Read Ngombale Hebələ̂ 9 Bible Online

Hebələ̂ 9 - Ngombale bible

Hebələ̂ 9

¹Ə́ lə pə́ cər nduŋ-mbi kaa, pye-mə́soŋ ghwo zap mbə̂u yi gháp laghʼ ńgúʼtə Sê, záp yʉʼ yi gháp lə tsuŋtə́ lə̂ ngwô wó, ə́ ngúʼtə Sê pə̂ pə́ ndəu ndesé.

²Gháp lə jə̂ghʼ jûŋ, ə́ ndaghʼ zə̂u-ndí ńzáʼá ə́ kwar lûm pwô. Ə́ fúŋ lûm yi pěi ńgó yʉʼ Ndêi-lěi, ə́ pə̂ cər wó, tâʼ ləʼtə lâm[1] tə̂ʉ yʉʼ wó, ə́ ngʉ̌ tə́pələ, mbələ̂ghʼ yi pə́ ŋə́ mbó Sê núŋu ndəu wó.

³Pə́ zêʼ zə̂u-ndí yi pə́ lə lǎghʼ ńzáʼá, ə́ nkə́u lə́ lûm yi cər wó, pə́ fûŋ zêi yʉʼ ńgó kwaʼ yʉʼ yi Sê pə̌ wó,

⁴lətǒu lamə́ndaa pə̂ cər wó, ə́ mbə́ yi pə́ lǎghʼ ntə̌ʉ-gôl ńtsúŋú, ə́ ntághʼ nkəu yi pə́ láa tə̌ʉ-gôl tə ə́ lwoŋ, pə́ laghʼ ńzóʼ nzəm tsəm, ə́ fûŋ ńgó nkəu kaa. Ə́ ntâghʼ có ngwǒŋ yi pə́ lǎghʼ tə̌ʉ-gôl ńtsúŋú cər nkəu wêi, mána[2] pə̂ cər wó, kə́shʉŋ Áloŋ yi pətə́toŋə́ lə sǎa mə́u pə̂ yé cər nkəu wêi, ə́ ngʉ̌ pətǎfərə́ pi pə́ lǎghʼ məghǒ ńtsúŋú, pə́ lə ŋwáʼá məno mi Sê gháp pə pye-mə́soŋ lə lǎghʼ ńgwár kaa ndəu wó.

⁵Gháp lə wô ndəu nkəu wêi, ə́ ntághʼ məcó məzə̂u mə́mbwô, ə́ pə̂ ghíʼ pəcwôʼ Sê, ə́ tə̂ʉ yʉʼ wó mə́ ŋwâŋtə́, ə́ ndághʼ ńnyárə ńgó Sê pə́ yʉʼ wó; gháp shaghʼə́ mbap máp ə́ ndaghʼ ḿbôu yʉʼ yi pə́ lə côghʼ məci mənye wó ə́ ndághʼ ńgʉ Sê lyə́ghʼə məfaa pye. Lə́ kâa pə̂ yé yi mboʼ paghʼə leʼtə məno mêi mə́tsəm mpfu wo.

⁶Pə́ lə tsuŋu yə́rə́ tə ə́ kuʼ, pənuŋú-poʼ Sê pə̂ nkə̂u cər lûm yi pěi maa leʼé tsəm ńfâʼ faʼ záp.

⁷Lə́ ə́ ngwǒ lə́ lûm yi cər wó, nuŋu-poʼ Sê yi njwǐ lə̂ kə̂u wó zə́ghʼə́-zʉ́, ə́ tâʼ mpfu lə̂ nguʼ lâʼ. Ə́ ngǐ kə̂u cər wó, ə́ ngwô məci mənye lə̂ ŋə́ mbó Sê, ə́ ndaghʼ ńsôghʼ ndʉʉ məno tə́poŋ ye, mbaa mi lâʼ lə ghʉ tə́ pə́ njí.

⁸Zəghʼə Ndêi-lěi laghʼ ńnyárə gháʼá ńgó lûm yi pěi lə̌i ndə́iʼ mě po, laŋə́-ndə̂u tsóʼo yé lə̂ nkə́u yʉʼ yi Sê pə̌ wó po.

⁹Məno mêi lə pə́ mələiʼi mi pə́ laghʼ ńnyárə wághʼə məno mi ə́ leitə leʼé wo, měi laghʼ ńdâʼ ńgó zə̂u yi pə́ ŋə̂ mbó Sê gháp mənye mi pə́ jwítə ńdághʼ ńgûʼtə yé, mboʼ kuʼ yé lə̂ ngʉ́ tə ntə̂ʉ ŋuu yi a ghʉ mbə̂u məzə̂u mêi tî tə́ kə́ pə́ fêʼ yé yé feʼé po.

