Read Ngombale Mənjwo Jâŋ 13 Bible Online

Mənjwo Jâŋ 13 - Ngombale bible

Mənjwo Jâŋ 13

¹N nkə̂ ncí njwô cǒ nkəʼə mə́nye fû nci ńkóʼ; məndôŋ mé pə̂ ləghə̂m, mətû mé pə̂ saambwô, mənkaghʼə-lə́fou ləghə̂m kə̂ mbə́ lə̂ məndôŋ mé mêi ləghə̂m. Mə́i pə́ lə wo lə̂ zarə́-zarə́ tû lə̂ mətû mé mêi saambwô, ə́ ŋwaʼá tâʼ ləjôghʼ laghʼ ńzóutə́ Sê.

²Mə́nye yi n nkə jwó lêi kə shwí pə́ təcwi (nye-njwi), məku mé pə̂ pə́ ghíʼ məku ntsap; ntsʉ yé pə̂ ghíʼ ntsʉ sáa-mbaŋə. Nô-məngə̂m zêi ŋə̂ mətəʉ mé lə́ zʉ́, ə́ ŋə́ lwoŋ ləfou yé lə́ zʉ́, ə́ mbou ŋə́ yé mətəʉ mi jwǐ lə̂ ndághʼ ńsáʼ lâʼ.

³Cǒ tâʼ lə̂ mətû mé mêi pə̂ pə́ ghíʼ a ghwo khwo fʉ̌ŋ yi mboʼ kə njwí yé jwî, lə́ pə́ pou tsúʼ fʉ̌ŋ zêi tə təʉ. Pye pə́tsəm ndəu ndesé jwô yə́rə́, ə́ poŋə́ gháp gháʼate, gháp tsə̂ʉ nzəm nye wêi.

⁴Pye pə́tsəm cʉ̂ʼ mə́ ngûʼtə nô-məngə̂m zêi ńté no a lə ŋə̂ mətəʉ mé lə́ nye wêi. Ə́ mbou mə́ ngûʼtə nye, ə́ ndâʼ ngô: «Wǒ ŋuu ghwo mətəʉ ghíʼ nye? Mboʼ wǒ ŋuu lwóʼo yé?»

⁵Pə́ ŋə́ saa saa lə́ nye wêi, lə̂ ndághʼ ńtsár mətsâr ŋâʼtə, ə́ mbou ndághʼ mənzou tə́poŋ nzôutə́ Sê, pə́ pou ŋə́ yé mətəʉ lə̂ ndághʼ ńgʉ̌ yə́rə́ təcər nguʼ tárə́ lə̂ pfuʼ.

⁶Nye wêi kə̂ ncʉ́ʼ njí lə̂ ntsár mətsâr laghʼ ńzóutə́ Sê, ə́ mə́ ntsâr tə́poŋ lə̂ ləjôghʼ yé, ə́ tsâr tə́poŋ ńté yʉʼ yi Sê cî wó; ə́ nzoutə́ mbaa pye pi gháp cî tʉ̌-lə́pû.

⁷Ə́ nkə́ ncí ŋə́ yé saa lə̂ ndághʼ ndwóʼó pye Sê tə nzʉ́ gháp; ə́ nkə́ ncí ŋə́ yé mətəʉ lə̂ ndághʼ sáʼ məcʉŋə-ndə̂ mə́tsəm, ə́ sáʼ məlâʼ mə́tsəm, ə́ sáʼ pye mətsâr lâʼ mə́tsəm, ə́ sáʼ ngoŋ tsəm.

⁸Pye pə́tsəm pi gháp pə́ ndəu ndesé ghʉ̌ ghúʼtə́ yé, ə́ pye pə̂ pə́tsəm pi káa pə́ lə ŋwáʼa yé mənyôghʼ máp tə fú lənuŋú ngoŋ cər ŋwaʼa yi pə́ ŋwaʼa mənyôghʼ pye pi gháp ghwǒ lənyâŋ yi shwî cər wó; a pə̂ yi Môu ndənzʉ yi pə́ lə jwí yé lə̂.

⁹«Ŋuu yi a ghwǒ mətuŋú lə̂ ndâghʼ ńzúʼ yʉʼ, â tsúŋú nzúʼ.

