Read Ngombale Mənjwo Jâŋ 1 Bible Online

Mənjwo Jâŋ 1 - Ngombale bible

Mənjwo Jâŋ 1

¹Məno mi ə́ pə́ cər ŋwaʼa wo, ə̂ mi ə́ lə pə́ ləlwǒ, Yěso Kəlísto ghʉ̂ pəghaŋə-faʼ Sê sâa-sǎa njí měi. Ə Sê lə ŋə́ měi mbó Yěso, ńjí ńgó a nyarə́ měi mbó pəghaŋə-faʼ pêi, ə́ pə̂ məzə̂u mi ə́ wo tóghʼ tó. Yěso lə tə́u cwôʼ ye ńgó â wo nyarə́ měi mbó ngaŋə-faʼ ye Jâŋ.

²Jâŋ lə pə́ ndâʼ pye ńgó məno mə́tsəm mi a lə jwó, ə̂ tsâr Sê; Yěso Kəlísto pə̂ nyárə ńgó měi pə́ lə́nə́ʉ.

³Ndʉʉ-mboŋ ə̂ ŋuu yi a fûŋ ŋwaʼa wo, pəndʉʉ-mboŋ kə̂ mbə́ pye pi gháp pə́ nzúʼ tsâr yo yi ə́ fû mbó Sê lo, ə́ mbou mə́ ngʉ̂ ghíʼ ə́ pə́ ntúŋú; ńté no mpfu yi məno mêi mə́tsəm wo mbəutə́ wó pə́ mə́ nkǔʼ.

⁴Məŋ Jâŋ, məŋ ŋwáʼá ŋwaʼa wo, ə́ ŋə̂ mbó Məcûʼtə pye Kəlísto saambwô mi ə́ pə́ cər paghʼə-ngoŋ Azî: Ńgó Sê yi a pə́ wó, mə́i a lə pə́ wó, ə́ mbou mə́ ntó, â ghʉ̂ məno shʉʼʉ lə́ pei, ə́ mbou ncóghʼ mə́shwítə məntə̂ʉ pei; ńgó məzəghʼə saambwô mi ə́ tə̂ʉ mbi lwoŋ ləfou yé ghʉ̂ məno shʉʼʉ lə́ pei, ə́ mbou ncóghʼ mə́shwítə məntə̂ʉ pei.

⁵Yěso Kəlísto, â kwaʼ ŋuu yi a ghʉ̂ pə́ jî ńgó tsâr Sê pə́ lə́nə́ʉ. Ńgó â ghʉ̂ məno shʉʼʉ lə́ pei, ə́ mbou ncóghʼ mə́shwítə məntə̂ʉ pei. Â nduŋ-mbi ŋuu yi Sê lə ghʉ̌ a zʉ̂ʉ lə̂ ləwʉ̂, ə́ mbə́ Fou pə fou ndəu ndesé. A koŋ wághʼə, a lə lâghʼ məci mé sǒghʼ məfaa wághʼə.

⁶A lə ghʉ ńgó paghʼə pə pǎp nâatə́ ə́ mə́ sâʼ ngoŋ, ə́ mbə́ pənuŋú-poʼ lə̂ fáʼ mbó Sê yi a pə̌ Tə́ ye. Ləghûʼ gháp mətəʉ pə́ mbó zʉ́ Yěso lə̂ mənguʼ mənguʼ! Ə̂ pə́ yə́rə́.

⁷Â wə́ lə́, a tô cər məlâm lə̂, ŋuu ntsəm ghʉ̌ jwó yé; tə mbaa pye pi gháp lə sǎp yé saŋ-mbei zʉ́. Pye pə́tsəm ndəu ndesé ghʉ̌ wé ngôu, ə́ gheʼtə́ ə́ té yé. Ə̂ŋ, ə́ ghʉ̌ pə́ yə́rə́ lə́nə́ʉ! Ə̂ pə́ yə́rə́.

⁸Nde Sê laʼ ngô: «Mə̂ŋ Álə́fa, ə́ mbou mbə́ Oméga.» Ə́ laghʼ ńdâʼ ngô: «Mə̂ŋ lə́jitə́, ə́ mbə́ ləlyəghʼtə́.» Mə̂ŋ ŋuu yi a pə́ wó, mə́i a lə pə́ wó, ə́ mbou mə́ ntó, ə́ mbə́ Ngaŋə-mətəʉ-mə́tsəm.

⁹Mə̂ŋ Jâŋ, ə́ mbə́ fə̌r wei, n ndar mbəʉ zaa lə́ Kəlísto ghíʼ pei. M mə̌ njwô zâa ngwôʼ ghíʼ pei, mbaa lə̂ sáʼ təʉ ə́ nyáŋ cər no Ləfou Sê. Pə́ lə ghou ghâa ńgwo méʼ Patəmósʉ, ə́ pə̂ có lâʼ yi nci zə́mə́ ńŋə́ təsoŋ, ńté ńgó m mə̌ ntâghʼ ku ndə́iʼí lə̂ tsâr Sê ə́ mbou mə́ ndâʼ no yi m mə̌ njî lə́ Yěso Kəlísto.

