Read Ngombale Mənjwo Jâŋ 22 Bible Online

Mənjwo Jâŋ 22 - Ngombale bible

Mənjwo Jâŋ 22

¹Cwôʼ Sê kə̂ ncí nyárə́ ghâa nci jwǐ, ə́ pə̂ nci yi ə́ ghʉ pə́ pə̂ wó, ə́ ndéi ghíʼ ngəláasʉ, ə́ mə́ fû lə̂ lwoŋ-lə́fou Sê gháp yi Môu ndənzʉ ə́ nkwâr,

²ə́ mə́ nkúŋ shíʼ soŋ laŋə́-ndə̂u yi ə́ lěi túsoŋ. Ə tʉ̌ yi ə́ ghʉ pə́ pə̂ wó tə̂ʉ lə̂ mənkaŋ nci wêi ndyə́ghʼə́ tsəm, ə́ mə́ nzə̂m mpfu ntsap pwô lə̂ ləghə̂m lə̂ nguʼ-lâʼ, ə́ ndaghʼ ńzə̂m tâʼ mpfu lə́ maa saŋ tsəm. Pə́ pə̂ nkâp məfu měi ndághʼ ńtsûʼ məghou lə́ pye cər ngoŋ tsəm.

³Cǒ ndou láʼ pə̂ yé túsoŋ wêi po. Lwoŋ-lə́fou Sê gháp pə yi Môu ndənzʉ ghʉ̌ pə́ cər túsoŋ wêi, pəghaŋə-faʼ Sê pə́ ngúʼtə yé.

⁴Gháp ghʉ̌ pə́ jwô sʉ̂ yé, pə́ póu ŋwaʼá ləjôghʼ yé məzə̌i páp.

⁵Ə twûʼ láʼ nkə́ mbóu shʉ̂ŋ yé po, lə́u gháp láʼ nkə́ ntsâa gháp nkeʼ yi lâm, kəʉ yi mə́nəu po, ńté ńgó Nde Sê ghʉ̌ pə́ laghʼ nkeʼ ye keʼ gháp, gháp pə pǎp nâa nsáʼ nzʉ̂ lə̂ mənguʼ mənguʼ.

⁶Cwôʼ Sê kə̂ ncí ndáʼ lə́ məŋ ngô: «Mətsâr mwo pə́ lə́nə́ʉ, ŋuu lə̌i nzúʼ koo a mʉ̂ŋtə. Nde Sê yi a ŋə̂ Zəghʼə yé lə́ pətsətə́-nkəʉ Sê gháp laghʼ ńgwó ntsətə nkəʉ ye, kwaʼ zʉ́ tə́u cwôʼ ye ńgó a wó nyarə́ ngaŋə-faʼ yé zə̂u yi ə́ wo tóghʼ tó.»

⁷Cwôʼ Sê kə̂ ncí ndâʼ ngô: «Yěso pə̌ ndaʼ ngô: péi zúʼ, n ngwo tóghʼ tó! Pəndʉʉ-mboŋ, ə̂ pye pi gháp ŋəi ghíʼ Nkəʉ yi Sê laʼ cər ŋwaʼa wo pə́ ntúŋú.»

⁸Məŋ Jâŋ, n nkə zúʼ mwo məno ə́ mbóu njwó. N ndə zúʼ mbóu njwó yə́rə́, ə́ mpfúŋ ńnúŋ məku cwôʼ Sê yi a kə nyárə́ ghâa měi, lə̂ ngúʼtə́ yé.

⁹Lə́, a lâʼ lə́ məŋ ngô: «Páa lə̂ ngʉ́ gháʼá lə̂! N nkə̌ mbə̂ zâa pə́ cǒ ngaŋə-faʼ ghíʼ gho, mbaa ghíʼ pəfə̌r pô pi gháp pə́ pətsətə́-nkəʉ Sê, mbaa ghíʼ pye pi gháp pə ŋəi ghíʼ mətsâr mi ə́ kwǎr cər ŋwaʼa wo pə́ ntúŋú. O ghwo lə̂ ngúʼtə́ pə́ ndaʼ Sê!»

¹⁰Cwôʼ Sê kə̂ ncí ndáʼ lə́ məŋ ngô: «Koo o lwo məno mi pətsətə́-nkəʉ Sê lǎʼ cər ŋwaʼa wo, ńté no mpfu yi mêi mwo məno wo mbəutə́ wó pə́ mə́ mbáatə́.

