Read Ngombale Hebələ̂ 2 Bible Online

Hebələ̂ 2 - Ngombale bible

Hebələ̂ 2

¹Ə̂ zə̂u yi ə́ ghʉ̌, paghʼə ghwô lə̂ ntsúŋú ngwǒ Nkəʉ yi paghʼə kə zúʼ tə ə́ təi, ə́ mbóghʼ lə́ pə́ yi mboʼ paghʼə fâa laŋə́-ndə̂u, ə́ ncwí.

²Ə Nkəʉ yi pəcwôʼ Sê lə lǎghʼ ńtô cǒ mpfu lə ghwo lətəi-ndwuŋ, wǒwó yi a lə zúʼ, ə́ mə́ ntə̂i tû, káa pə́ ŋəi yé mə́u ghíʼ ə́ pə́ ntúŋú, Sê lə ŋə̂ ye ngwôʼ yi kǔʼ lə́ zʉ́.

³Ghíʼ ə́ kə́ mbə́ yə́rə́ lo, paghʼə lə̌i ngwáʼá zêi yo mbə̂u Nkəʉ yi ə́ ŋə̂ ləcwôr lo, paghʼə ghʉ̂ gháʼá tə ndwôghʼ ngwôʼ? Tû-mbəʉ Nde lə pə́ nduŋ-mbi lə̂ ntsə́tə́ Nkəʉ zêi, pye pi gháp lə zúʼ no yi a lə lǎʼ, ə́ mbou mbə́i lə lǎʼ wághʼə ńgó ə́ pə́ lə́nə́ʉ.

⁴Gháp lə ghí pə́ laʼ zêi Nkəʉ Shʉʼʉ, Sê pə̂ ndâghʼ mənkəʼə məno gháp pə pəndǎa-jwô-mə́no mbə̂u lə̂ mbə̂u, ńtóutə́. Ə́ mbou ndeitə́ lə̂ Zəghʼə yé, ə́ ŋə́ mətəʉ mbó pye lə̂ ndághʼ ńfǎʼ faʼ yé ghíʼ a pə̌ nkǒŋ.

⁵Káa Sê lə côghʼ yé ngoŋ yi ə́ táa tó, ə́ yi paghʼə laʼ no mə́u lo, ə́ mbó pəcwôʼ pé ńgó gháp pə́ sáʼ.

⁶Cǒ ŋuu lə yaa ndǎʼ no cər ŋwaʼa Sê ńté no zêi ngô: «Ô Sê, ŋuu-məsoŋ gháʼa mbə́ hó tə o nyâŋ nkwâŋ no tə ncwíʼi lə́ zʉ́? Ŋuu-məsoŋ gháʼa mbə́ hó tə o pə̂ mbápə yé?

⁷O lə shúʼú ŋuu-məsoŋ, tə pəcwôʼ Sê nyêʼ ndêi yé lə́ mə́ceʼé mpfu, ə́ tsə̌ʼ yé ńgó pə ŋə́ məkuʼ mé, ə́ ngúʼtə́ yé

⁸o lə ghʉ gháp lə́ cʉ̂ʼ mə́ sâʼ zə̂u tsəm yi o lə tsuŋú.» Ə́ lə̌i mbə́ yi Sê lə ghʉ pye-mə́soŋ lə́ cʉ̂ʼ mə́ sâʼ zə̂u tsəm, ə́ laghʼ ḿbə́ ńgó kâa có zə̂u pə̂ yé wó yi ŋuu-məsoŋ títə́ pə́ sâʼ zěi. Tə nkə́u mpfu wo, paghʼə kə́ pə́ njwô wághʼə ńgó Sê lə nyêr zə̂u tsəm ńgó pye-mə́soŋ pə́ sáʼ.

⁹Lə́ paghʼə pə̌ njwô mpfu wo ńgó ŋuu yi Sê lə shúʼú tə pəcwôʼ pé nyêʼ ndêi yé lə́ mə́ceʼé mpfu, â Yěso. Ńjí ńgó ə́ leitə́ lə̂ tsâa-mə́jʉ̂ŋ yi Sê ghwǒ ńté pye-mə́soŋ pə́tsəm; a ghʉ̂ Yěso kwʉ̂ lə̂ tû záp. Ə́ pou mbə́ mpfu wo, mə́i Sê tsə̌ʼ yé ńgó pə́ ŋə́ məkuʼ mé, ə́ mbou ngúʼtə́ yé ńté ndwuŋ ngwôʼ yi a lə jwó, ə́ kwʉ́ lə̂ tû pye-mə́soŋ pə́tsəm.

