Read Ngombale Hebələ̂ 12 Bible Online

Hebələ̂ 12 - Ngombale bible

Hebələ̂ 12

¹Ə́ ngwǒ lə́ paghʼə, mə́i paghʼə pə̌ njî nou pye pêi pi gháp lə pə́i no Sê lêi. Ghíʼ ə́ kə́ mbə́ yə́rə́ lə̂, paghʼə mêʼ zə̂u tsəm yi mboʼ ə́ kə̂ʼtə wághʼə lə̂ no pə̂i-ntə̂ʉ, ə́ mêʼ məfaa yi mboʼ ə́ fû məsʉ̂ məsʉ̂ ə́ nkə́ʼtə́ wághʼə, ə́ nkhʉ zághʼə məndʉ mi Sê lə pʉ́ wághʼə lə̂ nkhʉ̂ lo, tə ngwó nkə́u ləlyəghʼtə́.

²Paghʼə ghí pə́ khʉ məndʉ mêi, ə́ nkə́ ntághʼ nyôghʼ mághʼə pə́ lə́ Yěso. Zʉ́ lə́ ghʉ paghʼə ghwô pə̂i-ntə̂ʉ, zʉ́ lə́ kə̂ ngʉ́ tə ə́ pə̂ yi mboʼ pə̂i-ntə̂ʉ zêi cághʼə wághʼə, ə́ ŋə́ cər ləcwôr tə me. A lə pə́i lə̂ nkwʉ́ lə̂ tʉ̌-mbʉ̂ŋtə tə́ kó sə̂ʉ. Ńté ńgó a lə zâʼ nzʉ̂, ə́ njwó lətsei yi a wo leitə́ mə́u ə́ ghwǒ, a pə̂ mpfu wo ə́ nyáŋ lə̂ ndyə́ghʼə́ pô Tǎa Sê yi təʉ.

³Pei kwâŋ Yěso, â ŋuu yi ngaŋə-məfaa lə ghʉ̌ a jwô zêi mbə̂u ngwôʼ, lə́ ə́ nkə́ shə̂ghʼ shəghʼə́. Ə́ pə̂ yə́rə́ ə́ mbə́ ńgó koo pei pə̂i məno fâr wéi, ə́ ngʉ́ mbô méi pwôr.

⁴Pei pə̌ ndwóʼo məfaa, lə́ pei kə́ lwóʼo wéi tə ŋə́ tû zéi.

⁵Koo pei lyə́ghʼə tsâr yi Sê lə lǎghʼ ńcóghʼ mətəʉ méi ghíʼ ŋuu côghʼ mətəʉ ghəpə́ yé lə̂. A lə laʼ ngô: «Môu ghaa, Nde lə̌i sáʼ gho lə̂ no yi o ghʉ̌ zěi, koo o lâghʼ ńgʉ́ məghaa, a póu sə́u gho, koo o záŋə-lóŋ.

⁶Ńté ńgó Nde sâʼ pə́ ŋuu yi a kǒŋ yé, ə́ mbou sə̂u pə́ ŋuu yi zʉ́ Nde pə́i ńgó â môu ye.»

⁷Pei shə̂ghʼ ngwôʼ yi Sê laghʼ ńdôu lə̂ ntághʼ wéi lə̂ laŋə́-ndə̂u yi shʉʼʉ. Sê ghʉ yə́rə́ lə́ pei gháʼá, ńté no pêi ghəpə́ yé. Warə́ môu pə́ wó yi káa tə́ ye pə́ sâʼ yé?

⁸A lə̌i ndə́iʼ sáʼ wéi ghíʼ a sâʼ ghəpə́ yé tsəm po, mə́i ə́ laghʼ ńdâʼ ńgó káa pei pə̂ wéi kwaʼ ghəpə́ yé, ə́ laghʼ ḿbə́ ńgó pei pə̌ pə̂ ghəpə́ məghap.

⁹Pətə́ paghʼə pi cər nzʉ̂ lə pə́ sâʼ wághʼə, paghʼə kə́ mə́ ŋə̂ pə̂ məkuʼ máp. Ə́ laghʼ ḿbə́ ńgó paghʼə ghwo lə̂ ŋə́ məkuʼ Tə́ waghʼə yi a pə̌ tʉ̌-lə́pû tə ndêi yə́rə́, ńjí ńgó a ghʉ paghʼə ghwô ləcwôr tə me.

