Read Ngombale Mənjwo Jâŋ 12 Bible Online

Mənjwo Jâŋ 12 - Ngombale bible

Mənjwo Jâŋ 12

¹Ə́ lei yə́rə́, tâʼ tə́koʼ ləiʼi kwâr ləfaŋ, ə́ mbə̂ cǒ məngyě, ə́ mǎʼ ndǐ, ə́ pə̂ mə́nəu; ə́ ntághʼ məku mé ndəu mə́saŋ. Ə́ sǒ nkaghʼə-ləfou tû zʉ́, pəcwôʼ-saŋ ntsap pwô lə̂ ləghə̂m pə̂ tû zʉ́.

²Məngyě wêi lə pə́ yi shuŋú, ə́ mə́ ngwô njí wó, môu pə̂ ndə̂u yé gháʼate, a pə̂ ntsə́rə́.

³Cǒ tâʼ ləiʼi kə̂ ncí nkwár ləfaŋ, ə́ mbə́ cǒ tə́koʼ nô-məngə̂m, ə́ mbǎŋ ghíʼ mǒghʼ, mətû mé pə̂ saambwô, ə́ ngwǒ məndôŋ ləghə̂m, zarə́-zarə́ tû lə́ měi ghwo tâʼ nkaghʼə-ləfou.

⁴Pəcwôʼ-saŋ ghaptə yʉʼ tárə́, a lâghʼ nkəu yé ńzághʼ tâʼ yʉʼ ə́ ncwə̌r ndəu ndesé. Ə́ ntó ńtə́ʉ mbi məngyě yi a wo njí wó lêi, ə́ mə́ nzʉ̂ʼtə ghíʼ môu wo kwǎr, a lêi-lěi nkhwôr ḿpfár.

⁵Məngyě wêi jî tâʼ môu mbiŋə, a ghwô mətəʉ lə̂ ndághʼ ńsáʼ ngoŋ tsəm, tə ə́ pə̂ yi mboʼ cǒ ŋuu kûʼ yé lə̂ mbʉ̂ŋ no ntsʉ zʉ́ po. A lêi tə njí, pə́ saʼ môu ndaghʼ ńdə́r lə̂ mbəʉ Sê, ə́ yʉʼ yi lwoŋ Ləfou Sê pə́ wó.

⁶Ə́ ngwǒ lə́ məngyě wêi, a nkhʉ̂ ńdə́r lə̂ koŋə-məkwaʼá lə̂ yʉʼ yi Sê lə tsuŋtə́ ńgó a tó nyáŋ yʉʼ wó, â pə́ zághʼə́ yé təcər məleʼé tâʼ-tóusʉ lə̂ nkʉ pwô lə̂ mə̂m ntoghʼó.

⁷Ə́ pə̂ yə́rə́, có ntso kəmə tʉ̌-lə́pû, Míshye tə́-ndə̂ pəcwôʼ Sê gháp pə pəcwôʼ pé lwóʼo nô-məngə̂m; nô-məngə̂m gháp pəcwôʼ pé kə̂ ndwóʼó gháp záp lə́wó.

⁸Lə́, pə́ lwóʼo nô-məngə̂m ńzʉ́ yé; lə́u gháp pə pəcwôʼ pé kə̂ mbyér ngwô gháp záp yʉʼ tʉ̌-lə́pû po.

⁹Míshye gháp pə pəcwôʼ pé ci nô-məngə̂m zêi ḿmâʼ ndəu ndesé. Nô-məngə̂m zêi, ə̂ ndwuŋu nô yi tə fú nguʼ, pə́ fûŋ ńgó Sə́tə, ə́ fûŋ yé ńgó ngaŋə-mbəu, zʉ́ lə́ futə ŋuu ntsəm ndəu ndesé. Pə lə ci yé gháp pə pəcwôʼ pé, ə́ mǎʼ ndəu ndesé.