¹⁰Sê lə̂ lə tsúŋú nzʉ̂, ə nzʉ̂ zei pôu mbə́ pə́ mbó zʉ́. Ə́ ngʉ yə́rə́, ə́ ndághʼ ńdou ńgó lələʉ lə̂ ghəpə́ yé kə́u cər ləghûʼ ye. Ghíʼ Yěso lə̂ kə̌ mbə́ ŋuu yi a nyárə laŋə́-ndə̂u yi pə́ lei mə́u Sê ghʉ̂ pə́ cwôr lə̂, ə́ lə pə́ ntúŋu ńgó zʉ́ Sê lêitə́ lə̂ ngwôʼ yi a lə jwó zěi, ə́ ngʉ̌ â kûʼ lə̂ nyáŋ lə̂ ndyəghʼə́ pô yé yi təʉ.

¹¹Yěso lə̂ soghʼ məno tə́poŋ pye-mə́soŋ. Ə́ pə̂ yə́rə́, ə́ mbə́ ńgó ŋuu yi a soghʼ məno tə́poŋ gháp pə pye pi a soghʼ mə́ gháp tə gháp lêi naa ngwǒ tâʼ Tə́. Ə̂ zə̂u yi ə́ ghʉ̌ káa a pə́ kô yé sə̂ʉ lə̂ fúŋ pye-mə́soŋ ńgó pəfə̌r pé.

¹²Zʉ́ Yěso lə lâʼ lə̂ Sê ngô: «N ngʉ̌ lǎʼ pəfə̌r pâa, ə́ ŋuu yi o pə̌ zʉ́. N ngʉ̌ tə́ʉ mbi cûʼtə pye pô, ə́ ghúʼtə́ ghô.»

¹³Ə́ nkə́ ncí ndâʼ ngô: «N ngʉ̌ cóghʼ ntə̂ʉ ghâa lə̂ Sê.» Ə́ nkə́ ncí ndâʼ ngô: «Paghʼ pə ghəpə́ pi o lə ŋə́ lə́ məŋ lə̂ pwo.»

¹⁴Ghíʼ ghəpə́ zêi tsəm nǎa mbə́ pye-mə́soŋ ə́ ngwǒ mbap mbəʉ gháp məci lə̂, tû-mbəʉ Yěso lə shə́rə ncʉ́ʼ ŋuu-məsoŋ tə ngwô mbap mbəʉ gháp məci ghíʼ páp. Lə́ pə́ yi a wo leitə́ lə́ ləwʉ̂ ye, ə́ kǔʼ lə̂ ngôʼ Sə́tə, ə́ zʉ́ Sə́tə yi a ghwǒ mətəʉ lə̂ ndághʼ ńgʉ̌ pə́ kwʉ̂tə,

¹⁵Yěso lə ghʉ yə́rə́, lə̂ ndághʼ ńkwarə́ pye pi póghʼo-lə́wʉ̂ lə ghʉ̌ gháp cʉ̂ʼ məpuʼ ləwʉ̂ tə fú ləlěsê ghap.

¹⁶Kwaʼ lə́nə́ʉ káa a lə yáa ntô yé pə́ lə̂ mpfútə́ pəcwôʼ Sê, a lə tô pə́ lə̂ mpfútə́ ngər-ndə̂ Ábələhâm.

¹⁷Ə̂ zə̂u yi ə́ ghʉ̌, a lə ghwô lə̂ shwí pəfə̌r pé lə́ maa zə̂u tsəm, tə ncʉ́ʼ nuŋu-poʼ Sê yi njwǐ, ə́ mbə́ ngaŋə-tsâa-mə́jʉ̂ŋ, ə́ mbou ntághʼ ku ndəiʼí lə̂ məfaʼ Sê, lə́ pə́ yi a wo ghʉ̌ Sê lyəghʼə́ məno tə́poŋ pye-mə́soŋ.

¹⁸Ə́ pou mbə́ lə̂ mpfu wo, mboʼ a kûʼ lə̂ mpfútə́ pye pi gháp pə́ cər nkwaʼtə, ńté no zʉ́ tû-mbəʉ yé lə lei cər nkwaʼtə gháp ngwôʼ.