Read Ngombale Hebələ̂ 4 Bible Online

Hebələ̂ 4 - Ngombale bible

Hebələ̂ 4

¹Sê lə ghʉ̂ ndaʼá mbó paghʼə, ńgó mboʼ paghʼə táa nkə́u cər yʉʼ yi a pə́ wó, lə́ pə́ yi mboʼ paghʼə zə́tə wó. Paghʼə páa lə́ pə́ yi mboʼ cǒ wághʼə títə́ ghwǒ saa yi a lǎghʼ ńkə̂u yé cər wó.

²Ńté ńgó paghʼə zághʼə lə́wó lə nzûʼ tsâr Sê, ə́ ndʉŋ-ndʉŋ ghíʼ pye pi gháp lə pə́ koŋə-məkwaʼá lə kə́ nzûʼ záp. Lə́ gháp lə pə́ tə nzúʼ, lə́ káa zʉ̂ gháp có pəi mə́u, ńté ńgó gháp lə pə̂i gháp ńgó tsâr zei kə́u məntə̂ʉ páp, ə́ ngʉ̌ gháp pə́i no Sê.

³Lə́ ə́ ngwǒ lə́ paghʼə, mə́i paghʼə kə zúʼ ə́ mbə́i, paghʼə táa kə́u cər yʉʼ yi Sê pə̌ wó, lə́ pə́ yi mboʼ paghʼə zə́tə. Sê lə lâʼ no ńté yʉʼ ləzətə́ zêi ngô: «N ndə lâghʼ záŋə́ lóŋ ńdǎʼ tə nkâa ngô: Mboʼ gháp lâʼ nkə̂u gháp cər yʉʼ yi m mbə̌ wó, lə́ pə́ yi mboʼ gháp zə́tə po!» Sê lə ghí laʼ yə́rə́, mə́i a lə myaghʼ faʼ yé tə fú ghíʼ a lə tsuŋú nzʉ̂.

⁴Pə́ kə́ ncí mə́ ndâʼ lə̂ có yʉʼ cər ŋwaʼa Sê, ńté mbâatə leʼé saambwô ngô: «Ə́ lə pə́ lə̂ mbâatə leʼé saambwô, Sê zə̂tə lə̂ məfaʼ mé.»

⁵Pə́ kə́ ncí mə́ ndâʼ lə̂ có yʉʼ cər ŋwaʼa Sê ngô: «Gháp táa kə̂u gháp cər yʉʼ yi m mbə̌ wó lə́ pə́ yi mboʼ gháp zə́tə po.»

⁶Pye pi gháp lə pyə̌ghʼ nzúʼ Nkəʉ Shʉʼʉ kâa lə kə̂u gháp cər yʉʼ yi Sê pə̌ wó lə́ pə́ yi mboʼ gháp zə́tə, ńté ńgó gháp lə zûʼ tsâr zei, ə́ ndəʼ gháp lə̂ ŋə̂i ghíʼ ə́ pə́ ndǎʼ. Lə́, saa kə̂ mbə́ pə́ wó mbó pəcó pye lə̂ ndághʼ ńkə́u cər wó.

⁷Ə̂ zə̂u yi ə́ ghʉ̌, Sê tâghʼ có leʼé pə̂ shwi shwî, ə́ fúŋ leʼé zêi ngô: «Leʼé wo». Ə́ lə lei tə ncí gháʼate, a pôu ndêi lə́ fou Davîd, ə́ ndǎʼ no ńté leʼé lâʼ zêi cər yʉʼ ŋwaʼa yi pə́ təi mə́ fú ngěi ə́ ndâʼ yʉʼ wó ngô: «Pei lə̌i nzúʼ no yi Sê laʼ zěi leʼé wo, koo pei ghúʼu mətuŋú méi.»

⁸Yǒsówa lə yaa ngíʼi ndâghʼ pye Ísə́lahêl ńdə́r tə nkə́u cər lâʼ ləzətə́ zêi, mə́i káa Sê lə kə́ mbóu ndâʼ no ńté leʼé lâʼ ləzətə́ yi ndeʼe.

