Read Ngombale Mənjwo Jâŋ 10 Bible Online

Mənjwo Jâŋ 10 - Ngombale bible

Mənjwo Jâŋ 10

¹N nkə̂ ncí njwó ghíʼ cǒ cwôʼ Sê fû ləfaŋ shíʼ, ə́ ngwǒ mətəʉ. Məlâm pou mbəʉ ye ghíʼ ndǐ, ə ndʉŋ zə́mə tû yé; ə sʉ̂ yé ŋwáŋə ghíʼ ləjôghʼ mə́nəu, məku mé pə̂ ghíʼ mələ̂ʉ mǒghʼ.

²A ghwô mə́ceʼé ləpuʼú ŋwaʼa yi pə́ fei mə́ mbó zʉ́. Ə́ ntághʼ ku yé yi təʉ ndəu mə̂i-nci, ə́ ntághʼ yi kwap ndəu ndesé;

³ə́ ntsʉ̌ʉ lə̂ təʉ ghíʼ sáa-mbaŋə tsʉʉ cər mbə̂i lə̂. Ə́ ntsʉ̌ʉ yə́rə́, ləfaŋ pyêtə mpfu saambwô.

⁴Ləfaŋ pyêtə mpfu saambwô yə́rə́, m mə̂ ndôu lə̂ ŋwáʼá zə̂u yi ə́ pyêtə yə́rə́, ə́ ndaghʼ ńdáʼ, cǒ nji fû ləfaŋ ə́ ndáʼ lə́ məŋ ngô: «Lwǒ no yi ləfaŋ pyétə́ mpfu saambwô gháʼa, ə́ ndághʼ ńdǎʼ, koo o ŋwáʼá.»

⁵Ə́ pə̂ yə́rə́, cwôʼ Sê yi n ndə jwó yé có ku yé tə̂ʉ ndəu mə̂i-nci, ə có tə̂ʉ ndəu ndesé lə̂ ŋáʼá pô yé yi təʉ ŋə́ tʉ́,

⁶ə́ ndǎghʼ ləjôghʼ Sê yi a pə̌ ntəʉ, ə́ mbə́ yi a láʼ cí pə̂ pə́ wó, ə́ mbə́ yi a lə tsuŋú ləfaŋ gháp pə zə̂u tsəm yi ə́ pə́ cər wó, ə́ ntsuŋú ndesé gháp pə zə̂u tsəm yi ə́ pə́ cər wó, ə́ ntsuŋú mənci gháp pə zə̂u tsəm yi ə́ pə́ cər wó, ə́ nkâa ńdǎʼ ngô: «Cǒ mpfu yi pə́ pǒu kə́ zʉ́ʼtə́ kâa pyêr yé!

⁷Lə́ ə́ ghʉ̌ pə́ leʼé yi cwôʼ Sê mbâatə saambwô wo ntôŋ ye ntaŋ, məno mi Sê lə ghʉ̌ ə́ pə̂ ləlwǒ ə̂ pə̂utə́, ə́ ghíʼ a lə lǎʼ mbó pəghaŋə-faʼ pé, ə́ mbə́ pətsətə́-nkəʉ pé.»

⁸M mbôu nzúʼ nji yi n ndə zúʼ lə̂ fû tʉ̌-lə́pû, kə̂ ncí ndáʼ lə́ məŋ ngô: «Wo mpfú mə́ceʼé ləpuʼú ŋwaʼa yi pə́ fei mə́ li, mbô cwôʼ Sê yi a tə̌ʉ có ku yé tə̂ʉ ndəu mə̂i-nci, có tə̂ʉ ndəu ndesé.»

⁹A lâʼ yə́rə́, n ncʉ́ŋə-mbáatə́ cwôʼ Sê wei, ə́ sʉ́ʉtə́ yé ńgó â ŋə́ mə́ceʼé ləpuʼú ŋwaʼa wêi lə́ məŋ, a lâʼ lə́ məŋ ngô: «Ko wěi, ə́ mpfár: a wó pə́ ntsʉ gho ə́ lə̌ʉ ghíʼ ŋwâʼ lə̂, ə́ pǒu kə́u ləpəm gho, ə́ cʉ́ʼ li lǐ.»

¹⁰N fû mbô zʉ́ ə́ mpfú mə́ceʼé ləpuʼú ŋwaʼa zêi, ə́ mpfár. A pə̂ ntsʉ məŋ ə́ ndə̂ʉ ghíʼ ŋwâʼ lə̂, n ndêi tə mî a kə̂u ləpəm məŋ ə́ ncʉ́ʼ ndî lǐ.

¹¹Ə́ pə̂ yə́rə́, pə́ laʼ lə́ məŋ ngô: «Ə́ poŋ ńgó o kə́ ncí ngwó ntsətə́ no yi Sê lə lǎʼ zěi mbó lâʼ tsəm, ə́ mbó ngoŋ ntsəm, ə́ mbó pye pi gháp tsâr mətsâr mbə̂u lə̂ mbə̂u, mbaa mbó pəfou tə nzáa.»