Read Ngombale Mənjwo Jâŋ 20 Bible Online

Mənjwo Jâŋ 20 - Ngombale bible

Mənjwo Jâŋ 20

¹M mbôu njwó cǒ cwôʼ Sê fû ləfaŋ shíʼ, ə́ ngwǒ kísʉ laghʼ ńtsóʼ ntsʉ tâa-tə́-ləlyəghʼtə́, mbaa tə́koʼ cêŋ mbô zʉ́.

²Ə́ ngǒu tə́koʼ nô-məngə̂m ə́ ndǎghʼ cêŋ wêi ńkâp. Ə́ pə̂ yi a wo nyáŋ lə́ cêŋ wêi, təcər mənguʼ tâʼ-tóusʉ. Tə́koʼ nô-məngə̂m zêi ə pə̂ nô yi pə́ lə fûŋ mpfu ntsəmbi ńgó Sə́tə, ə́ nkə́ ncí fûŋ yé ńgó ndəʉ-sê.

³Ə́ nkǎp yé yə́rə́, ə́ mǎʼ yé cər tâa tə́ ləlyəghʼtə́, ə́ nkhʉŋə́ ntsʉ wěi, ə́ ndǎghʼ kísʉ ntsághʼə́, ə́ ndaghʼ ńtôʼ yé lə̂ nkə́ ncí ŋáa fútə́ ngoŋ tsəm tə ngwó ŋə́ ghíʼ mənguʼ tâʼ-tóusʉ mêi lěi. Měi lêi yə́rə́, pə kə́ ncí nyéʼ nyér yé.

⁴Zei yo no lei, n nkə̂ ncí njwó məlwoŋ-lə́fou, pye nyâŋtə mə́u, pə́ ŋə̂ gháp mətəʉ lə̂ ndághʼ ńfěʼ pye. N nkə́ ncí njwó pəmə́jʉ̂ŋtə pye pi pə́ lə zéʼtə́ mətû máp, ńté ghíʼ gháp lǎʼ no yi gháp pə́ njí lə́ Yěso, ə́ mbou mə́ ŋə̂i ghíʼ tsâr Sê pə́ ndǎʼ. Ə́ mbə́ pye pi gháp lə lə̌ʼ lə̂ ngúʼtə́ mə́nye mbaa tə́tó yé, ə́ ndə̌ʼ ńgó koo pə́ côghʼ ləiʼi yé məzə̌i páp mbaa lə̂ mbô máp; Sê ghʉ̂ pye pêi zʉ̂ʉ lə̂ ləwʉ̂, gháp pə Kəlísto sâʼ ngoŋ təcər mənguʼ tâʼ-tóusʉ.

⁵Ə́ lə laghʼ mbə̂ nduŋ-mbi ləzʉ̌ʉ lə̂ ləwʉ̂. Pəcó pye pi gháp lə kwʉ́tə́ mə́, káa Sê kə́ ngʉ̂ yé ńgó gháp zʉ́ʉ lə̂ ləwʉ̂, tə ndáʼ nkə́u ghíʼ mənguʼ tâʼ-tóusʉ mêi lěi.

⁶Pəndʉʉ-mboŋ ə̂ pye pi Sê ghʉ̌ gháp zʉ̂ʉ lə̂ nduŋ-mbi ləzʉ̌ʉ lə̂ ləwʉ̂ wêi! Ghâp pye Sê, gháp pǒu láʼ kə́ kwʉ̂ gháp po; gháp ghʉ̌ cʉ́ʼ pənuŋú-poʼ Sê mbaa pi Kəlísto; gháp pə Kəlísto sáʼ nzʉ̂ təcər mənguʼ tâʼ-tóusʉ mêi.

⁷Mənguʼ mêi tâʼ-tóusʉ ghʉ̌ lěi, pə kéʼ pəcêŋ lə́ Sə́tə, ə́ fú cər tâa-tə́-ləlyəghʼtə́ zêi, ə́ nkwarə́ yé ndə̂-tsâŋ,

⁸â kə́ ncí ngwó cər ngoŋ lə̂ məsaghʼə́ nzʉ̂ ləkwo, ə́ nkə́ ncí njí lə̂ ŋáa fútə́ pye, pə́ fûŋ mêi məpaghʼə-ngoŋ ńgó Ngôghʼ gháp Mangôghʼ. Ə́ kəitə́ gháp lǎghʼ wǒ lwóʼó Sê. Gháp ghʉ̌ záa ghíʼ məmbəm saŋə-sáŋə nkaŋ mə̂i-nci.

⁹N njwô, gháp naa nzʉ́ ndəu ndesé tsəm, ə́ karə́ yʉʼ yi pye Sê nyâŋ wó, ə́ pə̂ Túsoŋ yi Sê kǒŋ zěi gháʼate. Lə́ có mǒghʼ fú ləfaŋ ə́ tó ńtôu gháp ńjwítə́.

¹⁰Ə́ ngwǒ lə́ Sə́tə yi a lə futə gháp lêi, pə́ ci yé máʼ cər tə́koʼ mǒghʼ məkaa. Ə́ pə̂ yʉʼ yi pə́ lə mǎʼ mə́nye gháp ntsətə-nkəʉ Sê yi məlaa wó, gháp wo pə́ wó, ə́ pə́ jwô ngwôʼ ntə̌ʉ-nəu gháp lətwûʼ, lə̂ mənguʼ mənguʼ.

¹¹Mêi məno lei, n nkə̂ ncí njwó cǒ tə́koʼ fúfú lwoŋ-lə́fou, ə́ nkə́ ncí njwó ŋuu yi a nyǎŋ mə́u. Ndesé gháp ləfaŋ fû mbi zʉ́ ə́ nkhʉ̌, lə́u pə́ kə̂ mbyér njwô yé gháp po.

¹²M mbôu nkə́ ncí njwó pəpfû-sê, ə́ pə̂ pətikáŋ gháp pə ghəpə́, gháp tə̂ʉtə mbi lwoŋ-lə́fou zêi. Pə́ ŋéʼe pəŋwaʼa, ə́ nkə́ ncí ŋéʼe cǒ a pə̂ yi pə́ lə ŋwaʼá mənyôghʼ pye pi gháp ghwǒ lənyâŋ yi shwî cər wó. Pə́ nâŋ məno mi wǒwó lə ghʉ̌ pə́ ŋwaʼa cər pəŋwaʼa pêi, ə́ mboŋə́ záʼ kôr ye.

¹³Mə̂i-nci pághʼə pye pi a lə khwotə́ gháp ndaghʼ ńdə́r. Ləwʉ̂ pághʼə pye pi a lə lǎghʼ gháp ńdə̂r, ə lâʼ pəpfû-sê kə̂ mbághʼə pé pye lə́wó, pə́ leitə lə̂ məfaʼ wǒwó, ə́ nzáʼ kôr ye.

¹⁴Pə́ maʼ ləwʉ̂ gháp lâʼ pəpfû-sê cər tə́koʼ mǒghʼ. Ə́ mâʼ gháp cər tə́koʼ mǒghʼ wêi laghʼ ḿbə̂ ləwʉ̂ mbâatə pwô.

¹⁵Ə́ nkə́ ncí mâʼ wǒwó yi káa pə jwó yé ləjôghʼ yé cər ŋwaʼa mənyôghʼ pye pi gháp ghwǒ lənyâŋ yi shwî, cər tə́koʼ mǒghʼ wêi.