⁹Ə́ laghʼ ḿbə́ ńgó có leʼé ləzətə́ ghíʼ yi mbâatə leʼé saambwô zêi pə́ wó, ə́ mbə́ yi pye Sê.

¹⁰Ńté no ŋuu yi a kə̂u cər yʉʼ ləzətə́ yi Sê lə̂ lə tsuŋtə́, wo gháʼá nzətə́ wó lə̂ məfaʼ mé, ə́ ndʉŋ-ndʉŋ ghíʼ Sê lə myǎghʼ məfaʼ mé, ə́ nkə́ nzə́tə yé lə́wó.

¹¹Ghíʼ ə́ kə́ mbə́ yə́rə́ lə̂, paghʼə sáʼ təʉ lə̂ nkə̂u zághʼə cər yʉʼ ləzətə́ zêi; paghʼə lû tə lə́u cǒ ŋuu waghʼə fâa yé laŋə́-ndə̂u, ə́ ndə̌ʼ lə̂ nzúʼ ntsʉ Sê ghíʼ pəmə́ngâa-njʉʼ paghʼə lə lə̌ʼ záp po.

¹²Kâa tsâr Sê pə́ nkwʉ̂ yé, ə́ ghwo mətəʉ gháʼate. Ə́ mbou cóghʼ ə́ nděi məpuʼ məngʉ̂ŋ mə́mbwô. Tsâr zei pə́ shíʼ tə nkə̂u təcər ntə̂ʉ ŋuu tə ngwo nkəu mə́jʉ̂ŋtə ye, ə́ mə́ ndə́r tə nkə̂u lə̂ məlʉŋə́ mbəʉ ŋuu, ə́ mə́ nkə̂u lə̂ məfôu mi ə́ pə́ cər məkwěi mbəʉ ŋuu. Ə́ mə́ cʉ́ŋə ŋuu a lâghʼ məkwaŋtə mi ə́ pə́ ntə̂ʉ zʉ́, ə́ njî məno shʉʼʉ mi mboʼ a ghʉ̂.

¹³Mboʼ có zə̂u yi Sê lə tsuŋú lwo yé mənyôghʼ zʉ́ Sê po. A maʼ nyôghʼ mé, ə́ njwó zə̂u tsəm kwaʼ ghíʼ ə́ pə́ yʉʼ wó mbə́, mboʼ có zə̂u cwî yé mənyôghʼ zʉ́ po, ə́ pou mbə́ yi paghʼə pə́tsəm ghʉ̌ tə́ʉ mbi zʉ́ ə́ pyétə́ ntsʉ wághʼə.

¹⁴Paghʼə yaa ngwǒ tə́-ndə̂ pənuŋú-poʼ Sê yi njwǐ, ə́ yi a lə lə̌r tə nkə́u kwaʼ mbi Sê: â Yěso, ə́ mbə́ Môu Sê. Ə́ pə̂ yə́rə́, paghʼə ghwô pə̂i-ntə̂ʉ zághʼə nzəm zʉ́ tə ə̂ tə̂i; ə́ mbou ntə́ʉ mbi lâʼ ḿbə́i.

¹⁵Kwaʼ tə́-ndə̂ pənuŋú-poʼ Sê yi njwǐ yi paghʼə ghwǒ kûʼ lə̂ ntóutə́ wághʼə mpfu yi paghʼə pə̌ mbwór. Pə́ lə yaa nkə́ nkwáʼtə́ yé yé lə̂ məsʉ̂ mə́tsəm pə́ ghíʼ paghʼə, lə́ káa a pfûŋ yé cər məfaa.

¹⁶Ghíʼ ə́ kə́ mbə́ yə́rə́ lə̂, paghʼə cʉ́ŋə́ mbáatə́ lwoŋ-lə́fou Sê tə́ mʉ̂ŋtə, zʉ́ yi a ghwǒ poŋə-ntə̂ʉ tə́ ndaghʼə nzəm pye pə́tsəm; â tsáa məjʉ̂ŋ mághʼə, paghʼə pfú zə̂u tsəm yi a ŋə̂ lə́ paghʼə lə̂ ndághʼ pfútə́ wághʼə mpfu tsəm yi a pə̌ nkǒŋ.