Read Ngombale Mənjwo Jâŋ 19 Bible Online

Mənjwo Jâŋ 19 - Ngombale bible

Mənjwo Jâŋ 19

¹Ə́ lei yə́rə́, m mbôu nzúʼ có wâr ə́ tʉ̌-lə́pû, ə́ pə̂ ghíʼ mənji pye tə nzáa lə̂, ə́ mə́ ndâʼ ngô: «Alelúya![2] Sê lə̂ ghʉ̂ ńgó ŋuu cwór, ləghûʼ gháp pə mətəʉ pə́ mbó Sê zaghʼə!

²Ə mbə̂u yi a laghʼ ńzâʼ kôr təcər páp pə pye-mə́soŋ pə̂ ndʉŋ-ndʉŋ, ə́ mbou mbə́ lə́nə́ʉ! Ńté no a pə̂ghʼ kwarə jwǐ yi a lə lǎghʼ no məghap yé ńcôŋ ndesé tsəm. Kwarə məngyě wêi lə cwə̂r məci pəghaŋə-faʼ Sê, Sê pʉ̂ŋ mbəu zěi lə́ zʉ́.»

³Pye tə nzáa pêi kə̂ ncí ndâʼ ngô: «Alelúya! Ə ndî yi ə́ kôʼ lə̂ tə́koʼ túsoŋ lo, ə̂ tə lǎʼ mé!»

⁴Pətikáŋ pə̂ ntsap ləkwo lə̂ mə̂m mbwô gháp pə pəmə́nye pə̂ ləkwo kʉ̂ʼtə sê, ə́ mə́ ngúʼtə Sê yi a nyǎŋ ndəu lwoŋ-lə́fou, ə́ mə́ ndâʼ ngô: «Ə̂ pə́ yə́rə́! Alelúya!»

⁵Ə́ pə̂ yə́rə́, cǒ njî fû yʉʼ lwoŋ-lə́fou ə́ mə́ ndâʼ ngô: «Pei pə́tsəm pi pei pə̌ pəghaŋə-faʼ Sê; pei pi pei pə̌ ŋə̂ məkuʼ mé, pei pətikáŋ mbaa ghəpə́, pei ghúʼtə́ Sê zaghʼə!»

⁶N nkə́ ncí nzúʼ cǒ nji, ə pə̂ pə́ ghíʼ nji pye tə nzáa; ə́ nzôr pə́ ghíʼ nci jwǐ lə̂, ə́ nzor ghíʼ ləfaŋ pyétə lə̂ təʉ lə̂, ə́ mə́ ndâʼ ngô: «Alelúya! Nde Sê zaghʼə, ngaŋə-mətəʉ mə́tsəm ghʉ pə́ jwô ləfou yé.

⁷Paghʼə tsêi, ə́ nzǎp ḿbíŋ, ə́ ngúʼtə́ Sê! Ńté no leʼé nzǒʼ Môu ndənzʉ tó mə́, ngwě ye kwəi mə́ mbəʉ ye tə mə́ nzʉ́ʼtə́.

⁸Pə́ ŋə́ ndǐ lə́ zʉ́ ńgó â mâʼ, ə ndǐ zêi ŋwâŋtə ŋwaŋtə́, ə́ mbou mbə́ tə̌ có pǎp ncǔ, ə́ yi pə́ lə lǎghʼ lêŋ ḿbáʼ.» Ə ndǐ lêŋ zêi laghʼ ḿbə̂ ləiʼi məfaʼ shʉʼʉ mi pye Sê faʼ měi.

⁹Tâʼ cwôʼ Sê lâʼ lə́ məŋ ngô: «Ŋwaʼá ngô: Pəndʉʉ-mboŋ, ə̂ pye pi pə́ ghə́u gháp no lətsei nzǒʼ Môu ndənzʉ.» Ə́ mbou kə́ ncí ndáʼ ngô: «Zə̂ mətsâr mi ə́ kwar ntsʉ Sê.»

¹⁰M mə̂ nkʉ́ʼtə mbi zʉ́ lə̂ ngúʼtə́ yé, lə́ a lâʼ lə́ məŋ ngô: «Páa lə̂ ngʉ́ yə́rə́! M mbə́ gháʼá, ə́ nkə́ mbə̂ zâa pə̂ ngaŋə-faʼ Sê ghíʼ gho, mbaa ghíʼ pəfə̌r pô pi gháp kə zúʼ no lə́nə́ʉ yi Yěso kə lǎʼ gháp, ə́ ngʉ́ ghíʼ ə́ pə́ ntúŋú. O ghwo lə̂ ngúʼtə́ pə̂ Sê!» Ə no lə́nə́ʉ yi Yěso lə jyéʼ pye, ə̂ zěi yi ə́ cʉ́ŋə pye lə̂ ndeʼtə́ Nkəʉ ye.

