Read Ngombale 1 Jâŋ 4 Bible Online

1 Jâŋ 4 - Ngombale bible

1 Jâŋ 4

¹Pəsə̌u pâa pi lətəi-ndwuŋ, koo pei zûʼ ŋuu lâʼ lə́ pei ńgó Zəghʼə Ndêi-lěi pə́ lə́ zʉ́, pei lêi-lěi mbə́i. Lə́ pei zʉ́ʼ yé, ə́ njwó ńgó kəʉ zəghʼə yi ə́ pə́ lə́ zʉ́ fú mbó Sê. Ńté no pətáŋ-mə́laa ńgó gháp pətsətə́-nkəʉ Sê fú mə́ nzáa cər nzʉ̂ gháʼate.

²Ə zə̂u yi pei lǎghʼ jí Zəghʼə yi ə́ fû mbó Sê, ə̂ yo: Ŋuu lə̌i mbə́i ńgó Yěso Kəlísto lə shərə ncʉ́ʼ kwaʼ ŋuu-məsoŋ ə́ ntó ndəu ndesé, mə́i ngaŋ ghwo Zəghʼə yi ə́ fû mbó Sê.

³Lə́ ŋuu kə́ ndâʼ ńgó káa Yěso Kəlísto lə shə́rə yé ncʉ́ʼ ŋuu-məsoŋ ə́ ntó ndəu ndesé, mə́i wei ŋuu kâa ghwô yé Zəghʼə yi ə́ fû mbó Sê. Ə Zəghʼə yi ə́ pə́ lə́ wei ŋuu, ə̂ Zəghʼə ngaŋə-mbəu Kəlísto; pə́ lə yaa ndǎʼ wéi ńgó a ghʉ̌ tó, a kə mə́ ntó tə mbə́ ndəu ndesé.

⁴Ghəpə́ zâa, ə́ ngwǒ lə́ pei, mə́i pêi pye Sê; pei lə lwóʼo pətáŋ-mə́laa ńgó gháp pətsətə nkəʉ Sê, ə́ nzʉ́ gháp; ńté no ə Zəghʼə yi ə́ pə́ lə́ pei ghwo mətəʉ, ə́ nděi yi ə́ pə́ lə́ pye cər nzʉ̂.

⁵Pye pêi pə́ pə̂ pye nzʉ̂. Ə̂ zə̂u yi ə́ ghʉ̌, gháp tsâr pə́ lə̂ mbə̂u yi pye nzʉ̂, ə pye nzʉ̂ kə́ mə́ nzûʼ no yi gháp laʼ zěi.

⁶Lə́ ə́ ngwǒ lə́ paghʼə, mə́i paghʼə pye Sê. Ŋuu yi a pə̌ ŋuu Sê pə̂ nzʉ̂ʼtə tsâr zághʼə; ŋuu yi kâa pə̂ yé ŋuu Sê, kâa pə́ nzʉ̂ʼtə yé tsâr zághʼə. Paghʼə fû pə́ mə́u, ə́ njî no-lə́nə́ʉ, ə́ mbou njî məlaa.

⁷Pəsə̌u pâa pi lətəi-ndwuŋ, paghʼə koŋə́ mbəʉ zághʼə təcər paghʼə, ńté ńgó ə nkoŋə fû pə́ mbó Sê. Ŋuu yi a ghwǒ nkoŋə gháʼá mbə́ môu Sê, ə́ mbou mə́ njî Sê.

⁸Ŋuu yi kâa ghwô yé nkoŋə nzəm pye-mə́soŋ, â ŋuu yi kâa pə́ njî yé Sê, ńté no Sê koŋ yé pye-mə́soŋ kǒŋ.

⁹Ə zə̂u yi Sê lə lǎghʼ ńnyárə́ wághʼə ńgó a kôŋ wághʼə, ə̂ yo: a ghwo tâʼ môu ye moʼ, ə́ ntə́u yé ńŋə́ cər nzʉ̂, ńjí ńgó paghʼə lei lə́ zʉ́, ə́ ngwǒ kwaʼ ləcwôr.

¹⁰Ə nkoŋə zêi pou mbə́ ngô: kâa pə̂ yé ńgó paghʼə lə̂ lə kǒŋ Sê, zʉ́ lə́ lə fú nkóŋ wághʼə, ə́ ntə́u Môu ye ńgó a tó ńŋə́ tû yé ə́ ndaghʼ ńnúŋu poʼ ńté wághʼə, ə̂ zə̂u yi ə́ ghʉ̌, Sê lyə́ghʼə́ məno tə́poŋ mághʼə.

