Read Ngombale 3 Jâŋ 1 Bible Online

3 Jâŋ 1 - Ngombale bible

3 Jâŋ 1

¹Məŋ yi n ntə̌ʉ tû-mbi ndə̂ cûʼtə pye Kəlísto, məŋ ŋwaʼá ŋwaʼa wo, ə́ ŋə̂ lə́ gho Gawísʉ sə̌u ghâa yi lətəi-ndwuŋ, yi n sâa-sǎa nkǒŋ gho.

²Ə sə̌u ghaa yi lətəi-ndwuŋ, m mə̌ ntsâa ńgó məno mô mə́tsəm ŋə̂i shʉʼʉ, o pôu nyáŋ shʉʼʉ soŋ nə̂r ghô, ə́ ndʉŋ-ndʉŋ ghíʼ o kə̌ mbə́ shʉʼʉ mbi Sê lə̂.

³N nkə ghwo lətsei gháʼate ńté ghíʼ pəcó pəfə̌r kə tó ńdâʼ ghâa mbə̂u yi o lǎghʼ ńnyáŋ cər no lə́nə́ʉ, ə́ mbou nkə́ ŋə̂i pə́ ghíʼ zěi pə́ ntúŋú.

⁴Mboʼ có zə̂u ŋə̂ yé ghâa lətsei tə ndêi lə̂ nzúʼ ńgó ghəpə́ zâa pə́ ŋəi lə̂ no lə́nə́ʉ po.

⁵Sə̌u ghâa yi lətəi-ndwuŋ, o kə̌ njî zô pə́ ndaʼ Kəlísto, ə́ mbou mə́ mpfûtə pəfə̌r mbaa pi gháp pə́ pəghəʉ.

⁶Gháp kə tə́ʉ mbi cûʼtə pye Kəlísto, ə́ ndéʼtə́ mbə̂u yi o kə laghʼ ńkôŋ gháp, ə́ ŋə́ gháp zə̂u yi ə́ wo pfútə́ gháp laŋə́-ndə̂u, gháp ŋə̂i lə̂ mbə̂u yi ə́ pə́ ntúŋu ńgó pəghaŋə-faʼ Sê ŋə̂i yə́rə́.

⁷Ńté no gháp kə kwar ndə̂ lə̂ fâʼ faʼ Yěso Kəlísto, káa pə́ pə̂i gháp lə̂ mpfú có zə̂u mbó pətəpə̌i-no Sê.

⁸Paghʼə ghwo lə̂ ntóutə́ mbə̂u pye zêi, ńjí ńgó paghʼə pə pǎp naa ngʉ̌, ə no lə́nə́ʉ zʉ̂ ngoŋ.

⁹N nkə ŋwaʼa cǒ məkəm ŋwaʼa, ə́ ntə́u ńŋə́ cər cûʼtə zéi, lə́ Dyotəlêfə yi a zâʼtə ntə̂ʉ mbi lə̂ məno mə́tsəm káa a lághʼ fûŋ yé có zə̂u, ə́ ndə̌ʼ lə̂ nzúʼ.

¹⁰Ə̂ zə̂u yi ə́ ghʉ̌, n ngʉ̌ tó tə kə́u təcər pei, ə́ kěʼ məno tə́poŋ mi a ghʉ měi; zʉ́ yi a tâŋ məlaa tû paghʼ, ə́ ndághʼ ńcôŋ ləjôghʼ zághʼ. Lə́ káa ə̂ pə̂ yé pə́ ndaʼ yə́rə́, a pə̌ ndəʼ lə̂ mpfú pəfə̌r pi ə́ pə́ pəghəʉ nzeʼ zʉ́; ə́ mbou mə́ ntôʼ pye pi gháp pə́ ndou mpfú pəghəʉ pêi nzeʼ páp, ə́ ngí pə́ toʼ gháp, ə́ mə́ ndâʼ ńgó ŋuu lə̌i mpfú pəfə̌r pi ə́ pə́ pəghəʉ, mə́i a wo zǔŋ yé ndə̂ cûʼtə.

¹¹Sə̌u ghâa yi lətəi-ndwuŋ, koo o fəiʼi no tə́poŋ, fəiʼí pə̂ no shʉʼʉ. Ŋuu yi a ghʉ no shʉʼʉ, â Môu Sê, ŋuu yi a pou ngʉ̂ no tə́poŋ kâa pə́ njî yé Sê.

¹²Ŋuu ntsəm kʉ̂ʉ Demetwǐsʉ pə̂ shʉʼʉ. Ə mbə̂u yi a laghʼ ńŋə̂i lə̂ laŋə́-ndə̂u no lə́nə́ʉ pə́ nyárə ńgó məfaʼ mé yaa mbǒŋ. Paghʼ zághʼ lə́wó pə́ mbə̂i ńgó məfaʼ mé poŋ. O pôu mə́ njî ńgó no yi paghʼ laʼ zěi ə̂ no lə́nə́ʉ.

¹³M mbyěr ngwǒ məno tə nzáa mi n ngwo lǎʼ gho, lə́ káa pə́ koŋ ghâa lə̂ ŋwáʼá měi ŋwaʼá.

¹⁴M mə̌ nkwaŋ lə̂ ntó njwó gho, poghʼo nyâŋ se ə́ ntsár.

¹⁵Ńgó Sê pə́ ncôghʼ mə́shwítə ntə̂ʉ gho. Pəsə̌u pághʼə pi yaʼa tsêʼtə́ gho. Tsêʼtə́ pəsə̌u pághʼə pi yʉʼ wə̂ pə̂ moʼ moʼ.