Read Ngombale 1 Jâŋ 5 Bible Online

1 Jâŋ 5 - Ngombale bible

1 Jâŋ 5

¹Ŋuu ntsəm yi a pə̌i ńgó Yěso, â Kəlísto; ngaŋ môu Sê. Ŋuu lə̌i nkôŋ Tǎa Sê, a kə̂ nkôŋ ghəpə́ Sê lə́wó.

²Ə zə̂u yi paghʼə wo fú mə́u, ə́ jí ńgó paghʼə pə̌ nkoŋ ghəpə́ Sê, ə̂ ghíʼ paghʼə wo kǒŋ Sê, ə́ pǒu ŋə̌i lə̂ ləpə̌ʉ yé.

³Ńté no ə zə̂u yi ə́ nyarə ńgó paghʼə kôŋ Sê, ə̂ ŋə̂i ghíʼ məntǎghʼ mé pə́ ntúŋú. Məntǎghʼ mé mêi, pou káa təi yé tə̌i mbó paghʼə;

⁴ńté ńgó wǒwó yi a pə̌ môu Sê kuʼtə lə̂ ndwóʼó zə̂u tsəm yi mboʼ ə́ kə́ʼtə yé cər nzʉ̂ tə nzʉ́ zěi. Ə zə̂u yi paghʼə pou ndághʼ ńdwóʼo nzʉ̂ tə nzʉ́ pə̂ pə̂i-ntə̂ʉ zághʼə nzəm Yěso Kəlísto.

⁵Mboʼ wǒ ŋuu lwóʼo nzʉ̂ tə nzʉ́? Ə̂ ndaʼ ŋuu yi a pə̌i ńgó Yěso, â Môu Sê.

⁶Yěso Kəlísto ŋuu yi a lə tó, pə́ ŋə̂ yé nci, a pôu ncwə́r məci mé ə́ nkwʉ́. Káa a lə laghʼ yé pə̂ ndaʼ nci ntó, a lə laghʼ nci gháp məci ńtó. Zəghʼə Ndêi-lěi pou mbə́ nzǔʼ-njwó ńgó ə̂ no-lə́nə́ʉ, ńté ńgó Zəghʼə Ndêi-lěi, ə̂ no-lə́nə́ʉ.

⁷Ə́ laghʼ mbə́ ńgó pənzǔʼ-njwó pə́ pə́tárə́:

⁸ə̂ Zəghʼə Ndêi-lěi, ə mbə́ nci, ə́ ngʉ̌ məci; gháp pêi pə́tárə́ naa ngwǒ tâʼ ntsʉ.

⁹Pye-mə́soŋ pə́ ndaʼ wághʼə no yi gháp pə́ njî lə̂ məno, ə́ ndǎʼ wághʼə, paghʼə pə̂i; lə́ no yi Sê lǎʼ pou ndéi yi pye-mə́soŋ lǎʼ. Ə Sê, zʉ́ tû-mbəʉ yé lə pǒu ndáʼ məno mêi ńté Môu yé.

¹⁰Ə́ pə̂ yə́rə́, ŋuu yi a pə̌i no Môu Sê fǔ mbə́i cər ntə̂ʉ zʉ́ ńgó məno mêi pə́ lə́nə́ʉ. Ŋuu yi kâa pə̂i yé no Sê, pə̌ ndaʼ ńgó ə Sê ngaŋə-məlaa, ńté ńgó káa a pə̂i yé no yi Sê lǎʼ ńté Môu yé.

¹¹Ə no yi Sê lǎʼ lêi pə́ ngô: Sê lə ŋə́ wághʼə ləcwôr tə me, ləcwôr wei fû lə́ Môu ye.

¹²Ŋuu lə̌i mbə́i no Môu Sê, a ghwô ləcwôr, ə́ ndə́iʼ pə́i no Môu Sê po, a ghwô yé ləcwôr po.

¹³N ŋwaʼa məno mwo, ə́ ŋə́ lə́ pei pi pei pə̌i no Môu Sê gháʼá, ə́ ndaghʼ ńdôu ńgó pei jí ńgó pei ghwo ləcwôr tə me.

¹⁴Mboʼ paghʼə tə̂ʉ mbi Sê tə́ mʉ̂ŋtə, ńté ńgó paghʼə pə̌ njî ńgó paghʼə lə̌i ndóu yé zə̂u yi ə́ pə̌u mbó zʉ́ ńgó mboʼ a ŋə̂ lə́ paghʼə, mə́i a wo ŋə́.

¹⁵Ghíʼ paghʼə pə̌ njî ńgó a pə̌ nzûʼ məsʉ̂ʉtə mághʼə lə̂, paghʼə fǔ mə́u ə́ njí ńgó paghʼə fú mə́ ngwǒ zə̂u tsəm yi paghʼə pə̌ ndôu yé zěi.

¹⁶Ŋuu lə̌i njwó fə̌r ye ghʉ̂ no yi kâa pə́ ncághʼə yé ŋuu ə́ ŋə̂ lə̂ ləwʉ̂, a sʉ̂ʉtə Sê tû zʉ́, a ŋə̂ yé ləcwôr. No yi n ndâʼ lo, ə́ náŋtə pə́ pye pi gháp ghʉ̌ no tə́poŋ yi káa ə̂ pə́ ncághʼə ŋuu ŋə̂ lə̂ ləwʉ̂. Lə́ có no tə́poŋ pə́ wó yi ə́ cághʼə ŋuu ŋə̂ lə̂ ləwʉ̂, káa n ndâʼ gháʼá ńgó pə́ sʉ́ʉtə́ Sê tû ŋuu yi a ghʉ̌ zêi zə̂.

¹⁷Ə no tsəm yi kâa tə́ʉ ndʉŋ-ndʉŋ, ə̂ no tə́poŋ, lə́ káa no tə́poŋ tsəm pə́ ncághʼə yé ŋuu ŋə̂ lə̂ ləwʉ̂.

¹⁸Paghʼə pə̌ njî ńgó ŋuu lei tə ncʉ́ʼ môu Sê, káa kə́ pyér ghʉ yé no tə́poŋ, ńté no Môu Sê pə̌ mbápə yé, ə́ pə̂ yi mboʼ Sə́tə kə̂ mbóu nzâp yé pô yé lə́ zʉ́ po.

¹⁹Paghʼə pə̌ njî ńgó paghʼə ghəpə́ Sê, ə nzʉ̂ tsəm pôu mə́ nzûʼ pə́ mbó Sə́tə.

²⁰Paghʼə pə̌ njî ńgó Môu Sê lə tô, ə́ mbóu mə́ njî ńgó a lə ŋə́ wághʼə jîno lə̂ ndághʼ ńjí Sê yi a pə̌ lə́nə́ʉ. Paghʼə pə Sê yi a pə̌ lə́nə́ʉ təmtə, ńté ńgó paghʼə pə Môu ye Yěso Kəlísto kə́ ntə́mtə lə́wó. Zʉ́ lə́ pə́ kwaʼ Sê, ə́ mbə́ ləcwôr tə me.

²¹Ghəpə́ zâa, pei páa məzə̂u mi mboʼ ə́ zʉ̂ məntə̂ʉ méi, pei cʉ̂ʼ mə́ ngúʼtə́ ə́ fûŋ ńgó ə̂ Sê.