Read Ngombale 1 Pyêh 1 Bible Online

1 Pyêh 1 - Ngombale bible

1 Pyêh 1

¹Mə̂ŋ Pyêh, ə́ mbə́ ngaŋə-ntə̂u Yěso Kəlísto, məŋ ŋwáʼá ŋwaʼa wo. N ŋə̂ wěi lə́ pei pi Sê lə tsóʼ wéi ə́ ndaghʼ ńgʉ́ pye pé, pei pə̂ mpfu wo, ə́ mbə́ məkhʉ-lâʼ mi ə́ lə sěi ńkə́utə́ cər məpaghʼə-ngoŋ pəlóma mwo: Cər yi Pôŋ, ə́ cər yi Galasî, ə́ cər yi Kapadósʉ, ə́ cər yi Azî, mbaa cər yi Bitinî.

²Tǎa Sê lə tsóʼ wéi, ə́ pə̂ ghíʼ a lə láʼ nzáʼ nzʉ̂ ntághʼ yə́rə́; ə́ ndǎghʼ Zəghʼə Ndêi-lěi yé ńgʉ́ pei cʉ̂ʼ pye pé, lə́ pə́ yi pei wo zúʼ ntsʉ Yěso Kəlísto, â lághʼ məci mé ńsôghʼ wéi. Ńgó poŋə-ntə̂ʉ Sê yi tə́ ndaghʼə gháp mə́shwítə ye pə́ lə́ pei tə ndóghʼə́ mvûʼ.

³Paghʼə ghúʼtə́ Sê, ə́ zʉ́ yi a pə̌ Tə́ pə Nde waghʼə Yěso Kəlísto! A lə laghʼ tsâa-mə́jʉ̂ŋ, ə́ ngʉ́ pə́ jî wághʼə lə̂ ləjî yi shwî, ə́ ndeitə́ ghíʼ a lə ghʉ̌ Yěso Kəlísto zʉ̂ʉ lə̂ ləwʉ̂. Paghʼə cóghʼ cər ntə̂ʉ paghʼə ńgó paghʼə ghʉ̌ ghwǒ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə,

⁴ə́ pə̂ məfuʼ mi mboʼ ə́ lâʼ mê yé po, lə́u ndʉ̂ yé po, lə́u sʉ̂ wěi kə̂ nkwʉ̂ yé po. Ə Sê loʼo məfuʼ mêi tʉ̌-lə́pû, ə́ mə́ ndághʼ ńzʉ̂ʼtə wéi,

⁵ə́ wéi pi pei lə ghwǒ pə̂i-ntə̂ʉ nzəm zʉ́, a lâghʼ mətəʉ mé, ə́ mə́ mbápə wéi, ńjí ńgó ə́ ghʉ mbə́ ndyəghʼ-nzəm leʼé, pə jwô ghíʼ a ghʉ̌ pei cwôr.

⁶Pei tsêi ńté yə́rə́, tə mbaa pə́ ghíʼ pei lə̌i mbə́i nyéʼ mə́ nzʉ̂ŋ zʉŋə́ mpfu wo, ńté məngaghʼə mbə̂u lə̂ mbə̂u mi ə́ pə́ ncə̂r wéi.

⁷Pə́ pə́ ndaghʼ mǒghʼ ńzʉ̂ʼ tə̌ʉ-gôl, ə́ pə̂ zə̂u yi ə́ pə́ ncoŋtə́, ə́ kə́ mbə́ ndʉŋ-ndʉŋ ghíʼ pə́ wo lǎghʼ məngaghʼə mbə̂u lə̂ mbə̂u zʉ́ʼ pə̂i-ntə̂ʉ zéi nzəm Kəlísto, ə́ yi ə́ pə́ zə̂u lətəi-ndwuŋ ə́ ndêi tə̌ʉ-gôl lə̂ njwó ńgó kəʉ ə́ təitə́. Ə̂ zə̂u yi ə́ wo ghʉ̌ Sê ghʉ́ ŋə́ ngaatə zei, ə́ ŋə́ ləghûʼ wei, ə́ ŋə́ məkuʼ méi, ə́ leʼé yi Yěso Kəlísto ghʉ̌ pə̌ʉ tó.

