Read Ngombale Mənjwo Jâŋ 16 Bible Online

Mənjwo Jâŋ 16 - Ngombale bible

Mənjwo Jâŋ 16

¹M mbôu nzúʼ cǒ nji ntə̌i fû Ndə̂ Sê ńdǎʼ lə́ pəcwôʼ Sê pêi saambwô ngô: «Pei wo mbʉŋə́ záŋə-lóŋ Sê zə̂, ə́ mi ə́ pə́ cər məntə̂uʼ saambwô mi pei ghwǒ lə̂ ndəu ndesé!»

²Nduŋ-mbi cwôʼ Sê lə̂r, ə́ ngwo mbʉŋə́ ye ntə̂uʼ ndəu ndesé; məfʉ̌ŋ tə́poŋ mi ə́ záŋ gháʼate kwatə ndəu pye pi gháp lə ghwǒ ləiʼi mə́nye ndəu páp, ə́ mbou mə́ ngûʼtə tə́tó ye.

³Cwôʼ Sê mbâatə pwô pʉ́ŋə ye ntə̂uʼ cər mə̂i-nci. Ə nci shərə ńcʉ́ʼ ghíʼ məci mpfusê, zə̂u tsəm yi ə́ kə pə́ nci ə́ mbə́ ntəʉ kwʉ̂.

⁴Cwôʼ Sê mbâatə tárə́ pʉ́ŋə ye ntə̂uʼ cər mənci jwǐ ghap pə cər məsâʼ nci, měi shərə ńcʉ́ʼ məci.

⁵N nzûʼ cwôʼ Sê yi a ghwǒ mətəʉ lə̂ mənci lâʼ lə̂ Sê ngô: «Ô ndaʼ Sê yi o pə̌ wó, ə́ mbə́ yi o kə pə́ wó, o ghʉ zə̂u tsəm pə̂ ndʉŋ-ndʉŋ, o ghʉ pə́ jwô ghô ghíʼ tâʼ feʼ-məno yi a pə̌ lə́nə́ʉ;

⁶ghíʼ pye lə cwə̂r məci pye pô mbaa mi pətsətə́-nkəʉ pô lə̂, o pou ŋə́ məci ńgó gháp nó; gháp laghʼ ḿpfû gháʼá məntsoʼó-faʼ máp.»

⁷Cwôʼ Sê lâʼ yə́rə́, n nzûʼ cǒ nji fû yʉʼ lənuŋú poʼ Sê, ə́ ndǎʼ ngô: «Ə̂ŋ Nde Sê, ngaŋə mətəʉ mə́tsəm, mbə̂u yi o laghʼ ńfêʼ məno pə́ lə́nə́ʉ, ə́ mbou mbə́ ndʉŋ-ndʉŋ.»

⁸Cwôʼ Sê mbâatə ləkwo pʉ́ŋə ye ntə̂uʼ lə̂ ləjôghʼ mə́nəu! Ə Sê ghʉ, mə́nəu laghʼ mǒghʼ ńtôu pye-mə́soŋ.

⁹Mə́nəu tə̂ gháʼate, ə́ ntôu pye yə́rə́, gháp ləʼ gháp lə̂ nkə́p cǐ záp ə́ ngúʼtə Sê; ə́ ncʉ́ʼ nzóutə́ yé zoutə́, lə́ mə́i zʉ́ lə́ ghwǒ mətəʉ lə̂ ndághʼ ńgʉ̌ məzə̂u tə́poŋ mêi me.

¹⁰Cwôʼ Sê mbâatə tâa pʉ́ŋə ye ntə̂uʼ lə̂ lwoŋ ləfou mə́nye, ə yʉʼ yi a sâʼ ləfou yé wó shə́rə shʉ́ŋ ńgó ŋóŋ. Pye-mə́soŋ jwô ngwôʼ tə ndə́utə́ mələ̂ʉ máp,

¹¹ə́ ncʉ́ʼ mə́ nzôutə́ Sê tʉ̌-lə́pû ńté ngwôʼ zap mbaa məfʉ̌ŋ máp; lə́ káa gháp kə̂p gháp cǐ záp, ə́ nkə́ mə́ ngʉ̂ pə̂ məfaʼ tə́poŋ.

