Read Ngombale 1 Pyêh 3 Bible Online

1 Pyêh 3 - Ngombale bible

1 Pyêh 3

¹Mbaa pei pəngyě, wǒwó təcər pei shúʼu-mbəʉ ye mbi ndə̂u péi, ńjí ńgó ə́ lei yə́rə́, ə́ tə́i mbə́ yi pəcó mbiŋə pə́ təcər pei pi káa gháp pə́ mbə̂i gháp no Sê, gháp jwô ləŋəi wéi, ə́ mbə̂i záp no Sê lə́wó; tə́ ghó pei jǒghʼ ndǎʼ gháp laʼá.

²Ńté ńgó gháp pə́ njwô cǐ shʉʼʉ yi pei ghwǒ, ə́ mbou mə́ njwô mbə̂u yi pei laghʼ ńŋə̂ məkuʼ máp.

³Koo pei kwə̂i mbəʉ zéi pə́ nzəm pěi: ghíʼ mbə̂u yi pei lâghʼ ḿbâʼ mətû méi, ghíʼ ngwér məfə̂i mi pə́ lǎghʼ ntə̌ʉ-gôl ńtsuŋú, ghíʼ mâʼ məndǐ nkâp.

⁴Pei lághʼ pə̂ cǐ yi ə́ kwar cər ntə̂ʉ pei ńnyárə́ ńgó pei sěi. Ə zə̂u yi ə́ ghwǒ lətəi-ndwuŋ mbi Sê pə́ pə̂ lə̂ ndághʼ cǐ shʉʼʉ yi ə́ kwar cər ntə̂ʉ pei ńkwə̌i mbəʉ zéi. Ə̂ cǐ yi kâa pə́ ncôŋtə yé, ə́ mbou mbə́ yi ə́ ghʉ ŋuu pwórə, ə́ mbóu nǎʼ.

⁵Yo zə̂u yi pəngyě pi gháp lə cóghʼ ntə̂ʉ gháp lə̂ Sê mpfu ntsəmbi, ə́ mbou mə́ nzʉ̂ʼtə zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ páp, lə laghʼ ńkwə̂i mbəʉ záp. Gháp lə zûʼ ntsʉ pələ̂u páp,

⁶ə́ ndʉŋ-ndʉŋ ghíʼ Sará lə zúʼ ntsʉ ndə̂u ye Ábələhâm tə fûŋ yé pə́ ńgó «Nde ghaa». Pei lə̌i mə́ ngʉ̂ məno shʉʼʉ tə́ pôghʼ có zə̂u, pei cʉ̂ʼ mbə́ kwaʼ ghəpə́ Sará pi pəngyě.

⁷Ə́ ngwǒ lə́ pei mbiŋə, wǒwó təcər pei ghwô ngwě ye kwaʼ shʉʼʉ, ńté ńgó ghâp pye pi pə́ pwôtə gháp pwótə́. Pei ŋə́ məkuʼ máp ńté ńgó ləcǐ mbî yi shwî yi Sê ŋə̂ lə́ pei, a kə̌ mə́ ŋə̂ lə́ páp záp lə́wó. Pei ghʉ̂ yə́rə́, ńjí ńgó có zə̂u kə̂ʼtə yé məsʉ̂ʉtə méi po.

⁸N ngǐ lyəghʼtə́, ə́ pə́ laʼ lə́ pei ńgó pei pə́tsəm ghwô tâʼ tsâr, fə̌r gho pə́ njwô ngwôʼ, pei zʉ́ pə́tsəm naa njwó, ə́ nkoŋə́ mbəʉ zéi təcər pei ghíʼ ghəpə́ tâʼ ŋuu lə̂. Pei ghwô tsâa-mə́jʉ̂ŋ ə́ mbou ngwô shúʼu-mbəʉ təcər pei.

⁹Ŋuu lə̌i ngʉ́ no tə́poŋ lə́ pei, koo pei lâghʼ có ḿbʉ̂ŋ; ŋuu zôu wéi, koo pei lâghʼ nzou ḿbʉ̂ŋ. Tə ncʉ́ʼ yə́rə́, pei lâʼ pə́ ńgó Sê cóghʼ mbwórə lə́ ngaŋ, ńté ńgó Sê lə fúŋ wéi ńgó pei ghʉ̂ yə́rə́, â ŋə́ mbwórə yi a lə ghʉ̌ ndaʼá mə́u lə̂ ngʉ́ ŋə́ lə́ pei.

¹⁰Pə́ lə yaa ŋwáʼá cər ŋwaʼa Sê ngô: «Ŋuu yi a pə̌ ndou lə̂ nyáŋ shʉʼʉ, ə́ mbou ngwô məleʼé lâʼ mi ə́ pǒŋ mbó zʉ́; káa ghwô yé lə̂ ntsár mətsâr tə́poŋ, mbaa lə̂ ntáŋ məlaa.

¹¹A ghwo lə̂ ntə́m nzəm no tə́poŋ, ə́ ngʉ̌ shʉʼʉ, ə́ ndǒu ńgó mbwórə pə́ wó tə́ kâa.

