Read Ngombale 2 Pyêh 2 Bible Online

2 Pyêh 2 - Ngombale bible

2 Pyêh 2

¹Pətsətə́-nkəʉ Sê pi məlaa lə kwatə təcər pye Ísə́lahêl mpfu ntsəmbi; ə́ kə́ mbə́ ndʉŋ-ndʉŋ ghíʼ pəjyéʼ-pye no Sê pi məlaa ghʉ̌ kwatə́ təcər pei. Gháp ghʉ̌ jyéʼ pye məno mi ə́ pə́ məlaa ə́ mbóu mə́ ncôŋ yʉʼ, ə́ pǒu jyéʼ pye ńgó gháp lə̌ʼ no Nde, lə́ mə́i zʉ́ lə́ lə zə́u tû záp, gháp cwôr; gháp ghʉ̌ ghʉ̌ yə́rə́, ə́ lǎghʼ ńshǔŋ ndou cóghʼ tû páp, ə̂ pə́ghʼ gháp, ə cʉ́ŋə mə́ tə mbáatə́ gháp.

²Pye tə nzáa ghʉ̌ tsə́ʉ nzəm páp, lə̂ laŋə́-ndə̂u tə́poŋ zêi, ə́ zoutə́ laŋə́-ndə̂u Sê, lə́ zěi lə́ pə̂ laŋə́-ndə̂u no lə́nə́ʉ.

³Gháp ghʉ̌ kwaŋtə́ məno lǎʼ, ə́ lǎghʼ futə́ wéi; ə́ pfú məzə̂u méi, ńté ńgó gháp koŋ nkâp gháʼate. Lə́ Sê lə láʼ mə́ nzáʼ kôr ghap; ə́ wo kə́ cî yé gháp poŋə́ mě po!

⁴Ə́ yaa ngǐ pə́, káa Sê lə nyêr yé pəcwôʼ Sê pi gháp lə fǎa no tə́ tághʼ ngwôʼ tû páp, a lə zéʼé gháp mǎʼ cər tâa tə́ ləlyəghʼtə́; ə́ ndǎghʼ pəcêŋ ńkâp gháp yʉʼ wó, gháp nuŋ wó cər nzə̌m, ə́ mə́ nzʉ̂ʼtə leʼé yi a ghʉ̌ fěʼ gháp.

⁵Pye pi mpfu tsəmbi lə fâa záp no lə́wó, káa Sê lə nyêr yé gháp tə́ tághʼ ngwôʼ tû páp; a lə ghʉ mbʉŋ tə tsə lô, mənci fû məsʉ̂ məsʉ̂ ńkóʼ, ə́ mbə́ghʼ gháp pə́tsəm. Ndaʼ pye ləfǎa lə́ lə cwór. Pə́ laʼ gháʼá Nówa yi a lə pə́ ndaʼ ŋuu yi a lə pə́ ndâʼ ńgó pə́ ghwo lə̂ nyáŋ ghíʼ Sê pə̌ nkǒŋ, ə́ ngʉ̌ pəcó pye saambwô.

⁶Sê lə tâghʼ ngwôʼ tû pye túsoŋ Sodôm gháp pi túsoŋ Ngomôh, ə́ ndǎghʼ mǒghʼ ńtǒu gháp tə gháp shərə ncʉ́ʼ pfû, ə́ ndaghʼ ńnyárə gháʼá fəiʼ no yi ə́ ghʉ̌ cə́r pye pə́tsəm pi gháp təi tû ə́ ŋə̂ mbó Sê.

⁷Ə́ ngǐ ghʉ yə́rə́, ə́ fú wó ńkwárə́ Lôt, a cwôr; ńté ńgó a lə pə́ wó, ə́ mbə́ ŋuu no lə́nə́ʉ, ə́ mə́ njwô məno tə́poŋ mi pye-mə́soŋ ghʉ̂, ə́ pə̂ ngághʼə yé.

