Read Ngombale Hebələ̂ 5 Bible Online

Hebələ̂ 5 - Ngombale bible

Hebələ̂ 5

¹Pə́ wo pə́ təcər pye-mə́soŋ ə́ ntsôʼ nuŋu-poʼ Sê yi njwǐ, lə́ pə́ yi a wo fǎʼ mbó Sê lə̂ nzôŋ tû pye-mə́soŋ lə̂ lənyâŋ ghap pə Sê, ye faʼ pə̂ lə̂ ngwó lənuŋú poʼ, ə́ nuŋú məzə̂u mi pə́ ŋə̂ mbó Sê, mbaa mi pə́ ŋə̂ ńté məfaa.

²Ghíʼ zʉ́ nuŋu-poʼ Sê yi njwǐ kə́ mbwôr yé pwórə́ lə̂ məsʉ̂ mə́tsəm lə̂, a kuʼ lə̂ njí zə̂u yi ə́ lěi, pye poŋə́ ghʉ̌ məfaa mbaa zə̂u yi ə́ lěi pye pou faa laŋə́ tə́ pə́ njí.

³A laghʼ pə́ ghíʼ a kə̌ mbwôr yé lə́wó lêi, ə́ ngwǒ lə̂ nuŋú məzə̂u poʼ Sê ńté ndʉʉ məfaa ye, ə́ nkə́ núŋú mi pye lâʼ lə́wó ńté məfaa gháp.

⁴Káa ŋuu pə́ nyáŋ tə mbə̂i yé nuŋu-poʼ Sê yi njwǐ pə́ zʉ́ ńgó pə ŋə́ məkuʼ mé. Sê lə̂ tsôʼ ŋuu ə́ ndághʼ ńgʉ wěi, ə́ ndʉŋ-ndʉŋ ghíʼ a lə tsóʼ Áloŋ.

⁵Ə́ lə kə́ mbə́ pə́ yə́rə́ lə́ Kəlísto, káa a lə tsóʼ yé mbəʉ ye pə́ zʉ́ lə̂ ngwô ləghûʼ yi nuŋu-poʼ Sê yi njwǐ ghwǒ wěi. A lə ghí cʉ́ʼ wěi, Sê lâʼ lə́ zʉ́ ngô: «Lə̂ fú leʼé wo, ô Môu ghaa, m mbə̂ Tə́ gho.»

⁶Sê kə̌ ncí ndáʼ lə̂ có yʉʼ ŋwaʼa ngô: «Ô nuŋu-poʼ Sê yi a láʼ cí pə̂ pə́ wó, lə̂ mbə̂u yi Meləkísedêghʼ lə pə̂ yé.»

⁷Ə́ lə pə́ ghíʼ Yěso lə pyér ndəu ndesé, ə́ mə́ ngêʼtə lə̂ təʉ, ə́ mbûʼ mbô ə́ sʉ̂ʉtə Sê yi a kǔʼ lə̂ ngʉ́ mpfú yé mbó ləwʉ̂. Ə́ pə̂ yə́rə́, Sê zûʼ sʉ̂ʉtə Yěso ńté ghíʼ a lə pə́ nzûʼ ntsʉ Sê.

⁸Tə mbaa pə́ ghíʼ a lə pə́ Môu Sê, a lə leitə́ lə̂ ngwôʼ tsəm yi a lə jwó zěi, jyéʼ lə̂ nzúʼ ntsʉ Sê.

⁹Sê tâghʼ yé lə̂ lətə̌ʉ yi jwǐ, a cʉ̂ʼ mbə́ mbó pye pi gháp zûʼ ntsʉ yé, ə́ mbə́ ŋuu yi a ŋə́ ləcwôr tə me.

¹⁰Sê lə yaa ndaghʼ yé ńgʉ́ nuŋu-poʼ Sê yi njwǐ lə̂ mbə̂u yi Meləkísedêghʼ lə lǎghʼ ḿbə̂ yé.

¹¹Məno mi mboʼ paghʼ lâʼ ńté no zêi yo záa gháʼate, lə́ ə́ təi lə̂ nkéʼtə́ tə pei zûʼ, ńté ńgó pə́ pə́ ndaʼ wéi no, káa pei pə́ fátə́ nzûʼ wéi.

¹²Pei təi ghǐ tə́ʉ mpfu wo, ə́ cʉ́ʼ pə́ jyêʼ zéi pəcó pye zə̂u lə́wó, ńté ńgó ndǐ saghʼ mə́ ghíʼ pə́ pə́ njyêʼ wéi tsâr Sê, lə́ pei kə́ jyêʼ wéi tə tsúŋú nzúʼ, ə́ pə́ ntúŋu ńgó pə tó nkə́ ncí njyéʼ wéi məno lə̂ tsâr Sê zêi. Pei kə́ pə́ njî wéi nzʉ́ məzʉ̂ mi ə́ pə́ ntəitə́ ghíʼ pətikáŋ, ə́ pə́ ntúŋu ńgó pə kə́ mə́ ŋə̂ pə́ mə́lə̂ghʼ lə́ pei.

¹³Ŋuu yi a pyěr mə́ nô pə́ mə́lə̂ghʼ pə̌ pə́ ghíʼ môu-mbaŋə́. Káa a kûʼ yé lə̂ njí no yi ə́ pə́ ndʉŋ-ndʉŋ.

¹⁴Ə́ ngwǒ lə́ pətikáŋ, mə́i gháp pə́ nzʉ̂ məzʉ̂ mi ə́ pə́ ntəitə́, ə́ páp pi gháp fú mə́ lə̂ ndwuŋ məno mi gháp lə jwó mə́, ə́ njí zə̂u yi ə́ pǒŋ mbaa yi kâa pôŋ yé.