Read Ngombale Mənjwo Jâŋ 17 Bible Online

Mənjwo Jâŋ 17 - Ngombale bible

Mənjwo Jâŋ 17

¹Ə́ lei yə́rə́, cǒ tâʼ lə́ pəcwôʼ Sê saambwô pi gháp lə ghwǒ məntə̂uʼ saambwô lə̂, cʉ́ŋə mbáatə́ ghâa, ə́ ńdáʼ lə́ məŋ ngô: «Tô, n nyárə́ ghô ghíʼ Sê wo záʼ kôr məngyě yi a lə gháʼ mə́ cər mpfuʼ, â túsoŋ jwǐ yi pə́ kə́r nkaŋ mənci jwǐ.

²Gháp pə pəfou ndəu ndesé lə ghʉ məghap; pye pə́tsəm ndəu ndesé pou nó məluʼ məghap mé tə mbʉ́ʉ.»

³Ə Zəghʼə Sê kə̂u lə́ məŋ, cwôʼ Sê pou nkhwór ghâa ńdaghʼ ńdə́r lə̂ có koŋə-məkwaʼá. N nkə́u wó, ə́ njwó cǒ məngyě nyâŋ ndəu cǒ nye. Nye wêi pâŋ ńgó pûŋ, ə́ ngwǒ mətû saambwô, ə́ ngwǒ məndôŋ ləghə̂m. Mənyôghʼ laghʼ ńzóutə́ Sê pə̂ lə̂ mbəʉ ye tsəm.

⁴Məngyě wêi mâʼ məndǐ nkâp, ə́ paŋ ńgó pûŋ. Ə́ ngwér məzə̂u məsəu mi pə́ lǎghʼ tə̌ʉ-gôl ńtsúŋú; məcó pə̂ mi pə́ lǎghʼ məghǒ lətəi-ndwuŋ ńtsúŋú, məcó pə̂ mi pə́ lǎghʼ mətuʼú-cí ńtsúŋú. A lə ghwo ntə̂uʼ yi pə́ lǎghʼ tə̌ʉ-gôl ńtsúŋú, məno ncǔ mbə̂u lə̂ mbə̂u mi ntə̌i pə̂ cər wó tə ndóghʼó, ə́ mbə́ mi ə́ fú lə̂ no məghap yé.

⁵Pə́ ŋwaʼa có ləjôghʼ ləzə̌i zʉ́, ə́ pə̂ yi mboʼ cǒ ŋuu jî yé no yi ə́ laghʼ ńdáʼ po, ləjôghʼ zêi pə̂ ngô: «Babilônə túsoŋ jwǐ, mə́ pə məkwarə pəngyě mbaa yi pye pi gháp ghʉ məno ncǔ mbə̂u lə̂ mbə̂u ndəu ndesé.»

⁶N njwo mə́i məngyě wêi nô mə́ məci pye Sê tə mbʉ́ʉ, ə́ məci pye pi gháp lə kwʉ́tə́ ńté ghíʼ gháp lə pə́ ndâʼ no yi gháp jí lə́ Yěso Kəlísto. N njwô yə́rə́, ə́ kəʼə ghâa gháʼate.

⁷Cwôʼ Sê lâʼ lə́ məŋ ngô: «Ə́ kəʼə ghô kəʼə ńté hó? N ngwo kěʼ ghô ntsəm yi ə lwǒ lə̂ no məngyě wêi, mbaa lə̂ no mə́nye yi a ghwǒ mətû saambwô, ə́ ngwǒ məndôŋ ləghə̂m lə̂.

⁸Mə́nye yi o yǎa njwó lêi, lə pə́ wó cǒ mpfu, lə́ káa a pyêr yé wó; a ghʉ̌ fú cər tâa tə́ ləlyəghʼtə́ kwǎr, ə Sê pə́ghʼ yé. Pye pi gháp cî ndəu ndesé, ə́ mbə́ pi Sê laa kə́ ŋwáʼa yé mənyôghʼ máp cər ŋwaʼa mənyôghʼ pye pi gháp ghwǒ lənyǎŋ yi shwî, tə fú ghíʼ a lə tsuŋú ngoŋ táa jwó nye wêi, ə̂ kə́ʼə́ gháp gháʼate. Ńté no a lə pə́ wó, káa a póu mbyêr yé wó, lə́ a ghʉ̌ pə̌ʉ tó.»

