Read Ngombale Jâghʼ 5 Bible Online

Jâghʼ 5 - Ngombale bible

Jâghʼ 5

¹Lə̂ mpfu wo, pei pəghaŋə-zə̂u, pei zúʼ! Pei ghêʼtə́ tə nji zei kóʼ tʉ́, ńté ngwôʼ yi ə́ wo ńcə́r pei.

²Məzə̂u nkâp méi lʉ́, saa pou nzʉ́ məndǐ méi.

³Wə́rə́káa ghôu tə̌ʉ-gôl zéi gháp nkâp zei, pə́ ghʉ̌ fú pə́ lə̂ wə́rə́káa zêi, ə́ jí ńgó pei wʉ kôr. Pei tsâp mənkâp ńnuŋú, lə́ ngoŋ pə̂ ngwô yé mě wó.

⁴Pye kə faʼ nkâʼ pei, káa pei péi gháp. Pei zúʼ ghíʼ gháp lâa. Ə nji záp koʼ mə́ tə nkə́u lətuŋú Nde yi a ghwǒ mətəʉ mə́tsəm.

⁵Pei kə pə́ cər nzʉ̂, ə́ ngwǒ məzə̂u məsəu mi ə́ pǒŋ mbou ńgʉ́ pei nyâŋ shʉʼʉ, ə́ ntsáa zə̂u tsəm ə́ ngwǒ, ə́ mpfár zə̂u ńgúʼ ghíʼ mənye mi pə́ tsâp lə̂ ntáa ngwâr.

⁶Pei kə kap məno tû pəpə̌uʼ, ə́ njwítə́ gháp. Káa gháp sâʼ gháp məcó mətəʉ mbi pei.

⁷Pəfə̌r pâa pei shə̂ghʼ ə́ mbáp tə nkə́u mpfu yi Nde ghʉ̌ pə̌ʉ tó. Pei náŋtə́ nkhwoʼo-sô njwó, ghíʼ a pwórə ə́ nzʉ́ʼtə́ tə́ cátə́ mbəʉ ye ńgó məzə̂u mi a pǐ sê ghúʼ tə ntsúŋú ntə̌ʉ. A pə̌ njî ńgó a ghwo lə̂ ə́ nzʉ́ʼtə́ ńgó mbʉŋ ló tə ntsúŋú nkə́u sê njí ńgó mbi zə̂u sâʼ, ə́ nkóʼ, ə́ nzə́m shʉʼʉ.

⁸Pei zéi lə́wó pei sáʼ mətəʉ, ə́ shə̂ghʼ, ə́ mpfu yi Nde wo pə̌ʉ tó pə́ mə́ nkǔʼ.

⁹Pəfə̌r pâa koo pei nyâŋ nkʉ̂ʉ pəfə̌r péi tə́poŋ təcər pei, ə́ mbóghʼ no mboʼ Sê ghʉ̂ ncóghʼ fər paa pei ńgó pei wʉ no. Feʼ pəkôr to mə́ tə ntə́ʉ ntsʉ ndə̂ pei.

¹⁰Pəfə̌r pâa, pei pyé fəiʼ lə́ pətsətə́-nkəʉ Sê pi gháp lə shə̌ghʼ ngwôʼ mpfu yi gháp lə ŋâa ngâp tsâr lə̂ ləjôghʼ Nde. Pei shə̂ghʼ zéi ghíʼ páp.

¹¹Pei jwó, paghʼə pə̌ fûŋ pye pi gháp lə shə̌ghʼ ngwôʼ ńgó pəndʉʉ-mboŋ. Pei lə zûʼ mbə̂u yi Jôb lə lǎghʼ ńshə̂ghʼ ngwôʼ. Ə́ mbǒu njwó zə̂u yi ə́ lə ghí lyəghʼtə́, Nde ghʉ̂ lə́ zʉ́. Ńté ńgó Nde ghwô nkoŋə gháp tsâa-mə́jʉ̂ŋ.

¹²Pəfə̌r pâa, ə ntəʉ no pə́ ńgó koo pei lâʼ ndáʼ no tə nkâa. Koo pei lâghʼ lə́pû, kəʉ ndesé lo, kəʉ có zə̂u ə́ nkǎa no. Ə́ lə̌i mbə́ ə̂ŋ pei ghó ə̂ŋ, ə́ mbə́ ə́ ngə́ pei ghó ə́ ngə́. Ə́ lêitə́ yə́rə́, Sê táa ndâʼ yé ńgó pei wʉ no po.

¹³Ŋuu wei lə̌i mə́ njwô ngwôʼ, a sʉ̂ʉtə Sê. Ŋuu wei lə̌i mə́ ntsêi, a zâp mənci laghʼ ńgúʼtə́ Sê.

¹⁴Ŋuu wei lə̌i mə́ ngôu, a fûŋ pətə̌ʉ-tú-mbi lə̂ məcûʼtə pye Kəlísto, gháp tô ńtsə́ghʼtə́ məkoŋ məwə̂r tú zʉ́, ə́ ngʉ̌ sʉ̂ʉtə lə̂ ləjôghʼ Nde.

¹⁵Gháp lə̌i ngí ghʉ̌ sʉ̂ʉtə ə́ ngwǒ pə̂i-ntə̂ʉ nzəm Kəlísto, mə́i ngou wo cwór. Nde pə́ʼə́ yé ntághʼ. Ə́ mbə́ yi a lə ghʉ mə́ məno tə́poŋ, Sê lyə́ghʼə məno tə́poŋ mé.

¹⁶Ŋuu pə́i məno tə́poŋ mé mbó fə̌r ye, fə̌r ye kə́ mbə̂i mé mbó zʉ́, ŋuu sʉ́ʉtə́ Sê tû fə̌r yé, fə̌r ye kə́ sʉ̂ʉtə yé Sê tû zʉ́, ə̂ lêi yə́rə́ pei shwítə́. Ə sʉ̂ʉtə ŋuu yi a pə̌ ndʉŋ-ndʉŋ mbi Sê ŋəi gháʼate.

¹⁷Elyê lə kə́ mbə́ pə́ ŋuu ghíʼ paghʼə. Ə́ sʉ́ʉtə́ Sê lə̂ ntə̂ʉ yé tsəm ńgó koo mbʉŋ lô, ə mbʉŋ kə̂ nyáŋ tə́ lô təcər nguʼ tárə́ lə̂ saŋ ntóghʼó.

¹⁸Ə́ ngʉ́ nkə́ ncí nyáŋ tə sʉ́ʉtə́ Sê, mbʉŋ lô ndesé ŋə̂ məzʉ̂.

¹⁹Pəfə̌r pâa cǒ tâʼ ŋuu lə́ pei lə̌i fú lə̂ laŋə́-ndə̂u no lə́nə́ʉ nkwâr, cǒ ŋuu póu ndǔ tə ndághʼ yé mbə̌ʉ ntághʼ mə́u,

²⁰Pei jí ńgó ŋuu lə̌i fâa laŋə́-ndə̂u cǒ ŋuu təcər pei póu mbaghʼə́ yé ntághʼ lə̂ laŋə́-ndə̂u shʉʼʉ, mə́i a ghʉ a cwôr ləwʉ̂. Ə́ wo lěi yə́rə́, Sê lyə́ghʼə́ məno tə́poŋ tə nzáa.