Read Ngombale 1 Jâŋ 1 Bible Online

1 Jâŋ 1 - Ngombale bible

1 Jâŋ 1

¹Paghʼ ŋwaʼa ŋwaʼa wo, ə́ ŋə̂ lə́ pei lə̂ ndághʼ ńdǎʼ wéi no lə̂ Tsâr yi ə́ ŋə̂ ləcwôr, ə́ yi ə́ pə́ wó tə fú ləjitə́ zə̂u tsəm: Paghʼ lə laghʼ mətuŋú mághʼ ńzúʼ, ə́ ndághʼ nyôghʼ ńjwó, ə́ ntsuŋú náŋtə́, ə́ mbóu ndǎghʼ mbô mághʼ ńkə̂u.

²Ləcwôr wêi lə kwar, paghʼ jwô; ə̂ zə̂u yi ə́ ghʉ̌, paghʼ pə̂ ndâʼ wéi no ńté wěi, ə́ mbou mə́ ndâʼ wêi no lə̂ ləcwôr tə me yi a lə pə́ mbəʉ Tǎa, ə́ ntó nyárə́ mbəʉ yé mbó paghʼ.

³Ə zə̂u yi paghʼ kə jwó ə́ mbou nzúʼ, ə̂ zěi yi paghʼ lâʼ wéi, ńjí ńgó pei təmtə́ lə́ paghʼ, paghʼə pə́tsəm naa təmtə́ lə́ Tə́ gháp Môu ye Yěso Kəlísto.

⁴Paghʼ ŋwaʼa no zêi yo ńŋə̂ lə́ pei, ńjí ńgó ə́ lei yə́rə́, paghʼ ghwô lətsei waghʼ[1] tə lə́u có zə̂u pûŋ yé mə́u po.

⁵No yi paghʼ wo ndǎʼ pei lo, ə̂ yi paghʼ lə zúʼ mbó Yěso Kəlísto. A lə lâʼ ngô: «Ə Sê nkeʼ, káa cǒ məyʉʼ nzə̌m pə̂ yé lə̂ ngʉ̌ məno yé.»

⁶Paghʼə lə̌i ndáʼ ńgó paghʼə pə pǎp təmtə́ mə́ ńcʉ́ʼ tâʼ ŋuu, ə́ mbou mə́ ŋə̂i cər nzə̌m, ə́ pə̂ ńgó paghʼə pə̌ ntâŋ məlaa; ə́ laghʼ mbə́ ńgó káa pághʼə pə́ ngʉ̂ wághʼə zə̂u yi a pə̌ nkǒŋ.

⁷Lə́, paghʼə póu mə́ ncî cər nkeʼ, ghíʼ Sê tû-mbəʉ yé kə̌ mbə́ yé cər nkeʼ, mə́i paghʼə wo təmtə́ ə́ cʉ́ʼ tâʼ təcər paghʼə, məci Môu ye Yěso Kəlísto cʉ́ʼ sóghʼ wághʼə lə̂ məno tə́poŋ mə́tsəm.

⁸Paghʼə lə̌i ndáʼ ńgó káa có no tə́poŋ pə̂ yé lə́ paghʼə, ə́ pə̂ ńgó paghʼə pə̌ futə mbəʉ zághʼə, lə́u no lə́nə́ʉ yi fû mbó Sê pə̂ yé lə́ paghʼə po.

⁹Lə́, paghʼə lə̌i ntə́ʉ mbi Sê, ə́ mbə́i məno tə́poŋ mághʼə, mə́i a wo lyəghʼə́ měi ńŋə́ lə́ paghʼə, ə́ fú lə́ paghʼə kwarə́ no tə́poŋ tsəm, ńté no ə Sê ŋuu yi a lei tə ndáʼ ńgó a wo ghʉ có zə̂u, ə́ nkə́ ngʉ̂ zěi ndʉŋ-ndʉŋ ghí a lǎʼ.

¹⁰Paghʼə póu nkə́ ndáʼ ńgó káa paghʼə pə́ wághʼə ngaŋə-məfaa, mə́i paghʼə lâghʼ Sê ńgʉ̌ ngaŋə-məlaa, ə́ laghʼ nkə́ mbə́ lə́wó ńgó káa tsâr yé pə̂ yé lə́ paghʼə.