Read Ngombale Mənjwo Jâŋ 3 Bible Online

Mənjwo Jâŋ 3 - Ngombale bible

Mənjwo Jâŋ 3

¹«Ŋwaʼá məno mwo ńŋə́ lə́ cwôʼ Sê yi a cághʼə cûʼtə pye Kəlísto yi ə́ pə́ túsoŋ Saadésʉ.» Ŋwaʼá ngô: «Ŋuu yi a ghwǒ məzəghʼə saambwô mi ə́ faʼ mbó Sê, lə̂ pəcwôʼ-saŋ saambwô laʼ ngô: m mə̌ njî məfaʼ mô, pye pə́ ndaʼ ńgó o pə̂ ntəʉ, lə́ gháʼá o pə̂ pə̂ mpfû-sê.

²Jye, ə́ tsuŋú nkúʼtə́ mə́ceʼé pə̂i-ntə̂ʉ yi a pyěr lə́ gho ə́ mə́ myághʼə́ nkwʉ́ lə̂; n ndaʼ yə́rə́ ńté no n njwo mə́ ńgó ə́ wo lə̂ məfaʼ mô mə́tsəm, ə có yi ə́ təʉ ndʉŋ-ndʉŋ mbi Sê zaa kâa pə̂ yé wó.

³Ghíʼ ə́ kə́ mbə́ yə́rə́ lə̂, kʉ́ʉtə́ tsâr Sê yi pə́ lə jyéʼ ghô mbaa mbə̂u yi o lə lǎghʼ ńzúʼ zěi; ŋə̌i ghíʼ zěi pə́ ntúŋú, ə́ nkə́p cǐ zô. O lə̌i ndə́iʼ jyě po, mə́i n ngwo wóghʼə́ woghʼə́ tó ghíʼ ntsǒŋ lə̂, lə̂ mpfu yi koo o yáa mə́ mbâp ghô.

⁴Lə́ có ntâʼ pye pə́ təcər pei túsoŋ Saadésʉ pi gháp kə́ côghʼ gháp ncǔ lə̂ məndǐ máp. Gháp ghʉ̌ mǎʼ pəfúfú məndǐ ə́ lǎghʼ pə́ nzəm məŋ, paghʼ pəpáp lághʼ ńŋə̌i, ńté ńgó gháp kuʼ pye pi mboʼ gháp mǎʼ pěi.»

⁵«Ghíʼ ə́ kə́ mbə́ yə́rə́ lə̂, ŋuu yi a ghʉ̌ lwóʼó no tə́poŋ tə zʉ́ ghʉ̌ maʼ yé pəfúfú məndǐ lə́wó; n ndáʼ və́rə ghâa ləjôghʼ yé cər ŋwaʼa yi pə́ ŋwaʼá mənyôghʼ pye pi gháp ghwǒ lənyâŋ yi shwî po. N ngʉ̌ tə́ʉ mbi Tə́ ghâa gháp pə pəcwôʼ pé, ə́ lǎʼ ńgó â ŋuu ghaa.

⁶Ŋuu yi a ghwǒ mətuŋú lə̂ ndághʼ ńzúʼ yʉʼ, â tsúŋú nzúʼ no yi Zəghʼə Sê laʼ lə̂ məcûʼtə pye-Kəlísto lo.»

⁷«Ŋwaʼá məno mwo ńŋə́ lə́ cwôʼ Sê yi a cághʼə cûʼtə pye Kəlísto yi ə́ pə́ túsoŋ Filadelfî.» Ŋwaʼá ngô: «Ŋuu yi a fǔ mbó Sê, ə́ mbə́ ŋuu no lə́nə́ʉ, ə́ ngwǒ kísʉ fou Davîd, ə́ mbə́ yi a lə̌i ntsághʼə́, ŋuu tsôʼ yé po; ə́ mbou ntsóʼ, Ŋuu tsághʼə yé po, a laʼ ngô:

⁸M mə̌ njî məfaʼ mô; m mə̌ njî ńgó mətəʉ mô khwôghʼ, lə́ o kə ŋə̂i ghíʼ tsâr zâa pə́ ntúŋú, káa muŋu ghô ghâa. N ntsǒʼ tâʼ ntsʉ ndə̂ mbi gho yi mboʼ ŋuu kûʼ yé lə̂ ntsághʼə́ po.

⁹N ngʉ̌ pútə́ pye pi gháp ghûʼtə Sə́tə mbó gho; ə́ páp pi gháp tâŋ məlaa ńgó gháp pəyúda lə́u ə́ mbə̂ gháp pěi po: n ngʉ̌ ŋə́ʼtə́ gháp, gháp tó ńkʉ́ʼtə́ mbi gho, ə́ ŋə́ məkuʼ mô. Ə̂ lêi yə́rə́, gháp jí ńgó n nkoŋ gho.

¹⁰Ghíʼ o kə sáʼ təʉ ńŋə́i ghíʼ tsâr zâa pə́ ntúŋú lə̂, məŋ zâa lə́wó n ngʉ̌ kə pápə́ ghô zô ə́ mpfu yi ngwôʼ wo pfúŋ wó ndəu ndesé, ə́ zʉ́ʼ pye-mə́soŋ.

¹¹N ngwo tóghʼ tó. Kúʼtə́ pə̂i-ntə̂ʉ zô tə ə̂ tə̂i, ńjí ńgó ə́ lei yə́rə́, lə́u cǒ ŋuu kûʼ yé lə̂ mpfú nkaghʼə pəmaʼ-nzʉ́ zô po.»

