Read Ngombale 1 Jâŋ 2 Bible Online

1 Jâŋ 2 - Ngombale bible

1 Jâŋ 2

¹Ghəpə́ zâa, n ntə̂u ŋwaʼa wo ńŋə̂ lə́ pei gháʼá, ə́ ndaghʼ ńdôu ńgó pei ghwótə́ mbəʉ zéi tə lə́u ə́ ngʉ wéi có no tə́poŋ po. Lə́, ə́ nkə́u nkə́ mbə́ yi ŋuu ghʉ mə́ no tə́poŋ, mə́i paghʼə ghwo nzoŋ-tû waghʼə mbəʉ Tə́ waghʼə: a pə̂ Yěso Kəlísto yi a pə̌ ndʉŋ-ndʉŋ mbi Sê.

²Ńté no Yěso lə laghʼ mbəʉ ye ə́ núŋú poʼ Sê, ńjí ńgó ə́ lei yə́rə́, Sê lyəghʼə məno tə́poŋ mághʼə; lə́u ə́ ndyəghʼə́ yé pə̂ ndaʼ mághʼə po, lə́ ə́ ndyəghʼə́ mbaa mi maa ŋuu tsəm ndəu nzʉ̂.

³Paghʼə lə̌i mə́ ŋə̂i ghíʼ ləpə̌ʉ Sê pə́ ntúŋú, ə́ laghʼ ńnyárə́ ńgó paghʼə pə̌ njî yé.

⁴Ŋuu lə̌i ndáʼ ngô: «M mə̌ njî Sê», ə́ mbou ndə́iʼ pə́ ŋə̂i yé ghíʼ ləpə̌ʉ Sê pə́ ntúŋú po, ə́ laghʼ mbə́ ńgó â ngaŋə-məlaa, lə́u no-lə́nə́ʉ pou mbə̂ yé lə́ zʉ́ po.

⁵Lə́, ŋuu yi a pǒu mə́ ŋə̂i ghíʼ tsâr Sê pə́ ntúŋu, â ŋuu yi a sâa-sǎa nkǒŋ Sê lə̂ ntə̂ʉ yé tsəm. Yo laghʼ mbə̂ mbə̂u yi mboʼ paghʼə laghʼ ńjî ńgó paghʼə pə Sê təmtə́ ḿbə́ tâʼ.

⁶Ŋuu lə̌i mə́ ndâʼ ńgó gháp Sê təmtə́ ə́ mbə́ tâʼ, a ghʉ̂ ləcǐ-mbî ye pə̂ ghíʼ yi Yěso lə pə́.

⁷Pəsə̌u pâa pi lətəi-ndwuŋ, ləpə̌ʉ yi məŋ ŋwaʼa ńŋə̂ lə́ pei lo, káa ə̂ pə̂ yé ləpə̌ʉ shwî, ə̂ ndwuŋu ləpə̌ʉ yi pei pə̌ njí tə fú lənuŋú ngoŋ. Ndwuŋu ləpə̌ʉ wêi pə̂ tsâr yi pei kə yaa mə́ nzúʼ.

⁸Lə́, ə́ pou mbə́ gháʼa, ə́ ncʉ́ʼ mbə́ pə́ yi shwî yi n ŋwaʼa ńŋə̂ lə́ pei; zêi yo ləpə̌ʉ ə̂ yi shwî, ə́ nděi lə̂ zə̂u yi pə́ jwô lə́ Kəlísto mbaa lə́ pei zéi. Ńté no kwaʼ nkeʼ pə mə́ nkeʼ yʉʼ, ə nzə̌m pə̂ mê.

⁹Ŋuu lə̌i mə́ ndâʼ ńgó a pə́ cər nkeʼ, lə́ ə́ mbou mə́ mbâa fə̌r yé, ə́ pə̂ ńgó a pyěr pə́ cər nzə̌m.

¹⁰Ŋuu yi a pə̌ nkôŋ fə̌r ye, â ŋuu yi a pə̌ cər nkeʼ; ə́ pə̂ yə́rə́, có zə̂u pə̂ yé wó yi mboʼ a kôtə mə́u ḿpfúŋ po.

