Read Ngombale 2 Pyêh 1 Bible Online

2 Pyêh 1 - Ngombale bible

2 Pyêh 1

¹Mə̂ŋ Síməu Pyêh, ə́ mbə́ ngaŋə-faʼ Yěso Kəlísto, ə́ nkə́ ncí mbə́ ngaŋə-ntə̂u ye. N ŋwaʼa ŋwaʼa wo ńŋə̂ lə́ pye pi gháp ghwǒ pə̂i-ntə̂ʉ nzəm Yěso ghíʼ paghʼ, pə̂i-ntə̂ʉ zei pə̂ zə̂u yi ə́ ghwǒ lətəi-ndwuŋ mbó pei mbaa mbó paghʼ, Yěso Kəlísto lə̂ lə ghʉ̌ yə́rə́ lə́ paghʼə, ńté ńgó a ghʉ zə̂u tsəm pə̂ ndʉŋ-ndʉŋ lə́ maa wǒwó. Â Sê zaghʼə, ə́ mbə́ Nzaʼ-nkʉ waghʼə.

²Ńgó Sê lêitə́ ghíʼ pei pə̌ njî no yé, mbaa yi Nde waghʼə Yěso Kəlísto, ə́ ngwǒ poŋə-ntə̂ʉ yé yi tə́ ndaghʼə nzəm pei, ə́ ngʉ́ mə́shwítə pə́ məntə̂ʉ pei tə ndóghʼó mvûʼ.

³Nde lə laghʼ mətəʉ mé, ə́ ŋə́ wághʼə zə̂u tsəm yi ə́ pə́ ntúŋu ńgó paghʼə ghwô, ə́ ndaghʼ ńŋə́i ghíʼ Sê pə̌ nkǒŋ; a lə ghʉ paghʼə jî Sê yi a lə fúŋ wághʼə ghíʼ paghʼə wo zʉ̂ zághʼə pəi ləghûʼ ye mbaa yi poŋə-ntə̂ʉ yé.

⁴Sê lə kə́ ndǎghʼ pə̂ mətəʉ mé mêi gháp ləghûʼ ye, ə́ ngʉ̌ ndaʼá lə́ pətə́koʼ məzə̂u lətəi-ndwuŋ mi a ghʉ̌ ŋə́ lə́ paghʼə, měi pə̂ mi ə́ wo pfútə́ wághʼə gháʼate; ńjí ńgó pei ghwo měi, ə́ nkuʼtə́ lə̂ ngwôtə́ mbəʉ zei, ə́ nkhʉ̂ məno tə́poŋ mi məmbəʉ pye cʉ́ŋə gháp lə̂ ngʉ́ měi cər nzʉ̂ yo; ə́ ncʉ́ʼ ngwô pə̂ cǐ yi Sê ghwǒ zěi.

⁵Ə̂ zə̂u yi ə́ ghʉ̌, ə́ pə̂ ntúŋu ńgó pei sáʼ təʉ ə́ ndághʼ cǐ shʉʼʉ ńkʉʼʉ́ pə̂i-ntə̂ʉ zéi nzəm Yěso Kəlísto; ə́ ngwǒ lə̂ cǐ shʉʼʉ, ə́ nkʉʼʉ́ ńjí zə̂u yi Sê pə̌ nkǒŋ;

⁶ə́ ngwǒ lə̂ njí zə̂u yi Sê pə̌ nkǒŋ, ə́ nkʉʼʉ́ ghwotə-mbəʉ; ə́ ngwǒ lə̂ ghwotə-mbəʉ, ə́ nkʉʼʉ́ shəghʼ-ntə̂ʉ, ə́ ngwǒ lə̂ shəghʼ-ntə̂ʉ, ə́ nkʉʼʉ́ nyáŋ ghíʼ Sê pə̌ nkǒŋ;

⁷ə́ ngwǒ lə̂ nyáŋ ghíʼ Sê pə̌ nkǒŋ, ə́ nkʉʼʉ́ njwó fə̌r gho ghíʼ o jwǒ tû-mbəʉ zô; ə́ ngwǒ lə̂ njwó fə̌r gho ghíʼ o jwǒ tû-mbəʉ zô, ə́ nkʉʼʉ́ nkoŋə.

⁸Pei lə̌i ngwô məno mwo mə́tsəm, ə́ mbou mə́ sâʼ mətəʉ ńgó měi kʉʼʉ́ ngúʼ ndəu pei, mə́i ə́ wo ghʉ̌ mbəʉ zéi záŋə́ lə̂ məfaʼ Sê, pei póu nkʉʼʉ́ njí ŋuu yi Nde waghʼə Yěso Kəlísto pə̌ wěi.

⁹Lə́ ŋuu yi káa a pə́ ŋə̂i yé lə̂ mbə̂u yi n ndaʼ lo, â jí ńgó â fwoghʼ-mə́nyôghʼ, káa pə́ tsúŋú jwô yé yʉʼ. A lyəghʼə mə́ ńgó Sê lə soghʼ məfaa ye yi a lə ghʉ cǒ mpfu.

