Read Ngombale Mənjwo Jâŋ 18 Bible Online

Mənjwo Jâŋ 18 - Ngombale bible

Mənjwo Jâŋ 18

¹Mêi məno lei yə́rə́, n nkə̂ ncí njwó cǒ tâʼ cwôʼ Sê fû ləfaŋ shíʼ, ə́ ngwǒ mətəʉ gháʼate; ləghûʼ ye pə̂ nkêʼ ndesé tsəm.

²A lâʼ lə̂ təʉ ngô: «A pfǔŋ, a pfǔŋ, tə́koʼ túsoŋ Babilônə me! Lə̂ mpfu wo, a cʉ̌ʼ mbə́ pə̂ yʉʼ yi məzəghʼə tə́poŋ cî wó. Ə́ mbə́ yʉʼ yi məzəghʼə tə́poŋ mbə̂u lə̂ mbə̂u lwo wó, ə́ yʉʼ yi pəshʉ̌ŋ gháp [mənye] pi gháp ghwǒ nji, ə́ mbə́ pi pye-mə́soŋ tyê gháp tyé lwo wó.

³Ə́ pə̂ yə́rə́ ńté ńgó no məghap kə poŋə́ yé ghíʼ məluʼ poŋə́ pye lə̂, a côghʼ ŋuu ntsəm mə́u. Gháp pə pəfou ndəu ndesé lə ghʉ məghap. Pətáŋ mətǎa ndəu ndesé pou ndêitə́ lə̂ məzə̂u məsəu túsoŋ zêi, ə́ mi lətəi-ndwuŋ ə́ ncʉ́ʼ pəghaŋə-nkâp.»

⁴M mbou nzúʼ cǒ nji yi ndeʼe fû ləfaŋ, ə́ ndǎʼ ngô: «Pei pi pei pə̌ pye pâa, pei fú cər túsoŋ Babilônə ńkwátə́, ə́ mbóghʼ lə́ pə́ yi pə́ wo lǎʼ ńgó pei jǐ no ńŋə́ lə̂ məfaa ye; mbaa ə́ mbóghʼ lə́ pə́ yi mboʼ pʉŋ-mbəu məfaa ye pə̂ shîʼ lə́ zʉ́, pei pəpǎp naa ŋâghʼ.

⁵Pei kwátə́ ńté no məfaa ye lə tsáp mə́ tə kə́u ləfaŋ, Sê pôu mə́ nkʉ̂ʉtə məno tə́poŋ mé.

⁶Pə́ ghʉ́ lə́ zʉ́ ghíʼ a lə ghʉ̌ yé lə́ pəcó pye lə́wó. Ə no tə́poŋ yi a lə ghʉ̌ lə́ ŋuu, pə́ pʉ̂ŋ lə́ zʉ́ yə́rə́, ə́ mpfu pwô. Ə́ lə̌i mbə́ yi a lə laghʼ məluʼ tə̌i ə́ ndə́ghʼə́ tə́tóʼ ŋuu, pə́ lə́ghʼə ye mpfu pwô.

⁷Ə́ lə̌i mbə́ yi a lə pə́ cər ləghûʼ, ə́ mbou mbə́ ngaŋə-zə̂u lə́ zárə́ mbə̂u, pə́ kə̂ ngʉ́ a tsúŋu njwó ngwôʼ, ə́ mbou ngʉ́ məno tə́poŋ kə́ ncêr yé pə́ yə́rə́. Pə́ ghʉ́ yə́rə́ lə̂ túsoŋ zêi, ńté ńgó a yaa mbəi mə́ ndâʼ lə́ tû-mbəʉ yé ngô: “N nyǎŋ yaʼa ndəu lwoŋ ləfou, ə́ mbə́ maa-fou məngyě; káa m mbə̂ ghâa mpfǒghʼ-məngyě; ə́ láʼ laa ghâa ləwʉ̂ po.”

⁸Ə̂ zə̂u yi ə́ ghʉ̌, ə ngwôʼ mbə̂u lə̂ mbə̂u yi pə́ lə tsuŋtə́ ńdóʼó ńté yé ghʉ̌ tə́ʉ tâʼ leʼé ə́ pfúŋ lə́ zʉ́: ə́ pə́ ləwʉ̂, ə́ pə̂ ndâa ləwʉ̂, ə́ pə́ ntəʉ nji, ə mǒghʼ kóʼ lə́ zʉ́, â sʉ́ tə fú mé; ə́ ghʉ̌ pə́ yə́rə́ lə́ zʉ́, ńté ńgó Nde Sê yi a feʼ yé, ghwo mətəʉ mə́tsəm.»

