Read Ngombale 2 Jâŋ 1 Bible Online

2 Jâŋ 1 - Ngombale bible

2 Jâŋ 1

¹Məŋ yi n ntə̌ʉ tû-mbi ndə̂ cûʼtə pye Kəlísto ŋwaʼá ŋwaʼa wo, ə́ ŋə̂ lə́ gho Mə́ pə ghəpə́ yi Sê lə tsóʼ ghô mbaa lə̂ ghəpə́ zô pi n nkǒŋ gháp lə̂ ntə̂ʉ ghâa tsəm. Káa ndaʼ məŋ lə̂ nkôŋ wéi, pye pə́tsəm pi gháp pə́ njî no-lə́nə́ʉ kə́ nkǒŋ wéi záp lə́wó,

²ńté ńgó paghʼə pə́tsəm pə́ cər no lə́nə́ʉ, ə́ láʼ cí kə́ pə̂ pə́ cər wó.

³Ńgó Tə́ waghʼə Sê gháp Yěso Kəlísto, zʉ́ Yěso yi a pə̌ Môu Tǎa ghwô poŋə-ntə̂ʉ yi tə́ ndaghʼə nzəm paghʼə, ə́ ndyəghʼə́ məfaa waghʼə, ə́ ŋə́ wághʼə mbwórə ńjí ńgó ə́ leitə yə́rə́, paghʼə nyâŋ cər no lə́nə́ʉ gháp nkoŋə.

⁴N nkə ghwo lətsei cər ntə̂ʉ məŋ gháʼate ghíʼ n nkə jwó có ghəpə́ zô nyâŋ cər no lə́nə́ʉ, ə́ ndʉŋ-ndʉŋ ghíʼ Tə́ waghʼə lə lǎʼ ńgó paghʼə nyáŋ.

⁵Mə́ pə ghəpə́ yi lətəi-ndwuŋ, ə zə̂u yi məŋ ntúŋu ghô zěi mpfu wo pə́ ńgó paghʼə ghwô nkoŋə təcər paghʼə. Ə no yi məŋ ndaʼ lə́ gho lo, kâa pə̂ yé có ləpə̌ʉ shwî; ə̂ yi paghʼə kə zúʼ tə fú ləjitə́.

⁶Ə ngwô nkoŋə, ə̂ ŋə̂i ghíʼ ləpə̌ʉ Sê pə́ ntúŋú. Ləpə̌ʉ yi pei lə zúʼ tə fú ləjitə́ pə̂ ńgó pei ghwô nkoŋə təcər pei.

⁷Pəghaŋə məlaa tə nzáa kə kwatə cər nzʉ̂, ə́ mbə́ pye pi gháp laʼ ńgó Yěso Kəlísto káa lə shə́rə yé ə́ ncʉ́ʼ ŋuu-məsoŋ. Ə̂ zə̂u yi pə́ leitə mə́u, ə́ njî ngaŋə-məlaa yi a pə̌ ngaŋə-mbəu Yěso Kəlísto.

⁸Ghíʼ ə́ kə́ mbə́ yə́rə́ lə̂, pei ghwôtə́ mbəʉ zéi ə́ mbóghʼ lə́ pə́ yi mboʼ pei cwî fuʼ yi pei lə pyé lə̂ faʼ[1] yi paghʼ lə fǎʼ zěi nzəm pei; pei ghʉ̂ yə́rə́, ə́ ngʉ mpfú məntsoʼó-faʼ méi mə́tsəm mi Sê lə ghʉ̌ ndaʼá mə́u lə̂ ngʉ́ ŋə́.

⁹Ŋuu lə̌i ndə́iʼ ŋə̌i pə́ lə̂ no yi Yěso Kəlísto lə jyéʼ zěi po, lə́ ə́ fú mə́u nkwǎr, mə́i káa gháp Sê pyér tə̂mtə́. Lə́ ə́ ngwǒ lə́ ŋuu yi a kə̌ mə́ ŋə̂i pə́ lə̂ zə̂u yi Yěso Kəlísto lə jyéʼ zěi, mə́i gháp Tə́ təmtə́, gháp Môu kə̂ tə̂mtə́ záp lə́wó.

¹⁰Ə̂ zə̂u yi ə́ ghʉ̌, ŋuu lə̌i ntó lâʼ pei ə́ ndâʼ no tə ə́ lə́iʼ kə́ pə́ pə́ yi Yěso Kəlísto lə jyéʼ wéi zěi po, koo pei pə̂i ntsêʼtə́ yé tseʼtə́;

¹¹ńté ńgó ŋuu lə̌i ntsêʼtə́ yé, ə́ pə̂ ńgó gháp zʉ́ pə́ tâʼ ntsʉ lə̂ məno tə́poŋ mi a ghʉ měi.

¹²M mbyěr ngwǒ məno tə nzáa mi n ngwo lǎʼ wéi, lə́ káa pə́ koŋ ghâa lə̂ ŋwáʼá měi cər ŋwaʼa ə́ ŋə́ lə́ pei. M mə̌ nkwaŋ lə̂ ntó tə nkə́u lâʼ pei, tə ə́ kwar pə́ ntsʉ məŋ ə́ nkə́u lətuŋú pei; ńjí ńgó lətsei wághʼə fǔ mbə̌u.

¹³Ghəpə́ Fə̌r gho yi məngyě yi Sê lə kə́ ntsôʼ yé yé lə́wó laʼ ńgó məŋ ntsêʼtə́ gho ə́ ŋə́ lə́ páp.