Read Ngombale Hebələ̂ 13 Bible Online

Hebələ̂ 13 - Ngombale bible

Hebələ̂ 13

¹Pei lâghʼ nkoŋə pəfə̌r nzəm Kəlísto yi pei ghwǒ təcər pei, ə́ ndə́r lə̂ mbi.

²Koo pei lyə́ghʼə ńgó pei ghwo lə̂ mpfú ŋuu ntsəm nzeʼ pei shʉʼʉ. Ńté no pəcó pye lə kə́u ngʉ̌ wó yə́rə́, ə́ mpfú pəcwôʼ Sê nzeʼ páp tə́ pə́ njí.

³Pei kʉ́ʉtə́ pye pi gháp pə́ məndə̂-tsâŋ, ghíʼ mpfu yi pei pə pǎp pə́tsəm nǎa mbə́ wó. Pei kʉ́ʉtə́ pye pi pə́ pə́ ŋə̂ gháp ngwôʼ, ńté ńgó pei kə̌ mbə̂ zéi pə̂ pye pi mboʼ pə́ ŋə̂ gháp záp ngwôʼ lə́wó.

⁴Ə́ poŋ ńgó wǒwó ghʉ̂ məkuʼ lə̂ nzǒʼ yé, koo ŋuu mbiŋə fûtə ngwě ye, koo məngyě kə̂ fútə́ ndə̂u ye lə́wó. Ə Sê ghʉ̌ tâghʼ ngwôʼ tû pye pi gháp pəu nzóʼ, gháp pə pye pi gháp ghʉ məghap.

⁵Koo pei côghʼ ntə̂ʉ wéi lə̂ no nkâp; ə́ poŋ ńgó zə̂u yi pei ghwǒ kûʼ lə́ pei, ńté ńgó Sê lə laʼ ngô: «Mboʼ n ndâʼ nyêr ghâa có leʼé tə́ náŋtə gho po, lə́u nkə́ ntsôʼ ghâa pô zâa lə́ gho po.»

⁶Ə̂ zə̂u yi ə́ ghʉ̌, mboʼ paghʼə pə̂i tə́ mʉ̂ŋtə ngô: «Ə Nde Sê ŋuu yi a pfûtə ghâa, mboʼ n nkə̂ mbôghʼ ghâa có zə̂u po mboʼ pye-mə́soŋ ghʉ hó lə́ məŋ?»

⁷Pei kʉ́ʉtə́ pəghaŋə-faʼ Sê pi gháp lə lǔŋ mbi ə́ njyéʼ wéi no Sê. Pei náŋtə́, ə́ njwó mbə̂u yi gháp lə laghʼ ńnyáŋ, mbaa mbə̂u yi gháp lə lǎghʼ ńkwʉ́tə́, pei fəiʼí mbə̂u yi gháp lə lǎghʼ ńgwô pə̂i-ntə̂ʉ nzəm Sê.

⁸Yěso Kəlísto kâa pə́ nkə̂p yé, a pə̂ leʼé wo, ə́ mbə́ ghíʼ a kə pə́ zou mbə́, ə́ ghʉ̌ pə́ zou, ə́ kə́ pə́ pə́ ghíʼ a pə̌ leʼé wo mbə́, ə́ láʼ kə́ cí pə̂ pə́ yə́rə́.

⁹Koo pei pə̂i məno shwî mi pə́ jyêʼ wéi lə̂ no Sê, ə́ ghʉ pei mêʼ laŋə́-ndə̂u zéi. Ə́ poŋ ńgó ə̂ lêitə́ lə̂ poŋə-ntə̂ʉ tə́ ndaghʼə yi Sê ghwǒ nzəm pei, məntə̂ʉ méi tə̂itə́, koo pei tə̂itə pə́ lə̂ ləpə̌ʉ yi ə́ nâŋtə no məzʉ̂; pye pi gháp təitə lə̂ mbə̂u məno zêi laa kə́ zʉ̂ gháp pəi zěi.

¹⁰Paghʼə ghwo tâʼ lənuŋú poʼ Sê, pənuŋú-poʼ Sê pəyúda kâa ghwô gháp lə̂ mbyé zə̂u yi pə́ núŋú yʉʼ wó, ə́ mpfár.

¹¹Nuŋu-poʼ Sê pəyúda yi njwǐ laghʼ məci pəmə́nye ńkə̂u cər yʉʼ yi Sê pə̌ wó, lə̂ ndághʼ ńsʉ́ʉtə́ Sê ńgó a lyə́ghʼə́ məfaa pye-mə́soŋ; lə́ ncʉ́ʼ ndâghʼ məpfû pəmə́nye pêi, ə́ fû cər lâʼ nkwǎr, ə́ ngwo pə́ pěi ə́ ntǒu.

¹²Ə́ lə pə́ lə́ Yěso, ə́ nkə́ mbə́ pə́ yə́rə́, a ghí lǎghʼ məci mé ńsǒghʼ məfaa pye-mə́soŋ, ə́ fú cər túsoŋ nkwâr, ə́ njwó ngwôʼ tə nkwʉ́ pə́ nzəm pěi.

