Read Ngombale 2 Pyêh 3 Bible Online

2 Pyêh 3 - Ngombale bible

2 Pyêh 3

¹Pəsə̌u pâa pi lətəi-ndwuŋ, yo laghʼ ḿbə̂ gháʼa ŋwaʼa mbâatə pwô yi məŋ ŋwáʼa ə́ ŋə̂ lə́ péi. Ə́ pə́ cər pəŋwaʼa pêi pə́pwô, m mə̂ nkʉ́ʉtə́ wéi məno mi pei lə jyéʼ, lə̂ ndághʼ ńjyě jîno zéi, ə́ fǎʼ ndʉŋ-ndʉŋ.

²M mə̌ ntsâa ńgó pei kʉ́ʉtə́ məno mi pətsətə́-nkəʉ pi Sê lə tə́u gháp mpfu-ntsəmbi lə tsətə́, ə́ mbou nkʉ́ʉtə́ ntǎghʼ Nde yi a pə̌ Nzaʼ-nkʉ waghʼə lə ŋə́ lə́ pəghaŋə-ntə̂u pé gháp jyêʼ wághʼə.

³Pei tsə́mbi njí ńgó ə́ táa pə́ lə́ pəlyəghʼ-nzəm məleʼé, ə pye pi mbəʉ záp cʉ́ŋə gháp, gháp ghʉ məno tə́poŋ kwátə́. Gháp ghʉ̌ pə́ jwi wéi,

⁴ə́ laʼ ngô: «Lə́u Yěso lə laʼ lə́ pei ńgó a ghʉ̌ pə̌ʉ tó péh? Tə â ghǒ? Tə fú ghíʼ pəmə́ngâa-njʉʼ pághʼə lə kwʉ́tə́, zə̂u tsəm kə́ mbyér mbə̂ yé pə́ ghíʼ ə́ lə pə́, tə fú ghíʼ Sê lə tsuŋú nzʉ̂!»

⁵Gháp ghí pə́ laʼ yə́rə́, ə́ ngʉ ghíʼ káa gháp pə́ njí, lə́ ə́ ntsúŋú mə́ njî ńgó Sê lə laghʼ pə̂ tsâr yé ńtsúŋú ləfaŋ gháp ndesé tə ndǐ saghʼ mə́; ə́ ngʉ́ ndesé fû cər nci kwâr, a pôu ndâghʼ nci ńzáʼ məndaghʼə měi.

⁶A lə kə́ mbou ndághʼ pə̂ nci, ə́ nci yi ə́ lə pə́ cǒ mpfu fú məndyəghʼə́ məndyəghʼə́ ńkóʼ ə́ shwə̂ghʼ ndəu ndesé tsəm, ə́ nǎa zə̂u tsəm ə́ mbə́ghʼ. Nci wêi lə fú lə̂ mbʉŋ tə tsə.

⁷Ə́ ngwǒ lə̂ ləfaŋ gháp ndesé yi ə́ pə́ wo mpfu wo, mə́i tsâr Sê zêi pə́ ndâʼ ńgó ə wo kə́ pə́ pə́ wó tə láʼ ŋə́ leʼé yi Sê wo lǎghʼ mǒghʼ pə́ghʼ ləfaŋ gháp ndesé zêi. Sê wo kə́ loʼó měi loʼó tə ŋə́ leʼé yi a wo záʼ kôr pye-mə́soŋ ə́ pə́ghʼ pye pi gháp lə pə́ tə̂i tû ńŋə̂ lə́ zʉ́.

⁸Pəsə̌u pâa pi lətəi-ndwuŋ, tâʼ zə̂u pə́ wó yi kâa pə́ ntúŋu yé ńgó pei lyə́ghʼə́, ə́ mbə́ ngô: ə́ pə́ mbó Nde, tâʼ leʼé pə̂ ghíʼ mənguʼ tâʼ-tóusʉ, mənguʼ tâʼ-tóusʉ pou mbə́ ghíʼ tâʼ leʼé.

⁹Káa Nde pə́ ndə̂i yé lə̂ ngʉ́ no yi a lə ghʉ̌ ndaʼá mə́u lə̂ ngʉ́, ə́ pəutə; ghíʼ pəcó pye kwaŋ záp lə̂. Lə́ a ghwo shəghʼ-ntə̂ʉ nzəm pei, ńté no kâa pə́ nkôŋ yé ńgó cǒ wei kə́u cwí; a lou yé pə́ ńgó ŋuu ntsəm ghwô saa lə̂ ndâghʼ ńkə́p cǐ ye.

¹⁰Ə́ ghʉ̌ pə́ leʼé yi Nde wo ntó wó, â ghápə-ghapə́ ntó ghíʼ ntsǒŋ tô lə̂. Ə́ ghʉ̌ pə́ leʼé wêi, ləfaŋ pyér lə̂ təʉ, ə́ mê; ə mǒghʼ tôu zə̂u tsəm yi ə́ pə́ ləfaŋ tə ə̂ shə́rə́ ńcʉ́ʼ pfû, ə ndesé gháp pə zə̂u tsəm yi ə́ pə́ ndəu wó nâa mě.

