Read Ngombale Mənjwo Jâŋ 2 Bible Online

Mənjwo Jâŋ 2 - Ngombale bible

Mənjwo Jâŋ 2

¹«Ŋwaʼá məno mwo ńŋə́ lə́ cwôʼ Sê yi a cághʼə cûʼtə pye Kəlísto yi ə́ pə́ túsoŋ Efêzə.» Ŋwaʼá ngô: «Ŋuu yi a ghwǒ pəcwôʼ-saŋ saambwô lə́ lǎa pô yé yi təʉ, ə́ mə́ ŋə̂i təsoŋ mələʼtə lâm saambwô mi pə́ lǎghʼ tə̌ʉ-gôl ńtsúŋú laʼ ngô:

²M mə̌ njî məfaʼ mô, ə́ mə́ njî mbə̂u yi o laghʼ ńtáŋə́ mə́u, ə́ mbou mə́ njî mbə̂u yi o laghʼ shə̂ghʼ ngwôʼ. M mə̌ njî ńgó koo o kôŋ ghô lə́ pə́ yi mboʼ pei pə pəghaŋə ntə̂ʉ shʉŋə́ tə̂m no; m mə̌ njî ńgó o kə zʉ́ʼ pye pi gháp laʼ ńgó gháp pəghaŋə-ntə̂u, lə́ káa pə̂ gháp pěi, ə́ njwó ńgó gháp pəghaŋə məlaa.

³O jî shə̂ghʼ ngwôʼ, o kə jwô ngwôʼ ńté ghíʼ o kə lǎʼ no zâa, lə́ káa kâa ghô lə̂ ndâʼ.

⁴Lə́, o ghwo tâʼ no yi m mə̌ fər gho mə́u: ə́ pə̂ ńgó koo o pyér mə́ nkôŋ ghô ghâa ghíʼ o lə yaa nkôŋ.

⁵Kʉ́ʉtə́ yʉʼ yi o lə kóʼ tə ntə́ʉ wó mboŋə́ fú yʉʼ wó pfúŋ, ə́ nkə́p cǐ zô, ə́ ngʉ́ məfaʼ mi o lə fú ləjitə́ ə́ mə́ fâʼ měi. O lə̌i nkə́ ndə̂ʼ lə̂ nkə́p cǐ zô, mə́i n ngʉ̌ tó pfú ləʼtə lâm zô, ə́ kə́pə́ yʉʼ zěi.

⁶Lə́, zə̂u yi o pə̌ ngʉ̌ tə ə́ poŋ pə́ ngô: məno mi pye lə̂ nou yi pə́ fûŋ ńgó Nikolayîdə ghʉ měi pə́ shwor gho, ghíʼ ə́ shwor ghâa zâa lə́wó.»

⁷«Ŋuu yi a ghwǒ mətuŋú lə̂ ndághʼ ńzúʼ yʉʼ, tsúŋú nzúʼ no yi Zəghʼə Sê laʼ lə̂ məcûʼtə pye Kəlísto.» «Ŋuu yi a ghʉ̌ lwóʼó no tə́poŋ tə zʉ́, n ngʉ̌ ŋə́ ntǎa tʉ̌ yi ə́ ghʉ pə́ pə̂ wó lə́ zʉ́, â zʉ́. Ə tʉ̌ zêi pə́ cər nkâʼ Sê, ə́ tʉ̌-lə́pû.»

⁸«Ŋwaʼá məno mwo ńŋə́ lə́ cwôʼ Sê yi a cághʼə cûʼtə pye Kəlísto yi ə́ pə́ túsoŋ Səmîrənə.» Ŋwáʼá ngô: «Ŋuu yi a pə̌ nduŋ-mbi, ə́ mbə́ ndyəghʼ-nzəm, ə́ mbə́ ŋuu yi a lə kwʉ́ mbou nzʉ́ʉ lə̂ ləwʉ̂ lâʼ ngô:

⁹M mə̌ njî ngwôʼ yi o jwô zěi, mbaa pûŋ yi ə́ pə́ lə́ gho, lə́ ə́ pou mbə́ gháʼá, o pə̂ ngaŋə-zə̂u! M mə̌ njî mənzou mi pye pi gháp laʼ ńgó gháp pəyúda lə́ káa pə̂ gháp pěi laghʼ ńzôutə gho, gháp pə́ pə̂ pye pi gháp ghúʼtə Sə́tə!

¹⁰Koo o pôghʼ ngwôʼ yi o pə̌ ngwo njwô wó. Tsuŋu nzúʼ shʉʼʉ: Sə́tə ghʉ̌ mǎʼ pəcó pye tə nzáa təcər pei ə́ ndə̂-tsâŋ, ə́ lǎghʼ zʉ́ʼ wéi jwó. Ə̂ pə́ yə́rə́, pêi jwó ngwôʼ təcər leʼé ləghə̂m. Pei kə́ mbə́ pə́ nzəm məŋ tə ndáʼ nkwʉ́tə́. Pei lə̌i ngʉ́ yə́rə́, n ngʉ̂ sô nkaghʼə pəmaʼ-nzʉ́ tû pei, ə pə̂ ləcwôr tə me yi pei ghʉ̌ ghwǒ.»