¹⁰Ə́ lə pə́ leʼé lâʼ Nde, Zəghʼə Sê kə̂u lə́ məŋ, n nzûʼ cǒ tə́koʼ nji cû nzəm məŋ ghíʼ ntaŋ yi pə́ pə́ ntóŋ lə̂,

¹¹ə́ mə́ ndâʼ ngô: «Ŋwaʼá zə̂u tsəm yi o wo jwó, ə́ ndaghʼ ńgʉ́ tâʼ ləpuʼú ŋwaʼa, ə́ ntə́u ńŋə́ lə̂ məcûʼtə pye Kəlísto mwo saambwô: ə́ túsoŋ Efêzə gháp yi Səmîrənə, ə́ túsoŋ Perəngâmə gháp yi Tiyatî, ə́ túsoŋ Saadésʉ gháp yi Filadelfî ə́ ngʉ́ yi Lahodisê.»

¹²N shə́rə lə̂ njwó ŋuu yi a laʼ no lə́ məŋ. Ə́ shə́rə́ yə́rə́, ə́ njwó mələʼtə lâm saambwô mi pə́ lǎghʼ tə̌ʉ-gôl ńtsúŋú, pəlâm tə̂ʉtə ndəu wó.

¹³M mbôu njwó cǒ ŋuu tə̂ʉ təsoŋ wó, ə́ mbə́ ghíʼ Môu ŋuu lə̂; ə́ mǎʼ təsə ndǐ, ə́ ngwáa nkəndə́ nzoʼ zʉ́, ə́ pə̂ yi pə́ kə́ ndǎghʼ pə̂ tə̌ʉ-gôl ńtsúŋú.

¹⁴Mənyuŋu tû mé fôghʼ ńgó ntór, ghíʼ mənyuŋ ndənzʉ mbaa ghíʼ məghʉʉ; nyôghʼ mé pə̂ nkêʼ yʉʼ ghíʼ lə̂ʉ mǒghʼ,

¹⁵Məku mé ŋwáŋə ghíʼ cǒ mbə̂u tə̌ʉ yi pə́ tǒu ə́ ndǎghʼ zə̂u ńgóghʼ ńgó ə̂ ŋwáŋə́, njî yé zôr ghíʼ ləpêi nci jwǐ.

¹⁶Ə́ ngwǒ pəcwôʼ-saŋ saambwô lə̂ pô yé yi təʉ, nyǐ ntso pə̂ fû ntsʉ zʉ́ nkwǎr, ə́ mbə́ məngʉ̂ŋ mə́mbwô, lətû zěi cópə gháʼate. Ə sʉ̂ yé ŋwaŋtə ghíʼ ləjôghʼ mə́nəu ə́ ŋwaŋtə ntə̌ʉ-nəu.

¹⁷N ndêi tə njwó yə́rə́, ə́ mpfúŋ ńnûŋ məku zʉ́ ghíʼ pfû zə̂u lə̂. A zápə pô yé yi təʉ ndəu məŋ, ə́ ndâʼ ngô: «Koo o kə̂ mbóghʼ, mə̂ŋ nduŋ-mbi, ə́ mbou mbə́ ndyəghʼ-nzəm.

¹⁸M mbə̂ ntəʉ. N ndə kwʉ̂ mbǒu nzʉ́ʉ lə̂ ləwʉ̂, m mbə̂ mpfu wo ə́ mbə́ ntəʉ, ə́ láʼ pǒu kə́ kwʉ̂ ghâa po. N ndə təi nděi ləwʉ̂, n ngwo pəkísʉ lə̂ ndághʼ ńtsághʼə́ mbaa lə̂ ńdághʼ ńtsóʼ lâʼ pəpfû-sê.

¹⁹Ghíʼ ə́ kə́ mbə́ yə́rə́ lə̂, ŋwáʼá zə̂u tsəm yi o jwǒ, ə́ mi pə́ ndei mpfu wo, mbaa mi ə́ ghʉ̌ poŋə́ tó.

²⁰Ə́ ngwo lə̂ no pəcwôʼ-saŋ saambwô pi o jwǒ n ngwô lə̂ pô zâa yi təʉ lə̂, mbaa lə́ mələʼtə lâm saambwô mi pə́ lǎghʼ tə̌ʉ-gôl ńtsúŋú lə̂, mə́i pəcwôʼ-saŋ saambwô ə̂ pəcwôʼ Sê pi ə́ pápə məcûʼtə pye Kəlísto saambwô, mələʼtə lâm saambwô laghʼ ḿbə̂ məcûʼtə pye Kəlísto saambwô.»