Read Ngombale Jwîdə 1 Bible Online

Jwîdə 1 - Ngombale bible

Jwîdə 1

¹Mə̂ŋ Jwîdə, ə́ mbə́ ngaŋə-faʼ Yěso Kəlísto, ə́ mbə́ fə̌r Jâghʼ. N ŋə̂ ŋwaʼa wo lə̂ pye pi Tə́ waghʼə Sê lə fúŋ gháp, ə́ nkǒŋ gháp, ə́ mə́ mbápə gháp; ə́ ndághʼ ńzʉ̂ʼtə Yěso Kəlísto.

²Ńgó Sê sâa-sǎa ndyəghʼə́ məno tə́poŋ méi, ə́ ncóghʼ mbwórə ye lə́ pei, ə́ ngʉ́ pei kə́ mə́ nzûʼ pə́ ńgó a koŋ wéi gháʼate.

³Pəsə̌u pâa pi lətəi-ndwuŋ, n nkə pə́ ntsûŋtə mbəʉ zâa lə̂ ŋwáʼá ŋwaʼa ńŋə́ lə́ pei, lə̂ no ləcwôr yi paghʼə pə́tsəm nǎa mbə́ mə́u. Lə́ m mbou njwó ńgó ə́ pə́ ntúŋu ńgó, n ŋwáʼá ŋwaʼa wo ə́ ndághʼ ńcóghʼ mətəʉ méi, lə̂ ndwóʼó ntso lə̂ no pə̂i-ntə̂ʉ nzəm Yěso Kəlísto yi Sê lə ŋə́ lə́ pye pé. Ə́ kə́ mbə́ pə́ ndaʼ tâʼ moʼ, káa có pôu nkə́ mbə̂ yé wó.

⁴Ńté no pəcó pəghʉ̌-mə́no tə́poŋ lə só ńkə́u təcər pei, ə́ mə́ shə́rə sʉ̂ no shʉʼʉ yi Sê lə lǎghʼ ḿmâʼ pou zághʼə; ə́ ndághʼ ńdôu lə̂ mbwórə́ ńgʉ́ məno sə̂ʉ máp tə́ ghó có zə̂u kə́ʼtə́ gháp. Ə́ ngʉ yə́rə́ gháʼá, ə́ ndaghʼ ḿmúŋu Yěso Kəlísto yi a pə̌ ndaʼ Cícye waghʼə, ə́ mbóu mbə́ Nde wághʼə. Ndǐ saghʼ mə́ ghíʼ pə́ lə ŋwáʼá cər ŋwaʼa Sê, ə́ ngwôʼ yi ə wo nkə́u mbə̂u pye zêi.

⁵Pei pə̌ tə mə́ njí, lə́ n ngwo kʉ́ʉtə́ wéi ghíʼ Sê lə ghʉ̌ pye Ísə́lahêl fû cər ngoŋ Egípto ńkwár, ə́ ncwór; leʼé ghʉ kûʼ, a ghʉ̂ pye pi gháp lə ləʼ gháp lə̂ mbə́i no yé kwʉ̂tə pə́tsəm.

⁶Pei kʉ́ʉtə́ no yi pə́ leʼtə lə́ pəcó pəcwôʼ Sê pi gháp lə wághʼə́ záp lətə̌ʉ yi Sê lə ŋə́, ə́ fú lə̂ záp yʉʼ ńkwár, ə́ mə́ nzûŋ tû-mbi, Sê lə kə́r gháp lə́ pəcêŋ pi ə́ láʼ cí pə̂ lə́ páp; ə́ máʼ gháp cər nzə̌m. Gháp nuŋ wó, ə́ mə́ nzʉ̂ʼtə leʼé yi a ghʉ̌ fěʼ gháp, ə́ tághʼ ngwôʼ tû páp.

⁷Pei póu nkʉ́ʉtə́ no yi pə́ leʼtə ńté túsoŋ Sodôm gháp Gomôrə mbaa mətúsoŋ mi ə́ páatə́ gháp, pye pi gháp cî wó lə nyáŋ tə ncʉ́ʼ ngʉ̂ pə̂ məno sə̂ʉ tə sâa-sǎa ndâghʼ mbəʉ záp ńkə́pə məsʉ̂ məno mi Sê lə tághʼ. Gháp pə̂ mpfu wo, ə́ núŋ cər mǒghʼ yi tə́ lághʼ ńcwí; ə́ pə̂ yə́rə́, ə́ ndaghʼ ńkweitə tû pye pə́tsəm lə̂ no yi mboʼ ə́ táa ncə́r gháp.