¹¹«Ŋuu yi a ghwǒ mətuŋú lə̂ ndághʼ nzúʼ yʉʼ, â tsúŋú nzúʼ no yi Zəghʼə Sê laʼ lə̂ məcûʼtə pye Kəlísto lo!» «Ŋuu lə̌i ndwóʼó no tə́poŋ tə nzʉ́, a ghʉ̂ nkwʉ́, ə́ nkə́u nkə́ mbyə́ghʼə́ nkwʉ̂ yé po.»

¹²Ŋwaʼá məno mwo ńŋə́ lə́ cwôʼ Sê yi a nâŋtə cûʼtə pye Kəlísto yi ə́ pə́ túsoŋ Perəngâmə. Ŋwaʼá ngô: «Ŋuu yi a ghwǒ nyǐ ntso məngʉ̂ŋ mə́mbwô, lətû zěi cópə lâʼ ngô:

¹³M mə̌ njî yʉʼ yi o cî wó, ə̂ yʉʼ yi Sə́tə nyâŋ wó, ə́ sâʼ ləfou yé. O pə̌ tə mbə́ yʉʼ wó lə̂, o laa kə́ fû gho nzəm məŋ ncʉ̂ŋtə có leʼé, o laa kə́ nyêr gho tə́ ghwǒ pə̂i-ntə̂ʉ nzəm məŋ có leʼé, tə mbaa pə́ lə̂ məleʼé mi pə́ lə jwí Aŋtipásʉ lâʼ pei, ə́ yʉʼ yi Sə́tə cî wó. Aŋtipásʉ wêi lə pə́ ŋuu yi a lə nyárə ńgó no zâa pə́ lə́nə́ʉ.

¹⁴Lə́, n ngwo tâʼ no yi m mə̌ fər gho mə́u: ə́ pə̂ ńgó pəcó pye təcər pei pə́ nzûʼ zə̂u yi Mbalâm jyêʼ gháp zěi, a lə laʼ lə́ Mbalâghʼ ńgó â lə̂ʼ ləkei mbi pye Ísə́lahêl lə̂ ndághʼ ńcʉ́ŋə́ gháp, gháp pfâr mbap yi pə́ lǎghʼ ḿmǎʼ məsê, ə́ mbou ndághʼ ńcʉ́ŋə́ gháp ńgó gháp ghʉ məghap.

¹⁵Pəcó pye kə́ ncí mbə́ təcər pei, ə́ pi gháp pə́ ngʉ zə̂u yi pye pi gháp pə́ lə̂ nou yi pə́ fûŋ ńgó Nikolayîdə[1] jyêʼ gháp zěi.

¹⁶Ə́ ngwǒ lə́ gho, kə́p cǐ zô, tə ndə́iʼ yə́rə́ po, mə́i n ngwo tóghʼ tó, ə́ lǎghʼ nyǐ ntso yi kwar ntsʉ məŋ lo, ə́ lwóʼó gháp.»

¹⁷«Ŋuu yi a ghwǒ mətuŋú lə̂ ndághʼ ńzúʼ yʉʼ, â zúʼ no yi Zəghʼə Sê laʼ lə̂ məcûʼtə pye Kəlísto!» «Ŋuu yi a ghʉ̌ lwóʼó no tə́poŋ tə zʉ́, n ngʉ̌ ŋə́ məzʉ̂ mi pə́ fûŋ ńgó mána lə́ zʉ́, ə́ pə̂ mi ə́ pə́ ləlwǒ; ə́ kə́ cí ŋə́ ləghǒ fúfú lə́ zʉ́, ə̂ pə́ yi pə́ ŋwáʼá có ləjôghʼ shwî mə́u, ə́ mbə́ yi káa cǒ ŋuu pə́ njî yé zěi, tə ndyéʼ ŋuu yi pə́ ŋə̂ ləghǒ zêi lə́ zʉ́.»

