Read Ngombale Mənjwo Jâŋ 15 Bible Online

Mənjwo Jâŋ 15 - Ngombale bible

Mənjwo Jâŋ 15

¹N nkə̂ mə́ nâŋ naŋə́, n nkə́ ncí njwó có ləiʼi kwar ləfaŋ, ə́ ngúʼ mbou nkəʼə́ yʉʼ gháʼate: ə́ mbə́ pəcwôʼ Sê saambwô, ə́ ngwǒ ngwôʼ məmbə̂u saambwô, ə́ pə̂ pəlyəghʼ-nzəm ngwôʼ ńté no ə́ wo lěi tə mě, ə Sê kə́ záŋə yé lóŋ po.

²M mbôu njwó có zə̂u, ə́ pə̂ ghíʼ mə̂i-nci, ə́ ŋwâŋtə ghíʼ jwô-sʉ̂, ə́ mǒghʼ watə mə́u. Pye pə́tsəm pi gháp lə lwóʼó mə́nye tə nzʉ́ yé, ə́ ndəʼ gháp lə̂ ngúʼtə́ tə́tó ye, mbaa lə̂ mpfú pənómbaa pi ə́ leʼtə ləjôghʼ yé ndəu páp, ə́ tə̂ʉtə ndəu mə̂i-nci wêi; wǒwó ghwo ye ntsənkoŋ yi Sê ŋə̌.

³Gháp pə̂ nzâp zap-nci yi Mə̌usə̂i ngaŋə-faʼ Sê lə zǎp, gháp zap-nci yi Môu ndənzʉ lə zǎp, ə́ mə́ nzâp ngô: «Nde Sê, ngaŋə mətəʉ mə́tsəm məfaʼ mô ghûʼ, ə́ mbou mbôŋ gháʼate Ghô Fou ngoŋ tsəm ə mbə̂u yi o laghʼ ńgʉ̂ məno mô pə̂ ndʉŋ-ndʉŋ, ə́ mbə́ lə́nə́ʉ.

⁴Ə́ Nde mboʼ wǒ ŋuu tî tə póghʼ ghô, ə́ mbou nyér tə́ ghúʼtə́ ləjôghʼ zô? Ńté no ndaʼ gho lə̂ pə̌ ndêi-lěi. Məlâʼ mə́tsəm táa tó kʉ́ʼtə́ sê mbi gho, ə́ ghúʼtə́ gho Ńté no o lə sâa-sǎa nyárə́ gháp məfaʼ mô.»

⁵N nkə̂ ncí njwó: Ndə̂ Sê ŋéʼe ńtə́ʉ tʉ̌-lə́pû, ə nkəu kaa Sê tə̂ʉ cər wó, ə́ ndaghʼ ńnyárə ńgó Sê pə́ təcər pye pé.

⁶Pəcwôʼ Sê saambwô pi gháp lə ghwǒ ngwôʼ məmbə̂u saambwô lə̂, fû Ndə̂ Sê ńkwatə́, ə́ mǎʼ məndǐ mi ə́ fóghʼ ńgó púp, mə́i pə́ lə laghʼ cǒ mbə̂u təshi yi pə́ fûŋ ńgó lêŋ ḿbáʼ; ə́ nkə́r mənkəndə́ mənzoʼ páp, ə́ pə̂ mi pə́ lǎghʼ tə̌ʉ-gôl ńtsuŋú.

⁷Cǒ tâʼ lə̂ pəmə́nye ləkwo tô ńŋə́ tâʼ tâʼ ntə̂uʼ tə̌ʉ-gôl mbó pəcwôʼ Sê pêi saambwô, záŋə-lóŋ Sê yi láʼ kə́ cí pə̂ pə́ wó pə̂ cər wó tə ndóghʼó.

⁸Ə ndî mǒghʼ kə̂u ndə̂ Sê tə ndóghʼó, lə̂ ndághʼ ńnyárə́ ləghûʼ Sê gháp mətəʉ mé. Mboʼ ŋuu lə kuʼ yé lə̂ nkə́u cər wó tə́ ghó məzáŋə́-lóŋ mə̂ saambwô lei mə́ po.