Read Ngombale 1 Pyêh 4 Bible Online

1 Pyêh 4 - Ngombale bible

1 Pyêh 4

¹Ghíʼ Kəlísto lə jwó ngwôʼ lə̂ mbap mbəʉ ye lə̂, pei tsúŋtə́ mbəʉ zéi lə̂ nkə́ njwô zéi ngwôʼ ghíʼ zʉ́; ńté ńgó ŋuu Kəlísto yi a jwǒ ngwôʼ lə̂ mbap mbəʉ ye, mboʼ a kə̂ ngʉ̂ yé məfaa po.

²Lə̂ fú mpfu wo, pei ghwo lə̂ nyáŋ lə̂ mbə̂u yi Sê pə̌ nkǒŋ, lə̂ pfuʼ məleʼé-mbî mi pei pyěr ngwǒ ndəu ndesé, koo pei ghʉ̂ məno mi məmbəʉ méi cʉ́ŋə wéi lə̂ ngʉ́.

³Pei saa mə́ sáa ncí lə̂ ngʉ́ məno mi ə́ poŋə́ pətəpə̌i-no Sê, tə ə́ kuʼ. Pei lə pə́ mbə̂u nzóʼ, ə́ ngwo məkwaŋtə tə́poŋ, ə́ nô məluʼ mbʉ́ʉ, ə́ nzʉ́ məzʉ̂ tə ə́ nzéʼ ndaghʼə, ə́ mbə́ pə nó-nó, ə́ ngúʼtə məzə̂u ə́ fûŋ ńgó məsê: ə́ pə̂ zə̂u yi Sê lə̌ʼ tə mbúʼ mbaʼ.

⁴Ə́ pou mbə́ mpfu wo, ə́ mə́ nkə́ʼə pətəpə̌i-no Sê ghíʼ káa pei pyér mə́ mbə̂i wéi pei pǎp ntə̂m ku ŋáa ŋə̂i sʉ̂ŋ mbə̂u məno tə́poŋ mêi, gháp cʉ́ʼ mə́ nzôutə́ wéi zoutə́.

⁵Lə́ gháp ghʉ̌ tə́ʉ mbi Sê, ə́ pyétə́ ntsʉ gháp, zʉ́ yi a tə̌ʉ mpfu wo lə̂ nzáʼ kôr gháp pə pye pi gháp pə́ ntəʉ, mbaa yi pye pi gháp pə́ pəpfû-sê.

⁶Ə̂ zə̂u yi ə́ ghʉ̌, Kəlísto lə tsətə Nkəʉ Shʉʼʉ tə mbaa mbó pəpfû-sê. Sê lə feʼ gháp ə́ mpfu yi gháp lə pyêr pə́ ndəu ndesé, ə́ ndʉŋ-ndʉŋ ghíʼ a lə fěʼ pye-mə́soŋ pə́tsəm. Gháp pə̂ mpfu wo, ə Zəghʼə Ndêi-lěi ghʉ gháp nkuʼ záp lə̂ nyáŋ ghíʼ Sê pə̌ nkǒŋ.

⁷Ə mpfu yi zə̂u tsəm wo ndyəghʼtə́ wó pə mə́ nkǔʼ. Ə̂ zə̂u yi ə́ ghʉ̌, pei nyáŋ lə̂ mbə̂u yi ə́ yǎa mə́ ntúŋu ńgó pə nyáŋ yə́rə́, ə́ ngwotə́ mbəʉ zéi ə́ mbóghʼ no mboʼ có zə̂u kə̂ʼtə wéi lə̂ sʉ́ʉtə́ Sê.

⁸Ə́ ngí pə́ ghʉ zə̂u tsəm, ə́ sâa-sǎa ngwǒ nkoŋə təcər pei, ńté ńgó o lei tə mə́ nkôŋ ŋuu, ə́ fátə́ ndyə́ghʼə́ məfaa yi a ghʉ̌ lə́ gho.

⁹Pei pfú pəfə̌r péi pye Kəlísto mənzeʼ pei shʉʼʉ, tə́ shʉ́ŋə́ məsʉ̂ méi.

¹⁰Sê lə ŋə̂ məzə̂u shʉʼʉ mbə̂u lə̂ mbə̂u mbó maa ŋuu ntsəm, ə́ poŋ ńgó wǒwó lâghʼ yé ntóutə́ pəcó pye. Pei lə̌i ngʉ́ yə́rə́, pei pə̂ pye pi gháp kǔʼ lə̂ mbápə́ məzə̂u shʉʼʉ mi Sê lə ŋə́ lə́ páp.

