Read Ngombale Hebələ̂ 6 Bible Online

Hebələ̂ 6 - Ngombale bible

Hebələ̂ 6

¹Ə̂ zə̂u yi ə́ ghʉ̌, koo paghʼə kə̂ ntə́ʉ pə́ lə̂ məno mi pə́ lə tsə̌mbi njyéʼ wághʼə lə̂ no Kəlísto, paghʼə náŋtə́ pə̂ məno mi pə́ jyêʼ pye pi gháp cəghʼtə́ mə́. Koo paghʼə kə̂ mbə̂ʉ lə̂ məno mi pə́ lə tsə̌mbi njyéʼ wághʼə lêi, koo paghʼə kə̂ njyéʼ pye pə̂ shwi shwî ńgó gháp kə́p cǐ záp, ə́ nyér məno tə́poŋ mi ə́ cʉ́ŋə gháp ə́ ŋə̂ lə̂ ləwʉ̂, ńgó gháp cóghʼ ntə̂ʉ gháp lə̂ Sê,

²mbaa mi ə́ náŋtə́ no ŋə́ lə̂ pfû-nci, mbaa ghíʼ ńzápə́ mbô tû pye, mbaa ghíʼ no yi ə́ náŋtə́ ləzʉ̌ʉ lə̂ ləwʉ̂, gháp pə ghíʼ Sê ghʉ̌ záʼ kôr gháp pə pye-mə́soŋ.

³Paghʼə nyér məno mêi mə́tsəm nzəm, ə́ ndə̂r lə̂ mbi! Ə̂ zə̂u yi paghʼə ghwǒ lə̂ ngʉ́ ghíʼ Sê lə̌i mbə́i.

⁴Koo paghʼə kə̂ mbə̂ʉ lə̂ məno mêi ńté ńgó pye lə̌i mêʼ laŋə́-ndə̂u Sê, pə́ kə̂ mbóu nkûʼ yé lə̂ mbághʼə́ gháp tə gháp kə̂p cǐ záp ə́ ncʉ́ʼ pye pi shwî po, pye pêi lə jwô nkeʼ Sê. Gháp lə ghwo záp zə̂u lə̂ məzə̂u mi Sê ŋə̂ lə́ pye, Zəghʼə Ndêi-lěi kə̂u lə́ páp lə́wó.

⁵Gháp lə zûʼ tsâr Sê, ə́ mbǒu ntsúŋu njí ńgó ə́ poŋ; gháp lə tsuŋu njí ńgó ngoŋ yi ə́ pə́ ntó ghwo mətəʉ gháʼate.

⁶Ə́ mbə́ tə nzʉ́ʼ məzə̂u mei mə́tsəm, lə́ ə́ nkə́ mbə̂ʉ nkə́u pə́ lə̂ məlwuŋə məno mi gháp lə ghʉ měi. Mboʼ pə́ kə̂ mbóu ngʉ yé tə mbə̂u pye zêi kə̂ ncí nkə́p cǐ záp po. Gháp ghʉ yə́rə́ gháʼá, ə́ ndaghʼ mbyə́ghʼə́ ńkʉ̂ʉ Môu ŋuu lə̂ tʉ̌-mbʉ̂ŋtə, ə́ mbou ndághʼ ńŋə̂ gháʼá saa lə́ pəcó pye lə̂ nzôutə́ yé.

⁷Pǎp ndesé lə̌i nyóŋ mbʉŋ yi lô mə́u mpfu tsəm, ə́ mbǒu nzə́m məntǎa mi ə́ wo pfútə́ pye pi pə́ jʉ̂ʼ zěi ńtê gháp, mə́i Sê wo cóghʼ mbwórə lə́ zei yʉʼ ndesé.

⁸Lə́ zêi pǎp ndesé póu nzə́m pə́ pəmə́kǎp-kǎp gháp pə shǒŋ-məncǐ, mə́i kâa pə́ ngwô yé mpfûtə ŋuu lə̂ có zə̂u; ə Sê cóghʼ ndou tû zêi pǎp ndesé, ə̂ póu ngǐ lyəghʼtə́, pə lâr mǒghʼ mə́u.

⁹Ə́ ngwó lə́ pei pəsə̌u pâa pi lətəi-ndwuŋ, paghʼ pə̌ tə mə́ ndâʼ yə́rə́, lə́ mə́ njî ńgó pei pə́ lə̂ laŋə́-ndə̂u yi ə́ tə́ʉ ndʉŋ-ndʉŋ, ə́ mbə́ yi pə́ lei mə́u ə́ ngwo ləcwôr.