¹¹Lə́, ŋuu yi a pə̌ mbaa fə̌r ye pə̂ cər nzə̌m; ə́ mə́ ŋə̂i cər wó tə́ pə́ njî yʉʼ yi a lər lə̂ wó, ńté ńgó nzə̌m ghʉ a fwôghʼ.

¹²Ghəpə́ zâa, n ŋwaʼa ŋwaʼa wo ńŋə̂ lə́ pei gháʼá, ńté ńgó pə́ leitə́ lə̂ ləjôghʼ Yěso Kəlísto, ə́ ndyəghʼə́ məfaa wéi ńŋə́ lə́ pei.

¹³Pətə́ pâa, n ŋwaʼa ŋwaʼa wo ńŋə́ lə́ pei, ńté ńgó pei pə̌ njî ŋuu yi a pə̌ wó tə fú lənuŋú ngoŋ. Nkaŋ-ŋuu, n ŋwaʼa ŋwaʼa wo ńŋə́ lə́ pei, ńté ńgó pei lə lwóʼó Sə́tə ńzʉ́ yé.

¹⁴Ghəpə́ zâa, n ŋwaʼa ŋwaʼa wo ə́ ŋə̂ lə́ pei, ńté ńgó pei pə̌ njî Tə́ waghʼə. Pətə́ pâa, n ŋwaʼa ŋwaʼa wo ńŋə́ lə́ pei, ńté ńgó pei pə̌ njî ŋuu yi a pə̌ wó tə fú ləjitə́. Nkaŋ-ŋuu, n ŋwaʼa ŋwaʼa wo ńŋə́ lə́ pei, ńté ńgó pə̂i-ntə̂ʉ zéi nzəm Kəlísto təitə: Ə tsâr Sê pə́ lə́ pei, ńté ńgó pei kə lwóʼó Ŋuu tə́poŋ ńzʉ́ yé.

¹⁵Koo pei kôŋ nzʉ̂, mbaa có zə̂u yi ə́ pə́ ndəu nzʉ̂. Ŋuu lə̌i nkôŋ nzʉ̂, mə́i mboʼ a kə̂ mbóu nkuʼ yé lə̂ nkôŋ Tə́ wághʼə po.

¹⁶Ńté no məzə̂u mi ə́ pə́ mi nzʉ̂ ə̂ mwo: Ə ngʉ̂ məzə̂u mi mbap mbəʉ zaghʼə cʉ́ŋə wághʼə lə̂ ngʉ́, ə́ ntsáa lə̂ ngwô zə̂u yi nyôghʼ mághʼə jwô mbaa lə̂ ndághʼ məzə̂u nzʉ̂ ńŋáʼtə́. Ghíʼ ə́ kə́ mbə́ yə́rə́ lə̂, məzə̂u mêi mwo kâa fû yé mbó Tə́ waghʼə, ə̂ məzə̂u mi ə́ fû pə́ cər nzʉ̂.

¹⁷Ə nzʉ̂ pə̌ nděi gháp pə məzə̂u mə́tsəm mi pye jwô ńtsâa lə̂ ngwô, lə́ ŋuu yi a pə̌ ngʉ ləkoŋtə Sê láʼ cí pə̂ pə́ wó.

¹⁸Ghəpə́ zâa, ndyəghʼ-nzəm mə́nəu pə́ mə́ ngwo nkǔʼ wó! Pei lə zúʼ pə́ lâʼ ńgó ngaŋə-mbəu Kəlísto ghʉ̌ tó; lə̂ mpfu wo, pəghaŋə mbəu Kəlísto kwatə tə nzáa záa; paghʼə fû mə́u njí ńgó ndyəghʼ-nzəm mə́nəu pə mə́ nkǔʼ.

¹⁹Pye pêi lə fú cər cûʼtə zághʼə ńkwár, ə́ ndə yǎa káa pə̂ gháp kwaʼ pye paghʼə; ńté no gháp lə yaa mbə́ kwaʼ pye paghʼə, mə́i paghʼə pə pǎp lə nyâŋ. Lə́ gháp lə fú cər cûʼtə zághʼə ńkwár, ghíʼ pə́ wo fú mə́u, ə́ jí ńgó káa gháp lə pə̂ gháp pye paghʼə.