⁸Pei pə̌ nkoŋ yé, tə mbaa pə́ ghíʼ pei laa kə́ jwô wéi yé; pei pə̌ mbə̂i no yé tə mbaa pə́ ghíʼ káa pei kə́ pə́ njwô wéi yé; ə̂ zə̂u yi ə́ ghʉ̌, pei ghwô lətsei yi a ghǔʼ tə mboʼ ŋuu jî yé ndêʼtə́ po,

⁹pei pə́ cər lətsei, ńté no pei ghwo mə́ zə̂u yi pei lə tsə̂ʉ nzəm Kəlísto ńté zěi, zêi zə̂u pə̂ ńgó Sê ghʉ pei cwôr.

¹⁰Pətsətə́-nkəʉ Sê lə lâʼ no ńté mbə̂u yi Sê ghʉ̌ lǎghʼ ghʉ̌ pei cwór, gháp lə lou lə̂ njwó, ə́ ntúŋ ləcʉŋ tə nzáʼ nzʉ̂, ə́ ndǎʼ wéi zə̂u shʉʼʉ yi Sê lə tághʼ lə̂ ngʉ́ ngʉ̌ lə́ pei.

¹¹Gháp lə sâʼ təʉ lə̂ njí mpfu mbî mbaa zə̂u yi ə́ ghʉ̌ lěi záʼa-ndě zə̂u yi Zəghʼə Kəlísto lə pə́ ndêʼtə gháp poŋə́ tó; ńté ńgó Zəghʼə zêi yi ə́ lə pə́ lə́ páp lêi lə cʉ́ŋə́ gháp, gháp zâʼ nzʉ̂ ndeʼtə́ ngwôʼ yi Kəlísto ghʉ̌ jwó zěi poŋə́ kə́u cər ləghûʼ ye.

¹²Ə Sê lə ghʉ pətsətə́-nkəʉ pé jî ńgó nkəʉ yi gháp wo ntsətə́ wo lêi, kâa pə́ náŋtə yé pə́ ndaʼ gháp, ńgó lə nâŋtə pə́ wéi. Ə Nkəʉ wêi, ə̂ yi pəkeʼtə́ Nkəʉ Shʉʼʉ pə̂ leʼé wo ə́ mə́ ndâʼ lə́ pei; ə́ ngí pə́ lǎʼ, Sê fû tʉ̌-lə́pû ntə́u mətəʉ Zəghʼə Ndêi-lěi, ə́ tô mə́ ntôutə gháp. Tû-mbəʉ pəcwôʼ Sê pou mə́ ntsâa záp lə̂ njí Nkəʉ wêi.

¹³Ə̂ zə̂u yi ə́ ghʉ̌, koo pei lê, ə́ poŋ ńgó kwaŋtə zéi pə́ maa mpfu tsəm, ə́ ntə́ʉ pə́ lə̂ fâʼ mbó Sê; pei ghwô cər ntə̂ʉ pei ńgó Sê ghʉ̌ ghʉ̌ no shʉʼʉ lə́ pei, zêi no shʉʼʉ pə̂ ńgó a ghʉ̌ ghʉ̌ pei cwór, ə́ leʼé yi Yěso Kəlísto ghʉ̌ pə̌ʉ tó.

¹⁴Pei zúʼ ntsʉ Sê, ghíʼ môu zûʼ ntsʉ tə́ ye lə̂, ə́ nyér lə̂ nkə́ mə́ ntsâa məzə̂u mi pei lə tsâa měi mpfu yi ə́ lə ghí pə́, mə́i pei kə́ tsə̂ʉ wéi nzəm Kəlísto.

¹⁵Pei pə́ tə́ lǒʼ lə̂ məno méi mə́tsəm, ə́ ndʉŋ-ndʉŋ ghíʼ Sê yi a lə fúŋ wéi ndaghʼ ńgʉ́ pye pé, kə̌ mbə̂ yé tə́ lǒʼ.

¹⁶Ə́ yaa ngǐ pə́, Sê pə̂ ndâʼ cər ŋwaʼa ye ngô: «Pei pə́ tə́ lǒʼ ghíʼ n nkə̌ mbə̂ zâa tə́ lǒʼ.»