¹⁰Sê kâa pə́ ngʉ̂ yé no yi ə́ ghʉ́ŋə́. Mboʼ a lyəghʼə yé məfaʼ shʉʼʉ méi po, káa kə́ pə́ lyəghʼə yé nkoŋə yi pei laghʼ məfaʼ méi ńnyárə́, mbaa mi pei lə lǎghʼ ḿpfútə́ pəfə̌r nzəm Kəlísto, pei pə̂ mpfu wo, ə́ nkə́ mə́ ndaghʼ ńdə̌r pə́ lə̂ mbi.

¹¹Paghʼ pə̌ ntsâa pə́ ńgó wǒwó təcər pei kə́ mə́ sáʼ təʉ ə́ ngʉ̂ pə́ ghíʼ a yaa ncí ngʉ́ tə ngwó ńkə́u ləlyəghʼtə́, ńjí ńgó lei yə́rə́, pei ghwô zə̂u yi pei cî mbâp zěi mbó Sê.

¹²Ə́ pə̂ yə́rə́, koo pei cʉ̂ʼ pəlǒŋ, pei pyé fəiʼ lə́ pye pi gháp lə pə̂i no Sê tə́ kâa, Sê ŋə̂ zə̂u yi a lə ghʉ̌ ndaʼá mə́u lə̂ ngʉ́ ŋə́ lə́ páp.

¹³Sê lə ghʉ ndaʼá lə̂ ngʉ́ ŋə́ zə̂u mbó Ábələhâm, ə́ ndǎghʼ tû-mbəʉ yé ńkâa, ńté ńgó kâa cǒ ŋuu ndeʼe lə póu mbə̂ yé wó tə ndêi zʉ́ Sê, tə ə́ pə̂ yi mboʼ a lâghʼ yé ńkâa.

¹⁴A lə kaa ngô: «Kwaʼ lə́nə́ʉ, n ngwo cóghʼ mbwórə lə́ gho tə ə̂ záa, ə́ pǒu ghʉ̌ ngər zô zə́r gháʼate.»

¹⁵A lə laʼ yə́rə́ lə́ Ábələhâm, a zûʼ, ə́ shə̂ghʼ ńzʉ́ʼtə́, Sê ghʉ̂ nkə́ ŋə́ zə̂u yi a lə ghʉ̌ ndaʼá mə́u lêi lə́ zʉ́.

¹⁶Pye-mə́soŋ cʉ́ʼ lə̂ nkâa no, ə́ ndǎghʼ ləjôghʼ ŋuu yi a ghǔʼ nděi gháp ńkâa; ə́ laghʼ ńnyárə ńgó pə́ lěi ndêi tə ndâʼ no tə nkâa pə́ kə̂ mbə̂ʉ yé mə́u po.

¹⁷Ə̂ zə̂u yi ə́ ghʉ̌, Sê lə ghʉ̂ ndaʼá mbó pye-mə́soŋ tə nkâa gháʼá, lə̂ ndághʼ ńnyarə́ pye pi a lə ghʉ̌ ndaʼá lə̂ zə̂u lə̂ ngʉ́ ŋə́ lə́ páp, ńgó mboʼ a ghʉ̂ yé ndaʼá lə̂ ŋə́ zə̂u lə́ páp, ə́ mbóu nyér tə́ ŋə̂ po.

¹⁸Ə́ pə̂ yə́rə́, ə́ mbə́ ńgó ə ngʉ̂ ndaʼá lə̂ no gháp nkâa no, ə̂ məno mə́mbwô mi mboʼ Sê lâʼ yé, ə́ mbóu nkə́p po; ńté no mboʼ Sê ntâŋ yé məlaa po. Ə́ pə̂ yə́rə́, ə́ mbə́ ńgó paghʼə pi paghʼə lə jwó ləzətə́ zághʼə mbəʉ Sê, a sâa-sǎa mə́ ŋə̂ wághʼə mətəʉ lə̂ ndághʼ ńdə̌r tə ndáʼ ngwô zə̂u yi a lə ghʉ̌ ndaʼá mə́u lə̂ ngʉ́ ŋə́ lə́ paghʼə.

¹⁹Paghʼə ghwo cər ntə̂ʉ paghʼə ńgó zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə, paghʼə ghʉ̌ ghwǒ zěi, ə̂ zěi yi ə́ ghʉ paghʼə tə̂ʉ mbi zʉ́ tə́ pôghʼ. Paghʼə tsúŋu mə́ njî ńgó paghʼə ŋéʼe mə́ paghʼə ndǐ yi ə́ záʼa yʉʼ Ndêi-lěi, ə́ kə́u yʉʼ yi Sê pə̌ wó.

²⁰Ə̂ yʉʼ yi Yěso lə pyěghʼ nkə́u wó ńté tû zághʼə, ńté ńgó a lə cʉ́ʼ nuŋu-poʼ Sê yi njwǐ ghíʼ a láʼ cí pə̂ pə́ wěi lə̂ mbə̂u yi Meləkísedêghʼ lə lǎghʼ ḿbə̂ yé wěi lə́wó.