⁸Pəghaŋə-tághʼə́ pi gháp lə só ńkə́u nou pye Kəlísto lêi, kə́ ngʉ̂ záp pə́ yə́rə́. Gháp lâghʼ məfwǒ məkwaŋtə mi gháp ghwǒ, ə́ ndaghʼ ńgʉ̂ məno mi ə́ côŋ ndwuŋ gháp; ə́ ntə̂i tû mbó Sê, ə́ nzoutə məzəghʼə mi ə́ ghwǒ ləghûʼ.

⁹Lə́, Míshye lə pə́ tə mbə́ pə́ tə́-ndə̂ pəcwôʼ Sê, lə́ káa ghʉ yé yə́rə́. Ə́ lə pə́ ghíʼ gháp Sə́tə lə pə́ nzóŋə no ńté mbəʉ Mə̌usə̂i, káa a lâʼ yé có no tə ndághʼ ńzoutə́ yé mbaa lə̂ ndághʼ ńzáʼ tsâŋ ye. A lə lâʼ lə́ zʉ́ pə́ ngô: «Ńgó Sê tághʼ ngwôʼ tû gho.»

¹⁰Lə́ pye pêi zoutə məzə̂u mi káa gháp pə́ njî gháp měi. Ə́ ngwǒ lə́ məzə̂u mi gháp mei záp měi njí pə́ ghíʼ mənye ləghěi mi káa gháp ghwô gháp jîno lə̂, mêi məzə̂u ghʉ gháp kə̂u pə́ cwí.

¹¹Ndou pə́ tû páp! Gháp ŋə̂i lə́ məku Kayêŋ. Gháp kə pə́ ngʉ̂ məno mi káa pôŋ ńdaghʼ ńdou ngwô nkâp ghíʼ Balâm. Gháp kə təi tû ghíʼ Korê, ə́ nkwʉ́tə́.

¹²Ə́ pə̂ mpfu yi pei pəfə̌r pəfə̌r nyáŋ sê, ə́ mə́ nzʉ̂ zə̂u; gháp tô yʉʼ wó, ə́ ncôŋ ndwuŋ wéi; ə́ nzʉ́ tə ə́ zêʼ ndaghʼə, ə́ nkə́ nó məluʼ pə́ yə́rə́ tə́ kwǎŋ pəcó pye, tə́ kó sə̂ʉ. Gháp pə́ ghíʼ məlâm mi ə́ kəitə́ tə pə́ pə̂ mbâp mbʉŋ, kəfwor khwôr ndághʼ ńděi. Gháp pə́ ghíʼ tʉ̌ tə́ láʼ nzə́m ntǎa; tə mbaa pə̂ mpfu cû yi mətʉ̌ mə́tsəm zə̂m ntǎa, ə́ zə̂m yé po; gháp pə́ ghíʼ mətʉ̌ mi pə́ fú sê, ə́ fú ntsóʼ tsóʼó, mə́i gháp fú mə́ nkwʉ́tə́.

¹³Gháp laghʼ məno sə̂ʉ máp ńsâr yʉʼ ghíʼ mələ̂ʉ mə̂i-nci mi ə́ tə̂m ngʉŋ wó, ə́ ntyátə́ ńsâr yʉʼ, ə́ ngí pə̌ʉ, ə́ nyér məghêi měi. Gháp pə́ ghíʼ pəcwôʼ-saŋ pi káa gháp pyér nkápə gháp lə̂ yʉʼ yi Sê lə tághʼ gháp wó.

¹⁴Enôghʼ ntsətə-nkəʉ Sê yi a pə̌ lə̂ ngər-ndə̂ Ádam lə̂ məlʉŋə́ saambwô lə láʼ mə́ ndáʼ tə fú mənguʼ ngô: «Ə Nde ghʉ̌ lǎghʼ pəcwôʼ pé pi ə́ pə́ ndêi-lěi tó, gháp záa tə mbə́ tə kwǎʼ njí ndwuŋ,

¹⁵Gháp pə pǎp féʼ pye pə́tsəm cər nzʉ̂. Ə́ ntághʼ ngwôʼ tû pye tə́poŋ pêi, ńté məno tə́poŋ mi gháp lə tə̌i tû mbó Sê ə́ ngʉ̌ mbaa mətsâr tə́poŋ mi gháp lə lǎghʼ ńzóutə́ yé.»

