Read Ngombale Mənjwo Jâŋ 14 Bible Online

Mənjwo Jâŋ 14 - Ngombale bible

Mənjwo Jâŋ 14

¹N nkə̂ mə́ nâŋ nǎŋ, ə́ njwó Môu ndənzʉ tə̂ʉ ndəu ləkôr Siyôŋ, pye tóusʉ nkʉ lə̂ ntsap kwo lə̂ mə̂m kwo tə̂ʉtə mbəʉ zʉ́; pə́ ŋwaʼa ləjôghʼ yé gháp yi Tə́ ye məzə̌i páp.

²N nzûʼ cǒ tə́koʼ nji fû lə́pû nkwǎr, ə́ nzôr ghíʼ mə̂i-nci; ə́ mbyétə ghíʼ ləfaŋ; nji yi n ndə zúʼ lei lə pôŋ pə́ ghíʼ nji ntsəkoŋ yi pə́ pə́ mbúʼ.

³Gháp pə̂ nzâp có zap-nci yi shwî, ə́ mbi lwoŋ-lə́fou, ə́ mbi pəmə́nye ləkwo pə̂ gháp pə mbi pətikáŋ pə̂. Ə zap-nci zêi pə̂ yi mboʼ cǒ ŋuu jyêʼ yé tə nzáp po, tə ndyéʼ pye tóusʉ nkʉ lə̂ ntsap kwo lə̂ mə̂m kwo pi Sê lə tsǔʼ gháp ndəu ndesé lə̂.

⁴Pêi pye káa lə lâghʼ gháp nzóʼ pəngyě ncóŋ ndwuŋ gháp, gháp nyâŋ gháp pə́ ghíʼ pye pi gháp kə́ jî gháp no məngyě. Ə́ mə́ nzûŋ nzəm Môu ndənzʉ yʉʼ tsəm yi a wo wó. Sê lə wo nou pye-mə́soŋ ńtsǔʼ gháp, gháp pə́ mbó Sê mbaa mbó Môu ndənzʉ ghíʼ ntû zə̂u yi pə́ laghʼ ńkwâr nkâʼ;

⁵pə́ laa kə́ zûʼ yé ghíʼ məlaa nkwǎr ntsʉ páp: mboʼ ŋuu côghʼ yé fər paa páp lə̂ có zə̂u po.

⁶M mbôu njwó cǒ cwôʼ-Sê pə̂ ndə̂m tə tʉ̌-lə́pû; ə́ ngwǒ Nkəʉ Shʉʼʉ yi mboʼ ə́ lâʼ mê yé po, ə́ yi a tô ńdeʼtə́ wó mbó pye ndəu ndesé, ə́ mbó pye məlâʼ mə́tsəm, ə́ mbó pye məcʉŋə-ndə̂ mə́tsəm, ə́ mbó pye mətsâr lâʼ mə́tsəm, ə́ mbó ngoŋ tsəm.

⁷Cwôʼ-Sê wêi pə̂ ndâghʼ nji ntə̌i ndâʼ ngô: «Pei shúʼú mbəʉ zéi mbi Sê, ə́ ngúʼtə yé ńté no mpfu yi a wo nzáʼ kôr gháp pə pye-mə́soŋ kuʼ mə́. Pei ghúʼtə́ yé, zʉ́ yi a lə tsuŋú ləfaŋ gháp ndesé; ə́ tsuŋú mənci jwǐ gháp pə məsâʼ-nci!»

⁸Cwôʼ-Sê mbâatə pwô zûŋ nzəm nduŋ-mbi wěi, ə́ mə́ ndâʼ ngô: «A pfǔŋ, a pfǔŋ, tə́koʼ túsoŋ Babilônə me! No məghap kə poŋə́ yé ghíʼ məluʼ poŋə́ pye lə̂, a côghʼ ŋuu ntsəm mə́u.»

⁹Cǒ tâʼ cwôʼ Sê mbâatə tárə́ kə̂ ncí nzúŋtə́ nzəm gháp, ə́ ndǎghʼ nji ntə̌i ńdáʼ ngô: «Ŋuu lə̌i ngúʼtə mə́nye gháp tə́tó ye, ə́ mbou mpfú ləiʼi yé ləzə̌i zʉ́ káa pô zʉ́,

¹⁰mə́i a ghʉ̌ kə́ nô yé məluʼ záŋə-lóŋ Sê yi ə́ lə zéʼ mə́ lə́wó, ə́ mi pə́ cóghʼ tə́ watə cər tə́tóʼ záŋə-lóŋ ye; ə́ pǒu jwó ngwôʼ ntə̌i cər mǒghʼ məkaa mbi pəcwôʼ Sê pi ndêi-lěi mbaa mbi Môu ndənzʉ.

¹¹Ə ndî fú lə̂ mǒghʼ yi gháp jwô ngwôʼ cər wó, ə́ ndáʼ ncí nkôʼ lə̂ mənguʼ mənguʼ, gháp póu nzətə gháp ntə̌ʉ-nəu káa lətwûʼ po; ə́ pye pə́ pi gháp ghûʼtə nye gháp tə́tó ye mbaa wǒwó yi pə́ ŋwaʼá ləjôghʼ nye wêi ndəu zʉ́.»