¹⁰M mbou nzúʼ cǒ nji ntə̌i fû ləfaŋ ndáʼ ngô: «Yo mpfu yi Sê zaghʼə wo ghʉ̌ pye-mə́soŋ cwór, ə́ mbə́ mpfu yi Sê wo nyarə́ mətəʉ mé, ə́ mbou mbə́ mpfu yi a wo sâʼ nzʉ̂. Lə̂ mpfu wo, a ŋə̌ mətəʉ mbó Nzaʼ-nkʉ; mpfu zêi kuʼ yə́rə́ gháʼá, ńté no pə́ kə fú tʉ̌-lə́pû ncǐ ngaŋə-mbəu pəfə̌r pághʼə ḿméʼ, ə́ zʉ́ yi a kə pútə gháp ntə̌ʉ-nəu gháp lətwûʼ mbi Sê.

¹¹Pəfə̌r pághʼə pêi kə mâʼ yé ńzʉ́, ńté no Môu ndənzʉ kə lâghʼ məci mé ńzə́u tû záp, mbaa ńté ghíʼ gháp kə pə́i ńgó tsâr Sê yi gháp leʼtə ə́ pə́ lə́nə́ʉ; káa gháp kə pâa gháp ləcǐ-mbî gháp, gháp kə pə́i ńgó ə́ lə̌i mbə́i mbə́ pə̂ nkwʉ́, mə́i gháp wo kwʉ́.

¹²Ə̂ zə̂u yi ə́ ghʉ̌, gho lə́pû tsêi; mbaa pei pə́tsəm pi pei cî wó, pei tsêi! Lə́, pei pi pei cî ndəu ndesé, mbaa cər mə̂i-nci, pêi pəndʉʉ-tə́poŋ, ńté no ngaŋə-mbəu shǐʼ ńkwátə́ wéi, ə́ mbou mə́ nzáŋə́ lóŋ gháʼate ńté ńgó a pə̌ njî ńgó mé məleʼé khwóghʼ mə́.»

¹³Tə́koʼ nô-məngə̂m kə lei tə njí ńgó pə́ kə fú tʉ̌-lə́pû ncǐ yé ḿmâʼ ndəu ndesé, ə́ ntsə́ʉ nzəm məngyě yi a lə jí môu mbiŋə lə̂, ə́ njǐ lə̂ nzûŋ yé.

¹⁴Lə́, pə́ ŋə̂ məmbap tə́koʼ mə́ghə́u mə́mbwô lə́ məngyě wêi, ghíʼ a lǎghʼ lə́m lə̌r lə̂ koŋə məkwaʼá; ə́ yʉʼ yi Sê lə tsuŋtə́ ghíʼ a wo nyáŋ wó, â pə́ nzághʼə yé təcər nguʼ tárə́ lə̂ pfuʼ, ə́ pə̂ yʉʼ yi mboʼ nô kə̂ njwô yé yé po.

¹⁵Ə́ pə̂ yə́rə́, nô zéʼe nci nzəm məngyě wêi, ə́ zâa ghíʼ mə̂i-nci lə̂, ghíʼ ə́ wo khwǒr yé lǎghʼ lə̌r.

¹⁶Lə́, ndesé tô mpfútə́ məngyě wêi, ə́ ŋáʼá ntsʉ yé, nci yi nô-məngə̂m yǎa nzéʼé lei kə̂u cər wó tsəm.

¹⁷Nô-məngə̂m kə̂ mə́ nzáŋə lóŋ záŋə́ nzəm məngyě wêi, ə́ shə́rə́ ncʉ́ʼ mə́ ndwóʼo pə̂ ngər məngyě wêi. Ə́ pə̂ pye pi gháp pə́ ŋəi ghíʼ ntǎghʼ Sê pə́ ntúŋú, ə́ mbou mbə́ mpfu tsəm ə́ ndâʼ ŋuu yi Yěso pə̌ zʉ́.

¹⁸Nô-məngə̂m zêi cʉ̂ʼ ngwó ntə́ʉ ndəu saŋə-sáŋə ə́ nkaŋ mə̂i-nci.