⁹Pəfou ndəu ndesé pi gháp pə pǎp kə ghʉ̌ məghap, ə́ mbou nâa mbə́ pəghaŋə-zə̂u, ghʉ̌ jwó ghíʼ túsoŋ sʉ́ yə́rə́ tə ndî kôʼ, ə́ gheʼtə́, ə́ pǒu lǎa gháʼate.

¹⁰Gháp ghʉ̌ tə́ʉ pə́ ndǐ təsə, ə́ pə́ pôghʼ ńgó mboʼ ngwôʼ yé kə̂u lə́ páp, ə́ pǒu pə́ lâʼ ngô: «Ô ndʉʉ tə́poŋ! Ô ndʉʉ tə́poŋ! Gho Babilônə túsoŋ jwǐ, túsoŋ tə̌i; Sê kə̌ ndǎghʼ pə́ tâʼ mə́nəu féʼ ghô ə́ fú nzáʼ kôr gho!»

¹¹Pətáŋ-mə́táa ndəu ndesé pə̂ ntsə́rə́ záp lə́wó, ə́ mbou mə́ ndâa ńté túsoŋ zêi, ńté ńgó káa ŋuu pyér mə́ nzə̂u yé məzə̂u mətǎa máp,

¹²pə́ laʼ məzə̂u mətǎa ghíʼ tə̌ʉ-gôl, ghíʼ tə̌ʉ nkâp, ghíʼ məghǒ lətəi-ndwuŋ, ə́ ngʉ̌ mətuʼú-cí; mbaa məndǐ lêŋ mi ə́ lepə́-lepə́, mbaa məndǐ lətəi-ndwuŋ mi ə́ pǎŋ ńgó pûŋ, mbaa məcó pə̂ pə̂ kotôŋ; ə́ ngʉ̌ nkwə̂i mbə̂u lə̂ mbə̂u yi ə́ tə̌i lə̂ njwó, məzə̂u mbə̂u lə̂ mbə̂u mi pə́ lǎghʼ mə́soŋ shwô ńtsúŋú, ə nkwə̂i yi lətəi-ndwuŋ, ə tə̌ʉ mbərôŋzə, ə tû-mbəʉ tə̌ʉ fefe kəʉ pə̂ məpaghʼə ləghǒ mi pə́ fûŋ ńgó mâabələ;

¹³məzə̂u mi pə́ tou jaghʼə́ zěi kôʼ, ə́ mbôŋ gháʼate ghíʼ kanêl, mbaa Sinamômə, Mîrə, aŋsáŋsʉ, ə́ nkʉʼʉ́ məcó məlamə́ndaa. Məzə̂u ghíʼ məluʼ, məwə̂r, faalə̂i gháp pə ngəsâŋ-ncʉ̂ŋ. Məzə̂u ghíʼ məfoŋ, ghíʼ məndənzʉ, ghíʼ pəlwô gháp pə pəkə́lə́ghʼə. Məzə̂u ghíʼ məpuʼ, mbaa ghíʼ məpuʼ ntso.

¹⁴Pətáŋ-mə́táa pə̂ ndâʼ lə̂ túsoŋ zêi ngô: «Məzə̂u mə́tsəm mi o lə pə́ ntsáa lə̂ ngwô naa sʉ́ nzeʼ gho tə mé. Məzə̂u lətəi-ndwuŋ mô gháp ləghûʼ gho naa me yé mbó gho, pə́ pǒu láʼ kə́ jwô yé měi po.»

¹⁵Pətáŋ-mə́táa pi gháp kə táŋ tə ə́ fú ngwô nkâp túsoŋ wêi gháʼate, ghʉ̌ jwó ngwôʼ yi ə́ kə́u túsoŋ wêi, ə́ póghʼ tə cʉ́ʼ tə́ʉ pə́ ndǐ təsə, ə́ gheʼtə́ ə́ pǒu pə́ lǎa;

¹⁶ə́ lǎʼ ngô: «Ô ndʉʉ tə́poŋ! Ô ndʉʉ tə́poŋ! Gho Babilônə túsoŋ jwǐ, gho yi o lə mǎʼ məndǐ lêŋ, mbaa məndǐ nkâp mi pǎŋ ńgó pûŋ, ə́ ndǎghʼ məfə̂i tə̌ʉ-gôl, mbaa məghǒ lətəi-ndwuŋ gháp pə mətuʼú-cí ə́ nkwə̌i mbəʉ zô;

