Read Ngombale Mənjwo Jâŋ 21 Bible Online

Mənjwo Jâŋ 21 - Ngombale bible

Mənjwo Jâŋ 21

¹Mêi məno lei, n nkə̂ ncí njwó ləfaŋ yi shwî gháp ndesé yi shwî. Ńté no nduŋ-mbi ləfaŋ gháp nduŋ-mbi ndesé lə me, mə̂i-nci kə̂ mbyêr yé yé wó po.

²N njwô ghíʼ túsoŋ Sê, ə́ Yelúsalêm yi shwî pə̂ fû tʉ̌-lə́pû mbəʉ Sê, ə́ shíʼ ńtó, ə́ mbə́ ghíʼ ngwě-ngəʉ yi a kwəi mə́ mbəʉ yé, ə́ mə́ zʉ̂ʼtə ndə̂u ye.

³N nzûʼ cǒ tə́koʼ nji fû yʉʼ yi lwoŋ-lə́fou pə́ wó, ə́ ndǎʼ ngô: «Lə̂ mpfu wo, ə yʉʼ yi Sê cî wó cʉ́ʼ mbə́ pə́ təcər pye-mə́soŋ, gháp pə pǎp lə́ wo cʉ́ʼ pə́ nyáŋ, gháp cʉ́ʼ pye lâʼ pé. Tú mbəʉ Sê nyáŋ təcər páp, ə́ mbə́ Sê zap.

⁴A ghʉ̌ zǎghʼ nci nyôghʼ gháp pə́tsəm. Ləwʉ̂ kə́ mbyér yé wó po, pə́ kə́ ndâa yé ləwʉ̂ po, ə́ nkə́ ngêʼtə́ yé po, lə́u nkə́ njwô yé ngwôʼ po, ńté no ngoŋ yi lwuŋ lei mə́.»

⁵Ŋuu yi a lə nyáŋ lə̂ lwoŋ-lə́fou kə̂ ncí ndáʼ ngô: «Lə̂ mpfu wo, m mə̌ ngʉ̂ zə̂u tsəm pə̂ shwi shwî.» Ə́ mbǒu ndáʼ lə́ məŋ ngô: «Ŋwáʼá no yo ngô: mətsâr mwo pə́ lə́nə́ʉ, ə́ mbə́ mi mboʼ pə́ pə̂i lə́ tâʼ ntə̂ʉ.»

⁶A pôu nkə́ ncí ndáʼ lə́ məŋ ngô: «Ə no me mpfu wo! Mə̂ŋ Álə́fa ə́ mbə́ Oméga, ə́ laghʼ ńdâʼ ńgó mə̂ŋ ləjitə́, ə́ mbə́ ləlyəghʼtə́. Ndě-nci lə̌i mə́ nzə̂u ŋuu, mə́i n ngwo ŋə́ nci yi ə́ fû ləsǎʼ nci lə́ zʉ́ pə̂ fefe â nó, ə nci wêi yi ə́ ghʉ pə́ pə̂ wó.

⁷Wǒwó yi a ghʉ̌ lwóʼó no tə́poŋ tə zʉ́, n ngʉ̌ ŋə́ məzə̂u mêi lə́ zʉ́. N ngʉ̌ pə́ Sê ye, â pə́ môu ghâa.

⁸Ə́ ngwǒ lə́ pəcwoʼ gháp pə pəghaŋə təi tû mbó Sê, ə́ ngwǒ lə́ pye pi gháp ghʉ məno cwoŋ ndwuŋ gháp pə pəjwítə́-pye, ə́ ngwǒ lə́ pəghʉ̌ məghap gháp pə pəghaŋə ləkaŋ, ə́ ngwǒ pəghúʼtə́ məzə̂u fúŋ ńgó məsê mbaa pəghaŋə məlaa pə́tsəm, mə́i záp yʉʼ táa pə́ pə́ cər tə́koʼ mǒghʼ məkaa yi ə́ pə́ ngwoʼó, ə̂ lághʼ ḿbə̂ ləwʉ̂ mbâatə pwô.»

⁹Cǒ tâʼ lə́ pəcwôʼ Sê saambwô pi gháp lə ghwǒ məntə̂uʼ saambwô, pəlyəghʼ-nzəm məngwôʼ saambwô pə̂ cər wó tə ndóghʼó lə̂, tô ńdáʼ lə́ məŋ ngô: «Tô, n nyárə́ ghô ngwě-ngəʉ, ə́ ngwě Môu ndənzʉ.»

