Read Ngombale 1 Jâŋ 3 Bible Online

1 Jâŋ 3 - Ngombale bible

1 Jâŋ 3

¹Pei jwó mbə̂u yi Tə́ wághʼə lə lǎghʼ ńkôŋ wághʼə! A fǔ ngwǒ nkoŋə nzəm paghʼə tə pə́ cʉ̂ʼ fûŋ wághʼə pə́ ńgó ghəpə́ Sê, paghʼə yâa nkə́ mbə́ pěi lə́nə́ʉ. Ə̂ zə̂u yi ə́ ghʉ̌, pye nzʉ̂ kâa jî gháp wághʼə, ńté no káa gháp kə jî gháp ŋuu yi Sê pə̌ wěi.

²Pəsə̌u pâa pi lətəi-ndwuŋ, paghʼə tə̂ʉ mpfu wo gháʼá, ə́ ncʉ́ʼ mbə́ pə̂ ghəpə́ Sê; lə́ mbə̂u yi paghʼə ghʉ̌ lǎghʼ pə́ pyěr pə́ ləlwǒ. Lə́ paghʼə pə̌ njî ngô: ə́ ghʉ̌ pə́ leʼé yi Kəlísto kwǎr, paghʼə jwó yé, ə mbə̂u yi a lǎghʼ mbə́, paghʼə kə́ mbə̂ zághʼə pə́ yə́rə́.

³Wǒwó yi a ghí nyáŋ pə́ zʉ́ʼtə́, ə́ mə́ ngwô kwaŋtə lə̂ no zêi, pə̌ sâʼ mətəʉ lə̂ mbə́ tə́ lǒʼ, ghíʼ zʉ́ Nde kə̌ mbə̂ yé tə́ lǒʼ lə́wó.

⁴Wǒwó yi a ghʉ no tə́poŋ ləʼ gháʼá lə̂ ŋə̂i lə̂ ləpə̌ʉ Sê, ə no tə́poŋ pou ngáʼá mbə́ ghíʼ ŋuu ləʼ lə̂ ŋə̂i ghíʼ ləpə̌ʉ Sê pə́ ntúŋú.

⁵Lə́ pei pə̌ njî ńgó zʉ́ Nde lə kwar lə̂ fú lə́ paghʼə ńkwárə́ məno tə́poŋ; káa có no tə́poŋ póu mbə̂ yé lə́ zʉ́.

⁶Ŋuu lə̌i ndár mbəʉ ye lə́ zʉ́, a ghʉ̂ yé no tə́poŋ po; ŋuu yi a ghʉ no tə́poŋ laa kə́ jwó yé yé, káa pə̌i jî yé yé.

⁷Ghəpə́ zâa, koo cǒ ŋuu fûtə wéi, pei ghʉ̂ no tə́poŋ. Ŋuu yi a ghʉ zə̂u yi ə́ pə́ ndʉŋ-ndʉŋ mbi Sê pə̂ ndʉŋ-ndʉŋ mbi Sê, ghíʼ tû-mbəʉ Nde kə́ mbə̂ yé ndʉŋ-ndʉŋ mbi Sê.

⁸Ŋuu yi a ghʉ no tə́poŋ, â ŋuu Sə́tə; ńté no Sə́tə lə ji lə̂ ngʉ́ no tə́poŋ tə fú lənuŋú ngoŋ. Môu Sê lə pou nkwǎr lə̂ mbə́ghʼ məfaʼ Sə́tə.

⁹Ŋuu lei tə ncʉ́ʼ môu Sê, káa kə́ ghʉ yé no tə́poŋ; ńté no mətəʉ ləcwôr mi ə́ fû mbó Sê pə́ lə́ zʉ́ ə́ mə́ fâʼ; ńté ńgó Sê lei tə ncʉ́ʼ Tə́ ye gháʼá, mboʼ a kə̂ ngʉ̂ yé no tə́poŋ ə́ ndághʼ ńdə̌r lə̂ mbi po.

¹⁰Ə zə̂u yi pə́ fû mə́u ə́ njî ghəpə́ Sê, ə́ nkə́ njî pi Sə́tə yo: Ŋuu lə̌i ndə́iʼ ghʉ̌ zə̂u yi ə́ pə́ ndʉŋ-ndʉŋ mbi Sê po, ə́ ndə́iʼ kǒŋ fə̌r ye po, mə́i káa a pə̂ yé môu Sê.

¹¹Ə no yi pei lə zúʼ tə fú ləjitə́ pə́ ngô: Paghʼə ghwô nkoŋə təcər paghʼə.