⁸Ŋuu yi a lə pə́ ndʉŋ-ndʉŋ mbi Sê lêi, lə pə́ ncî təcər páp, ə́ mə́ njwô məno tə́poŋ mi gháp ghʉ měi mbou mə́ nzûʼ mətsâr tə́poŋ mi gháp tsâr měi. A pə̂ leʼé tsəm ə́ mə́ njwô mbə̂u lənyâŋ tə́poŋ zêi, ə́ ghaghʼə yé gháʼate, ńté no a lə pə́ ŋuu ndʉŋ-ndʉŋ mbi Sê.

⁹Pə́ lei lə̂ mbə̂u məno zêi, ə́ njwó mbə̂u yi Nde kǔʼ lə̂ ndághʼ ńkwárə́ ŋuu yi a pə̌ ŋəi ghíʼ a pə̌ nkǒŋ cər ngwôʼ, ə́ mbou fú mə́u njwó mbə̂u yi a kǔʼ lə̂ ndághʼ nyéʼ ńdoʼó pye pi gháp ghʉ məno tə́poŋ, lə̂ ndághʼ ḿbáp leʼé yi a ghʉ̌ záʼ kôr gháp, ə́ tághʼ ngwôʼ tû páp;

¹⁰Kwaʼ pye pi a ghʉ̌ jǐ lə̂ ntághʼ ngwôʼ tû páp, ə̂ pye pi gháp ghʉ məno coŋ ndwuŋ mi mbəʉ záp cʉ́ŋə gháp lə̂ ngʉ̂, ə Sê tâghʼ ləpə̌ʉ ye, gháp wâghʼ zěi. Pəjyéʼ-pye məno Sê pi məlaa pêi ngaŋə-ŋâʼtə, ə́ mbou ŋə́ʼtə́ məno. Káa gháp pə́ ndâghʼ gháp məzəghʼə mi ə́ ghwǒ ləghûʼ tʉ̌-lə́pû fûŋ có zə̂u; lə́ ə́ nzoutə měi zoutə́.

¹¹Pəcwôʼ Sê pə́ tə ngwô mətəʉ ə́ mbóu ntə̂i nděi pəjyéʼ-pye no Sê pi məlaa pêi, lə́ káa pə́ tə̂ʉ gháp mbi Nde; ə́ pûtə gháp, ə́ pǒu zoutə məzəghʼə mêi.

¹²Pye pêi ghʉ záp no pə́ tə kwaŋ, ghíʼ mənye ləghěi mi gháp lə tó záp ndəu ndesé, pə́ ghíʼ pə́ wo pǒu ghoutə gháp ə́ jwítə́; pye pêi pə́ nzoutə məzə̂u mi káa gháp pə́ njî gháp, pə́ ghʉ̌ ghoutə́ gháp jwítə́ ghíʼ mənye ləghěi;

¹³gháp ghʉ̌ ghwǒ pʉ̌ŋ mbəu məno tə́poŋ mə́tsəm mi gháp lə ghʉ̌. Gháp lei tə ngʉ́ zə̂u yi mbəʉ záp cʉ́ŋə gháp lə̂ ngʉ́ ə́ ntə̌ʉ-nəu, mbəʉ záp poŋ gháʼate, ə́ pou mbə́ mpfu yi pei pəpáp pə́ ntəm zə̂u nzʉ̂, gháp laghʼ məlaa máp ńtə́m sə̂ʉ lə́ pei, ə́ mbou ncôŋ ndwuŋ wéi.

¹⁴Nyôghʼ máp kə́ ntə̂ʉ yé mpfu tsəm pə́ lə́ pəngyě, káa pə́ kâa gháp cǒ mpfu lə̂ ngʉ́ məfaa. Gháp lə̂ʼ məkei ńdághʼ ńgǒu pye pi gháp pyér ntʉŋə tʉŋə́ lə̂ laŋə́-ndə̂u Sê. Ntə̂ʉ gháp tə́ʉ pə́ lə̂ fútə́ pye mpfu tsəm, ə́ pfú məzə̂u máp; Sê ghʉ̌ cóghʼ ndou tû páp.