¹⁰Ə́ ndǎʼ yə́rə́, Zəghʼə Sê kə̂u lə́ məŋ, cwôʼ Sê khwôr ghâa ńdə̌r tə nkə́u ntsoʼ cǒ ləkôr yi ə́ ŋáʼá gháʼate, ə́ ntə́ʉ yʉʼ wó, ə́ nyarə́ ghâa túsoŋ Sê, ə́ Yelúsalêm, ə́ pə̂ fû lə́pû, ə́ mbəʉ Sê, ə́ shíʼ ńtó.

¹¹Ləghûʼ Sê pə̂ ŋwâŋtə mə́u ngwó, ə́ ŋwâŋtə ghíʼ có ləghǒ lətəi-ndwuŋ yi pə́ fûŋ ńgó Jásəpə, ə́ ndéi ghíʼ ngəláasʉ.

¹²Ə tâa-nkâʼ yi pə́ lə lǎghʼ ńzə́mə́ Túsoŋ zêi lə ŋáʼá lə̂ tʉ̌ gháʼate, ə́ ngwǒ məntsʉ ntsap pwô lə̂ ləghə̂m. Maa ntsʉ nkâʼ tsəm ghwô tâʼ cwôʼ-Sê yi a pápə. Ə́ ngwǒ lə̂ məntsʉ nkâʼ mêi, pə́ ŋwaʼa mənyôghʼ məcʉŋə-ndə̂ Ísə́lahêl tsap-pwô lə̂ ləghə̂m mə́u.

¹³Ə ndyəghʼə́ nkâʼ tsəm ghwo məntsʉ mə́ntárə́; ə mi mə́ntárə́ pə̂ lə̂ ndyəghʼə́ sǎʼ-nəu, ə mi mə́ntárə́ pə̂ lə̂ ndyəghʼə́ yi tû, ə mi mə́ntárə́ pə̂ lə̂ ndyəghʼə́ yi ncʉ̂ŋ, ə mi mə́ntárə́ pə̂ lə̂ ndyəghʼə́ yi ntsǒ-nəu.

¹⁴Tâa-nkâʼ yi pə́ lə lǎghʼ ńzə́mə́ túsoŋ zêi lə tə́ʉ ndəu pətə́koʼ məghǒ ntsap pwô lə̂ ləghə̂m. Pə́ wo lə̂ məghǒ mêi, ə́ ŋwaʼá mənyôghʼ pəghaŋə-ntə̂u Môu ndənzʉ ntsap pwô lə̂ ləghə̂m.

¹⁵Cwôʼ Sê yi a lə lâʼ no lə́ məŋ lêi lə ghwo zə̂u yi pə́ laghʼ ḿbyê fəiʼ zə̂u pô zʉ́, lə̂ ndághʼ ńfə̌iʼ túsoŋ gháp pə məntsʉ měi, mbaa tâa-nkâʼ yi pə́ lǎghʼ ńzə́mə́. Zêi zə̂u pə̂ ghíʼ tâʼ kəkaʼa yi pə́ lǎghʼ tə̌ʉ-gôl ńtsúŋú.

¹⁶Ə túsoŋ zêi lə ghwo məsaghʼə́ ləkwo, məsaghʼə́ měi pə̂ pə̂ ndʉŋ-ndʉŋ, ntǐ wěi gháp ləpəm zěi pə̂ pə̂ ndʉŋ-ndʉŋ. Cwôʼ Sê wei lâghʼ tsə̌m zə̂u zêi ńfə̂iʼ túsoŋ zêi, ə́ pə̂ zə̂u pəkíləu-mítə tóusʉ pwô lə̂ nkʉ pwô[3]; məsaghʼə́ měi ləkwo gháp pə ntǐ wěi lə̂ fú sê ńkóʼ ńgwó tʉ́, naa mbə́ pə́ tâʼ fəiʼ zə̂u.

¹⁷A fə̂iʼ tâa-nkâʼ, ə ntǐ wěi lə̂ fú sê ńkóʼ ńŋə́ tʉ́ pə̂ no zə̂u pəmítə ntsap pwô lə̂ mə̂m saambwô[4], mə́i a lə laghʼ fəiʼ yi pə́ lə laghʼ ńfə̂iʼ zə̂u mpfu wêi fə̂iʼ.

¹⁸Pə́ lə laghʼ có ləghǒ lətəi-ndwuŋ yi pə́ fûŋ ńgó Jásəpə mbóu tâa-nkâʼ wei. Ə́ ndǎghʼ tə̌ʉ-gôl yi shʉʼʉ ńkə́r túsoŋ zêi tsəm, ə́ póu ndéi ghíʼ ngəláasʉ.