¹⁰Pətə́ paghʼə lə sâʼ wághʼə lə̂ záp mbə̂u, lə́ ə́ ngʉ yə́rə́ pə́ lə́ mə́ceʼé mpfu. Lə́ ngwǒ lə́ Sê, a sâʼ wághʼə ə́ ndághʼ ńgʉ̌ pə̂ shʉʼʉ lə́ paghʼə, ńgó paghʼə pə́ tə́ lǒʼ ghíʼ zʉ́.

¹¹Ə́ pə̂ mpfu yi pə́ pə́ sâʼ ŋuu, káa no mə́u pôŋ yé yé, ə́ shwor yé shworə́. Lə́ ə́ tâa ngí lyəghʼtə́, pye pi pə́ lə sáʼ gháp lêi cʉ̂ʼ pye ndʉŋ-ndʉŋ, ə́ nyáŋ lə̂ mbwórə, ə́ ndeitə́ lə̂ mbə̂u yi pə́ lə lǎghʼ ńsáʼ gháp, ə́ ntághʼ gháp lə̂ laŋə́-ndə̂u shʉʼʉ.

¹²Ə̂ zə̂u yi ə́ ghʉ̌, ə́ pə̂ ntúŋu ńgó pei shîtə́ mbô méi mi ə́ pə́ nkáa, ə́ mbou shîtə́ məkʉʼtə́ méi mi ə́ pə́ mbwór.

¹³Pei tsúŋú məlaŋə́-ndə̂u méi ə̂ tə́ʉ ndʉŋ-ndʉŋ, pei poŋə́ ŋə̌i mə́u. Ńjí ńgó ŋuu yi a pə̌ ntyeʼé kotə yé ḿpfúŋ po, tə ncʉ́ʼ yə́rə́, a shwîtə shwitə́.

¹⁴Pei sáʼ mətəʉ lə́ pə́ yi mboʼ pei pə pye pə́tsəm nyâŋ lə̂ mbwórə, ə́ mbou ngwô ləcǐ-mbî yi a poŋə́ Sê. Ńté ńgó pei lə̌i ndə́iʼ ghʉ̌ yə́rə́ po, pei lâʼ njwô wéi Nde po.

¹⁵Pei páa lə́ pə́ yi mboʼ cǒ ŋuu lə̂ʼ lə̂ mpfû yé zə̂u shʉʼʉ yi Sê ŋə̂ lə́ pye pé. Pei páa lə́ pə́ yi mboʼ mbi zə̂u tə́poŋ sâʼ təcər pei, ə́ ndǎghʼ məcap mé ńcôŋ cûʼtə zéi.

¹⁶Koo pə́ tô təcər pei, ə́ njwó ŋuu yi a ghʉ məghap, mbaa ŋuu yi a coŋ məzə̂u Sê, ghíʼ Esawî lə ghʉ̌ yə́rə́. A lə pə́ môu-ndə̂ʉ, ə́ ndǎghʼ lətə̌ʉ yé zêi nkə́pə́ kâŋ məzʉ̂ ə́ mbó ncʉʼ-nzəm ye.

¹⁷Pei tsuŋu mə́ njî ńgó a lə nyáŋ tə mə́ ndôu lə̂ mpfú mbwórə mbó tə́ ye, a zûŋ yé. Ə́ ndǔ tə nci nyôghʼ yé shîʼ lə́ pə́ yi mboʼ tə́ ye kə̂p kwaŋtə yé, lə́ a lə̂ʼ yé.

¹⁸Ə́ lə pə́ mpfu yi pei lə cʉ́ŋə́ mbáatə́ Sê, káa cʉ́ŋə wéi gháʼá ə́ ncə́r pə̂ ləkôr yi mboʼ pə́ kəu, káa jwô wéi mǒghʼ yi ə́ pə́ nkʉ́, káa jwó nzə̌m, káa jwó lətwûʼ, káa jwó kəfwor,

¹⁹káa pei lə zûʼ wéi ghíʼ pə́ tôŋ ntaŋ, káa zúʼ nji Sê. Pye Ísə́lahêl pi gháp lə zúʼ zei yo nji, ə́ mbóghʼ tə ndə̂ʼ lə̂ nkə́ mbóu nzúʼ zěi.

²⁰Ńté ńgó káa gháp lə kûʼ gháp lə̂ shə̂ghʼ, ə́ ŋə̌i lə́ yo ləpə̌ʉ yi Sê lə ŋə́ lə́ páp, ə́ ndâʼ ngô: «Ə́ lə̌i mbə́ pə̂ wǒ ŋuu, mbaa pə́ mə́nye, ə́ nkə̌u ləkôr yo, mə́i pə́ wo lǎghʼ məghǒ tə́m yé jwí.»