¹⁰Ə́ lə̌i mbə́ yi Sê lə lâʼ ńgó ŋuu táa pə́ puʼ ntso, mə́i a táa kə́ pə́ pə́ wěi; ə́ mbə́ yi Sê lə lâʼ ńgó pə́ táa lǎghʼ mə́puʼ-ntso sǎp ŋuu jwí, mə́i ngaŋ táa kə́ kwʉ́ pə́ wěi; ə̂ zə̂u yi ə́ ghʉ̌, pye Sê ghwo lə̂ nkə́ mə́ sâʼ pə̂ təʉ, ə́ ngwo pə̂i-ntə̂ʉ nzəm Sê.»

¹¹N nkə̂ ncí njwô cǒ nkəʼə nye fû cər ndesé ńkwár. Ə́ ngwǒ məndôŋ mə́mbwô ghíʼ mi môu ndənzʉ, lə́, ə́ ntsâr pə́ ghíʼ tâʼ tə́koʼ nô-məngə̂m.

¹²A lə kə́ ngwô yé lə̂ ndâghʼ ńgághʼə́ pye-mə́soŋ ghíʼ mi nduŋ-mbi nye yi a lə kwǎr nci, ə́ ngǐ pə́ sâʼ; nduŋ-mbi nye tə̂ʉ mə́ njwó, a cʉ́ŋə pye-mə́soŋ pə́tsəm ndəu ndesé ńgó gháp kʉ́ʼtə́ mbi nduŋ-mbi mə́nye yi khwo fʉ̌ŋ lə pə́ lə́ zʉ́ ə́ mbou ntə̂ʉ lə̂, ə́ ngúʼtə́ yé.

¹³Wêi nye mbâatə pwô ghʉ̂ mənkəʼə-məno jwǐ; tə ngʉ́ mǒghʼ fû ləfaŋ ńshíʼ ḿpfúŋ ndəu ndesé mbi pye-mə́soŋ pə́tsəm.

¹⁴A lə lâghʼ mənkəʼə-məno mi pə́ lə ŋə́ yé mətəʉ lə̂ ndághʼ ńgʉ̌ mbi nduŋ-mbi nye lə̂, ə́ ndaghʼ ńcôŋ tû pye-mə́soŋ ndəu ndesé; ə́ ncʉ́ŋə́ gháp lə̂ nkóu tə́tó nduŋ-mbi nye yi pə́ lə lǎghʼ mə́puʼ-ntso sáp yé lə̂, pə́ pou ntsúʼ yé, a shwítə lə̂, ə́ ndághʼ ŋə́ məkuʼ mé.

¹⁵Pə́ ŋə̂ mətəʉ lə́ mbâatə nye, a lâghʼ ńnóghʼtə́ tə́tó nduŋ-mbi nye tə a pə̂ ntəʉ ə́ mə́ ntsár, ə́ njwítə́ ŋuu ntsəm yi a pə̌ ndəʼ lə̂ ngúʼtə yé.

¹⁶Nye mbâatə pwô wêi laghʼ təʉ ńgʉ́ ńgó ŋuu ntsəm ndəu ndesé pə́i, ə́ pə cóghʼ ləiʼi lə̂ pô yé yi təʉ káa ləzə̌i zʉ́, lə̂ ghəpə́ tsəm mbaa pətikáŋ pə́tsəm, lə̂ pəghaŋə-zə̂u mbaa pəpûŋ, lə̂ məpuʼ mbaa pəndʉʉ-nə̂r.

¹⁷Mboʼ ŋuu lə kûʼ yé lə̂ nzə́u zə̂u káa lə̂ fə̂i zə̂u tə́ ghó ləiʼi zêi pə́ ndəu zʉ́ po. Ə ləiʼi zêi laghʼ mbə̂ ləjôghʼ nye wêi mbaa pənómbaa pi ə́ kəitə́ ḿbə́ ləjôghʼ yé.

¹⁸Yo mpfu yi ə́ poŋ ńgó ŋuu ntsəm tsúŋú nkwaŋə́ tû yé. Ŋuu lə̌i ngwô jîno, mə́i a wo zúʼ no yi pənómbaa pi ə́ pə́ ləjôghʼ nye wo ə́ laghʼ ńdáʼ. Pənómbaa pêi ə̂ ləjôghʼ ŋuu-məsoŋ ə́ mbə́: nkʉ ntoghʼó lə̂ ntsap ntoghʼó lə̂ mə̂m ntoghʼó (666).