¹²Ńté ńgó Nde tâghʼ nyôghʼ lə́ pye pi gháp ghʉ ghíʼ tsâr yé pə́ ntúŋú, ə́ mbou mə́ nzʉ̂ʼtə məsʉ̂ʉtə máp; lə́, ə́ ngwǒ lə́ pye pi gháp ghʉ no tə́poŋ, a ntə̂m nzəm zap.»

¹³Pei lə̌i nkə́ mə́ nzáŋə mbəʉ, ə́ ngʉ̂ pə̂ məno shʉʼʉ gháʼa, wǒ pôu ngʉ́ no tə́poŋ lə́ pei?

¹⁴Pye-mə́soŋ lə̌i ngí pə́ jwô ngwôʼ, ə́ ńté pə́ ghíʼ pei pə̌ ngʉ zə̂u yi Sê pə̌ nkǒŋ, pei pə̂ pəndʉʉ-mboŋ. Koo pei pôghʼ wéi pye pi gháp ŋə̂ wéi ngwôʼ, koo mənzoʼ méi tsóʼo!

¹⁵Ghíʼ ə́ kə́ mbə́ yə́rə́ lə̂, pei ghúʼtə́ Kəlísto lə̂ ntə̂ʉ wéi tsəm, zʉ́ lə́ pə́ Nde wei. Pei pə́ mpfu tsəm, ə́ ntə́ʉ nkûʼ lə̂ nzôŋ tû zéi mbi pye pi gháp lou lə̂ njí zə̂u yi pei táŋə ə́ mbə̂i no Nde Yěso, ə́ ndaghʼ ńzʉ̂ʼtə zěi.

¹⁶Lə́ ə́ mə́ nzôŋ tû zéi, pei lâghʼ pə̂ mbwórə gháp məkuʼ. Ə́ poŋ ńgó pei ghí pə́ ghʉ yə́rə́, lə́u məkwaŋtə méi pə́ fêʼ yé wéi po; ə́ njí ńgó ə́ lei yə́rə́, sə̂ʉ kô pye pi gháp tsâr tə́poŋ, ə́ mbou nzôutə́ wéi lə̂ ləŋəi wei yi shʉʼʉ nzəm Kəlísto.

¹⁷Ńté ńgó mboŋə́ njwô ngwôʼ ńté no shʉʼʉ yi o ghʉ̌ zěi, ghíʼ ə́ lə̌i mbə́ ləkoŋtə Sê, ə́ nděi lə̂ njwó ngwôʼ ńté no tə́poŋ yi o ghʉ̌.

¹⁸Kəlísto, zʉ́ tû-mbəʉ yé lə yaa njwó ngwôʼ tâʼ mpfu moʼ ńté məfaa pye-mə́soŋ; zʉ́ yi a lə pə́ ŋuu ndʉŋ-ndʉŋ, a lə nkwʉ́ ńté tû pəghaŋə məfaa pə́tsəm, ə́ nkwʉ̂ yə́rə́ lə̂ ndághʼ ńgʉ̌ pei kə̂ ncí nkûʼtə́ lə̂ ntə́ʉ mbi Sê. Pə́ lə jwí yé lə̂ mbap mbəʉ, Zəghʼə Ndêi-lěi ghʉ a zʉ̂ʉ lə̂ ləwʉ̂, ə́ nkə́ ncí mbə́ ntəʉ.

¹⁹Ə́ ngwǒ ndə̂-tsâŋ, ə́ ndǎghʼ mətəʉ Zəghʼə Ndêi-lěi zêi, ə́ ndǎʼ tsâr Sê mbó Məzəghʼə pəpfû-sê,

²⁰Pêi pəpfû-sê, ə̂ pye pi gháp lə tə̌i tû mbó Sê. Ə́ mpfu yi Nówa lə pə́ nkôu kənyúʼ, Sê pə̂ shə̂ghʼ ə́ nzʉ́ʼtə ńgó gháp tó ńkə́u cər wó. Ə ntâʼ pye ləfǎa lə́ cʉ̂ʼ nkə́u cər kənyúʼ, Sê ghʉ̂ gháp lwoghʼ nci.

²¹Ə nci wêi lə pə́ ləiʼi pfû-nci yi Sê lei mə́u leʼé wo, ə́ ngʉ́ pei cwôr. Ə pfû-nci zêi kâa pə́ yé lə̂ ndághʼ ńsǒghʼ ncǔ ndəu ŋuu, ə́ pə́ pə́ lə̂ ndághʼ ńdóu mbó Sê ńgó â sóghʼ məntə̂ʉ mághʼə, ə̂ léi. Ə Sê cʉ̂ʼ ndêi lə̂ pfû-nci zêi, ə́ ngʉ́ pei cwôr, ńté ghíʼ a lə ghʉ̌ Yěso Kəlísto zʉ̂ʉ lə̂ ləwʉ̂,

²²ə́ nkóʼ ńdə́r lə̂ tʉ̌-lə́pû, ə́ nyáŋ lə̂ ndyəghʼə́ pô Tǎa Sê yi təʉ, a nyǎŋ yʉʼ wó, ə́ mə́ sâʼ pəcwôʼ Sê pə́tsəm, ə́ mə́ sâʼ zə̂u tsəm yi ə́ pə́ sâʼ nzʉ̂, ə́ mə́ sâʼ mətəʉ mə́tsəm mi ə́ wə́ tʉ̌-lə́pû.