¹¹Pəsə̌u pâa pi lətəi-ndwuŋ, ə Sê lə̌i ndə kôŋ wághʼə ndwuŋ wo, mə́i ə́ poŋ ńgó paghʼə kə́ koŋə́ mbəʉ zághʼə təcər paghʼə lə́wó.

¹²Cǒ ŋuu laa kə́ jwô yé Sê, lə́ paghʼə lə̌i nkóŋə́ mbəʉ zághʼə təcər paghʼə, mə́i Sê wo pə́ lə́ paghʼə. Pə́ fú mə́ njwó nkoŋə ye lə́ paghʼə tə káa có zə̂u pə́ mbûŋ yé mə́u po.

¹³Ə zə̂u yi ə́ ghʉ paghʼə jî ńgó paghʼə lâr mbəʉ zaghʼə lə́ zʉ́, a kə̂ ndâr ye lə́ paghʼə ə́ pə́ ngô: a lə ŋə̂ Zəghʼə Ndêi-lěi yé lə́ paghʼə.

¹⁴Paghʼ lə jwó, ə́ mə́ ŋáa ndêʼtə mbó lâʼ ńgó Sê lə tə́u Môu yé ńgó a tó ngʉ́ pye pi gháp pə́ cər nzʉ̂ cwór.

¹⁵Ŋuu lə̌i ntə́ʉ mbi Sê ḿbə́i ńgó Yěso Kəlísto Môu Sê, mə́i Sê wo lǎr mbəʉ ye lə́ ngaŋ, â kə́ ndâr ye mbəʉ lə̂ Sê.

¹⁶Ə́ ngwo lə́ paghʼ, mə́i paghʼ pə̌ njî nkoŋə yi Sê ghwǒ nzəm paghʼ; paghʼ lə jwó zêi mbə̂u nkoŋə, ə́ mbə́i. Ə Sê koŋ yé pye-mə́soŋ kǒŋ; ŋuu lə̌i ngwô nkoŋə nzəm pye-mə́soŋ, mə́i a lar mbəʉ ye lə̂ Sê, ə Sê kə̂ ndâr ye lə́ zʉ́ lə́wó.

¹⁷Paghʼə lə̌i ngwô nkoŋə cər ntə̂ʉ paghʼə tə có zə̂u lə́iʼ pûŋ yé mə́u po, mə́i paghʼə wo nyáŋ kwǎŋ leʼé yi Sê wo nzáʼ kôr təcər páp pə pye-mə́soŋ, ə́ pôghʼ wághʼə có zə̂u po, ńté ńgó ləcǐ-mbî waghʼə cər nzʉ̂ pə́ ghíʼ yi Yěso Kəlísto.

¹⁸Ŋuu lə̌i ngwó nkoŋə cər ntə̂ʉ zʉ́, a kə̂ mbôghʼ yé có zə̂u po; nkoŋə lə̌i mbə́ tə có zə̂u lə́iʼ pə́ pûŋ yé mə́u po, ə pə̂ghʼ ləpôghʼ. Ŋuu lə̌i ngwô ləpôghʼ, ə́ pə̂ ńgó zə̂u pə́ mbûŋ lə́ nkoŋə yi a ghwǒ; ńté ńgó ŋuu ghí pə́ póghʼ, ə́ mə́ njwô ngwôʼ yi pə́ wo tághʼ tû zʉ́ ghíʼ a fǎa no.

¹⁹Ə́ ngwo lə́ paghʼ, mə́i paghʼ kôŋ pye-mə́soŋ, ńté ńgó Sê lə luŋ mbi nkôŋ wághʼ zághʼ.

²⁰Ŋuu lə̌i ndâʼ ngô: «N nkoŋ Sê.» Ə́ ngǐ lǎʼ yə́rə́, ə́ mbóu mə́ mbâa fə̌r yé, mə́i â ngaŋə-məlaa. Ńté no mboʼ a kûʼ yé lə̂ kôŋ Sê yi káa a pə́ njwô yé yé, ə́ mbou mbâa fə̌r ye yi a pə̌ njwo yé po.

²¹Ləpə̌ʉ yi Kəlísto kə ŋə́ lə́ paghʼə yo: Ŋuu lə̌i nkóŋ Sê, a ghwo lə̂ nkə́ nkóŋ fə̌r ye ŋuu-məsoŋ lə́wó.