¹⁷Ə́ pə̂ mpfu yi pei pə̌ sʉ̂ʉtə Sê, pei fûŋ Sê ńgó Tǎa, ə́ zʉ́ yi a zâʼ kôr pye-mə́soŋ pə́tsəm lə̂ zə̂u yi wǒwó ghʉ̌ tə́ peʼe-mbî. Ə̂ zə̂u yi ə́ ghʉ̌, ə́ pə̂ ntúŋu ńgó pei wó lə̂ pfuʼ məleʼé mi pei pyěr ngwǒ ndəu ndesé, ə́ ndǎghʼ cǐ zéi nyarə́ ńgó pei pə̌ ngûʼtə Sê.

¹⁸Pei pə̌ njî zə̂u lətəi-ndwuŋ yi Sê lə lǎghʼ ńtsǔʼ tû zéi, ə́ ngʉ́ pei kwâr lə̂ məno tə́poŋ mi pəmə́ngâa-njʉʼ pei lə lǎghʼ ńnóghʼtə́ wéi. Zêi zə̂u yi a lə lǎghʼ ntsǔʼ tû zéi lêi, kâa pə̂ yé yi ə́ pə́ ncoŋtə́ ghíʼ tə̌ʉ-gôl, káa ghíʼ nkâp.

¹⁹Lə́, a lə laghʼ pə̂ məci lətəi-ndwuŋ Kəlísto, ə́ nkwarə́ wéi cər no tə́poŋ. Kəlísto wêi lə pə́ ghíʼ môu-ndənzʉ tə́ lǒʼ, ə́ mbou mə́i a laa kə́ ghʉ̂ yé có no tə́poŋ, pə́ jwî yé ə́ ndághʼ ńnuŋú poʼ Sê.

²⁰Sê lə yaa nzáʼ nzʉ̂ ə́ ntsóʼ yé ńté no zêi, ə́ mboŋə́ tsuŋú ngoŋ, a lə pou ngʉ̌ a kwâr lə̂ yo mpfu ghíʼ nzʉ̂ cʉ̌ʼ mə́ ngwô yé pə́ mě wo lo, ghíʼ a wo pfútə́ wéi.

²¹Pei pə̂i no Sê mpfu wo, ńtê pə́ Yěso yi Sê lə ghʉ̌ a zʉ̂ʉ lə̂ ləwʉ̂, a pôu ŋə́ ləghûʼ lə́ zʉ́. Ə̂ zə̂u yi ə́ ghʉ̌, pei ghwô pə̂i-ntə̂ʉ nzəm Sê, ə́ fú mə́ njî ńgó pei ghwo mə́ zə̂u yi pei lə pə́ ntsáa.

²²Pei lə laghʼ ghíʼ pei ŋə̌i lə̂ laŋə́-ndə̂u no lə́nə́ʉ, ə́ sóghʼ məntə̂ʉ méi, lə̂ ndághʼ ńgwǒ kwaʼ nkoŋə pəfə̌r təcər pei. Pei tsuŋú nkoŋə́ mbəʉ zéi təcər pei, lə̂ ntə̂ʉ lěi maa mpfu tsəm.

²³Pə́ lə jí wéi lə̂ ləjî yi shwî, ə́ ndeitə́ lə̂ tsâr Sê yi ə́ ghʉ pye pə̂ wó, ə́ mbə́ tsâr yi ə́ láʼ kə́ cí pə̂ pə́ wó. Sê zʉ́ tû-mbəʉ yé yi kâa pə́ nkwʉ̂ yé lə ghʉ pei pə̂ wó. Káa ŋuu-məsoŋ, zʉ́ yi a pə̌ nkwʉ́ lə̂ lə ghʉ́ pei pə́ wó.

²⁴Ńté ńgó pə́ lə ŋwaʼa cər ŋwaʼa Sê ngô: «Pye-mə́soŋ pə́tsəm pə́ ghíʼ ləghěi ngəwoghʼ zap pə̂ ghíʼ tə́toŋə́ yi a tə̌ʉ nkâʼ; ləghěi zə̂u, tə́toŋə́ wěi pfûŋ,

²⁵lə́ tsâr Nde láʼ nkə́ ncí pə̂ pə́ wó.» Ə tsâr zêi, ə̂ Nkəʉ Shʉʉ yi pə́ lə leʼtə́ wéi.