Read Ngombale Hebələ̂ 3 Bible Online

Hebələ̂ 3 - Ngombale bible

Hebələ̂ 3

¹Pəfə̌r pâa nzəm Yěso, pêi pye Sê, zʉ́ lə fúŋ wéi lə̂ fâʼ mbó zʉ́. Ghíʼ ə́ kə́ mbə́ yə́rə́ lə̂, pei tsə́ʉ nzəm Yěso, ə́ zʉ́ yi a pə̌ ngaŋə-ntə̂u Sê ə́ mbə́ nuŋu-poʼ yi njwǐ lə̂ no Sê yi paghʼə pə̂i zěi.

²Sê lə yaa ntsóʼ yé ə́ ncóghʼ faʼ zêi mbó zʉ́, a kə̂ mbóu ncóghʼ ntə̂ʉ mə́u ə́ fǎʼ ndʉŋ-ndʉŋ ghíʼ Mə̌usə̂i lə fâʼ yé lə́wó mbó Sê, ə́ mpfu yi a lə faʼ mbó pye lâʼ pé.

³Pə́ ŋə̂ məkuʼ ŋuu yi a kə̌r ndə̂ ə́ nděi tû-mbəʉ ndə̂. Ə́ pə̂ yə́rə́, ə́ mbə́ ńgó Yěso kuʼ lə̂ ngwô ləghûʼ ə́ nděi Mə̌usə̂i.

⁴Məndə̂ mə́tsəm pə̂ pə́ mi ŋuu kə̌r; lə́ Sê lə̂ lə pôu ntsúŋú zə̂u tsəm.

⁵Ə́ ngwǒ lə́ Mə̌usə̂i, mə́i a lə pə́ ngaŋə-faʼ Sê, ə́ fǎʼ mbó pye lâʼ pé, ə Sê tə́u yé a wô ntsətə́ məno mi zʉ́ Sê lə́ lə ghwǒ lə̂ ngwó ntsətə́.

⁶Lə́ Kəlísto, â Môu Sê, a lə zûʼ ntsʉ yé, a côghʼ lâʼ yé mbó zʉ́. Paghʼə cʉ̂ʼ mbə́ pye lâʼ pé ghíʼ paghʼə lə̌i mbə́i mêi məno tə́ mʉ̂ŋtə, ə́ mbou mə́ ndâghʼ lətsei ńzʉ̂ʼtə zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ pagh ghwo lətsei ńté zěi.

⁷Ə̂ zə̂u yi ə́ ghʉ̌, Sê lə lǎghʼ ntsʉ Zəghʼə Ndêi-lěi ndâʼ ngô: «Pei lə̌i nzúʼ no yi məŋ ndaʼ zěi leʼé wo,

⁸koo pei ghúʼu mətuŋú méi ghíʼ pəmə́ngâa-njʉʼ pei lə ghuʼu mətuŋú máp, ə́ mpfu yi gháp lə pə́ ntə̂i tû ə́ ŋə̂ mbó məŋ, ə́ leʼé yi gháp lə kwaʼtə́ ghâa koŋə-məkwaʼá.

⁹Sê lə kə́ ncí ndâʼ ńgó pəmə́ngâa-njʉʼ péi lə kwaʼtə ghâa koŋə-məkwaʼá ə́ ndou lə̂ njwó ghíʼ n ngwo ghʉ̌. Lə́ mə́i gháp jwó mə́ məzə̂u mi n ngʉ mə́ lə́ páp

¹⁰təcər nguʼ mə̂mkwo. Ə̂ zə̂u yi ə́ lə ghʉ̌, n nzáŋə́ lóŋ lə́ páp, ə́ ndǎʼ ngô: “Məkwaŋtə máp kə́ ngʉ gháp faa laŋə́-ndə̂u pə̂ mpfu tsəm. Káa gháp pə́ ŋə̂i gháp lə̂ məlaŋə́-ndə̂u mi n ntsuŋú ńté gháp.”

¹¹Ə̂ zə̂u yi ə́ kə ghʉ̌ n ndâghʼ záŋə́ lóŋ ńdǎʼ tə nkâa ngô: Gháp láʼ kə̂u gháp ə́ yʉʼ yi m mbə̌ wó lə́ pə́ yi mboʼ gháp zətə po!»

¹²Ə́ pə̂ yə́rə́ pəfə̌r, pei páa lə́ pə́ yi mboʼ cǒ wei ghwô ntə̂ʉ tə́poŋ, ə́ ntə̂ʉ yi mboʼ ə́ ghʉ a cwî pə̂i-ntə̂ʉ yé, ə́ fú nzəm Sê yi a pə̌ ntəʉ, ə́ nkhʉ̂.

¹³Tə ncʉ́ʼ yə́rə́, pei pə̂ ntôutə mbəʉ zéi təcər pei maa leʼé ntsəm, ə́ mbóghʼ lə́ pə́ yi mboʼ məfaa cʉ́ŋə cǒ ŋuu wei, a ghʉ̂ zə̂u yi kâa Sê pə́ nkôŋ. Pei ghʉ̂ yə́rə́, ńté ńgó leʼé tsəm pə́ pə́ ghíʼ leʼé wo, ə̂ ghíʼ pə́ lə ŋwaʼá cər ŋwaʼa Sê yə́rə́.

¹⁴Ə́ yaa ngǐ pə́, paghʼə lə̌i mbápə́ no yi pə́ lə jyéʼ wághʼə zěi tə ngwó ndyəghʼtə́ lə̂ mbə̂u yi paghʼə lə lǎghʼ ńjitə́, paghʼə pə̂ ngaŋə-ku Kəlísto.

¹⁵Ə̂ ghíʼ ŋwaʼa Sê pə̌ ndaʼ ngô: «Pei lə̌i nzúʼ no yi Sê laʼ zěi leʼé wo, koo pei ghúʼu mətuŋú méi, ghíʼ pəmə́ngâa-njʉʼ pei lə ghʉ̌ ə́ mpfu yi gháp lə pə́ ntə̂i tû ə́ ŋə̂ mbó Sê.»

¹⁶Pə wǒ lə yǎa nzúʼ no yi Sê lə lǎʼ, ə́ tə̌i tû ə́ ŋə̂ lə́ zʉ́? Ə̂ pye pə́tsəm pi Mə̌usə̂i lə lǎghʼ gháp ńfú ngoŋ Egípto nkwâr.

¹⁷Sê lə záŋə lóŋ təcər nguʼ mə̂mkwo ghíʼi ńtê pə wǒ? A lə záŋə lóŋ ńtê pye pi gháp lə ghʉ̌ məfaa, ə́ nkwʉ́tə́ koŋə-məkwaʼá.

¹⁸Sê lə laʼ tə nkâa ngô: «Gháp láʼ kə̂u gháp cər yʉʼ yi m mbə̌ wó, lə́ pə́ yi mboʼ gháp zətə po», a laʼ gháʼa pə wǒ? A lə laʼ yə́rə́ lə́ pye pi gháp lə tə̌i tû ə́ ŋə́ mbó zʉ́.

¹⁹Paghʼə yaa mə́ njwô ńgó káa gháp lə kûʼ gháp lə̂ nkə́u cər zêi yʉʼ ləzətə́ ńté ńgó gháp lə ləʼ lə̂ mbə́i no Sê.