⁹Cwôʼ Sê kə̂ ncí ndâʼ lə́ məŋ ngô: «Yo mpfu yi ə́ pə́ ntúŋu ńgó jîno pfútə́ kwaŋtə yi ŋuu ghwǒ lə̂ ndághʼ ńzúʼ no yi pə́ wo ndǎʼ wó lo: Mətû mə̂ saambwô, ə̂ məkôr saambwô mi məngyě wêi nyǎŋ ndəu wó. Məkôr mêi kə́ ncí mbə́ pəfou saambwô:

¹⁰Pi pə́taa təcər páp kâa pyêr gháp lə̂ lwoŋ-lə́fou, tâʼ nyǎŋ lə̂ lwoŋ mpfu wo, ə́ mə́ sâʼ nzʉ̂. Mbâatə saambwô kə́ tó, a táa tó, ə́ nyáŋ lə̂ lwoŋ, lə́ ləfou yé cî yé po.

¹¹Mə́nye yi a lə pə́ wó, lə́ káa a pyêr yé wó lə̂, gháʼá ə́ mbə́ fou mbâatə ləfǎa; a kə̌ mbə́ yé nou pi saambwô, a ghʉ̌ pə̌ʉ tó, Sê pə́ghʼ yé.»

¹²«Məndôŋ ləghə̂m mi o yǎa njwô lə̂, pə̂ pəfou ləghə̂m pi gháp kə́ nyâŋ gháp lə̂ lwoŋ-lə́fou; lə́ gháp pə mə́nye ghʉ̌ nǎa sáʼ ləfou təcər tâʼ mə́nəu.

¹³Gháp pêi ləghə̂m naa ngwǒ tâʼ kwaŋtə: ə́ pə̂ lə̂ ndághʼ ndʉʉ mətəʉ ghap mbaa mi gháp laghʼ ńsâʼ ləfou záp, ə́ fǎʼ mbó mə́nye.

¹⁴Gháp ghʉ̌ lwóʼó Môu ndənzʉ, lə́ Môu ndənzʉ zʉ́ gháp, ńté no â Nde pənde, ə́ mbə́ fou pəfou. Môu ndənzʉ gháp pə pye pi a lə fúŋ gháp, ə́ ntsóʼ gháp, gháp pôu mə́ njî pə́ ndaʼ yé, gháp pə pǎp ghʉ̌ zʉ́ gháp.»

¹⁵Cwôʼ Sê wei kə̂ ncí ndâʼ lə́ məŋ ngô: «Mənci mi o nyǎŋ njwô, ə́ yʉʼ yi kwarə-məngyě cî wó lə̂, ə́ gháʼá mbə́ pye məlâʼ mə́tsəm, ə́ mbə́ mənou lâʼ, ə́ mbə́ məngoŋ məntsəm, ə́ mbə́ pye pi gháp tsâr mətsâr lâʼ máp.

¹⁶Məndôŋ ləghə̂m mi o nyǎŋ njwô lə̂, gháp pə mə́nye táa pǎa kwarə-məngyě zêi, ə́ pfú zə̂u pé tsəm tə â tə́ʉ mbô fe. Gháp ghʉ̌ pfár mbap mbəʉ ye, ə́ tǒu pfuʼ zěi mǒghʼ;

¹⁷ə́ ghʉ̌ yə́rə́, ńté no Sê lə cóghʼ tâʼ kwaŋtə ntə̂ʉ páp, ə́ pə̂ lə̂ ngʉ́ zə̂u yi kwaʼ zʉ́ tû-mbəʉ yé lə pə́ kwâŋ ńgʉ́: zêi zə̂u pə̂ ghíʼ gháp wo sáʼ ləfou ghíʼ mə́nye pə̌ nkǒŋ tə láʼ kə́u mpfu yi zʉ́ Sê wo ghʉ̌ tsâr yé pə̂utə́.»

¹⁸«Məngyě yi o yǎa njwó yé lə̂, pə̂ túsoŋ jwǐ yi ə́ sâʼ pəfou pi ə́ pə́ ndəu ndesé.»