Read Ngombale Hebələ̂ 8 Bible Online

Hebələ̂ 8 - Ngombale bible

Hebələ̂ 8

¹Kwaʼ no yi paghʼ lou lə̂ ndâʼ wéi ə̂ yo: ə̂ mbə̂u núŋú poʼ Sê zêi yi paghʼə ghwǒ. A pə́ tʉ̌-lə́pû, ə́ nyáŋ lə́ ndyəghʼə́ pô Tǎa Sê yi təʉ, ə́ pə̂ yʉʼ yi zʉ́ Sê nyáŋ wó, ə́ mə́ sâʼ zə̂u tsəm.

²A nyǎŋ yʉʼ wó yə́rə́, ə́ mə́ fâʼ məfaʼ mé cər yʉʼ yi Sê pə̌ wó, zêi yʉʼ laghʼ mbə̂ kwaʼ jûŋ Nde, ə́ yi zʉ́ Sê lə́ lə kə́r, tə kâa pə̂ yé yi ŋuu-məsoŋ lə́ lə kə́r.

³Pə́ tsôʼ nuŋu-poʼ yi njwǐ gháʼá, ghíʼ a wo ŋə́ məzə̂u mbó Sê, mbaa ghíʼ a wo nuŋú poʼ mbi Sê; ə̂ zə̂u yi ə́ ghʉ̌, ə́ pə̂ ntúŋu ńgó waghʼə nuŋu-poʼ Sê yi njwǐ kə́ ngwô yé zə̂u yi a wo ŋə́ mbó Sê lə́wó.

⁴Mboʼ Kəlísto lə̌i ndə pə́ ndəu ndesé, mə́i káa a lə pə́i mbə̂ yé nuŋu-poʼ Sê, ńté no a lə ghí tô yé ndəu ndesé, mə́i pəcó pye pə́ mə́ wó, ə́ mə́ ŋə̂ məzə̂u mi lâʼ tô ŋə̂ lə́ páp, gháp ŋə̂ mbó Sê lə̂ mbə̂u yi ləpə̌ʉ Mə̌usə̂i pə́ ntúŋú.

⁵Pənuŋú-poʼ Sê pei faʼ cər ndə̂ Sê, lə́ faʼ yi gháp faʼ zěi pə̂ pə́ fəiʼtə faʼ yi pə́ faʼ tʉ̌-lə́pû. Ńté no ə́ lə pə́ mpfu yi Mə̌usə̂i lə pə́ nkə̂r jûŋ Sê, Sê lâʼ lə́ zʉ́ ngô: «Tsuŋu náŋtə́, ə́ nkə́ nkə́r ndʉŋ-ndʉŋ, pə́ ghíʼ yi n nkə nyárə́ ghô ndəu ləkôr lə̂.»

⁶Ə́ lei yə́rə́, paghʼə jwô ńgó ə faʼ yi Yěso ghwǒ lə̂ fâʼ, ə́ lei yi pəcó pənuŋú-poʼ gháʼate, ńté no â ŋuu yi a ŋəi kə̌m təcər Sê gháp pə pye-mə́soŋ lə̂ kaa yi gháp pə pǎp lə wǎr, ə kaa zêi lei nduŋ-mbi wěi ńté ńgó zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ pye cər kaa zêi, ə́ lei yi pə́ ghwo mə́.

⁷Nduŋ-mbi kaa lə ghwǒ lǒʼ, ə́ lə lə́iʼ yə́rə́ po, mə́i káa Sê lə kə́ ndôu yé có lə̂ ndághʼ ńkə́p.

⁸Paghʼə pə̌ njwô ńgó kaa zêi lə yaa ngwǒ lǒʼ, ńté no Sê lə pə́ sâʼ pye pé lə̂ məfaa yi gháp ghʉ̌, ə́ ndǎʼ ngô: «Məleʼé lâʼ pə́ ntó, məŋ Nde ndâʼ, ə́ mi paghʼ pə pye Ísə́lahêl ə́ ngʉ̌ Pəyúda wo wǎr kaa shwî.

⁹Lə́ kaa zêi ghʉ̌ pə̂ yé ghíʼ yi paghʼ pə mə́ngâa-njʉʼ páp lə wǎr, ə́ mpfu yi n ndə pyé pô záp, ə́ ndághʼ gháp ńfú cər ngoŋ Egípto ńkwár po. Káa gháp lə ŋə̂i gháp lə̂ ləpə̌ʉ kaa yi paghʼ pə pǎp lə wǎr lêi, ə́ lei yə́rə́, kâa n nkə́ mbyér mbûʼ ghâa mbəʉ zaa ńtê gháp, məŋ Nde lǎʼ yə́rə́.

¹⁰Ə kaa yi paghʼ pə pye Ísə́lahêl ghʉ̌ wǎr lə̂ məleʼé mêi, ə̂ yo; Nde laʼ ngô: n ngʉ̌ cóghʼ ləpə̌ʉ zâa cər jîno záp, ə́ pǒu ŋwáʼá zěi cər məntə̂ʉ máp: N ngʉ̌ pə́ Sê zap gháp pə́ pye pâa.

¹¹Cǒ ŋuu kə́ mbóu ngwô yé lə̂ njyéʼ ŋuu lâʼ ghap kəʉ pə́ fə̌r ye lə̂ njí ghâa po. Cǒ ŋuu kə́ mbóu ndaʼ yé lə̂ cǒ ńgó jí ŋuu yi Nde pə̌ zʉ́ po. Ńté ńgó ŋuu ntsəm tə fú lə̂ ghəpə́ ə́ ngwo nkə́u lə́ pətikáŋ ghʉ̌ pə́ jî ghâa.

¹²Ńté ńgó ə́ ghʉ̌ pə́ mpfu wêi, n ndyə́ghʼə́ məfaa ghap, n ngʉ̌ kə́ kʉ̂ʉtə ghâa məno tə́poŋ mi gháp lə ghʉ̌ po.»

¹³Sê lə laʼ no ńtê kaa shwî gháʼá, ə́ ndaghʼ ńdâʼ ńgó nduŋ-mbi wěi lwuŋ mə́; paghʼə pôu mə́ njî ńgó zə̂u lei tə ndwuŋ, káa kə́ pyér pə́ pfûtə yé lə̂ có zə̂u, ə́ ncʉ́ʼ mə́ ntúŋu pə̂ mêʼ.