Read Ngombale Mənjwo Jâŋ 11 Bible Online

Mənjwo Jâŋ 11 - Ngombale bible

Mənjwo Jâŋ 11

¹Pə́ laʼ yə́rə́ tə ə́ kuʼ, pə́ ŋə̂ có tsə̌m kəkaʼa lə́ məŋ, ə́ pə̂ tsə̌m zə̂u yi pə́ laghʼ fə̂iʼ zə̂u, ə́ ndǎʼ lə́ məŋ ngô: «Lər ngwo fə̂iʼ ndə̂ Sê gháp pə lənuŋú poʼ Sê, ə́ mbou nkwâʼ ndwuŋ pye pi gháp ghûʼtə Sê cər wó.

²Lə́ koo fə̂iʼ tətáa ndə̂ Sê yi nzəm pěi; koo fə̂iʼ ńté ńgó Sê lə nyér zêi yʉʼ mbó pətəpə̌i-no Sê. Gháp wo noʼtə́ pye túsoŋ Sê, ə́ təcər pəsaŋ ntsap pwô lə̂ mə̂m kwo.

³N ngʉ̌ tə́u pye pâa pə́pwô, gháp tó ndâʼ no yi gháp pə́ njî lə́ məŋ, gháp mâʼ məlúŋu ləwʉ̂, ə́ ndaghʼ ŋáa ńdéʼtə́ no zâa, təcər məleʼé tâʼ-tóusʉ lə̂ nkʉ pwô lə̂ mə̂m ntoghʼó mêi.»

⁴Pye pêi pə́pwô pi gháp laʼ no yi gháp pə́ njî lə̂ Sê, gháp tə̂ʉ mbi Nde yi a sâʼ ndəu ndesé tsəm, ə́ ndaghʼ mbə̂ mətʉ̌ məwə̂r olîvə mə́mbwô, ə́ nkə́ ncí mbə̂ mələʼtə lə̂m mə́mbwô.

⁵Ŋuu lə̌i mə́ ndôu lə̂ ngághʼə́ gháp, a jî ńgó mǒghʼ pə́ nkwar ntsʉ páp, ə́ mbə̂ghʼ pəghaŋə mbəu páp. Yo mbə̂u ləwʉ̂ yi ŋuu ntsəm yi a táa fəiʼtə́ lə̂ ngághʼə́ gháp táa kwʉ́ zěi.

⁶Gháp ghwo mətəʉ lə̂ ndághʼ ńtsághʼə́ mbʉŋ ləfaŋ, tə lə́u ə lô yé lə̂ məleʼé mi gháp pə́ ntsətə Nkəʉ Sê po. Gháp kə́ ncí ngwô mətəʉ lə̂ ndághʼ ńshə́rə́ mənci ə́ cʉ̂ʼ məci, ə́ mbou ngwô mətəʉ lə̂ ndághʼ ḿmǎʼ ngwôʼ mbə̂u lə̂ mbə̂u lə́ pye-mə́soŋ ndəu ndesé, ə́ ghíʼ gháp kǒŋ.

⁷Lə́ gháp táa leʼtə́ məno mi gháp pə́ njî lə̂ Sê tə myǎghʼ, mə́nye yi a kwar cər tâa tə́ ləlyəghʼtə́ tó ndwóʼó gháp lə̂ ntso, ə́ nzʉ́ gháp, ə́ mbou jwítə́ gháp.

⁸Məpfû máp ghʉ̌ káʼtə́ ndəu zǎa cər túsoŋ jwǐ, ə́ túsoŋ yi pə́ lə kʉ̌ʉ Nde gháp wó lə̂ tʉ̌-mbʉ̂ŋtə. Pə́ lâghʼ mbə̂u yi Sê lǎghʼ ńjwó, ə́ ncʉ́ʼ fúŋ zêi túsoŋ ńgó Sodôm káa ńgó Egípto.

⁹Məpfu máp káʼtə́ yʉʼ wó, ə lâʼ tsəm, ə́ pye mətsâr lâʼ mə́tsəm gháp pə ngoŋ ntsəm kóʼ ńjwó təcər leʼé tárə́ lə̂ pfuʼ, lə́u ŋuu pə̂i yé ńgó pə tʉ́ŋ gháp po.

¹⁰Ə́ pə́ yə́rə́ pye pi gháp pə́ cî ndəu ndesé jwó məpfû máp, ə̂ poŋə́ gháp, gháp tsêi gháʼate. Wǒwó kə́r ləpuʼú ə́ ŋə́ mbó cǒ, pə kə́ ŋə̂ có lə́ zʉ́, ə́ ndaghʼ ńtsêi ńté ghíʼ pə́ jwítə́ pətsətə́-nkəʉ Sê pə́pwô pi gháp kə ŋə̂ pye-mə́soŋ ngwôʼ gháʼate.