¹⁷Sê kə̌ fú ndághʼ pə́ tâʼ mə́nəu, ə́ mbə́ghʼ məzə̂u lətəi-ndwuŋ mô mə́tsəm!» Pəshǔŋ láanji gháp pə pye pə́tsəm pi gháp lə kə̂u láanji ə́ ngwô ləkâr, ə́ ntâŋ mətǎa, mbaa pəfǎʼ cər láanji gháp pə pye pə́tsəm pi gháp faʼ ndəu mə̂i-nci, ə́ ndághʼ ḿbə̂ wó cʉ̂ʼ ntə́ʉtə́ pə́ ndǐ təsə;

¹⁸ə́ njwó ghíʼ túsoŋ jwǐ sʉ́ mə́ tə ndî pə̂ nkóʼ. Gháp pə̂ ndâʼ lə̂ təʉ ngô: «Ə có túsoŋ laa kə́ ghûʼ yé tə ndéi túsoŋ yo!»

¹⁹Ə́ ngǐ pə́ laʼ yə́rə́, ə́ mə́ ntə̂uʼ pfû ńsáa, ə́ mə́ ngeʼtə́, ə́ mə́ ndâa ə́ ndâʼ ngô: «Ô ndʉʉ tə́poŋ! Ô ndʉʉ tə́poŋ! Gho túsoŋ jwǐ. Pye pə́tsəm pi gháp ghwǒ pəláanji ndəu mə̂i-nci kə leitə́ pə́ lə̂ túsoŋ zêi yo ə́ ncʉ́ʼ pəghaŋə-nkâp, Sê kə̌ mbou ntə́ʉ pə́ lə́ tâʼ mə́nəu ə́ fú mbə́ghʼ gho!»

²⁰Pei pi pei pə̌ tʉ̌-lə́pû, pei tsêi, ńté ghíʼ Sê pə̌ghʼ túsoŋ zêi! Pei pye Sê, pei pəghaŋə-ntə̂u mbaa pei pətsətə́-nkəʉ Sê, pei tsêi, ńté ghíʼ Sê tǎghʼ ngwôʼ tû zʉ́ ńté no tə́poŋ yi a lə ghʉ̌ lə́ pei!

²¹Ə́ pə̂ yə́rə́, cǒ cwôʼ Sê yi a ghwǒ mətəʉ gháʼate khwôr ləghǒ, ə́ pə̂ ghíʼ tə́koʼ lʉŋə, ə́ ngǐ zéʼé mǎʼ cər mə̂i-nci, ə́ mə́ ndâʼ ngô: «Yo ghíʼ pə́ ghʉ̌ zéʼé tə́koʼ túsoŋ Babilônə, ə́ mǎʼ cər mə̂i-nci, tə lə́u ŋuu láʼ nkə́ mbóu njwô yé zěi.

²²Ə̂ pə́ yə́rə́, pə láʼ nkə́ nzûʼ yé zap pəpúʼ ntsənkoŋ lâʼ gho po, mbaa yi pəzǎp-zə̂u, ə́ kə́ zûʼ yé zap pətǒŋ cǔ mbaa yi pətǒŋ ntaŋ po. Lə́u ə́ láʼ kə́ jwô yé cǒ ngaŋə-ləghu lâʼ gho po. Lə́u ə́ kə́ pǒu zûʼ yé ghíʼ pə́ cûʼ zə̂u cər ləpfuʼ, ə́ lâʼ gho po.

²³Pə́ láʼ kə́ jwô yé ghíʼ lâm kêʼ yʉʼ lâʼ gho po. Pə́ láʼ kə́ zûʼ yé nji ndə̂u-ngəʉ mbaa yi ngwě-ngəʉ lâʼ gho po. Ə́ ghʉ̌ pə́ yə́rə́ ńté no pətáŋ-mə́táa pô lə ghwo nkâp nděi ŋuu ntsəm ndəu ndesé, o pôu ndághʼ məkaŋ mô ńgʉ̌ məlâʼ mə́tsəm faa laŋə́-ndə̂u.»

²⁴Pə́ lə jwô məci pətsətə́-nkəʉ Sê gháp pə mi pye Sê, mbaa mi pye pə́tsəm pi pə lə jwítə́ gháp ndəu ndesé, ə́ lâʼ gho.