Read Ngombale Mənjwo Jâŋ 4 Bible Online

Mənjwo Jâŋ 4 - Ngombale bible

Mənjwo Jâŋ 4

¹N ndə jwó mêi məno tə ə́ kuʼ, n nkə̂ ncí njwô có zə̂u, n njwô có ntsʉ ndə̂ tsóʼo ntə́ʉ tʉ̌-lə́pû. Ə nji yi lə yǎa ndáʼ no lə́ məŋ cǒ mpfu lə̂, ə́ yi ə lə tôŋ ghíʼ ntaŋ lə̂, ə lâʼ lə́ məŋ ngô: «Kóʼ ńtó lə̂ yaʼa, n nyárə́ ghô məno mi ə́ wo páatə́ tó.»

²Ə́ ndǎʼ yə́rə́, Zəghʼə Sê kə̂ ntóghʼ nkə́u lə́ məŋ. N njwô lwoŋ ləfou tə̂ʉ tʉ̌-lə́pû, ŋuu nyâŋ ndəu wó;

³ə́ ŋwaŋtə ghíʼ ləghǒ lətəi-ndwuŋ yi pə́ fûŋ ńgó Jásəpə, mbaa ghíʼ yi pə́ fûŋ ńgó Saadwânə. Nkoŋə́ nô-məngə̂m zə́mə lwoŋ ləfou ńŋə́ soŋ, ə́ ŋwaŋə́ ghíʼ ləghǒ lətəi-ndwuŋ yi pə́ fûŋ ńgó Emerôdə.

⁴Məcó məlwoŋ ləfou ntsap ləkwo lə̂ mə̂m-mbwô zə́mə lwoŋ ləfou zêi ńŋə́ soŋ, pəkə̌m ntsap ləkwo lə̂ mə̂m-mbwô nyâŋtə mə́u, ə́ mǎʼ pəfúfú məndǐ ə́ mbou só mənkaghʼə ləfou mi pə́ lǎghʼ tə̌ʉ-gôl ńtsúŋú.

⁵Ləfaŋ yi ə́ pə́ mbyétə, mənji pye, ə́ nkʉʼʉ́ mənyǐ mbʉŋ pə̂ fû lə̂ lwoŋ ləfou zêi ńkwátə́. Pəlâm saambwô tə̂ʉtə mbi lwoŋ-lə́fou zêi ə́ mə́ nkʉ́ ə́ mbou mə́ ntôu gháʼate: ə́ ndaghʼ mbə̂ məzəghʼə saambwô mi ə́ faʼ mbó Sê.

⁶Ə cǒ mə̂i-nci pə̂ mbi lwoŋ ləfou zêi, ə́ ndéi ghíʼ jwô-sʉ̂ lə̂. Cǒ mbə̂u mənye ləkwo mi gháp ghwǒ mənyôghʼ ə́ mbi gháp nzəm pə̂ soŋ, ə́ nzə́mə́ lwoŋ ləfou ńŋə́ təcər.

⁷Nduŋ-mbi mə́nye pə̂ ghíʼ sáa-mbaŋə, mbâatə pwô pə̂ ghíʼ môu ndə̌u foŋ, ə sʉ̂ mbâatə tárə́ pə̂ ghíʼ ə sʉ̂ ŋuu, mbâatə ləkwo pə̂ ghíʼ cǒ mbə̂u mə́ghə́u yi pə́ fûŋ ńgó koʼ yi a pə̌ ndə́m lə̂.

⁸Warə́ warə́ lə̂ pəmə́nye pêi ləkwo ghwô məmbap ntoghʼó, ə nyôghʼ pə̂ mə́u yʉʼ tsəm, ə́ nzəm pěi mbaa nzəm cər wó. Gháp pə̂ nzâp mpfu tsəm, ntə̌ʉ-nəu mbaa lətwûʼ ə́ ndâʼ ngô: «Ə Nde Sê, Ngaŋə-mətəʉ-mə́tsəm, a pə́ tə́ lǒʼ, a pə́ tə́ lǒʼ, a pə́ tə́ lǒʼ. Â ŋuu yi a lə pə́ wó, ə́ mbə́ ŋuu yi a pə́ wó, ə́ mbə́ ŋuu yi a pə̌ ntó.»

⁹Pəmə́nye pêi ləkwo lə pə̂ mpfu tsəm ə́ nzáp ńdaghʼ ńŋə̂ ləghûʼ, ə́ ndaghʼ ńŋə̂ məkuʼ, ə́ ndaghʼ ńŋə̂ nkhwo lə́ ŋuu yi a nyǎŋ lə̂ lwoŋ ləfou; ə́ mbə́ ŋuu yi a láʼ kə́ cí pə̂ pə́ wó,

¹⁰Ə ngí pə́ zap yə́rə́, pəkə̌m pə̂ ntsap ləkwo lə̂ mə̂m-mbwô shîʼ nkʉ́ʼtə́ mbi ŋuu yi a nyǎŋ lə̂ lwoŋ ləfou, ə́ ngúʼtə́ yé yi a láʼ kə́ cí pə̂ pə́ wó. Ə́ mə́ mâʼtə mənkaghʼə ləfou máp mbi lwoŋ ləfou ńdâʼ ngô:

¹¹«Nde Sê zaghʼ, o kuʼ ŋuu yi mboʼ pə́ ŋə̂ məkuʼ mô, ə́ ngúʼtə́ gho, mətəʉ mə́tsəm pə́ pə́ mbó ghô; ńté no gho lə̂ lə tsúŋú zə̂u tsəm, o lə koŋ ńgó měi pə́ wó, ə́ ngʉ̌ ə́ pə̂ wó.»