¹⁰Pəfə̌r pâa, ə̂ zə̂u yi ə́ ghʉ̌, ghíʼ Sê lə tsóʼ wéi ə́ mbou fúŋ wéi lə̂ fáʼ faʼ yé lə̂, pei sáʼ təʉ lə̂ laŋə́-ndə̂u zêi; pei lə̌i ngʉ́ yə́rə́, pei lâʼ fû wéi lə̂ laŋə́-ndə̂u Sê nkwǎr po.

¹¹Ə́ lêi yə́rə́, ə Sê sâa-sǎa ntsóʼ laŋə́-ndə̂u ńtághʼ, pei lêi mə́u nkə́u cər ləfou yé; ə́ cər ləfou tə́ láʼ mé yi Nde waghʼə Yěso Kəlísto yi a pə̌ Nzaʼ-nkʉ waghʼə.

¹²Ə̂ zə̂u yi ə́ ghʉ̌, pei pə̌ tə mə́ njî məno mêi mwo, ə́ mbou nkúʼtə́ no lə́nə́ʉ yi pə́ lə jyéʼ wéi tə ə́ təi; lə́ n ndáʼ kə́ cí kʉ̂ʉtə wéi měi kʉ́ʉtə́.

¹³Lə́ n njwǒ ńgó ə́ poŋ ńgó mpfu yi m mbyěr cər yo nzʉ̂, n nkə́ mə́ nkʉ̂ʉtə wéi məno mêi kʉ́ʉtə́ lə̂ ndághʼ ńjyě wéi.

¹⁴M mə̌ njî ńgó mpfu yi n ngwo fú cər yo nzʉ̂ lə̌r pə mə́ nkǔʼ, Nde waghʼə Yěso Kəlísto kə ghʉ̌ n njî.

¹⁵N ngwo ghʉ̌ lə̂ mbə̂u yi n ntáa kwʉ́, pei cʉ́ʼ nzəm nkə́ mə́ nkʉ̂ʉtə məno mêi mi n ndə jyéʼ wéi kʉ́ʉtə́.

¹⁶Ə́ yaa ngǐ pə́, məno mi paghʼ laghʼ ńdâʼ wéi mbə̂u yi Nde waghʼə Yěso lə lǎghʼ ńtó cər ləghûʼ ye yi a ghwǒ mətəʉ, kâa pə̂ yé məno púʼ-kap mi pə́ kwaŋtə kwaŋtə́. Paghʼ lə tsúŋu njwó yé cər ləghûʼ ye pə́ lə̂ nyôghʼ mághʼ.

¹⁷Ə́ lə pə́ mpfu yi Tǎa Sê lə ŋə́ məkuʼ mé, ə́ mbou ŋáʼá ndwuŋ yé ŋə́ tʉ́, pə́ zûʼ nji Sê, ə́ zʉ́ yi ləghûʼ tsəm fû pə́ mbó zʉ́, lâʼ lə́ zʉ́ ngô: «Yo Môu ghaa yi n nkǒŋ yé gháʼate, məŋ lə̂ ndə tsóʼ yé, n ngwo lətsei ńté yé.»

¹⁸Ə ngǐ fú tʉ̌-lə́pû pə́ laʼ yə́rə́, ə́ pə̂ mpfu yi paghʼ pə Yěso lə pə́ ndəu ləkôr Tǎa Sê, tû-mbəʉ zághʼ pə̂ nzúʼ.

¹⁹Kâa pə̂ yé pə́ ndaʼ yə́rə́, ə no yi pətsətə́-nkəʉ Sê lə lǎʼ ńté no zêi təitə gháʼate; ə́ poŋ ńgó pei tsúŋú ntə́ lətuŋú ə́ nzúʼ zěi. Ə́ pə́ ghíʼ lâm yi a keʼ yʉʼ cər nzə̌m lə̂, ə́ ndaghʼ ńzʉ́ʼtə́ mpfu yi cwôʼ-saŋ yi a nyárə ńgó yʉʼ pə́ mə́ ngwo fóghʼ wó wo kwǎr, ə̂ pə́ yə́rə́, pei sâa-sǎa mbə́ cər nkeʼ.

²⁰Pei yáa ntsə̌mbi njí ńgó mboʼ cǒ ŋuu kûʼ yé lə̂ ndághʼ ndʉʉ jîno ye, ə́ nkéʼtə́ no yi Pətsətə nkəʉ Sê lə lǎʼ pə́ ŋwaʼa cər ŋwaʼa Sê po.

²¹Ńté ńgó cǒ Nkəʉ laa kə́ ghí kwǎr, ə́ pə̂ ləkoŋtə ŋuu-məsoŋ, lə́ Zəghʼə Ndêi-lěi lə́ lə cʉ́ŋə pye, gháp laʼ no yi ə́ fû mbó Sê.