¹⁸«Ŋwaʼá məno mwo ńŋə́ lə́ cwôʼ Sê yi a nâŋtə cûʼtə pye Kəlísto yi ə́ pə́ túsoŋ Tiyatî.» Ŋwáʼá ngô: «Môu Sê, ə́ ŋuu yi mənyôghʼ mé keʼ yʉʼ ghíʼ mələ̂ʉ mǒghʼ, məku mé pou ŋwáŋə ghíʼ tə̌ʉ yi pə́ tǒu mǒghʼ, ə́ ndǎghʼ zə̂u ńgóghʼ ńgó ə̂ ŋwáŋə́ lâʼ ngô:

¹⁹M mə̌ njî məfaʼ mô, ə́ mə́ njî nkoŋə yi o ghwǒ nzəm pye-mə́soŋ; ə́ mə́ njî mbə̂u yi o lǎghʼ ńgwǒ pə̂i-ntə̂ʉ nzəm məŋ; ə́ mə́ njî faʼ yi o ghʉ ńdághʼ ḿpfûtə pye, mbaa mbə̂u yi o laghʼ ńsáʼ təʉ lə̂ faʼ. M mə̌ njî ńgó məfaʼ mi o faʼ měi mpfu wo záa ńděi mi o lə yaa mə́ fâʼ.

²⁰Lə́, n ngwo tâʼ no yi m mə̌ fər gho mə́u. Ə́ pə̂ ńgó Jezabêl ghʉ pə̂ hohó, pei pə̂i pə̌i. Məngyě wêi pə̌ ndaʼ ńgó a ntsətə-nkəʉ Sê. A pə̌ njyêʼ pəghaŋə-faʼ pâa lə̂ ncʉ́ʼ mbə̂u pə̌u nzóʼ, ə́ mbou njyêʼ gháp lə̂ mpfâr mbap yi pə́ lǎghʼ ḿmǎʼ məsê.

²¹N nkə ŋə́ yé məleʼé tə nzáa lə̂ ndághʼ ńkə́p cî yé, lə́ kâa a pə̂i yé lə̂ nyér no məghap yi a meʼ mbəʉ ye mə́u.

²²Ə̂ zə̂u yi ə́ ghʉ̌, n ngwo cǐ yé mǎʼ kə̌u ghou, â jwó ngwôʼ ntə̌i; ə́ kə́ ghʉ̌ pye pi gháp pə pǎp ghʉ no məghap jwô záp ngwôʼ lə́wó; laa yi gháp měʼ faʼ tə́poŋ yi a jyêʼ gháp lêi.

²³N ngwo ghʉ̌ ghəpə́ yé kwʉ́tə́; ə̂ lêitə́ yə́rə́, məcûʼtə pye Kəlísto mə́tsəm jí ńgó, m mə̌ njî məkwaŋtə pye-mə́soŋ, ə́ mbóu mə́ njî zə̂u tsəm yi gháp pə́ ntsáa. N ngʉ̌ ghǐ tsóʼ faʼ wǒwó, ə́ leitə́ pə́ lə̂ məfaʼ mé.»

²⁴«Ə́ ngwǒ lə́ pei pye Kəlísto túsoŋ Tiyatî pi káa pei pə́ ŋə̂i wéi lə̂ laŋə́-ndə̂u tə́poŋ yi Jezabêl jyêʼ pye zěi, ə́ mbou káa pə́ lou wéi lə̂ njí zə̂u yi pə́ fûŋ ńgó ntsəm Sə́tə yi ə lwǒ tə ndǐ təsə, n ngwo tâghʼ ghâa có pyeʼ tû pei po.

²⁵Ə́ ndaʼ ghíʼ mboʼ n ndâʼ lə́ pei ńgó, pei ghwô no yi pə́ lə jyéʼ wéi zěi tə ə̂ tə̂i, ə́ nkə́ ngwô pə́ yə́rə́ tə ngwó nkə́u leʼé yi n ngwo tó.»

²⁶«Ə́ ngwǒ lə́ ŋuu yi a ghʉ̌ lwóʼó no tə́poŋ tə zʉ́, ə́ ŋuu yi a wo ghʉ̌ məfaʼ mi m mə̌ nkǒŋ měi tə ə́ wǒ lyəghʼtə́, n ngʉ̌ ŋə́ yé mətəʉ lə̂ ndághʼ sáʼ məlâʼ.

²⁷Â lâghʼ mətəʉ mêi ńsáʼ ŋuu ntsəm tə lə́u cǒ ŋuu pə́i fəiʼtə yé fəiʼtə́ lə̂ ntə̂i tû ńŋə́ lə́ zʉ́ po, ə́ ndǎghʼ měi ńnyúʼtə́ gháp ghíʼ pə́ nyuʼtə məngwǒŋ tsaʼá lə̂.

²⁸N ngwo ŋə́ mətəʉ mêi lə́ zʉ́, ə́ ndʉŋ-ndʉŋ ghíʼ n ndə ghí ghwo zâa měi, Tə́ ghâa lə̂ ŋə̂ lə́ məŋ. Ə́ kə́ cí ŋə́ cwôʼ-saŋ yi a nyarə ńgó nzʉ̂ pə́ mə́ fóghʼ lə́ zʉ́.»

²⁹«Ŋuu yi a ghwǒ mətuŋú lə̂ ndághʼ ńzúʼ yʉʼ, â tsúŋú nzúʼ no yi Zəghʼə Sê laʼ lə̂ məcûʼtə pye Kəlísto.»