Read Ngombale Hebələ̂ 7 Bible Online

Hebələ̂ 7 - Ngombale bible

Hebələ̂ 7

¹Meləkísedêghʼ wêi lə pə́ fou túsoŋ Salêm, ə́ nkə́ ncí mbə́ nuŋu-poʼ Sê, ə́ Sê yi a pə̌ tə tʉ̌-lə́pû. Ə́ lə pə́ mpfu yi Ábələhâm lə pə́ nkwô ntso, mə́i a lə lwóʼó pəfou tə nzʉ́ gháp, Meləkísedêghʼ wo mbə̂utə́ yé, ə́ ncóghʼ mbwórə lə́ zʉ́.

²A ghaptə zə̂u tsəm yi a lə lǎghʼ ńkwó ntso yʉʼ ləghə̂m, ə́ ŋə́ tâʼ yʉʼ lə́ zʉ́. Ləjôghʼ Meləkísedêghʼ laghʼ ńdâʼ ngô: «Fou məno mi ə́ pə́ ndʉŋ-ndʉŋ», a lə pou mbə́ fou túsoŋ Salêm, ə́ ndaghʼ ńdâʼ ngô: «Fou mbwórə».

³Káa pə pə́ njî yé tə́ yé, káa pə́ jî yé mə́ yé, káa pə́ jî cǒ ŋuu lə̂ ngər-ndə̂ zap; káa pə pə́ njî yé leʼé yi pə́ lə jí yé, káa pə́ jî yé leʼé yi a lə kwʉ́. A pə́ ghíʼ Môu Sê: Â nuŋu-poʼ Sê yi a láʼ kə́ cí pə̂ pə́ wěi.

⁴Pei jwó mbə̂u yi a lǎghʼ ńgúʼ tə Ábələhâm yi a pə̌ mə́ngâa-njʉʼ waghʼə ghâp məzə̂u mi a lǎghʼ ńkwó ntso yʉʼ ləghə̂m, ə́ ŋə́ yʉʼ yi shʉʼʉ lə́ zʉ́.

⁵Pye ngər-ndə̂ Levî pi gháp pə́ pənuŋú-poʼ-Sê ghí pə́ pfû tâʼ yʉʼ lə̂ məyʉʼ ləghə̂m, ə́ pə̂ ghíʼ pə́ lə ŋwaʼá lə̂ ləpə̌ʉ Mə̌usə̂i ńgó pye Ísə́lahêl gháptə́ zə̂u páp tsəm yʉʼ ləghə̂m, ə́ ŋə́ tâʼ yʉʼ lə́ páp; pye Ísə́lahêl pêi pə̂ pəfə̌r páp pi gháp pə pǎp nǎa mbə́ ngər Ábələhâm.

⁶Meləkísedêghʼ kâa lə pə̂ yé ŋuu ngər-ndə̂ Levî, lə́ Ábələhâm ghâptə́ məzə̂u mi a lə lǎghʼ ńkwó ntso, ə́ yʉʼ ləghə̂m, ə́ ŋə́ tâʼ yʉʼ lə́ zʉ́; ə́ pə̂ yə́rə́, Meləkísedêghʼ côghʼ mbwórə lə́ ŋuu yi Sê lə ghʉ̌ ndaʼá lə̂ ngʉ́ ŋə́ zə̂u lə́ zʉ́.

⁷Pə́ tsuŋu mə́ njî ńgó ŋuu yi a côghʼ mbwórə lə̌i nkə́ mbə̂ pə́ ŋuu njwǐ lə́ ŋuu yi a pfû mbwórə zêi.

⁸Pye ngər-ndə̂ Levî pi pə́ ghaptə məzə̂u yʉʼ ləghə̂m ə́ ŋə̂ tâʼ yʉʼ lə́ páp lêi, ə̂ pye pi gháp pə́ nkwʉ́tə́; lə́ Meləkísedêghʼ yi pə́ ghaptə məzə̂u yʉʼ ləghə̂m ə́ ŋə̂ tâʼ yʉʼ lə́ zʉ́ lo, pə̂ tə lǎʼ nkwʉ́; ə̂ ghíʼ tsâr Sê pə́ ndǎʼ.