¹²Ə́ laghʼ ńdâʼ ńgó ŋuu yi a pə̌ ŋuu Sê ghwo lə̂ sáʼ təʉ ńŋə̌i ghíʼ məntǎghʼ Sê pə́ ntúŋú, ə́ mbou ngwô pə̂i-ntə̂ʉ nzəm Yěso Kəlísto.

¹³M mbôu nzúʼ cǒ nji fû ləfaŋ ndâʼ lə́ məŋ ngô: «Ŋwaʼá ngô: “Lə̂ fú mpfu wo, pəndʉʉ-mboŋ ə̂ pye pi gháp ghí kwʉ́tə́, mə́i gháp pə Nde təmtə́ mə́ ńcʉ́ʼ tâʼ ŋuu.” Ə Zəghʼə Ndêi-lěi lâʼ ngô: “Ə̂ŋ, gháp pə́ nzətə lə̂ lətâŋ yi gháp kə táŋə́ wěi; ńté no Sê ghʉ̌ ŋə́ ntsoʼó-faʼ gháp lə̂ məfaʼ shʉʼʉ mi gháp lə fǎʼ měi.”»

¹⁴N nkə̂ mə́ nâŋ naŋə́, ə́ njwó məcó məlâm fúfú, cǒ ŋuu nyâŋ ndəu wó ghíʼ Môu ŋuu lə̂. Ə́ sǒ nkaghʼə-ləfou tû zʉ́, ə́ pə̂ yi pə́ lǎghʼ tə̌ʉ-gôl ńtsúŋú, ə́ mbou ngwô cǒ mbə̂u wafú-ndəuʼ yi pə́ laghʼ ńdôghʼ məzʉ̂ nkâʼ, a côghʼ gháʼate.

¹⁵Cǒ cwôʼ Sê yi ndeʼe fû ndə̂ Sê ə́ nkwǎr, ə́ ndǎʼ lə́ ŋuu yi a nyǎŋ ndəu məlâm ngô: «Pyé wafú-ndəuʼ ghô, ə́ ndaghʼ ńdôghʼ məzʉ̂ ńŋə́ ndə̂, ńté ńgó mpfu zěi kuʼ mə́, məzə̂u mi ə́ pə́ ndəu ndesé təʉ mə́!»

¹⁶Ə́ ndǎʼ yə́rə́, ŋuu yi a yǎa nyáŋ ndəu məlâm mâʼ wafú-ndəuʼ ye, ə́ ndaghʼ ńdôghʼ məzə̂u mə́tsəm ndəu ndesé.

¹⁷Cǒ cwôʼ Sê yi ndeʼe nkə̂ ncí fú yé ndə̂ Sê tʉ̌-lə́pû ńkwǎr, ə́ nkə ngwô yé cǒ wafú-ndəuʼ yi a cǒghʼ gháʼate lə́wó.

¹⁸Cǒ cwôʼ Sê kə̂ ncí fû yé yʉʼ lənuŋú poʼ Sê nkwǎr, ə́ ngwǒ mətəʉ lə̂ mǒghʼ, ə́ ndǎʼ lə̂ təʉ lə́ ŋuu yi a ghwǒ wafú-ndəuʼ yi a cǒghʼ gháʼate lêi ngô: «Pyé wafú-ndəuʼ gho ghíʼ a cǒghʼ gháʼate lə̂, ə́ ndaghʼ ńzéʼtə́ məkǎa məntǎa-ntʉ́ ndəu ndesé mi pə́ kêi ndághʼ ńtsúŋu məluʼ lə̂, ńté no məntǎa mêi təʉ mə́.»

¹⁹Cwôʼ Sê kə̂ máʼ wafú-ndəuʼ ye wêi ndəu ndesé, ə́ ndaghʼ ńzéʼtə́ məkǎa məntǎa-ntʉ́, ə́ ncwə́r cər tâʼ tə́koʼ ləpfuʼ yi pə́ cûʼ məntǎa-ntʉ́ cər wó ńdaghʼ ńkêi məluʼ; ə́ kə́ mbə́ ndʉŋ-ndʉŋ ghíʼ Sê ghʉ̌ cúʼ pye tə́poŋ pə́ yə́rə́, ə́ lǎghʼ ńnyarə́ záŋə-lóŋ ye.

²⁰Pə́ fû túsoŋ ńdághʼ ləpfuʼ zêi ńkwár, ə́ ncúʼ məntǎa-ntʉ́ mêi cər wó, ə́ nkéi, məci kwar mə́u, ə́ nkúŋ no pəkíləumítə nkʉ tárə́, ə́ shǐ tə ə́ pə́ yi lwô lə̌i ntə́ʉ cər wó, ə́ kôʼ tə mə́ nkə̂u məlî zʉ́.