¹⁵Gháp lə meʼ laŋə́-ndə̂u Sê, ə́ cwí; ə́ ncʉ́ʼ ŋə̂i pə́ lə̂ laŋə́-ndə̂u yi Balâm môu Bosôo lə ŋəi yé mə́u. Pə́ lə laghʼ nkâp ńzə́u yé, a ghʉ̂ no tə́poŋ;

¹⁶lə́ Sê sâʼ yé, ńté no yi a fǎa zěi. Njəkáasʉ lə̌i tsâr yé po, lə́ a lə laghʼ nji ŋuu-məsoŋ ńdáʼ no lə́ Balâm, ə́ ndaghʼ ńkə́ʼtə́ yé lə̂ ngʉ́ ghəghəʉ yi a lə lou ngʉ́ zěi, ə́ ndaghʼ ńnyárə́ ńgó â ntsətə-nkəʉ Sê.

¹⁷Pəjyéʼ pye no Sê pi məlaa pêi pə́ ghíʼ məsâʼ-nci mi ə́ kə pə́ ŋə̂ nci, ə́ mbóu nzə́u; ə́ mbə́ ghíʼ mbʉŋ yi kǒʼ, ə fə̂m khwor ńdaghʼ ńdə̌r. Ə Sê tsuŋu mə́ zap yʉʼ cər nzə̌m yi ə́ shʉ̂ŋ gháʼate.

¹⁸Gháp laghʼ mətsâr ŋâʼtə mi káa pə́ ndâʼ yé có no, ə́ fútə pye pi gháp kə pyér fû pə́ təcər ngaŋə-məfaa ńkwár. Ə zə̂u yi gháp laghʼ ńshûŋ pye ńŋə̂ mbəʉ páp pə̂ ghíʼ gháp jyêʼ ńgó mboʼ ŋuu ghʉ zə̂u tsəm yi mbəʉ ye cʉ́ŋə yé lə̂ ngʉ́.

¹⁹Gháp pə̂ ndâʼ lə́ páp ńgó gháp wo ghʉ̌, gháp cʉ́ʼ pəndʉʉ-nə̂r, lə́ ə́ ngǐ pə́ lǎʼ, ə́ mbə́ məpuʼ məno coŋ ndwuŋ mi ə́ pə̂ghʼ pye, ńté ńgó ŋuu lə̌i mêʼ mbəʉ ye lə̂ zə̂u tə zěi zʉ́ yé, a cʉ̂ʼ pûʼ zêi zə̂u.

²⁰Pye lə̌i ndâghʼ ghíʼ gháp lə tsə́ʉ nzəm Nde waghʼə Yěso Kəlísto, yi a pə̌ Nzaʼ-nkʉ waghʼə, ə́ nkwárə́ mbəʉ záp lə̂ məno coŋ ndwuŋ mi ndəu nzʉ̂ yo, ə́ mbóu nyér, məno coŋ ndwuŋ mêi nkə́ ncí nzʉ́ gháp, mə́i gháp wo pǒu pə́ cər ngwôʼ tə ə̂ lêi yi gháp lə yǎa mbə́ cər wó.

²¹Mboŋə lə pə́ ghíʼ mboʼ gháp lə yaa mbə́i njî gháp laŋə́-ndə̂u no-lə́nə́ʉ po, ə́ nděi ghíʼ mboʼ gháp lə jî, ə́ mbǒu nkə́ ncí ndə̂ʼ, ə́ měʼ tsâr Sê yi pə́ lə jyéʼ gháp.

²²Gháp lə̌i ngʉ́ yə́rə́, ə́ laghʼ ḿbə̂utə lə̂ no yi saghʼ-ləghaa lâʼ ngô: «Məngwʉ̂ zéʼé, ə́ mbou shə́rə́ ńzʉ́», mbaa ngô: «Pə́ soghʼ kúnye tə nyér yé, a wô nkárə́ cər tətapə.»