¹¹Ŋuu yi a ghʉ məno tə́poŋ lághʼ məno tə́poŋ mé ńdə́r lə̂ mbi mbwǒ, ŋuu yi a ghʉ məno coŋ ndwuŋ lághʼ məno coŋ ndwuŋ mé ńdə́r lə̂ mbi mbwǒ, lə́, ŋuu yi a pə̌ ngʉ shʉʼʉ a kʉ́ʼʉ́ ngʉ̌ shʉʼʉ yé ndághʼ ńdə̌r lə̂ mbi, ŋuu yi a pə̌ ŋuu Sê kʉ́ʼʉ́ ndǎr mbəʉ ye lə̂ Sê, ə́ ndaghʼ ńdə̌r lə̂ mbi.»

¹²Yěso lâʼ ngô: «Pei zúʼ n ngwo tóghʼ tó! Ə́ ghǐ tó, ə́ ghwǒ zə̂u yi n ngwo lǎghʼ tsóʼ faʼ wǒwó lə̂ ye mbə̂u yi a kə laghʼ ńfâʼ.

¹³Mə̂ŋ Álə́fa, ə́ mbə́ Oméga, ə́ laghʼ ńdâʼ ńgó mə̂ŋ ləjitə́, ə́ mbə́ ləlyəghʼtə́, ə́ mbə́ nduŋ-mbi, ə́ mbə́ ndyəghʼ-nzəm.»

¹⁴Pəndʉʉ-mboŋ ə̂ pye pi gháp sǒghʼ məndǐ máp, ə́ lêi tə ə́ pə̂ yi mboʼ gháp kuʼ lə̂ ndêi lə̂ məntsʉ nkâʼ ə́ kə́u túsoŋ, ə́ nzʉ́ məntǎa-ntʉ́ mi ə́ fû lə̂ tʉ̌ yi ə́ ghʉ pə́ pə̂ wó.

¹⁵Lə́, pəghʉ̌ məno coŋ ndwuŋ mbaa pəghaŋə ləkaŋ, mbaa pəghʉ̌-məghap, mbaa pəjwítə́-pye, mbaa pəghúʼtə́ məzə̂u ə́ fúŋ ńgó məsê, gháp pə pye pi gháp kǒŋ məlaa mbóu mə́ ntâŋ měi ghʉ̌ tə́ʉ pei, gháp láʼ kə̂u gháp túsoŋ po.

¹⁶Yěso kə̂ ncí ndâʼ ngô: «Məŋ ndə tə́u cwôʼ ghâa, ńgó a tó ntsə́tə́ nkəʉ wo cər məcûʼtə pye Kəlísto. Mə̂ŋ mbi zə̂u yi ə́ sǎʼ lə̂ ngər-ndə̂ fou Davîd, ə́ mbə́ cwôʼ-saŋ yi a keʼ yʉʼ ə́ mpfu nkôʼ nzʉ̂.»

¹⁷Zəghʼə Sê gháp ngwě-ngəʉ pə́ ndaʼ ngô: «Tô!» Ŋuu yi a pə̌ nzûʼ yo no lâʼ yé ngô: «Tô!» Ŋuu yi ndě-nci pə́ nzə̂u yé tó; ŋuu yi a pə̌ nkoŋ no nci yi ə́ ghʉ pə́ pə̂ wó, â tó mpfú nó tə́ ŋə̂ có zə̂u.

¹⁸Məŋ Jâŋ, m mə̌ ncwotə wǒwó yi a pə̌ nzûʼ Nkəʉ yi Sê laʼ cər ŋwaʼa wo ngô: Ŋuu lə̌i kʉ́ʼʉ có zə̂u mə́u, mə́i Sê wo lǎghʼ ngwôʼ yi pə́ leʼtə cər ŋwaʼa wo, ə́ kʉ́ʼʉ yi ngaŋ.

¹⁹Ŋuu póu cwótə́ có zə̂u lə̂ Nkəʉ yi Sê lǎʼ cər ŋwaʼa wo, mə́i Sê ghʉ̌ pfû mé məntǎa-ntʉ́ mi ə́ fû lə̂ tʉ̌ yi ə́ ghʉ pə́ pə̂ wó; mbaa pfû yé yʉʼ cər túsoŋ Sê. Pə́ leʼtə ghíʼ túsoŋ zêi mbaa tʉ̌ zêi pə̂ cər ŋwaʼa wo.

²⁰Ŋuu yi a laʼ ńgó məno mêi pə́ lə́nə́ʉ pə̌ ndaʼ ngô: «Ə̂ŋ, n ngwo tóghʼ tó!» Ə̂ pə́ yə́rə́! Tô Nde Yěso!

²¹Ńgó Nde Yěso ghʉ̂ məno shʉʼʉ lə́ pei pə́tsəm.