə lə́ Yokôp mbaa lə́ Esawî ə́ mə́ ndâʼ gháp məno mi ə́ táa poŋə́ kwatə lə́ páp.

²¹Ə́ lə leitə́ lə̂ pə̂i-ntə̂ʉ yi Yokôp lə ghwǒ nzəm Sê, a zâʼ nzʉ̂ ncóghʼ mbwórə lə̂ ghəpə́ Yosêp mboŋə́ kwʉ́; ə́ ngǐ cóghʼ, ə́ ndǎghʼ kə́shʉŋ ńtóutə́ mbəʉ ye, ə́ ngúʼtə́ Sê.

²²Ə́ lə leitə́ lə̂ pə̂i-ntə̂ʉ Yosêp, a ghi kwʉ́, ə́ ndǎʼ ńgó pye Ísə́lahêl ghʉ̌ fú Egípto kwǎr, ə́ mbou ndâʼ ghíʼ pə́ cʉ́ʼ ghʉ̌ lə̂ məkwěi mé.

²³Ə́ lə leitə́ lə̂ pə̂i-ntə̂ʉ tə́ pə Mə̌usə̂i gháp yi mə́ ye, gháp jî môu wei, ə́ njwó ńgó a poŋ gháʼate, káa kə́ pôghʼ gháp ləpə̌ʉ fou, ə́ ndwǒ môu wei təcər saŋ tárə́.

²⁴Ə́ lə leitə lə̂ pə̂i-ntə̂ʉ Mə̌usə̂i, a ghûʼ tə mbə́ ntikáŋ, ə́ ndəʼ yé məkuʼ mi pə́ ŋə̂ lə́ ŋuu yi mə́ ye pə̌ môu môu-ntôʼ Egípto yi məngyě.

²⁵A lə koŋ ńgó gháp pə pəfə̌r pé, ə́ pye Ísə́lahêl nâa njwó ngwôʼ, páp pi gháp pə́ pye Sê, ə́ ncʉ́ʼ lə́ pə́ yi mboʼ a pə̂ cər lətsei, ə́ fǎa no. Mbə̂u lətsei zêi kâa pə́ cî yé.

²⁶A lə jwó ńgó a lə̌i njwó ngwôʼ ghíʼ Nzaʼ-nkʉ, mə́i a wo zʉ́ pəi ə́ lěi məzə̂u shʉʼʉ mi ə pə́ Egípto, ńté ńgó a lə kə́ ntághʼ nyôghʼ mé pə́ lə̂ məntsoʼó faʼ mi a ghʉ̌ ghwǒ.

²⁷Ə́ lə leitə́ lə̂ pə̂i-ntə̂ʉ Mə̌usə̂i, a fû cər ngoŋ Egípto ndə́r, tə́ póghʼ ńgó mboʼ fou záŋə-lóŋ ńté yé; ə́ ntághʼ nkwəi lə̂ no yi a ghwǒ cər ntə̂ʉ zʉ́ pə́ ghíʼ mpfu yi a pə̌ njwô Sê yi pə́ lə̌i njwô yé yé po.

²⁸Ə́ lə leitə lə̂ pə̂i-ntə̂ʉ yé, a núŋu no lətsei Pásʉ́ka, ə́ ngʉ̌ pye Ísə́lahêl jwítə mənye, ə́ nyə̌ghʼ məci máp lə̂ məntsʉ ndə̂, lə́ pə́ yi cwôʼ yi Sê lə tə́u yé ńgó a jwítə́ pye lə̌i mə́ ndêi, a jwítə yé ghəpə́ lətû záp po.

²⁹Ə́ lə leitə lə̂ pə̂i-ntə̂ʉ pye Ísə́lahêl, gháp tə̂u paŋ-paŋ mə̂i-nci pə́ ghíʼ mpfu yi gháp ŋəi gháp pə́ ndəu ndesé fefe; lə́ pye Egípto tô fəiʼi záp lə̂ ntə́u, nci shwəghʼ gháp pə́tsəm.

³⁰Ə́ lə leitə lə̂ pə̂i-ntə̂ʉ pye Ísə́lahêl, gháp ŋəi ńzə́mə́ tâa-nkâʼ túsoŋ Yeríko təcər leʼé saambwô, a pfûŋ.

