Read Ngombale 1 Pyêh 5 Bible Online

1 Pyêh 5 - Ngombale bible

1 Pyêh 5

¹N ŋə̂ ntǎghʼ mpfu wo gháʼa lə́ pye pi gháp pə́ təcər pei, ə́ mbə́ pəkə̌m ndə̂ Sê. N ngǐ lǎʼ, ə́ mbə́ zâa nkə̌m ndə̂ Sê* lə́wó; n ndə laghʼ nyôghʼ mâa ńjwó ghíʼ Kəlísto jwô ngwôʼ, n ngʉ̌ ghwo zâa yʉʼ cər ləghûʼ* yi Sê táa ghʉ̌ â kwâr pə jwó. Ə zə̂u yi m mə̌ ntúŋu ńgó gháp ghʉ̂ pə́ ngô:

²«Pei pápə́ pye-mə́soŋ pi Sê lə cóghʼ mbó pei, gháp gháʼá mbə́ məndənzʉ* Sê, koo pei pápə pə́ ghíʼ pə́ fárə wéi fárə́, pei pápə́ lə̂ ntə̂ʉ shʉʼʉ ghíʼ Sê pə̌ nkǒŋ. Koo pei ghi pə́ pápə́, ə́ ndaghʼ ńdôu pə́ lə̂ ngwô nkâp, pei pápə́ gháp ghíʼ pei lə pə́i lə̂ mbápə́.

³Koo pei lôu pə́ lə̂ nôʼtə́ pye pi pə́ cóghʼ mbó pei lə̂ mbápə́; tə ncʉ́ʼ yə́rə́, pei ŋə̂i lə̂ mbə̂u yi mboʼ gháp pyê fəiʼ lə́ pei.

⁴Pei lə̌i ngʉ́ yə́rə́, mə́i mbapə mbî yi njwǐ ghʉ̂ tó pə jwó yé, â sô nkaghʼə pə maʼ nzʉ́* tû pei, ə́ lǎghʼ ńŋáʼá ndwuŋ wéi, ə̂ pə́ nkaghʼə yi sʉ̂ wěi láʼ kwʉ̂ yé po.»

⁵Ə́ ngwǒ lə́ pei nkaŋ-ŋuu, pei zúʼ ntsʉ pəkə̌m ndə̂ Sê. Koo pei pə̂ ngʉ̂ có zə̂u təcər pei, ŋuu wei kwâŋ ńgó a lei cǒ, ńté no pə́ ŋwáʼa cər ŋwaʼa Sê ngô: «Sê lə̂ʼ no ngaŋə-ŋâʼtə, lə́ ə́ mə́ ngʉ̂ məno shʉʼʉ lə́ pye pi gháp shúʼu-mbəʉ záp ə́ ŋə́ sê.»

⁶Ghíʼ ə́ kə́ mbə́ yə́rə́ lə̂, pei shúʼú mbəʉ zei mbi Sê, ə́ zʉ́ yi a ghwǒ mətəʉ mə́tsəm, ńjí ńgó yé leʼé yi a lə tághʼ ghʉ nkǔʼ, a ŋáʼa wéi ńŋə́ tʉ́.

⁷Pei nyér məno mə́tsəm mi ə́ pə́ ntsə wéi lə́ zʉ́, ńté ńgó zʉ́ lə́ pápə wéi.

⁸Koo pei wáʼa mbəʉ zei, koo pei lê! Ńté ńgó ngaŋə-mbəu wei Sə́tə* pə̌ ŋáa nkwâtə mbəʉ pei, lə̂ ngʉ́ pei mêʼ laŋə́-ndə̂u Sê, ə́ nkwatə ghíʼ púʼ-ntəʉ kwaatə mbəʉ mə́nye, ə́ ndou məsʉ̂ lə̂ mpfár yé.

⁹Koo pei nyêr no lə́ zʉ́, ə́ nkə́ mə́ tə̂itə təitə́ cər pə̂i-ntə̂ʉ zéi nzəm Kəlísto. Pei jí ńgó pəfə̌r péi pə́tsəm cər nzʉ̂ kə́ mə́ njwô záp pə̂ ngwôʼ yi pei jwô zěi lə̂.

¹⁰Pei kə́ cí nyéʼ jwó ngwôʼ, lə́ Sê ghʉ̂ zə̂u tsəm pə̂ʉ ntə́ʉ ghíʼ ə́ lə yǎa mbə́. Ə́ zʉ́ yi məzə̂u mághʼə mi shʉʼʉ mə́tsəm fû mbó zʉ́, a lə lei lə́ Yěso Kəlísto, ə́ fúŋ wéi ghíʼ pei wo ghwo zéi yʉʼ cər ləghûʼ ye yi a wo láʼ me yé po; ə́ mbóu wéi tə tí lətwǒ tû pei, ə́ ŋə́ wéi mətəʉ pei tə́ʉ ntə̂itə́, tə cǒ ŋuu kə́ mbóu nkuʼ yé lə̂ ngʉ́ tə pei pfûŋ po.

¹¹Zʉ́ lə́ ghwǒ lə̂ ndáʼ ncí sâʼ nzʉ̂ lə̂ mənguʼ mənguʼ! Ə̂ pə́ yə́rə́.

¹²Silásʉ yi a pə́ mbó məŋ, ə́ mbə́ tâʼ fə̌r nzəm Kəlísto, yi mboʼ ŋuu tə̂m nzəm yé ŋə́ lə́ zʉ́ tə́ pôghʼ có zə̂u kə pfútə́ ghâa lə̂ ŋwáʼá məkəm ŋwaʼa wo ə́ ŋə́ lə́ pei; lə̂ ndághʼ ńcóghʼ mətəʉ méi, ə́ mbou ngʉ́ pei tsúŋu njí ńgó Sê lə sâa-sǎa ngwô poŋə-ntə̂ʉ nzəm pei, pei pôu mə́ nzʉ̂ pəi zěi.

¹³Ə cûʼtə pye Kəlísto yi ə́ pə́ Babilônə tseʼtə́ wéi, ə́ mbə́ pye pi Sê lə tsóʼ gháp, ə́ ndʉŋ-ndʉŋ ghíʼ a lə tsóʼ wéi zéi, mbaa môu ghaa Máakúsʉ lə́wó kə̌ ntseʼtə́ wéi lə́wó.

¹⁴Pei lâghʼ ḿbaʼá ntsêʼtə́ mbəʉ zéi təcər pei ghíʼ pəfə̌r pi gháp ghwǒ nkoŋə. Ńgó Sê cóghʼ mbwórə lə́ pei pə́tsəm pi pei pə̌ pye Kəlísto.