²⁰Ə́ ngwǒ lə́ pei, mə́i Kəlísto lə côghʼ Zəghʼə Ndêi-lěi lə́ pei; ə̂ zə̂u yi ə́ ghʉ̌, pei pə́tsəm pə̂ njî no-lə́nə́ʉ.

²¹N ŋwaʼa ŋwaʼa wo ńŋə́ lə́ pei gháʼá, káa té pə́ ńgó káa pei pə́ njî wéi no-lə́nə́ʉ, lə́ n ŋwaʼa ńŋə́ lə́ pei, ńté ńgó pei pə̌ njî no-lə́nə́ʉ, ə́ mbou mə́ njî ńgó káa məcó məlaa pə́ nkwâr yé lə̂ no-lə́nə́ʉ.

²²Ngaŋə-məlaa wǒ? Â ŋuu yi a laʼ ńgó Yěso kâa pə̂ yé Kəlísto. Wêi ŋuu ngaŋə-mbəu Kəlísto: A lâghʼ ntə̂ʉ gháʼá tâʼ mpfu, ə́ ndə̂ʼ no Tə́, ə́ mbou ndə̂ʼ yi Môu.

²³Ńté no ŋuu lə̌i ndə̂ʼ no Môu, mə́i a lə̂ʼ mə́ gháʼá no Tə́; ŋuu póu mbə́i no Môu, mə́i a pəi mə́ gháʼá no Tə́.

²⁴Ə̂ zə̂u yi ə́ ghʉ̌, pei tsúŋú ngwǒ tsâr yi pei lə zúʼ tə fú ləjitə́ cər ntə̂ʉ pei kwaʼ shʉʼʉ. Pei lə̌i ngwô tsâr yi pei lə zúʼ tə fú ləjitə́ cər məntə̂ʉ pei, mə́i pei wo təmtə́ lə́ Môu mbaa lə́ Tə́.

²⁵Zə̂u yi Kəlísto lə ghʉ̌ ndaʼá mə́u lə̂ ngʉ́ ŋə́ mbó paghʼə ə̂ yo: ə́ mbə́ ləcwôr tə me.

²⁶Ə kə pəu mbó məŋ lə̂ ŋwaʼá ŋwaʼa wo ńŋə́ lə́ pei, ńté pye pi gháp lou lə̂ fútə́ wéi, pei fâa laŋə́-ndə̂u.

²⁷Ə́ ngwǒ lə́ pei, mə́i Zəghʼə yi Kəlísto lə cóghʼ ndəu pei, ə́ pə́ lə́ pei; ə́ pə̂ yə́rə́, káa pei ghwô wéi lə̂ nkə́ mbóu mbə́i pə́ jyêʼ wéi có zə̂u. Ńté no Zəghʼə yi ə́ pə́ lə́ pei pə́ njyêʼ wéi zə̂u tsəm: Ə́ jyêʼ wéi pə̂ no-lə́nə́ʉ, kâa ə pə́ njyêʼ yé wéi məlaa. Ə̂ zə̂u yi ə́ ghʉ̌, pei ghʉ̂ pə̂ zə̂u yi Zəghʼə jyêʼ wéi zěi: ə́ ndâr mbəʉ zéi lə́ Kəlísto.

²⁸Ə̂ŋ ghəpə́ zâa, pei kə́ ndár mbəʉ zéi pə́ lə́ Kəlísto, ńjí ńgó paghʼə ghí nyáŋ, ə́ fú mə́ njî ńgó a ghʉ̌ tó, paghʼə pə pǎp pə́; lə́u paghʼə tə̂ʉ wághʼə pěi, ə sə̂ʉ cʉ́ʼ mə́ nkô wághʼə po.

²⁹Pei pə̌ njî ńgó Kəlísto pə̂ ndʉŋ-ndʉŋ mbi Sê, ə́ pə̂ yə́rə́ ə́ mbə́ ńgó ŋuu lə̌i mə́ ngʉ̂ zə̂u yi ə́ pə́ ndʉŋ-ndʉŋ mbi Sê, a pə̂ môu Sê.