¹²Cwôʼ Sê mbâatə ntoghʼó pʉ́ŋə ye ntə̂uʼ cər nci jwǐ yi pə́ fûŋ ńgó Əfrâtə, nci wêi zə̂u, ə́ ntsóʼ laŋə́; pəfou fû sǎʼ-nəu ə́ ntó ndêi mə́u.

¹³M mbou njwó məzəghʼə tə́poŋ məcó mə́ntárə́, měi pə̂ pə́ ghíʼ pətə́tôʼtsaa, tâʼ fû ntsʉ tə́koʼ nô-məngə̂m ńkwǎr, tâʼ fû ntsʉ mə́nye ńkwár, cǒ tâʼ fû ntsʉ ŋuu yi a tâŋ məlaa ńgó â ntsətə-nkəʉ Sê ńkwár.

¹⁴Ə́ mbə́ məzəghʼə mi ə́ fû mbó Sə́tə, ə́ mbə́ mi ə́ ghʉ mənkəʼə-məno. Gháp lər ńgwó ńkwátə́ pəfou pə́tsəm ndəu ndesé, lə̂ nkə̂itə́ gháp ńdaghʼ ńdwóʼó Sê ngaŋə mətəʉ mə́tsəm, lə̂ leʼé jwǐ yi a ghʉ̌ tó, ə́ záʼ kôr gháp pə pye-mə́soŋ.

¹⁵Lə́ Nde lâʼ ngô: «Pei zúʼ, n ngwo tó pə́ ghíʼ ntsǒŋ lə̂! Ndʉʉ-mboŋ â ŋuu yi n ngwo ghǐ tó, â pə́ ndê yé po, ə́ mbou mâʼ məndǐ mé, ə́ mbóghʼ lə́ pə́ yi a wo lěsê pə́ ŋə̌i, pye jwó ghíʼ a ŋə̌i tsəmə, ə sə̂ʉ kó yé.»

¹⁶Məzəghʼə tə́poŋ mêi cʉ̂ʼ nkə́ nkə̂itə́ pəfou lə́ có yʉʼ yi pə́ fûŋ lə̂ tsâr Hebələ̂ ńgó Amagedôŋ.

¹⁷Cwôʼ Sê mbâatə saambwô pʉ́ŋə ye ntə̂uʼ cər fwôghʼ, cǒ nji ntə̌i fû lə̂ lwoŋ ləfou yi ə́ tə́ʉ Ndə̂ Sê nkwǎr, ə́ ndǎʼ ngô: «Ə no me mpfu wo!»

¹⁸Mənyǐ mbʉŋ ŋwaŋtə ləfaŋ, pə́ zûʼ mənji pye-mə́soŋ, ləfaŋ pyêtə, ndesé cʉʼʉ gháʼate lə̂ mbə̂u yi pə́ laa kə́ yáa njwô có yə́rə́ tə fú ghíʼ Sê lə póu pye-mə́soŋ ndəu ndesé.

¹⁹Ndesé cʉ́ʼʉ yə́rə́, túsoŋ jwǐ sêitə yʉʼ tárə́, mətúsoŋ mə́tsəm cər ngoŋ voghʼə́. Ə Sê kʉ̂ʉtə túsoŋ jwǐ yi pə́ fûŋ ńgó Babilônə, ə́ ngʉ̌ a nô məluʼ záŋə-lóŋ yé, ə́ mi ə́ pə́ cər ntə̂uʼ ə́ mə́ nfôʼ.

²⁰Ndesé cʉ́ʼʉ yə́rə́, məlâʼ mə́tsəm mi nci lə zə́mə́ ńŋə́ təsoŋ naa shíʼ ńkə́u nci, məkôr jwǐ me záp lə́wó.

²¹Pətə́koʼ məghʉʉ mi mboʼ tâʼ zʉ̂ kíləu mə̂m-ləkwo fû ləfaŋ mpfúŋtə́ lə́ pye. Pye ji lə̂ nzóutə́ Sê ńté ngwôʼ yi məghʉʉ mêi ghʉ gháp jwô. Ńté no ngwôʼ zêi lə təi gháʼate.