¹¹Ghíʼ zə̂u tsəm wo nǎa mě yé lə́ zêi mbə̂u lə̂, ə́ laghʼ ńdâʼ wéi gháʼá mbə̂u lənyâŋ yi pei ghwǒ lə̂ nyáŋ wěi mpfu wo! Ə́ pə́ ntúŋu ńgó pei ŋə̂i ghíʼ Sê pə̌ ntuŋú ə́ mbou ndár mbəʉ zéi lə́ zʉ́.

¹²Pei pi pei zʉ́ʼtə ńgó Nde tóghʼ ntó, ə́ ghʉ̌ pə́ leʼé wêi, mǒghʼ tôu ləfaŋ, zə̂u tsəm yi ə́ pə́ wo fú sʉ́ tə shə́rə́ ńcʉ́ʼ pfû.

¹³Sê lə ghʉ̌ ndaʼá lə̂ ngʉ́ ntsuŋú ləfaŋ yi shwî mbaa ndesé yi shwî; ə́ pə̂ yʉʼ yi pə́ ghʉ̌ pə́ wó, ə́ ghʉ pə̂ məno mi ə́ pə́ ndʉŋ-ndʉŋ mbi zʉ́; ə̂ zə̂u yi paghʼə zʉ̂ʼtə zěi mpfu wo.

¹⁴Pəsə̌u pâa pi lətəi-ndwuŋ, ə̂ zə̂u yi ə́ ghʉ̌, pei ghí pə́ zʉ̂ʼtə leʼé zêi, ə́ mə́ sâʼ təʉ lə̂ mbə́ tə́ lǒʼ, ə́ mbou ngʉ́ tə lə́u ə̂ pə́ yi mboʼ ŋuu côghʼ yé fə̌r paa pei lə̂ có no po; ńjí ńgó ə́ lei yə́rə́, pei pə Sê nyâŋ lə̂ mbwórə.

¹⁵Pei ghwô tû pei ńgó Nde ghí tí tə́ tóghʼ tó gháʼá, ńté no a pə̌ ndou lə̂ ŋə́ wéi saa lə̂ ndághʼ ńgwǒ ləcwôr, ə́ kə́ mbə́ ndʉŋ-ndʉŋ ghíʼ Pôl fə̌r waghʼə yi lətəi-ndwuŋ lə lǎghʼ jîno yi Sê lə ŋə́ lə́ zʉ́ ə́ ŋwaʼá, ə́ ŋə́ lə́ pei.

¹⁶Ə̂ no yi a lə ŋwaʼá cər pəŋwaʼa pé pə́tsəm lə̂ məyʉʼ mi a lǎʼ no tə ncwíʼí no zêi yo. Məcó məyʉʼ cər pəŋwaʼa pé pêi təi lə̂ nzúʼ, pye pi gháp pyér məghəghəʉ, ə́ mbou mbyér ntʉ́ŋə tʉŋə́, gháp têitə měi, ə́ ndághʼ ńdaʼ məno mi kâa pə̂ yé měi, ghíʼ gháp yaa ncí ngʉ̂ yə́rə́ lə̂ məcó məyʉʼ ŋwaʼa Sê. Gháp ghʉ yə́rə́, ə́ ndaghʼ ńshûŋ məndou ńcôghʼ tû páp.

¹⁷Ə́ ngwǒ lə́ pei, pəsə̌u pâa pi lətəi-ndwuŋ, mə́i n nzaʼ mə́ nzʉ̂ ndǎʼ wéi zə̂u yi ə́ ghʉ̌ lěi tə pei pə̂ njí. Ghíʼ ə́ kə́ mbə́ yə́rə́ lə̂, pei laghʼə́ tû zéi lə́ pə́ yi mboʼ pye pi gháp təi tû mbó Sê futə wéi, pei fâa laŋə́-ndə̂u; pei jí ńgó pei ghwo mə́ gháʼá lətə̌ʉ yi shʉʼʉ, koo pei pə̂i, gháp ghʉ pei cwî zěi.

¹⁸Tə ncʉ́ʼ yə́rə́, pei kʉʼʉ ndár pə̂ mbəʉ zéi lə̂ Yěso Kəlísto, ə́ mbou nkʉ́ʼʉ́ njí yé ndághʼ ńdə̂r lə̂ mbi, ə́ zʉ́ yi a pə̌ Nde waghʼə ə́ mbou mbə́ Nzaʼ-nkʉ waghʼə. Ləghûʼ pə́ mbó zʉ́ lə̂ fú mpfu wo, ə́ ngwó ŋə́ lə̂ mənguʼ mənguʼ! Ə̂ pə́ yə́rə́.