¹⁶Mbə̂u pye zêi pə̂ mpfu tsəm ə́ kə́ nzáŋə pə́ lóŋ, ə́ ndə̂mtə ńgó nkwar-ndə̂ gháp kâa lə pôŋ yé; gháp ghʉ pə̂ məzə̂u mi mbəʉ zap cʉ́ŋə́ gháp lə̂ ngʉ́. Ə́ ntsâr pə̂ mətsâr ləŋâʼtə; ə́ ngǐ pə́ lyaghʼtə ŋuu, ə́ mə́ njî pəi yi gháp wo nzʉ́ wó.

¹⁷Ə́ ngwo lə́ pei pəsə̌u pâa pi lətəi-ndwuŋ, pei kʉ́ʉtə́ məno mi pəghaŋə-ntə̂u Nde waghʼə Yěso Kəlísto lə záʼ nzʉ̂ ə́ ndǎʼ lə́ pei cǒ mpfu lə̂ ndághʼ ńcwótə́ wéi,

¹⁸ńté no gháp lə lâʼ lə́ pei ngô: «Ə́ láʼ pə́ lə̂ pəlyəghʼ-nzəm məleʼé, pəcó pye kwátə́ ə́ nzoutə́ wéi, ə́ ngʉ̂ pə̂ məno tə́poŋ mi məmbəʉ máp cʉ́ŋə gháp ńgó gháp ghʉ́.»

¹⁹Gháp pye pi gháp côghʼ ngaptə təcər pye Kəlísto, gháp ghʉ pə̂ zə̂u yi mbəʉ zap cʉ́ŋə gháp lə̂ ngʉ́, káa Zəghʼə Sê pə̂ yé lə́ páp.

²⁰Lə́ ə́ ngwo lə́ pei pəsə̌u pâa pi lətəi-ndwuŋ, pei kʉ́ʼʉ́ ntəitə́ təitə́ cər pə̂i-ntə̂ʉ zéi yi ə́ pə́ ndêi-lěi nzəm Yěso Kəlísto. Pei laghʼ pə̂ mətəʉ Zəghʼə Ndêi-lěi sʉ́ʉtə́ Sê.

²¹Pei ghʉ́, ə Sê kə́ mə́ nkôŋ wéi koŋə́; ə́ ndaghʼ mə́ nzʉ̂ʼtə leʼé yi Nde wághʼə Yěso Kəlísto ghʉ̌ lǎghʼ poŋə-ntə̂ʉ yé ghʉ̌, pei ghwo ləcwôr tə me.

²²Pei tsáa məjʉ̂ŋ pye pi gháp mʉ̂ŋtə mʉŋtə́.

²³Pei fú lə̂ laŋə́-ndə̂u mǒghʼ, ə́ mbyarə́ gháp, gháp cwôr. Pəcó pye kə́ mbou mbə́ wó pi mboʼ pei tsáa məjʉ̂ŋ máp, ə́ ngʉ́ gháp cwôr; lə́ ə́ mə́ ngʉ̂ yə́rə́, pei lwôʼ gháp tə ndwóʼ mbaa məndǐ máp, ńté ńgó ncǔ kwar mə́ lə̂ mbəʉ zap ə́ nkə́u mə́u.

²⁴Ləghûʼ pə́ mbó Sê yi a kǔʼ lə̂ ntóutə́ wéi tə lə́u pei pfûŋ wéi po; ńgó â ghʉ́, pei ghí tó kə́u cər ləghûʼ yé ə́ yʉʼ yi tû-mbəʉ yé pə́ wó, ə́ mbə́ pətə-lǒʼ, ə́ mbóu mə́ ntsêi wéi tsěi.

²⁵Ə̂ ndaʼ yé, ə́ mbə́ Sê. A lə laghʼ Nde waghʼə Yěso Kəlísto ńgʉ́ paghʼə cwôr. Ńgó pə́ ghúʼtə́ pə̂ ndaʼ yé, zʉ́ lə́ ghwǒ nkeʼ, ə́ ngwǒ ləghûʼ, ə́ ngwó mətəʉ, ə́ mbǒu mə́ sâʼ nzʉ̂ lə̂ fú ləjitə́, ə́ ntó ńkə́u mpfu wo, ə́ láʼ kə́ pə̂ pə́ yə́rə́ lə̂ mənguʼ mi ə́ pyér poŋə́ ntó. Ámeŋ.