Read Ngombale 1 Pyêh 2 Bible Online

1 Pyêh 2 - Ngombale bible

1 Pyêh 2

¹Pei nyér lə̂ nkə́ nzáa sôu, ə́ měʼ məlaa, ə́ nyér lə̂ nkə́ mbə́ pəsap-ndwô-fʉ́ŋ, ə́ nyér lə̂ ŋwə́itə́ gháp pə lə̂ ntáŋ ngə̂u tû pye.

²Pei tsáa lə̂ nzúʼ tsâr Sê, ə́ ndʉŋ-ndʉŋ ghíʼ môu mbaŋə́ tsâa lə̂ nóŋ ləpə̂ʉ mə́ ye lə̂. Tsâr zei lə́ pə́ kwaʼ ləpə̂ʉ yi ə́ pə́ tə́ lǒʼ. Pei nóŋ ləpə̂ʉ zêi ə̂ ghʉ́ pei ghúʼ, ńjí ńgó Sê ghʉ̂ pei cwôr.

³Ə́ yaa ngǐ pə́, pə ŋwaʼa cər ŋwaʼa Sê ngô: «Pei lə zʉ́ʼ Nde, ə́ nzúʼ mbə̂u yi a lǎghʼ mbǒŋ.»

⁴Pei cʉ́ŋə́ mbáatə́ Nde, zʉ́ lə́ ghʉ pə́ pə̂ wó, ə́ mbə́ ləghǒ yi pye-mə́soŋ lə měʼ, lə́ Sê jwô ńgó ə̂ yi lətəi-ndwuŋ, ə́ nkǎŋ zěi.

⁵Pei zéi lə́wó, pei cʉ́ʼ mbə́ ghíʼ məghǒ mi ə́ pə́ ntəʉ, pei nyér Sê lâghʼ wéi ḿbóu ndə̂ ye. Ndə̂ ye zêi, ə̂ yi Zəghʼə Ndêi-lěi cî cər wó. Pei pə́ cər ndə̂ wei, ə́ mbə́ pənuŋú-poʼ Sê, Zəghʼə Ndêi-lěi pou mə́ ncʉ́ŋə wéi, pei lêitə lə́ Yěso Kəlísto, ə́ mə́ ŋə̂ məzə̂u poʼ mi ə́ poŋə́ Sê.

⁶Pə́ lə ŋwáʼa cər ŋwaʼa Sê ngô: «N ndə nkaŋ ləghǒ lətəi-ndwuŋ ə́ nuŋú zěi túsoŋ Siyôŋ; ə́ pə̂ ləghǒ ləlí ndə̂ ŋuu lə̌i mbə́i no zěi, Sê lâʼ mbə̂i yé ńgó sə̂ʉ kó yé po.»

⁷Ləghǒ zêi zə̂u tə́koʼ lətəi-ndwuŋ mbó pei pi pei pə̌i no Sê; lə́ ə́ ngwǒ mbó pətəpə̌i-no Sê, mə́i pə́ ŋwaʼa cər ŋwaʼa Sê ngô: «Ləghǒ yi pəpóu-ndə̂ lə měʼ lə cʉ̂ʼ ləghǒ yi ə́ pyěʼ ndə̂ tsəm.»

⁸Ə́ wo cər có pǎp ŋwaʼa, pə́ kə̂ ncí ŋwáʼá ngô: «Ə̂ ləghǒ yi pye kotə mə́u, ə́ mbə́ tə́koʼ ləghǒ yi a ghʉ pye pfûŋtə.» Gháp kotə yə́rə́, ńté ńgó gháp lə ləʼ gháp lə̂ mbə́i no yi tsâr Sê pə́ ndǎʼ, ə́ pə̂ ghíʼ Sê lə tághʼ ńgó ə́ táa pə́ yə́rə́ mbó páp.

⁹Lə́ ə́ ngwǒ lə́ pei, mə́i pêi ngər yi Sê lə nkǎŋ, ə́ mbə́ pənuŋú-poʼ pi Fou Pəfou, ə́ mbə́ lâʼ yi ə́ pə́ yi Sê, ə́ mbə́ pye Sê. A lə fúŋ wéi ńgó pei fú cər nzə̌m ńkwár, ə́ nkə́u cər nkeʼ ye yi pə̌ yi tə́ fəiʼ zéi wó, ńjí ńgó pei leʼtə məfaʼ shʉʼʉ mé.

¹⁰Pei lə pə̂ cǒ mpfu, káa pə̂ wéi pye Sê, lə́ pei pə̂ mpfu wo, ə́ mbə́ pye pé; ə́ lə pə̂ cǒ mpfu, kâa Sê ghwô yé tsâa-mə́jʉ̂ŋ nzəm pei, lə́ ə́ pou ngǐ pə́ mpfu wo, a ghwô tsâa-mə́jʉ̂ŋ nzəm pei.

¹¹Pəsə̌u pâa pi lətəi-ndwuŋ, pei kʉ́ʉtə́ ńgó pei gháʼá mbə́ pə̂ pəghəʉ ə́ mbóu mbə́ pəndei-laŋə́-ndə̂u ndəu ndesé yaʼa: m mə̌ ncwotə wéi ńgó pei páa məkwaŋtə tə́poŋ mi ə́ pə́ məntə̂ʉ pei, měi pə́ nkə̂ʼtə wéi lə̂ ngʉ́ zə̂u yi ə́ wo poŋə́ Sê.