¹⁰Ə́ lə pə́ məzə̂u náŋtə́ pə̂ məzʉ̂ gháp məluʼ mbaa məzə̂u mbə̂u lə̂ mbə̂u lə̂ no sóghʼ məlǒʼ lə́ pye; ə́ mbə́ məzə̂u mi pye-mə́soŋ lə́ lə laʼ ńgó pə ghʉ́ měi. Gháp lə ghwo lə̂ nyér zêi mbə̂u məno mpfu yi Sê lə kə́p mbə̂u yi pə́ ghwǒ lə̂ ndághʼ ńgúʼtə́ yé.

¹¹Lə́ Kəlísto nuŋu-poʼ Sê yi njwǐ, ə́ mbə́ zʉ́ yi a laghʼ məzə̂u shʉʼʉ mi ə́ láʼ cí pə̂ wó ńtó. A lə kə́u cər jûŋ yi ə́ pə́ tə́ lǒʼ, ə́ mbou ngúʼ ə́ ndêi có, lə̂ fâʼ faʼ yé, ə jûŋ zei pou káa pə̂ yé yi pye-mə́soŋ lə lǎghʼ mbô máp ńtsúŋú, ə́ pə̂ yə́rə́ káa pə̂ yé yi yo nzʉ̂ yi Sê lə tsúŋú lo.

¹²A lə fú nkə́u tâʼ mpfu moʼ cər kwaʼ yʉʼ yi Sê pə̌ wó, ə́ kuʼ yə́rə́. Káa a lə laghʼ yé məci məpwôp mbaa mi pôu məfoŋ nuŋú poʼ mbi Sê, a lə laghʼ pə̂ ndʉʉ məci ye ńnuŋu poʼ wêi, ə́ ndaghʼ fú ńsóghʼ məfaa waghʼə.

¹³Ə́ lə pə́ mpfu ntsəmbi, pə́ zárə məci məpwôp gháp pə mi pələ̂u məfoŋ, mbaa pfû pəwě məfoŋ mi pə́ tǒu, ə́ ndəu pye pi gháp ghwǒ lǒʼ, lə̂ ndághʼ ńsǒghʼ məlǒʼ máp. Ə́ lei yə́rə́, mbəʉ zap lə̂ lêi; gháp kuʼ lə̂ nkə́ ncí ngúʼtə Sê.

¹⁴Tə gháp lə̌i ndə pə́ ngʉ̂ yə́rə́, mbəʉ zap lə̂ léi, mə́i ə́ wo lěi gháʼá məci Kəlísto títə́ sǒghʼ wághʼə tə paghʼə léi tə nkə́u cər wó? Ə Zəghʼə Ndêi-lěi lə ghʉ a ŋə̂ tû yé mbó Sê, ə́ ngǐ ŋə́, ə́ mbə́ tə́ lǒʼ, ə́ ndaghʼ ḿbə̂ ŋuu yi a ŋaghʼ no tə́ yǎa njí. Məci me ghʉ̌ sǒghʼ wághʼə lə̂ məfaʼ tə́poŋ mághʼə, paghʼə kûʼ lə̂ fâʼ mbó Sê yi a pə̌ ntəʉ.

¹⁵Ə̂ zə̂u yi ə́ ghʉ̌, Kəlísto pə̂ ŋuu yi a ŋəi kə̌m lə̂ ntsóʼ laŋə́-ndə̂u pə́ kə̂u cər kaa shwî, ə̂ lei yə́rə́, pye pi Sê lə fúŋ gháp kûʼ lə̂ ngwô məzə̂u shʉʼʉ mi a lə ghʉ̌ ndaʼá mə́u, lə̂ ngʉ́ ŋə́ lə̂ pye pé; ə́ pə̂ mi tə́ láʼ mé. Pye pé pêi táa kǔʼ lə̂ ngwô məzə̂u shʉʼʉ mêi, ńté ńgó tâʼ ŋuu lə kwʉ́, ə́ ndaghʼ ńtsǔʼ tû pye-mə́soŋ pi gháp lə ghʉ̌ məfaa cər nduŋ-mbi kaa.

¹⁶Mboʼ pə́ fûŋ yé ŋwaʼa laghʼ ńtághʼ ləwʉ̂ ŋuu, tə́ ghó ngaŋ kwʉ̂ tə pə́ tsuŋu njwó ńgó a kwʉ mə́ po.

¹⁷Ŋwaʼa yi ŋuu lǎghʼ ńtághʼ ləwʉ̂ yé, káa pə̂ yé có zə̂u mpfu yi ngaŋ pyěr ntəʉ. Ngaŋ lei tə nkwʉ́, ŋwaʼa wêi poŋə́ ghwǒ lətəi-ndwuŋ.

¹⁸Ə̂ zə̂u yi ə́ ghʉ̌, məci lə cwərə záʼa-ndě, nduŋ-mbi kaa poŋə́ pə́ wó.