³¹Ə́ lə leitə lə̂ pə̂i-ntə̂ʉ Rahâp yi a lə pə́ kwarə məngyě, a pfû mənâŋ mi pye Ísə́lahêl lə tə́u lə̂ mbwórə, ə̂ zə̂u yi ə́ lə ghʉ̌ pye Ísə́lahêl pə̂ njwîtə pəghaŋə mbəu Sê, káa jwî gháp yé.

³²N ngwo kʉ́ʉ wó ə́ nyér wó? M mbûŋ mpfu lə̂ mbworə́ mbyétə́ ńdâʼ wéi pə̂ moʼ moʼ məno mi ə́ náŋtə́ Jedeyôŋ, Barâghʼ, Sámə́soŋ, Jəfətê, Davîd, Samyê, tə mbaa pətsətə́-nkəʉ Sê.

³³Pêi pwo pye lə leitə́ lə̂ pə̂i-ntə̂ʉ záp, pəcó lwóʼó ntso, ə́ nzʉ́ mətə̂u mətə̂u, ə́ ngʉ̌ məno mi ə́ pə́ ndʉŋ-ndʉŋ, ə́ ngwǒ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ páp. Pəcó tsághʼə́ ntsʉ pəsáa-mbaŋə,

³⁴pəcó pə́ghʼ məmǒghʼ tə̌i, pə́ maʼ pəcó lə́ mə́puʼ-ntso ə́ shǔ. Pəcó ghou pətəʉ ghou, ə́ shwítə́ tə mbə̂ʉ mbə́ ghíʼ gháp lə pə́; pəcó pə̂ pəsóghəi pi káa gháp lə pə́ mbôghʼ gháp có zə̂u, ə́ nzǔŋ pi gháp lə tô lə̂ ndwóʼó gháp.

³⁵Ə́ lə leitə́ lə̂ pə̂i-ntə̂ʉ pəcó pəngyě, gháp jwô pye páp pi gháp lə kwʉ́tə́ mə́ zʉ̂ʉ lə̂ ləwʉ̂, ə́ mbə̌ʉ ńtó ńcə́r gháp. Gháp lə zʉ́ʉ yə́rə́, pəcó pye təcər páp pə̂i ńgó pə ŋə́ gháp ngwôʼ lə̂ mbə̂u yi mboʼ gháp kwʉ̂tə. Gháp lə pə̂i lə̂ njwó ngwôʼ yə́rə́, ə́ ndaghʼ ńdôu lə̂ ngʉ́ ngwǒ ləcwôr tə me.

³⁶Ə́ ngwǒ lə́ pəcó, gháp pə̂i ńgó pə zôutə́ gháp, ə́ mbou sə́u gháp, ə́ ngoutə́ pəcó ə́ nkə́r gháp lə́ pəcêŋ ə́ ngwo ncóghʼ ndə̂-tsâŋ.

³⁷Ə́ ndǎghʼ məghǒ ńtə́m pəcó ə́ njwítə́. Ə́ ndǎghʼ shwǒ ńzêʼtə pəcó kəm pwô pwô, ə́ ndǎghʼ mə́puʼ ntso ńjwítə pəcó. Pəcó pə̂ ndəu ndesé ə́ ŋáa ŋə̂i, ə́ ngǐ pə́ ŋəi yə́rə́, ə́ mǎʼ məndǐ mi pə́ lǎghʼ məngəp mbî-nzʉ̂ káa mi mbî-tə̂ʉ ńtə́, káa ghwo gháp có zə̂u, pə́ pə̂ nôʼtə gháp, ə́ mbou mə́ ŋə̂ gháp ngwôʼ.

³⁸Gháp lə pə́ ŋáa mbə̂u pəkoŋə-məkwaʼá, mbaa ndəu məkôr, ə́ ndê cər mənguʼ-ləghǒ mbaa cər məghəm. Pye pêi lə pə́ pye shʉʼʉ tə ə́ pə̂ yi mboʼ gháp cî gháp cər nzʉ̂ yo po.

³⁹Gháp pə́tsəm lə ghwo pə̂i-ntə̂ʉ nzəm Sê, ə́ pə̂ yə́rə́, a fûŋ gháp ńgó pye pé, lə́ káa ghwo gháp zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ páp.

⁴⁰Ńté ńgó Sê lə loʼo zághʼə zə̂u, ə́ pə̂ yi ə́ pǒŋ nděi yi gháp lə pə́ kwâŋ lə̂ ngwô, ə́ pou mbə́ yi mboʼ a lə ŋə̂ yé zěi lə́ páp tə́ paghʼə pə̂ zághʼə yʉʼ wó po.