¹³Paghʼə wó ncə́r yé nzəm pěi, ə́ mbə́i ńjwó ngwôʼ ghíʼ a lə jwô yé lə́wó.

¹⁴Ńté ńgó káa paghʼə ghwô wághʼə có túsoŋ ndəu ndesé yaʼa yi ə́ láʼ cî pə̂ pə́ wó; paghʼə cóghʼ ntə̂ʉ pə́ lə̂ túsoŋ yi paghʼə láʼ cí nyâŋ wó.

¹⁵Paghʼə lêitə́ lə́ Yěso, ə́ nzâp mənci laghʼ ńgúʼtə Sê tə́ kâa, ə́ ndaghʼ ńgʉ̂ mághʼə mənuŋú poʼ mbi Sê, pə́ laʼ gháʼá mətsâr mi ə́ kwatə ntsʉ paghʼə, pə́ lə̂ ndághʼ ńgûʼtə yé mbi pye-mə́soŋ.

¹⁶Koo pei lyə́ghʼə lə̂ ngʉ́ məno shʉʼʉ, ə́ mbou ntóutə́ mbəʉ zéi təcər pei, ńté ńgó ə̂ mbə̂u mənuŋú poʼ mi Sê pə̌ nkǒŋ.

¹⁷Pei zúʼ ntsʉ pətə̌ʉ-tú-mbi péi, ə́ mbou shúʼú mbəʉ zéi mbi páp. Gháp yaa mbə̂ mpfu tsəm, ə́ mə́ ntâghʼ ləjôghʼ lə́ pei, ńté ńgó gháp ghʉ̌ tə́ʉ mbi Sê, ə́ pyétə́ ntsʉ gháp lə̂ mbə̂u yi gháp lə laghʼ ńgwô wéi. Pei ghʉ̂ lə̂ mbə̂u yi mboʼ gháp ghi pə́ faʼ faʼ záp, ntə̂ʉ gháp pə́ mbôŋ, lə́u gháp pou mə́ ntsâtə gháp po. Gháp lə̌i ngí pə́ faʼ faʼ záp mə́ ntsátə́, pei zʉ̂ wéi có pəi po.

¹⁸Pei sʉ́ʉtə́ Sê tû paghʼ. Paghʼ tsuŋu mə́ njî ńgó káa kwaŋtə zághʼ pə́ fêʼ yé wághʼ lə̂ có no. Ńté ńgó paghʼ pə̂ mpfu tsəm, ə́ mə́ sâʼ təʉ lə̂ ngʉ́ ghíʼ ə́ yǎa mə́ ntúŋú.

¹⁹M mə̌ ntsuŋú ndâʼ lə́ pei ńgó pei sʉ́ʉtə́ Sê, ńgó â pə́i, n ntóghʼ mbə̂ʉ ńtó ńcə́r wéi.

²⁰Ə Sê, â ŋuu yi mbwórə zághʼə tsəm fû pə́ mbó zʉ́. A lə ghʉ Nde wághʼə Yěso zʉ̂ʉ lə̂ ləwʉ̂ təcər pəpfû sê. A lə zʉ́ʉ lə̂ ləwʉ̂ yə́rə́, ə́ ncʉ́ʼ mbapə mbî yi njwǐ, ə́ ndeitə́ ghíʼ a lə lǎghʼ məci mé ńgwâr kaa tə́ láʼ mé.

²¹Ńgó Sê zei ghʉ́ pei kûʼtə lə̂ ngʉ́ məno shʉʼʉ mbə̂u lə̂ mbə̂u, ə́ ndaghʼ ńŋə̂i ghíʼ a pə̌ nkǒŋ; ńgó a lêi lə́ Yěso Kəlísto, ə́ ngʉ́ zə̂u yi ə́ pǒŋ yé lə́ paghʼə. Ləghûʼ pə́ mbó Yěso Kəlísto maa mpfu tsəm! Ámeŋ.

²²Pəfə̌r, m mə̌ ndaʼ lə́ pei ńgó pei lâghʼ shəghʼ ntə̂ʉ, ə́ ngʉ̌ zə̂u yi mətsâr mi n ŋə̌ lə́ pei lə̂ ndághʼ ńcóghʼ mətəʉ lo, pə́ ndáʼ ńgó pei ghʉ̂. Lə́ ə́ yaa ngǐ pə́, zə̂u yi n ŋwáʼá ŋə́ lə́ pei kâa sâghʼ yé saghʼə́.

²³M mə̌ ndaʼ wéi ńgó pə́ kə tsôʼ pô lə́ fə̌r wághʼə Timotêi. A lə̌i ntóghʼ ntó ńcə́r ghâa, mə́i paghʼ zʉ́ wo tó jwó wéi.

²⁴Pei tsêʼtə́ pətə̌ʉ-tú-mbi pei pə́tsəm, mbaa pye Sê pə́tsəm. Pəfə̌r pi ə́ pə́ Italî tseʼtə́ wéi.

²⁵Ńgó Sê ghwô poŋə-ntə̂ʉ yi tə́ ndaghʼ nzəm pei pə́tsəm.