²¹Ə zə̂u yi pə́ lə pə́ njwó lə fú ngwərə́ pye tə Mə̌usə̂i lâʼ ngô: «M mbǒghʼ tə ngwə̂r!»

²²Lə́, ə́ ngwǒ lə́ pei, mə́i pei lə cʉ́ŋə́ mbáatə́ pə̂ ləkôr Siyôŋ, ə́ Yelúsalêm yi a pə̌ tə tʉ̌-lə́pû, ə́ mbə́ túsoŋ yi Sê yi a pə̌ ntəʉ nyâŋ wó, gháp pə pəcwôʼ pé nyâŋ gháp pə́ cər lətsei, gháp pou mbə́ tə kwǎʼ njí ndwuŋ.

²³Pei lə cʉ́ŋə́ zéi ə́ mbáatə́ pə̂ cûʼtə ghəpə́ lətû Tǎa Sê, pi pə́ lə ŋwaʼa mə́ mənyôghʼ máp ə́ tʉ̌-lə́pû. Pei lə cʉ́ŋə́ mbáatə́ pə̂ Sê yi a zâʼ kôr pye-mə́soŋ pə́tsəm, pei lə cʉ́ŋə́ mbáatə́ pye pi gháp zûʼ ntsʉ Sê, ə́ nyâŋ mbəʉ zʉ́ Sê.

²⁴Pei lə cʉ́ŋə́ mbáatə́ Yěso, a pə̂ ŋuu yi a ŋəi kə̌m lə̂ kaa shwî yi paghʼə pə Sê lə wǎr; pei lə cʉ́ŋə́ mbáatə́ məci mé mi a lə lǎghʼ ńgwár kaa; məci mé mêi lei mi Abêl.

²⁵Ghíʼ ə́ kə́ mbə́ yə́rə́ lə̂, koo pei lə̂ʼ lə̂ nzúʼ ntsʉ ŋuu yi a lâʼ no lə́ pei! Pye pi gháp lə lə̌ʼ lə̂ nzúʼ ntsʉ ŋuu yi a lə laʼ no lə́ páp ndəu ndesé, ə Sê lə tâghʼ ngwôʼ tû páp. Tə ŋuu lə̌i mbóu fú tʉ̌-lə́pû, ə́ ndǎʼ no lə́ paghʼə, paghʼə lə́iʼ zúʼ ntsʉ yé po, paghʼə pôu ngí cwór ngwôʼ ə́ ngʉ̌ gháʼá.

²⁶Ə́ lə pə̂ cǒ mpfu, ə nji ye ghʉ̂ ndesé cʉʼʉ́. Ə́ pou mbə́ mpfu wo, a ghʉ̂ ndaʼá mbó paghʼə ngô: «N ngʉ̌ ghʉ̌ lə́u ndesé ndaʼ lə̂ kə́ ncí ńcʉ́ʼʉ́ yé po, n ngʉ̌ ghʉ̌ mbaa ləfaŋ cʉʼʉ́ yé lə́wó.»

²⁷«N ngʉ̌ kə́ cí» laghʼ ńdâʼ ńgó məzə̂u mə́tsəm mi Sê lə tsuŋú, ə́ pə̂ mi ə́ pə́ ŋarə́, ə́ ghʉ̌ cʉʼʉ́, ə́ kəmə́, ə́ mě; ńjí ńgó yi ə́ wo cʉ́ʼ pə́ wó, ə́ wo láʼ cí pə̂ pə́ wó.

²⁸Ghíʼ ə́ kə́ mbə́ yə́rə́ lə̂, paghʼə ŋə́ nkhwo mbó Sê ghíʼ a lə ŋə̂ zághʼə ləfou, ə́ pə̂ yi tə́ láʼ nkə́mə́. Paghʼə ghí pə́ ŋə̂ nkhwo lə́ zʉ́, ə́ mə́ fâʼ mbó zʉ́ lə̂ mbə̂u yi ə́ wo poŋə́ yé, ə́ mə́ ŋə̂ məkuʼ mé, ə́ mbou mə́ nzûʼ ntsʉ yé.

²⁹Ə́ Sê yi paghʼə ghûʼtə pə́ ghíʼ mǒghʼ yi ə́ pə̂ghʼ yé zə̂u tsəm pəghʼə́.