¹²Koo paghʼə pə̂ ghíʼ Kayêŋ: A lə pə́ ŋuu Sə́tə, ə́ njwí fə̌r ye. A lə jwî yé ńté hó? Ńté ńgó məfaʼ mé zʉ́ Kayêŋ kâa lə pôŋ yé, ə mi fə̌r ye pou mbə́ ndʉŋ-ndʉŋ mbi Sê.

¹³Pəfə̌r pâa, pye ndəu nzʉ̂ lə̌i mə́ mbâa wéi, koo ə́ kəʼə yé wéi.

¹⁴Paghʼə pə̌ ntsuŋu njî ńgó paghʼə lə fú cər ləwʉ̂, ə́ nkwǎr ńkə́u cər ləcwôr; ə zə̂u yi ə́ ghʉ̌ paghʼə jî yə́rə́: ə̂ nkoŋə yi ə pə̌ təcər paghʼə pəfə̌r pəfə̌r. Ŋuu yi káa ghwô yé nkoŋə, â ŋuu yi a pyěr pə́ cər ləwʉ̂.

¹⁵Wǒwó yi a ghwo kəpaa nzəm fə̌r ye, â ngaŋə-pəi. Pei pôu mə́ njî ńgó ŋuu yi a jwî ŋuu, káa a ghwô yé ləcwôr tə me ndəu zʉ́.

¹⁶Ə zə̂u yi paghʼə laghʼ ńjî nkoŋə ə̂ yo: Yěso Kəlísto lə ŋə́ tû ye ńté wághʼə. Ə́ laghʼ ḿbə́ ńgó paghʼə zághʼə ghwo lə̂ ŋə́ tû zághʼə ńté pəfə̌r pághʼə.

¹⁷Ŋuu lə̌i mbə́ ngaŋə-zə̂u, ə́ njwó fə̌r ye pə́ mbûŋ zə̂u, a lə́iʼ pfútə́ yé po, a pôu ndághʼ hó nyárə́ ńgó a pə̌ nkoŋ Sê?

¹⁸Ghəpə́ zâa, koo paghʼə lâghʼ pə̂ məkəpə-ntsʉ fefe, kəʉ mətsâr mi pə́ tsuŋú tsuŋú ńdáʼ lə́ ŋuu ńgó paghʼə pə̌ nkoŋ yé; paghʼə lághʼ pə̂ məfaʼ mághʼə, ə́ nyárə́ ńgó paghʼə pə̌ nkoŋ yé.

¹⁹Paghʼə wo ghʉ̌ yə́rə́ záʼa-ndě, ə́ poŋə́ jí ńgó paghʼə pə́ lə̂ ndyəghʼə́ yi no-lə́nə́ʉ, ə́ tə́ʉ mbi Sê, lə́u pôghʼ wághʼə có zə̂u po.

²⁰Ńté no ntə̂ʉ wághʼə lə̌i mbə́i mə́ fêʼ wághʼə feʼé, paghʼə jí ńgó Sê ghǔʼ ə́ nděi ntə̂ʉ wághʼə, ə́ mbou mə́ njî zə̂u tsəm.

²¹Pəsə̌u pâa pi lətəi-ndwuŋ, ə ntə̂ʉ wághʼə lə̌i mbôu ndə̌iʼ pə́ feʼ yé wághʼə po, mə́i paghʼə wo tə́ʉ mbi Sê tə́ pə́ pôghʼ có zə̂u;

²²zə̂u tsəm yi paghʼə lǒu yé, â ŋə́ lə́ paghʼə; ńté no paghʼə pə̌ ŋəi lə̂ məntǎghʼ mé, ə́ mbou mə́ ngʉ̂ zə̂u yi ə́ poŋə́ yé.

²³Ləpə̌ʉ yi a laʼ ńgó paghʼə ŋə́i mə́u pə́ ńgó paghʼə pə́i no Môu ye Yěso Kəlísto, ə́ mbou nkóŋə́ mbəʉ zághʼə təcər paghʼə, ə́ ndʉŋ-ndʉŋ ghíʼ Yěso lə lǎʼ ńgó paghʼə ghʉ́ yə́rə́.

²⁴Ŋuu yi a pə̌ ngʉ ghíʼ məntǎghʼ Sê pə́ ntúŋú lar gháʼá mbəʉ yé lə̂ Sê, Sê kə̂ ndâr ye mbəʉ lə́ zʉ́. Ə zə̂u yi paghʼə laghʼ ńjî ńgó Sê lâr mbəʉ ye lə́ pághʼə, ə̂ Zəghʼə Ndêi-lěi yi a lə cóghʼ lə́ pághʼə.