⁹Ə́ pə̂ mpfu wo, pye ngər-ndə̂ Levî lə́ cʉ́ʼ mpfû tâʼ yʉʼ lə̂ məzə̂u mi pə́ ghaptə yʉʼ ləghə̂m. Lə́ ə́ mbə́ yi mboʼ pə́ laʼ ńgó Levî lə ghaptə məzə̂u mé yʉʼ ləghə̂m, ə́ ndeitə́ lə́ Ábələhâm, ə́ ŋə́ tâʼ yʉʼ lə́ Meləkísedêghʼ.

¹⁰Ńté ńgó Meləkísedêghʼ lə ghí wǒ pəutə́ Ábələhâm, Levî pə̂ yé yʉʼ wó, ńté no ə́ lə ghí pə́, a pyêr pə́ cər mbəʉ mə́ngâa-njʉʼ gháp Ábələhâm.

¹¹Ə́ pə́ lə̂ nôghʼ-lâʼ pye Ísə́lahêl, pə́ ghwo lə̂ ntsóʼ pənuŋú-poʼ Sê pə́ lə̂ ngər-ndə̂ Levî. Pə́ laghʼ gháp ńgʉ́ pənuŋú-poʼ Sê, pə́ lə̂ mbə̂u yi Áloŋ lə lǎghʼ ḿbə̂ yé. Lə́ zap mbə̂u lə̂ ndághʼ fǎʼ, káa lə pə̂ yé ghíʼ ləpə̌ʉ pə́ ntúŋú, ə́ lə pə́ ghíʼi mbə́ ghíʼ ləpə̌ʉ pə́ ntúŋú, mə́i mboʼ pə́ lə pôu nkə́ ndôu lə̂ ngwô cǒ nuŋu-poʼ Sê yi ndeʼe lə̂ mbə̂u yi Meləkísedêghʼ ńté hó? Mə́i mboʼ pə́ lə kə̂ mbóu ndou yé lə̂ ngwô cǒ yi ndeʼe lə̂ mbə̂u yi Meləkísedêghʼ po.

¹²Ńté ńgó mbə̂u yi pə́ laghʼ ḿbə̂ nuŋu-poʼ Sê lə̌i nkə́pə́, ləpə̌ʉ kə̂ nkə́pə yé lə́wó.

¹³Pə́ laʼ mwo mətsâr gháʼa ńtê Nde waghʼə. Ə́ zʉ́ yi a lə kwǎr lə̂ ngər yi cǒ ŋuu laa kə́ fú yé mə́u, ə́ mbə́ nuŋu-poʼ Sê.

¹⁴Ŋuu ntsəm pə̌ ntsuŋu njî ńgó a lə kwar lə̂ ngər-ndə̂ Yúda, ə́ pə̂ ngər yi Mə̌usə̂i lə pə́ ndâʼ no yi ə́ náŋtə́ pənuŋú-poʼ Sê, káa lâʼ yé có yi cwíʼí ngər-ndə̂ zêi.

¹⁵Káa pənuŋú-poʼ Sê lə̂ ngər-ndə̂ Levî lə kûʼ gháp lə̂ ngʉ́ faʼ ghíʼ Sê pə̌ nkǒŋ. Ə zə̂u yi pə́ wo fú mə́u tsuŋú jí no zêi, ə̂ ghíʼ cǒ nuŋu-poʼ Sê yi ndeʼe lə pǒu nkwâr, ə́ mbə́ ghíʼ Meləkísedêghʼ.

¹⁶Â nuŋu-poʼ Sê yi a ghí pə́ wěi, káa leitə́ yé pə́ lə̂ no cʉŋə-ndə̂, lə́ ə́ ndeitə́ pə́ lə̂ mətəʉ mi ə́ láʼ cí pə̂ pə́ wó.

¹⁷Ńté ńgó có yʉʼ ŋwaʼa Sê pə́ mbə̂i ńgó no zêi pə́ lə́nə́ʉ, ə́ mə́ ndâʼ ngô: «Ô nuŋu-poʼ Sê yi a láʼ cí pə̂ pə́ wó lə̂ mbə̂u yi Meləkísedêghʼ lə lǎghʼ ḿbə̂ yé.»

¹⁸Ə́ pə̂ yə́rə́, ə́ mbə́ ńgó Sê lə pə̂ghʼ ləpə̌ʉ yi tsəmbi, ńté ńgó ə́ lə pwôr, ə́ mbou káa pə́ pfûtə yé ŋuu lə̂ có zə̂u.