¹⁹Pə lə laghʼ məghǒ lətəi-ndwuŋ mbə̂u lə̂ mbə̂u, ə́ nkwə̌i məghǒ mə̂ ntsap pwô lə̂ ləghə̂m mi pə́ lə lǎghʼ mbóu cû tâa-nkâʼ lə̂. Pə́ kə laghʼ cǒ mbə̂u ləghǒ lətəi-ndwuŋ yi pə́ fûŋ ńgó Jásəpə ńkwə̌i nduŋ-mbi ləghǒ, ə́ ndǎghʼ yi pə́ fûŋ ńgó safî ńkwə̌i mbâatə ləghǒ; ə́ ndǎghʼ yi pə́ fûŋ ńgó kaləsedwǎnə ńkwə̌i mbâatə tárə́, ə́ ndǎghʼ yi pə́ fûŋ ńgó Emerôdə ńkwə̌i mbâatə ləkwo.

²⁰Ə́ ndǎghʼ yi pə́ fûŋ ńgó saadwânə ńkwə̌i mbâatə tâa, ə́ ndǎghʼ yi pə́ fûŋ ńgó korənalînə ńkwə̌i mbâatə ntoghʼó, ə́ ndǎghʼ yi pə́ fûŋ ńgó Kəlisolîtə ńkwə̌i mbâatə saambwô; ə́ ndǎghʼ yi pə́ fûŋ ńgó Berîl ńkwə̌i mbâatə ləfǎa, ə́ ndǎghʼ yi pə́ fûŋ ńgó topâazə ńkwə̌i mbâatə ləpfuʼú; ə́ ndǎghʼ yi pə́ fûŋ ńgó kərizopərâzə ńkwə̌i mbâatə ləghə̂m, ə́ ndǎghʼ yi pə́ fûŋ ńgó yasêŋtə ńkwə̌i mbâatə ntsap moʼ lə̂ ləghə̂m, ə́ ndǎghʼ yi pə́ fûŋ ńgó Ametístə ńkwə̌i mbâatə ntsap pwô lə̂ ləghə̂m.

²¹Məntsʉ nkâʼ mêi ntsap pwô lə̂ ləghə̂m lə kə́ mbə́ mətuʼú-cí ntsap pwô lə̂ ləghə̂m. Pə́ lə pôu ndâghʼ pə̂ tâʼ tâʼ tuʼú-cí ńtsúŋu maa ntsʉ nkâʼ tsəm. Pə́ lə laghʼ tə̌ʉ-gôl yi shʉʼʉ ńtsúŋú laŋə́-ndə̂u yi ə́ lei túsoŋ, ə́ lêi ghíʼ ngəláasʉ.

²²N nâŋ yʉʼ tsəm túsoŋ wêi káa jwô ghâa ndə̂ Sê, ńté no ndə̂ Sê yi túsoŋ zêi pə̌ pə́ Nde, ə́ mbə́ Sê ngaŋə mətəʉ mə́tsəm, ə́ mbə́ Môu ndənzʉ.

²³Kâa pə̂ yé mə́nəu, kəʉ mə́saŋ yi a ghwǒ lə̂ nkêʼ zêi túsoŋ, ńté no ləghûʼ Sê lə pə́ nkêʼ zěi, Môu ndənzʉ pə̂ ye nkeʼ.

²⁴Ngoŋ ngoŋ ghʉ̌ lǎghʼ pə̂ nkeʼ ye ŋə̌i, pəfou ndəu ndesé póu ndǎghʼ məzə̂u lətəi-ndwuŋ máp ńtó lə̂ wó.

²⁵Məntsʉ nkâʼ túsoŋ zêi póu njóghʼ ntə̂ʉ pə́ yə́rə́; lə́u pə́ láʼ mbə́i ntsághʼə yé po, ńté no twûʼ láʼ kə́ pǒu shʉ̂ŋ yé wó po.

²⁶Pə́ táa fú cər ngoŋ tsəm, ə́ lǎghʼ ləghûʼ gháp məkuʼ ə́ tó lə̂ wó.

²⁷Có zə̂u yi ə́ ghwǒ lǒʼ láʼ zêʼ yé tə kə́u túsoŋ wêi po, tə mbaa pə́ pəghʉ̌ məno coŋ-ndwuŋ gháp pə pəghaŋə məlaa. Ə ndaʼ pye pi mənyôghʼ máp pə́ cər ŋwaʼa mənyôghʼ pye pi gháp ghwǒ lənyâŋ shwî lə́ láʼ kə́u wó, ŋwaʼa wêi pə̂ yi Môu-ndənzʉ.