¹²«Ŋuu yi a ghʉ̌ lwóʼó no tə́poŋ tə zʉ́, n ngʉ̌ ghʉ̌ â pə́ ghíʼ tâʼ ntôu lə̂ ndə̂ Sê zâa, lə́u ə́ ndáʼ nkə́ mbóu fû yé mə́u ńkwǎr po. N ngʉ̌ ŋwaʼá ləjôghʼ Sê zaa ndəu zʉ́; ə́ ŋwaʼá ləjôghʼ Yelúsalêm yi shwî, ə́ túsoŋ Sê zâa ndəu zʉ́, túsoŋ Yelúsalêm zêi fû tʉ̌-lə́pû, ə́ mbəʉ Sê zâa. N ngʉ̌ kə́ cí ŋwaʼá ləjôghʼ zâa yi shwî ndəu zʉ́.»

¹³«Ŋuu yi a ghwǒ mətuŋú lə̂ ndâghʼ ńzúʼ yʉʼ, â tsúŋú nzúʼ no yi Zəghʼə Sê laʼ lə̂ məcûʼtə pye Kəlísto lo!»

¹⁴«Ŋwaʼá məno mwo ńŋə́ lə́ cwôʼ Sê yi a cághʼə cûʼtə pye Kəlísto yi ə́ pə́ túsoŋ Lahodisê.» Ŋwaʼá ngô: «Ŋuu yi ləjôghʼ yé pə́ ńgó Ə̂ pə́ yə́rə́, ə́ kwaʼ ŋuu yi a nyarə ńgó tsâr Sê pə́ lə́nə́ʉ, ə́ mbə́ ŋuu yi Sê lə leitə́ lə́ zʉ́ ńtsuŋú zə̂u tsəm, a pə̌ ndaʼ ngô:

¹⁵M mə̌ njî məfaʼ mô. M mə̌ njî ńgó kôo pə́ nyô ghô, káa kə́ pə́ tou ghô; m mə̌ ntsâa ńgó ô pə́ nyô, ə́ nkə́ ndə́iʼ yə́rə́ po, o pə̂ ntôu.

¹⁶Ghíʼ o ghapə́ ə́ tə́ʉ pə́ təcər lə̂, káa pə́ nyǒ, káa kə́ pə́ tôu lə̂, n ngwo fú ntsʉ məŋ ə́ zéʼé ghô ḿměʼ.

¹⁷O pə̌ ndaʼ ńgó ô ngaŋə-zə̂u, ńgó məzə̂u mô záa, ńgó koo o pə́ mbûŋ ghô có zə̂u. O pə̌ ndaʼ yə́rə́, lə́ ə́ mbə́ ngaŋə-ngwôʼ, ə́ mbə́ mbûŋ, káa kuʼ ghô lə̂ có zə̂u, ə́ mbə́ fwoghʼ-mə́nyôghʼ, ə́ mbə́ ntsəmə léʼe ndǐ.

¹⁸Ə̂ zə̂u yi ə́ ghʉ̌, m mə̂ ndâʼ lə́ gho ńgó o tó mbó məŋ, ə́ nzə́u tə̌ʉ-gôl yi pə́ tǒu mǒghʼ ə́ ngóghʼ tə ə́ ŋwaŋə, ə́ ndaghʼ sâa-sǎa ḿbə́ ngaŋə-zə̂u. Ə́ nzə́u pəfúfú məndǐ, ə́ ndaghʼ ḿbôu mbəʉ zô, ńjí ńgó sə̂ʉ kə́ nkô yé ghô ńté ghíʼ o tə̌ʉ ntsəmə léʼe ndǐ po. Ə́ nzə́u mbaa fu, ə́ ndághʼ ńtsúʼ nyôghʼ mô, ńjí ńgó ə́ kə́ ncí njwó yʉʼ.

¹⁹M mə̌ sâʼ ŋuu ntsəm yi n nkǒŋ no yé, ə́ mbou mə́ sə̂u yé. Ghíʼ ə́ kə́ mbə́ yə́rə́ lə̂, sáʼ təʉ, ə́ nkúʼtə́ pə̂i-ntə̂ʉ zô, ə́ nkə́p cǐ zô.

²⁰Məŋ ngwo, n ntə̌ʉ ntsʉ ndə̂ ə́ mə́ mbə́uʼtə́ lo; ŋuu lə̌i nzúʼ nji zâa, ə́ ŋéʼ ntsʉ ndə̂, mə́i n ngwo kə́u ndə̂ zʉ́, paghʼ zʉ́ tə̂m zə̂u nzʉ́; m mbə́ lə́ zʉ́, â pə́ lə́ məŋ.»

²¹«Ŋuu yi a ghʉ̌ lwóʼó no tə́poŋ tə zʉ́, n ngʉ̌ ghʉ̌ paghʼ zʉ́ nyáŋ lə̂ lwoŋ ləfou zâa; ə́ ndʉŋ-ndʉŋ ghíʼ n ndə lwóʼo zâa tə nzʉ́, ə́ ngwo ncə́r Tə́ ghaa, paghʼ zʉ́ nyâŋ lə̂ lwoŋ ləfou yé.»

²²«Ŋuu yi a ghwǒ mətuŋú lə̂ ndághʼ ńzúʼ yʉʼ, â tsúŋú nzúʼ no yi Zəghʼə Sê laʼ lə̂ məcûʼtə pye Kəlísto lo!»