¹²Pei ghwô cǐ shʉʼʉ təcər pətəpə̌i-no Sê; tə ə́ pə̂ yi gháp lə̌i mbə́i mə́ ntsâtə pə̂ tə́poŋ ńté wéi, ńgó pêi pəghʉ̌ məno tə́poŋ, gháp jwô pə̂ məfaʼ shʉʼʉ méi, ə́ cʉ́ŋə́ gháp lə̂ ŋə́ ləghûʼtə mbó Sê leʼé yi a ghʉ̌ tó lə̂ nzâʼ kôr pye-mə́soŋ.

¹³Ghíʼ pei kə̌ mbə́ pye Nde lə̂, pei nzúʼ ntsʉ pəsǎʼ lâʼ pə́tsəm: ə́ nzúʼ ntsʉ fou yi a tə̌ʉ tû-mbi lə̂ məlâʼ mə́tsəm,

¹⁴ə́ nkə́ ncí nzúʼ ntsʉ pye pi fou tsǒʼ gháp ńgó gháp ncóghʼ fər paa pəghʉ̌-mə́no tə́poŋ, ə́ mbou ŋə́ ngaatə pye pi gháp pə́ ngʉ məno shʉʼʉ.

¹⁵Pei ghʉ̂ yə́rə́ ńté ńgó ə̂ zə̂u yi Sê koŋ zěi, ə́ ndághʼ ńtsághʼə́ ntsʉ pye pi gháp pə́ məghəghəʉ, ə́ mbə́ pətəzǔʼ ntǎghʼ.

¹⁶Pei ŋə̂i ghíʼ pəfou-ndʉʉ; ghíʼ ə́ kə́ mbə́ yə́rə́ lə̂, koo pei lâghʼ ghíʼ pei pə̌ pəfou-ndʉʉ, ə́ ngʉ́ nkwə̌ yi pei laghʼ ḿbôu mbəʉ zéi, ə́ ngʉ̂ məno tə́poŋ méi, lə́ pei ghʉ́ ghíʼ pəghaŋə-faʼ Sê ghwǒ lə̂ ngʉ́.

¹⁷Pei ŋə́ məkuʼ pye-mə́soŋ pə́tsəm, ə́ pye Kəlísto, pei ghúʼtə́ Sê, ə́ ŋə́ məkuʼ fou.

¹⁸Pei pi pei faʼ mənzeʼ pye, wǒwó zúʼ ntsʉ ŋuu yi a faʼ nzeʼ zʉ́, ə́ sâa-sǎa ŋə́ məkuʼ máp. Koo pei zûʼ pə́ ntsʉ pi gháp ghwǒ poŋə-ntə̂ʉ mbou mbworə́, pei zúʼ mbaa ntsʉ pi gháp nyâŋ sâʼ saʼá.

¹⁹Ə́ yaa mbə́ no shʉʼʉ ghíʼ mboʼ o lâghʼ no yi o pə̌ nzûʼ ntsʉ Sê, ə́ shə̌ghʼ ngwôʼ yi pə́ tághʼ tû gho lə̂ no yi koo o pə́ njí ghô.

²⁰Pə́ lə̌i ngí tághʼ ngwôʼ tû pei, ə́ ntághʼ ntê pə̂ no tə́poŋ yi pei ghʉ̌ zěi, pə́ pou fə́tə́ wéi ńté hó? Lə́ ə́ ngǐ pə́ shə̌ghʼ ə́ jwô ngwôʼ yi pə́ tághʼ tû pei, ə́ pə́ ngwôʼ yi pə́ tâghʼ ńté no shʉʼʉ yi pei ghʉ̌ zěi, ə́ pə̂ no shʉʼʉ yi pei ghʉ̌ zěi mbi Sê.

²¹Sê lə yaa fúŋ wéi ńté pə́ zěi. Tû-mbəʉ Kəlísto lə jwô ngwôʼ ńté tû zéi, lə̂ ndághʼ ńnyárə́ wéi tâʼ fəiʼ yi pei wo ŋə̌i mə́u.

²²Káa a lə ghʉ̂ yé có məfaa, có tsâr məlaa laa kə́ kwâr yé ntsʉ zʉ́.

²³Pə́ lə zou yé, káa a lâghʼ yé nzou ḿbʉ̂ŋ; pə́ lə ŋə́ yé ngwôʼ, káa a ghʉ̂ yé məcó mətəʉ lə̂ ndághʼ ńzǒŋ tû yé, lə́ ə́ nyêr yé no tsəm mbó Sê yi a zâʼ kôr pye-mə́soŋ pə̂ ndʉŋ-ndʉŋ.

²⁴A lə khwor məfaa wághʼə ńcóghʼ ndəu zʉ́, ə́ ndaghʼ ńkwʉ́ lə̂ tʉ̌-mbʉ̂ŋtə, ńjí ńgó ə́ lei yə́rə́, paghʼə kə̂ nkwʉ̂ zághʼə lə̂ məfaa lə́wó, ə́ ncʉ́ʼ ngʉ̂ pə̂ məno mi ə́ wo poŋə́ Sê. Pei lə lei lə̂ məfʉ̌ŋ mé, ə́ shwítə́.

²⁵Pei lə pə́ ŋáa mbə̂u ghíʼ məndənzʉ mi ə́ lə fǎa laŋə́-ndə̂u ə́ ncwí, lə́ ə́ pou mbə́ mpfu wo, péi pəʉ mə́ tə mbə́ mbəʉ mbapə mbî ghíʼ a wo pə pápə wéi.