¹¹Ŋuu yi yé zə̂u shʉʼʉ pə̂ njí tsâr, â lághʼ ńdeʼtə́ tsâr Sê. Ŋuu yi yé zə̂u shʉʼʉ pə́ lə̂ mpfútə́ pəcó pye, â lághʼ mətəʉ mi Sê ŋə̂ lə́ zʉ́, ə́ mpfútə́ gháp. Ə́ pə́ ntúŋu ńgó pei ghʉ̂ yə́rə́, ńjí ńgó pye-mə́soŋ lei lə́ Yěso Kəlísto, ə́ ngúʼtə́ Sê lə́ maa zə̂u tsəm. Ə́ zʉ́ Yěso Kəlísto yi ləghûʼ gháp pə mətəʉ nǎa mbə́ pə̂ mé lə̂ mənguʼ mənguʼ! Ə̂ pə́ yə́rə́.

¹²Pəsə̌u pâa pi lətəi-ndwuŋ, ə ngwôʼ yi pei pə̌ cər wó lə̌i mə́ ntôu wéi ghíʼ mǒghʼ lə̂, koo pei jwô ə́ kəʼə wéi pə́ ghíʼ mpfu yi ə́ pə́ pə́ cǒ ndǎa-jwô-no lə̂. Ə̂ zə̂u yi Sê wo fú mə́u, ə́ jwó mbə̂u yi pei lǎghʼ ngwǒ pə̂i-ntə̂ʉ nzəm zʉ́.

¹³Tə ncʉ́ʼ yə́rə́, pei ghwô pə́ lətsei ńté ghíʼ pei pə̌ njwô zéi ngwôʼ ghíʼ Kəlísto, ńjí ńgó ə́ lei yə́rə́, ə́ tâa mbə́ leʼé yi Kəlísto wo ghʉ̌ pə jwó ləghûʼ yé, pei pə́ cər lətsei, ə́ mə́ nzâp ḿbíŋ.

¹⁴Pə́ lə̌i mə́ nzôutə́ wéi ńté no pei pə̌i no Kəlísto, pei pə̂ pəndʉʉ-mboŋ. Pə́ lei tə́ mə́ nzôutə́ wéi yə́rə́, Zəghʼə Ndêi-lěi yi ə́ ghwǒ ləghûʼ pə́ lə́ pei.

¹⁵Koo cǒ ŋuu təcər pei ghi pə́ jwô ngwôʼ, ə́ ntê no a jwǐ ŋuu, ńté ghíʼ a jǔ zə̂u ŋuu, ńté ghíʼ a ghʉ̌ məcó məno tə́poŋ, ńté ghíʼ a jwǒ no ŋuu ə́ ntyár ńkə́u mə́u.

¹⁶Lə́ ŋuu lə̌i mə́ njwô ngwôʼ ńté no â ŋuu Kəlísto, koo sə̂ʉ kô yé yé; tə ncʉ́ʼ yə́rə́, a ŋə̂ pə́ nkhwo mbó Sê ńté no pye pə́ fûŋ yé ńgó ŋuu Kəlísto.

¹⁷Ə mpfu kuʼ mə́ ghíʼ Sê wo záʼ kôr gháp pə pye-mə́soŋ, ə́ fú pə́ lə̂ pye pé. Tə ə́ lə̌i mbə́ yi Sê wo fú pə́ lə́ paghʼə pi paghʼə pə̌ pye pé lə̂ nzáʼ kôr pye-mə́soŋ, mə́i ə́ táa ghǐ lyəghʼtə́ ə́ cʉ́ʼ fú pə́ pə́ gháʼá mpfu yi a záʼ kôr, ə́ ntághʼ ngwôʼ tû pye pi gháp lə lə̌ʼ gháp lə̂ mbə́i Nkəʉ Shʉʼʉ Sê?

¹⁸Ə tsâr Sê pə́ ndâʼ ngô: «Ə́ lə̌i mbə́ yi ŋuu ndʉŋ-ndʉŋ jwô ngwôʼ gháʼate Sê poŋə́ ŋə̂ yé ləcwôr, mə́i ə́ ghʉ̌ kə́u lə́ pəghaŋə təi tû gháp pə pəghaŋə məfaa ə́ fú cʉ́ʼ pə́ pə́ gháʼá?»

¹⁹Ghíʼ ə́ kə́ mbə́ yə́rə́ lə̂, pye pi gháp pə́ njwô ngwôʼ ńté no gháp pə́ ngʉ zə̂u yi Sê pə̌ nkǒŋ kʉ́ʼʉ́ ńgʉ̌ shʉʼʉ ə́ ndághʼ ńdə̌r lə̂ mbi, ə́ nyér məno máp mə́tsəm mbó Sê, ə́ zʉ́ yi a lə póu gháp, ə́ zʉ́ yi â laʼ ngʉ́ lə̂ məno mə́tsəm mi a ghʉ ndaʼá mə́u.