¹⁹Mə̌usə̂i tə̂ʉ mbi lâʼ, ə́ fúŋ ləpə̌ʉ tsəm yi Sê lə ŋə́ a ŋwáʼa, ə́ fúŋ zěi lə̂ təʉ. Ə́ nkhwǒr məci pôu məfoŋ gháp pə mi məpwôp, ə́ ngwarə́ lə̂ nci. Ə́ mbyé pô tʉ̌ yi pə́ fûŋ ńgó izôpə, ə́ nkár mənyuŋ ndənzʉ mi ə́ pə́ paŋ-paŋ lətû wó, ə́ ntsə̌p zěi cər wó. Ə́ ndaghʼ nyə́ghʼ ŋwaʼa wêi, ə́ nkə́ ncí ndághʼ ńnyə̌ghʼ lâʼ tsəm.

²⁰Ə́ mə́ nyə́ghʼ, ə́ ndǎʼ ngô: «Yo məci mi pei pə Sê lə lǎghʼ ńgwâr kaa, ə́ mə́ ndâʼ lə́ pei ńgó koo pei lâʼ ńdághʼ kaa zêi, ńgʉ́ məghaa.»

²¹Mə̌usə̂i kə̂ mbôu nyə̌ghʼ pə́ yə́rə́ lə̂ jûŋ Sê mbaa lə̂ məzə̂u mə́tsəm mi pənuŋú-poʼ laghʼ ńgûʼtə Sê.

²²Ləpə̌ʉ pə́ ndaʼ ńgó məci lə́ soghʼ zə̂u tsəm, ə́ lêi. Ə́ ndǎghʼ ńdâʼ ńgó mboʼ Sê lyə́ghʼə yé məfaa pye tə́ ghó məci ncwə́rə́ sê po.

²³Pə́ pə ndaʼ ńgó məzə̂u mə́tsəm mi pə́ lə laghʼ ńgûʼtə Sê cər ndwuŋu kaa lə pə́ pə̂ məfəiʼtə məzə̂u mi ə́ pə́ tʉ̌-lə́pû. Pə lə ghwo lə̂ sôghʼ lǒʼ lə̂ məzə̂u mei ghíʼ ləpə̌ʉ Mə̌usə̂i lə pə́ ntuŋú. Ə́ ngwǒ lə́ kwaʼ mbə̂u yi pə́ ghwǒ lə̂ ndághʼ ńgúʼtə́ Sê, ə́ pə̂ ntúŋu ńgó pə ŋə́ məzə̂u poʼ Sê mi ə́ lěi məci mənye. Ə̂ poʼ Sê yi Kəlísto lə nuŋú.

²⁴Káa a lə kə̂u yé cər jûŋ Sê yi ndəu ndesé, ə́ yi pye-mə́soŋ lə lǎghʼ mbô máp ńtsúŋú, Jûŋ zei lə pə́ fəiʼtə lə̂ ndághʼ ńnyárə́ ghíʼ yʉʼ yi Sê pə̌ wó pə̂. A lə kə́u tʉ̌-lə́pû, ə́ yʉʼ yi a pə̌ wó mpfu wo, ə́ mə́ nzôŋ tû zághʼə mbi Sê.

²⁵Ə́ pə̂ nguʼ tsəm, nuŋu-poʼ Sê pəyúda yi njwǐ laghʼ məci mənye ńkə̂u cər yʉʼ yi Sê pə̌ wó tâʼ mpfu moʼ, káa laghʼ yé pə́ ndʉʉ məci ye kə́u lə̂ ndághʼ ńnúŋú poʼ Sê. Lə́ ə́ ngwǒ lə́ Kəlísto, mə́i a lə lâghʼ mbəʉ ye ńnúŋú poʼ Sê tâʼ mpfu moʼ, ə́ kuʼ yə́rə́.

²⁶Ə́ lə ghíʼi mbə́ yə́rə́, mə́i a lə jwô ngwôʼ ndəu ndesé məmpfu tə nzáa tə fú ghíʼ pə́ lə tsuŋú ngoŋ. Mpfu lə kuʼ, Kəlísto nyarə́ mbəʉ ye, ə́ ŋə́ tû-mbəʉ yé tâʼ mpfu moʼ, ə́ kuʼ, lə̂ ndághʼ ńsǒghʼ məfaa pye-mə́soŋ pə́tsəm.

²⁷Ŋuu-məsoŋ tsəm ghwo lə̂ nkwʉ́ pə́ tâʼ mpfu moʼ, ə́ ncʉ́ʼ mbâp pə̂ leʼé yi Sê ghʉ̌ fěʼ yé.

²⁸Ə́ kə́ mbə́ ndʉŋ-ndʉŋ ghíʼ Kəlísto lə lǎghʼ mbəʉ ye núŋú poʼ Sê tâʼ mpfu moʼ, ə́ ndaghʼ ńsóghʼ məfaa pye tə nzáa. A ghʉ̌ kə́ cí tó, lə́u tô yé pə́ lə̂ sôghʼ məfaa pye po, ə́ cʉ́ʼ tô pə́ lə̂ ŋə́ ləcwôr lə́ pye pi gháp cî nzʉ̂ʼtə yé.