¹⁹Ləpə̌ʉ Mə̌usə̂i kâa lə kûʼ yé lə̂ ngʉ́ tə pye-mə́soŋ pə̂ tə́ lǒʼ mbi Sê. Lə́ ə́ pou mbə́ mpfu wo, mə́i Sê lə ŋə́ wághʼə zə̂u yi ə́ lěi ləpə̌ʉ, tə paghʼə fǔ mə́ njî ńgó paghʼə ghwo mə́ zěi. Zêi zə̂u tsôʼ laŋə́-ndə̂u mbi paghʼə lə̂ ndə̂r tə tə́ʉ mbi Sê.

²⁰Có no pou nkə́ ncí mbə́ ńgó Sê lə ghí lǎghʼ Yěso ghʉ̌ nuŋu-poʼ Sê, ə́ ndǎʼ no tə nkâa. Ə́ ngwǒ lə́ pənuŋú-poʼ Sê lə̂ ngər-ndə̂ Levî, káa laʼ yé có no tə kǎa.

²¹Sê lə ghí lǎghʼ Yěso ghʉ̌ nuŋu-poʼ Sê yi njwǐ, ə́ ndǎʼ no tə nkâa ngô: «Məŋ Nde, n ndaʼ no yo tə nkâa, ə́ pǒu láʼ kə̂p ghâa no zêi po, “Ô nuŋu-poʼ Sê, ə́ láʼ kə́ cí pə̂ pə́ wěi.”»

²²Sê lə laʼ tə nkâa gháʼá, ə́ ndaghʼ ńnyárə́ ńgó Yěso ləiʼi yi ə́ nyárə ńgó kaa yi Sê gháp pə pye-mə́soŋ wǎr mpfu wo, ə́ lei yi ntsəmbi.

²³Có zə̂u kə́ mbə́ wó yi ə́ kə́pə́ lə̂ kaa shwî zêi yo: ə́ mbə́ ńgó pəcó pənuŋú-poʼ Sê lə̂ ngər-ndə̂ Levî lə zǎa, ńté ńgó ləwʉ̂ lə pə́ nkə̂ʼtə gháp lə̂ ndáʼ nkə́ mbə̂ pə́ wó.

²⁴Lə́ mbə́ lə́ Yěso, mə́i a láʼ kə́ pə̂ pə́ wó, cǒ ŋuu láʼ mbóu nkə́pə yé tû yé lə̂ faʼ yé po.

²⁵Ə̂ zə̂u yi ə́ ghʉ̌, a kûʼ lə̂ ngʉ́ pye pi gháp lei lə́ zʉ́ ə́ ncʉ́ŋə́ mbâatə Sê fû ncwór, ńté ńgó a pə̂ mpfu tsəm, ə́ kə́ mbə̂ yé pə̂ ntəʉ lə̂ mə́ sʉ̂ʉtə Sê tû páp.

²⁶Yěso lâghʼ mbə̂ nuŋu-poʼ Sê yi njwǐ yi ə́ lə pə́ ntúŋu ńgó paghʼə ghwô. A pə̂ Ndêi-lěi, ə́ mbə́ tə́ lǒʼ, káa ghwo yé məfaa; Sê lə fú nou pəghaŋə məfaa, ə́ fǎghʼ yé.

²⁷Káa a pə̂ yé ghíʼ pəcó pənuŋú-poʼ Sê pi jwǐ: káa a ghwô yé lə̂ núŋú poʼ Sê maa leʼé tsəm, lə̂ ndághʼ ńsǒghʼ ndʉʉ məfaa ye, ə́ mbǒu sôghʼ mi pye. A lə ŋə̂ tû-mbəʉ yé ndághʼ ńnuŋú poʼ Sê tâʼ mpfu moʼ, ə́ kuʼ yə́rə́.

²⁸Ə́ pə́ cər Ləpə̌ʉ Mə̌usə̂i, pə́ laghʼ pə́ pye-mə́soŋ, ə́ ngaŋə-məfaa, ə́ ngʉ́ pənuŋú-poʼ-Sê pi jwǐ; Ləpə̌ʉ lə pou nděi, Sê lâʼ no tə nkâa, ə́ ndǎghʼ Môu ye yi a lə ghʉ̌ zə̂u yi ə́ poŋə́ yé, ə́ ngʉ́ nuŋu-poʼ Sê yi njwǐ yi a láʼ kə́ pə̂ pə́ wěi.