Read Ngombale Jâghʼ 1 Bible Online

Jâghʼ 1 - Ngombale bible

Jâghʼ 1

¹Məŋ Jâghʼ, m mbə̌ ngaŋə-faʼ Sê gháp Nde Yěso Kəlísto, m mə̌ ntseʼtə wéi. Məŋ ŋwáʼa wo ŋwaʼa ə́ ŋə̂ lə́ pei pye Sê pi pei lə sěi nkə́u yʉʼ tsəm cər nzʉ̂.

²Pəfə̌r pâa nzəm Yěso Kəlísto, ə ngwôʼ mbə̂u lə̂ mbə̂u lə̌i mə́ ncə́r wéi, pei lâghʼ pə́ lətsəi mpfú.

³Péi jí ńgó pei lə̌i shə̂ghʼ ngwôʼ yi ə́ pə̌ ńtó ńcə̂r wéi, mə́i ə́ wo ghʉ̌ pə̂i-ntə̂ʉ zéi nzəm Kəlísto tə̂itə́.

⁴Pei shə̂ghʼ tə ngwó ndyəghʼtə́, ńjí ńgó pei pə̌ pətəlǒʼ, lə́u có zə̂u kə̂ mbûŋ yé wéi po.

⁵Ŋuu lə̌i mbə́ təcər pei ə́ mbúŋ jîno, a lôu mbó Sê, a ŋə̂ zěi lə́ zʉ́. Ńté no Sê laghʼ pə̂ ntə̂ʉ shʉʼʉ ńŋə̂ zə̂u lə́ ŋuu, ə́ ŋə̂ tə ghwo có kwaŋtə ndeʼe.

⁶Lə́ mə́ ndóu, a tsəmbi mbə́i cər ntə̂ʉ zʉ́ tə́ mʉ̂ŋtə ńgó a wo ŋə́. Ńté ńgó ŋuu yi a pə̌ mʉ́ŋtə́ pə́ ghíʼ mələ̂ʉ mə̂i-nci mi kəfwor pə̌ ncwóʼ mâʼ ghíʼ a kǒŋ.

⁷Koo mbə̂u ŋuu zêi kwaŋ ńgó a láʼ wǒ có zə̂u shʉʼʉ yi ə́ fú mbó Nde.

⁸Â ŋuu yi kâa pə́ ndâʼ yé no ntâghʼ ku mə́u. A nkwaŋ lə̂ ngʉ́ no, ə́ nkə́ mbóu mə́ nkwâŋ yi ndeʼe pə̂ mpfu wêi.

⁹Ə́ poŋ ńgó ŋuu yi â mbûŋ tsêi ńté ghíʼ Sê ŋaʼá yé ńŋə́ tʉ́.

¹⁰Ngaŋə-nkâp tsêi ńté ghíʼ Sê shuʼú yé ńŋə́ sê, ńté ńgó ngaŋə-nkâp ghʉ̌ mě pə́ ghíʼ tə́toŋə́ məghěi lə̂.

¹¹Mə́nəu sâʼ, ə́ ntə́, ə́ ntǒu ləghěi, a zə̂u, tə́toŋə́ pfûŋ, ləpoŋ ye mê yé. Ə̂ ndʉŋ-ndʉŋ ghíʼ ngaŋə-zə̂u ghʉ̌ kwʉ́, məfaʼ mé kə́ mê yé pə́ yə́rə́.

¹²Ndʉʉ-mboŋ â ŋuu yi a ghwǒ shəghʼ-ntə̂ʉ lə̂ məno mi ə́ cə̂r yé, ńté ńgó məno mêi wo lěi, Sê ghʉ́ sǒ nkaghʼə pəmaʼ-nzʉ́ tû zʉ́, ə̂ pə́ nkaghʼə yi a lə ghʉ̌ ndaʼá mə́u lə̂ ngʉ́ ŋə́ lə̂ ŋə́ lə́ pye pi gháp nkǒŋ no yé.

¹³Ə nkwaʼtə lə̌i ncə́r ŋuu, koo a lâʼ ńgó Sê kwaʼtə yé. Ńté ńgó mboʼ Sê ghwô yé kwaŋtə lə̂ ngʉ́ no tə́poŋ lə́ ŋuu po, lə́u nkə́ cʉ́ŋə́ yé ŋuu lə̂ ngʉ́ no tə́poŋ po.

¹⁴Nkwaʼtə ghí cə́r ŋuu-məsoŋ ə́ ndeitə́ lə̂ kwaŋtə yi a ghwǒ ntə̂ʉ zʉ́, ə́ ncʉ́ŋə́ yé a pfûŋ lə̂ ləkei.