¹¹Məleʼé mêi mə́ntárə́ lə̂ pfuʼ lə lei, Sê fwôghʼ Zəghʼə yi ə́ ghʉ pə́ pə̂ wó ndəu páp, gháp lêtə sê ə́ ntə́ʉ tə́ʉ mbi pye pi gháp lə tə́ʉ mə́ njwô gháp, tə́koʼ ləpôghʼ ghôu gháp.

¹²Pətsətə́-nkəʉ Sê pêi pə́pwô zûʼ cǒ nji yi ghwǒ mətəʉ gháʼate fû ləfaŋ, ə́ ndáʼ lə́ páp ngô: «Pei kóʼ ńtó lə̂ yaʼa!» Gháp pə̂ nkôʼ yə́rə́, məlâm pou gháp, pəghaŋə mbəu páp cʉ̂ʼ ntə́ʉ mə́ njwô ghíʼ gháp kôʼ ńdə̂r.

¹³Pə̂ mpfu wěi mpfu wêi, ndesé cʉʼʉ gháʼate. Túsoŋ ghaptə məyʉʼ ləghə̂m, tâʼ yʉʼ kə́mə ńcwə́rə́, pye tóusʉ saambwô kwʉ̂tə ghíʼ ndesé cʉʼʉ́. Pfuʼ pye pi gháp lə lwǒghʼ pôghʼ gháʼate, ə́ ncʉ́ʼ mə́ ŋə̂ ləghûʼ mbó Sê yi a wə́ tʉ̌-lə́pû.

¹⁴Ə ngwôʼ mbâatə pwô lei mə́. Lə́ ngwôʼ mbâatə tárə́ yo yi tô lo.

¹⁵Cwôʼ Sê mbâatə saambwô tôŋ ye ntaŋ, pə́ zûʼ mənji tə̌i fû tʉ̌-lə́pû, ə́ ndǎʼ ngô: «Ə Nde wághʼə gháp Nzaʼ-nkʉ lə́ cʉ́ʼ sâʼ ndəu nzʉ̂ mpfu wo, ə́ láʼ kə́ cʉ́ʼ sâʼ pə́ yə́rə́ lə̂ mənguʼ mənguʼ!»

¹⁶Gháp laʼ yə́rə́ tə nâʼ, pətikáŋ pə̂ ntsap ləkwo lə̂ mə̂m mbwô pi gháp lə nyáŋtə́ lə̂ máp məlwoŋ-lə́fou mbi Sê lə̂, shîʼ nkʉ́ʼtə́ sê, ə́ sǎp sʉ̂ gháp sê, ə́ mə́ ngúʼtə́ Sê

¹⁷ə́ ndâʼ ngô: «Ə Nde Sê yi o ghwǒ mətəʉ mə́tsəm, gho yi o pə̌ wó, ə́ ndə yǎa fú leʼé mbə́ wó, paghʼ ŋə̌ nkhwo lə́ gho ńté ghíʼ o laghʼ mbə̂u yi o kə lǎghʼ ńsáʼ nzʉ̂, ə́ nyarə́ mətəʉ mô mi jwǐ.

¹⁸Məcó məngoŋ ndeʼe kə záŋə-lóŋ ńté gho, lə́ lə̂ mpfu wo, gho lə̂ cʉ̌ʼ ngwǒ lə̂ nyárə́ gháp zô záŋə-lóŋ, ə́ pə̂ mpfu yi o wo záʼ kôr təcər pei pə pəpfû-sê, ə́ pə̂ mpfu yi o wo tsôʼ faʼ ngaŋə-faʼ zô pətsətə́-nkəʉ Sê, mbaa ŋuu ntsəm yi a pə̌ gho, ə́ mbou mə́ nzûʼ ntsʉ ghô, ə́ môu kəʉ pə̂ ntikáŋ lo; ə́ pə̂ mpfu yi o wo mbə̂ghʼ ŋuu ntsəm yi a pə̌ mbə̂ghʼ pye-mə́soŋ ndəu nzʉ̂!»

¹⁹Ə́ ngúʼtə́ Sê tə nyér, ntsʉ ndə̂ Sê tʉ̌-lə́pû tsóʼo ńtə́ʉ. Pə́ jwô nkəu yi Sê gháp pə pye-mə́soŋ lə lǎghʼ ńgwâr kaa kwar ńtə́ʉ cər wó, pə́ jwô mənyǐ mbʉŋ, ə́ nzúʼ mənji pye; ləfaŋ pyêtə, ndesé cʉ́ʼʉ, məghʉʉ pfûŋ gháʼate.