¹¹M mbôu njwó ləfaŋ ŋéʼe ńtə́ʉ, tâʼ lwô fúfú kwâr ńtə́ʉ. Ləjôghʼ ŋuu yi a nyǎŋ ndəu wó pə̂: «Laʼ tə kə̂p», ə́ mbou nkə́ ncí mbə́: «Ŋuu ndʉŋ-ndʉŋ». A feʼ kôr pə̂ ndʉŋ-ndʉŋ, ə́ ndwóʼo ntso pə̂ ndʉŋ-ndʉŋ.

¹²Nyôghʼ mé kêʼ yʉʼ ghíʼ lə̂ʉ mǒghʼ. A sô mənkaghʼə-lə́fou tə nzáa tû zʉ́. Pə́ ŋwáʼa có ləjôghʼ ndəu zʉ́, lə́u cǒ ŋuu pə̂ njî yé no yi ə́ laghʼ ńdáʼ po, tə ndyéʼ ndaʼ zʉ́ zə́ghʼə́-zʉ́;

¹³ə́ mǎʼ ndǐ fwôghʼ yi pə́ tsə̌p cər məci. Ləjôghʼ yé pə̂ ngô: «Tsâr Sê.»

¹⁴Pəsóghəi tʉ̌-lə́pû pə̂ nzəm zʉ́, ə́ nyáŋtə́ záp ndəu pəfúfú pəlwô, ə́ mǎʼ məndǐ mi pə́ lǎghʼ lêŋ fúfú ḿbáʼ, lə́u có pǎp ncǔ pə̂ yé mə́u po.

¹⁵Mə́puʼ-ntso pə̂ fû ntsʉ zʉ́ nkwâr, ə́ copə́ gháʼate, ə́ mbə́ yi a laghʼ ńgwô ndwóʼó pye cər məngoŋ mə́tsəm. A ghʉ̌ lwóʼó gháp, ə́ zʉ́, ə́ pǒu sáʼ gháp, tə ə́ pə̂ yi mboʼ cǒ ŋuu kûʼ yé lə̂ mbʉ̂ŋ no ntsʉ zʉ́ po, ə́ pǒu cúʼ gháp ghíʼ pə́ cûʼ məntǎa-ntʉ́, ə́ ndaghʼ ńkêi məluʼ lə̂. Ə́ ghʉ yə́rə́, ə́ lǎghʼ ńnyarə ńgó Sê ngaŋə-mətəʉ mə́tsəm pə̌ nzáŋə́ lóŋ.

¹⁶Pə́ lə wo lə̂ ndǐ fwôghʼ ye mbaa lə̂ ntaa yé, ə́ ŋwáʼá có ləjôghʼ ngô: «Fou pəfou, Nde pənde.»

¹⁷Zei yo no lei, n njwô cǒ cwôʼ Sê tə̂ʉ cər ləjôghʼ mə́nəu. Ə́ ndǎʼ lə̂ təʉ lə́ pəshʉ̌ŋ pə́tsəm pi ə́ lə̂m tə tʉ̌-lə́pû ngô: «Pei tó, ə́ nkə̂itə́, ə́ nzʉ́ məzʉ̂ tə́koʼ lətsei yi Sê tsuŋtə́!

¹⁸Pei tó ḿpfár mbap mbəʉ pəfou, ə́ mbap mbəʉ pətə́-ndə̂ pəmǎʼ-ntso, mbaa yi pəmǎʼ ntso, ə́ mpfár mbap mbəʉ pəlwô mbaa yi pye pi gháp nyáŋtə́ ndəu páp. Ə́ mbap mbəʉ pye-mə́soŋ pə́tsəm, ə́ yi pəfou-ndʉʉ mbaa yi məpuʼ, ə́ yi ghəpə́ mbaa yi pətikáŋ.»

¹⁹M mbôu njwó mə́nye, ə́ njwó pəfou ndəu ndesé gháp pə pəmǎʼ-ntso páp; gháp kəitə lə̂ ndwóʼó ŋuu yi a nyǎŋ ndəu fúfú lwô, ə́ pǒu lwóʼó nou pəmǎʼ-ntso pé.

²⁰Pə́ ghou mə́nye, ə́ nkə́ ngôu ŋuu yi a tâŋ məlaa ńgó â ntsətə-nkəʉ Sê, ə́ zʉ́ yi a kə tə̂ʉ mbi mə́nye, ə́ ngʉ̂ mənkəʼə-məno ə́ ndághʼ ńfutə́ pye pi gháp kə pə́i pə́ côghʼ ləiʼi mə́nye lə́ páp, gháp pou ngúʼtə́ tə́tó ye. Ə́ mǎʼ gháp pêi pə́pwô pə̂ ntəʉ ntəʉ cər ghəm mǒghʼ məkaa.

²¹Ŋuu yi a nyǎŋ ndəu fúfú lwo lâghʼ mə́puʼ ntso yi a lə pə́ fû ntsʉ zʉ́ nkwâr lə̂, ə́ njwítə́ nou pəmǎʼ-ntso mə́nye wêi. Pəshʉ̌ŋ pə́tsəm pou mpfár mbap mbəʉ záp tə njwə́r.