¹⁵Ə kwaŋtə tə́poŋ lei tə mbə́ cər ntə̂ʉ ŋuu, ə́ ncʉ́ŋə́ yé a ghʉ̂ no tə́poŋ, no tə́poŋ lei tə ngáʼ, ə́ ncʉ́ŋə́ yé ŋə́ lə̂ ləwʉ̂.

¹⁶Pei pəfə̌r pâa pi lətəi-ndwuŋ koo məkwaŋtə méi futə wéi.

¹⁷Məfuʼ gháp məntsoʼó-faʼ shʉʼʉ fû pə́ tʉ̌-lə́pû shíʼ; ə́ fû mbó Sê yi a lə tsuŋú nkeʼ. Kâa pə́ nkə́p yé, yʉʼ ntsəm yi a pə̌ wó, kâa nzə̌m pə̂ yé yʉʼ wó ńté ńgó káa có zə̂u pə́ kə́pə yé mbəʉ zʉ́.

¹⁸A lə koŋ yé koŋə́ ńdághʼ tsâr lə́nə́ʉ ńtsúŋú wághʼə, ńjí ńgó paghʼə pə̌ pəluŋ-mbi lə̂ məzə̂u mé mi a lə tsuŋú.

¹⁹Pəfə̌r pâa pi lətəi-ndwuŋ pei jí yo no. Pə́ lə̌i mə́ ntsár, pei tsúŋu nzúʼ, lə́ koo pei fâtə mbwôr, koo pei fâtə nzáŋə́ lóŋ.

²⁰Ŋuu yi a záŋə-lóŋ kâa pə́ ngʉ̂ yé zə̂u yi pə́ ndʉŋ-ndʉŋ mbi Sê.

²¹Ə̂ zə̂u yi ə́ ghʉ̌, pei méʼ zə̂u tsəm yi ə́ coŋ ndwuŋ pye, ə́ mbǒu ndə̂ʼ lə̂ ngʉ̂ məno tə́poŋ mə́tsəm. Pei shúʼú mbəʉ zéi mbi Sê, ə́ ndǎghʼ məkuʼ ḿpfú tsâr yi a pi məntə̂ʉ pei, ə́ pə̂ yi ə́ kǔʼ lə̂ ngʉ́ pei cwór.

²²Koo pei pə̂ pə́ ndaʼ pəzǔʼ tsâr Sê, pei zúʼ, ə́ ngʉ́ ghíʼ ə́ pə́ ntuŋú. Tə ndə́iʼ yə́rə́ po, mə́i pei shərə fûtə mbəʉ zéi.

²³Ŋuu yi a zûʼ tsâr Sê káa pə́ ghʉ̂ yé ghíʼ ə́ pə́ ntúŋú, pə́ ghíʼ ŋuu yi a nâŋ cər məlâm njwô ghíʼ mbəʉ ye pə̌,

²⁴ə́ nděi tə fú yʉʼ wó ńdə́r, ə́ ndyə́ghʼə́ ghíʼ mbəʉ ye tə̌i mbə́.

²⁵Ləpə̌ʉ Sê pə̂ ndʉŋ-ndʉŋ, ə́ mə́ ndâghʼ wághʼə ngʉ̂ pəfou-ndʉʉ. Ŋuu lə̌i nzúʼ zěi ə́ ndə́iʼ pə́ ŋuu yi a zûʼ no mbóu ndyə́ghʼə́ po, ə́ mə́ ngʉ̂ ghíʼ ə́ pə́ ntúŋú mə́i â ndʉʉ-mboŋ, ńté ńgó Sê wo cóghʼ mbwórə lə̂ zə̂u tsəm yi ngaŋ ghʉ̌ zěi.

²⁶Ŋuu lə̌i mə́ nkwâŋ ńgó â môu Sê lə́ mbou ndə́iʼ kǔʼ lə̂ ngwôtə́ lə̂ʉ yé po, mə́i yé mbə́ môu Sê zêi kâa pə̂ yé có zə̂u, a pôu mə́ shərə́ fútə mbəʉ ye pə́ zʉ́.

²⁷Ləpə̌i no Sê yi ə́ pə́ tə́ lǒʼ mbou mbə́ yi Tǎa Sê pə̌i ńgó ə́ pə́ lə́nə́ʉ, ə́ pə́ ńgó pei pápə́ pəcǐ gháp pə pəpfǒghʼ pi gháp pə́ njwô ngwôʼ, ə́ mbou mbáa lə pə́ yi mboʼ məzə̂u nzʉ̂ futə wéi.