Read Ngombale Mənjwo Jâŋ 5 Bible Online

Mənjwo Jâŋ 5 - Ngombale bible

Mənjwo Jâŋ 5

¹M mbou njwó ləpuʼú ŋwaʼa lə̂ pô təʉ ŋuu yi a nyǎŋ lə̂ lwoŋ ləfou, ə́ pə̂ yi pə́ ŋwáʼá nzəm tsəm ə́ nkátə́, ə́ ndǎghʼ lei ŋwâʼ ńdár lə̂ məyʉʼ saambwô.

²Ə́ nkə́ ncí njwó tâʼ cwôʼ Sê yi a ghwǒ təʉ gháʼate, a túŋu lə̂ təʉ ngô: «Wǒ ŋuu kuʼ lə̂ ŋéʼtə́ lei-ŋwâʼ, ə́ fêi ləpuʼú ŋwaʼa yo?»

³Lə́ káa tâʼ ŋuu tʉ̌-lə́pû, ə́ ndəu ndesé kəʉ nzəm sê lo kûʼ yé lə̂ ŋéʼ ləpuʼú ŋwaʼa zêi, ə́ fúŋ zə̂u yi ə́ pə́ cər wó.

⁴Ə́ pə̂ yə́rə́, n ngéʼtə gháʼate, ńté ńgó káa pə jwô yé ŋuu yi a kǔʼ lə̂ ŋéʼ ləpuʼú ŋwaʼa zêi mbǒu fúŋ zə̂u yi ə́ pə́ cər wó.

⁵Cǒ tâʼ lə̂ pəkə̌m pə̂ lâʼ lə́ məŋ ngô: «Koo o kə̂ ngêʼtə́. Jwô, ŋuu yi pə́ fûŋ yé ńgó Sáa-mbaŋə lə̂ cʉŋə-ndə̂ Yúda, ə́ mbə́ môu fou Davîd, a kə mâʼ ńzʉ́; a kuʼ lə̂ ŋéʼtə́ lei ŋwâʼ lə̂ məyʉʼ saambwô.»

⁶M mbôu njwó tâʼ Môu ndənzʉ tə̂ʉ mbəʉ lwoŋ ləfou, ə́ təcər mənye mə̂ ləkwo, mbaa təcər pəkə̌m pə̂ ntsap ləkwo lə̂ mə̂m-mbwô; ə́ pə̂ pə́ ghíʼ mpfu yi pə́ shú mə́ lôŋ yé lə̂. Məndôŋ pə̂ tû zʉ́ saambwô, mənyôghʼ pə̂ tû zʉ́ saambwô; ə́ ndaghʼ mbə̂ məzəghʼə saambwô mi ə́ faʼ mbó Sê, mə́i Sê lə tə́u měi yʉʼ tsəm ndəu ndesé.

⁷Môu ndənzʉ wêi cʉ́ŋə mbáatə́ ŋuu yi a nyǎŋ lə̂ lwoŋ ləfou, a laghʼ pô yé yi təʉ, ə́ ŋə́ ləpuʼú ŋwaʼa zêi lə́ zʉ́, a pfû.

⁸Ə́ nděi tə mpfú ləpuʼú ŋwaʼa zêi, mənye mə̂ ləkwo gháp pə pəkə̌m pə̂ ntsap ləkwo lə̂ mə̂m mbwô shîʼ nkʉ́ʼtə́ sê mbi môu ndənzʉ wêi. Wǒwó təcər páp ghwô ye ntsənkoŋ mbó zʉ́ gháp pə ye tôʼ yi pə́ lǎghʼ tə̌ʉ-gôl ńtsúŋú, lamə́ndaa pə̂ cər wó tə ndóghʼə́, ə́ mbə́ məsʉ̂ʉtə pye Sê.

⁹Pəmə́nye pêi ləkwo gháp pə pəkə̌m pêi pə̂ nzâp có zap shwî ə́ ndâʼ ngô: «O kuʼ ŋuu yi mboʼ a pfû ləpuʼú ŋwaʼa ə́ ŋéʼtə́ lei ŋwâʼ yi pə́ lə lǎghʼ ńdǎr. Ńté no pə́ lə jwí ghô, o lâghʼ məci mô ńtsǔʼ tû pye-mə́soŋ ńŋə́ gháp mbó Sê; ə́ pye lə̂ məngər-ndə̂ mə́tsəm, ə́ pye pi gháp tsâr mətsâr lâʼ mə́tsəm, mbaa ŋuu ntsəm cər ngoŋ ntsəm.

¹⁰Ə́ ndághʼ gháp ngʉ́ pəfou, gháp pə̂ pənuŋú-poʼ ə́ mə́ fâʼ mbó Sê zaghʼə, gháp ghʉ̌ cí sâʼ pye pə́tsəm ndəu ndesé.»

¹¹N nkə̂ ncí náŋtə́, ə́ nzúʼ nji pəcwôʼ Sê, gháp pə̂ pətóusʉ pətóusʉ, ə́ nzáa tə mbə́ tə kwǎʼ njí ndwuŋ, ə́ ntə́ʉtə́ ńzə́mə́ lwoŋ ləfou ə́ ŋə́ soŋ; ə́ ngʉ̌ mənye mə̂ ləkwo gháp pə pəkə̌m pə̂ ntsap ləkwo lə̂ mə̂m mbwô,

¹²ə́ mə́ nzâp lə̂ təʉ ngô: «Môu ndənzʉ yi pə́ lə jwí yé lə̂, a kuʼ yi mboʼ pə́ jî ńgó â ngaŋə mətəʉ, ə́ njí ńgó â ngaŋə zə̂u, ə́ mbə́ ngaŋə jîno, ə́ ngwǒ təʉ, ə́ mbə́ yi mboʼ pə́ ŋə̂ məkuʼ mé, ə́ ngúʼtə́ yé ə́ mbou zâp ləjôghʼ yé.»

¹³N nkə̂ ncí nzúʼ zə̂u tsəm yi Sê lə tsuŋú tʉ̌-lə́pû, ə́ ndəu ndesé, ə́ nzəm-sê mbaa ndəu mə̂i-nci, ə́ məzə̂u mə́tsəm mi Sê lə tsuŋú cər nzʉ̂ pə̂ nzáp ngô: «Pə zâp ləjôghʼ ŋuu yi a nyǎŋ lə̂ lwoŋ-lə́fou mbaa yi Môu ndənzʉ. Pə ŋə́ məkuʼ máp, ə́ ngúʼtə́ gháp, ə́ nyér gháp sáʼ nzʉ̂. Ə́ ngʉ̌ yə́rə́ lə̂ məguʼ məguʼ.»

¹⁴Ə́ mə́ nzâp yə́rə́, mənye mə̂ ləkwo pə̂ ndâʼ ngô: «Ə̂ pə́ yə́rə́.» Pəkə̌m pə̂ shîʼ ńkʉ́ʼtə́ sê, ə́ ngúʼtə́ Sê gháp Môu ndənzʉ.